?Yu Save Mekem Moa Blong Ona Long Jeova?

¹ Hemia nao wan impoten kwestin we yumi evriwan i mas tingbaot. From we yumi folemgud masta blong yumi Jisas Kraes, tede yumi ona long God blong yumi, taem yumi talemaot nem blong hem. Hemia wan responsabiliti we yumi mas mekem sipos yumi wantem kasem gladhat blong God. (Mak 13:10; Luk 4:20; Heb. 13:15) Hemia wan nambawan wok ya we man i no save olsem wanem blong talem —⁠yes, givim ona—⁠blong talemaot gud nyus long ol man we oli olsem “sipsip” we oli lus oli save kam haf blong ol man blong Jeova we oli stap long olgeta ples long wol!—⁠Jon 10:⁠16.

² ?Yu mo ol pikinini blong yu, yufala i save mekem moa blong ona long Jeova taem yufala i mekem minista wok blong yufala i kam antap moa? Namba blong ol brata mo sista we oli joen long paenia wok long olgeta ples long wol i kam antap bitim ol taem bifo. Long manis blong Epril 1992, wan nyufala namba blong 228 long Nyu Kaledonia (38 long Vanuatu) oli mekem spesel, fultaem, no haftaem paenia wok. ?Olsem wanem yu wan yu bin tingting strong long wok blong paenia? ?Yu stap leftemap tingting blong ol pikinini blong yu blong tingbaot blong kasem wok ya blong fultaem minista?

³ ?From wanem yu no skelem ol tingting blong yu long saed blong paenia wok? ?Taem oli tokbaot poen ya, wantaem nomo yu talem se ol samting long laef blong yu oli blokem yu blong mekem wok olsem wan paenia? I tru se wok blong paenia i no blong evriwan. Ol responsabiliti we Baebol i givim mo ol narafala samting i blokem plante blong no mekem paenia. (1 Tim. 5:⁠8) ?Be olsem wanem, yu bin tingbaot samting ya long ol prea blong yu? ?Yufala i bin tokbaot samting ya long famle blong luk sipos i gat wan long yufala i save mekem paenia? Wajtaoa blong Novemba 15, 1982 (Febuwari 15, 1983 long Franis), i givim tok ya we i save mekem yumi tingting plante long pej 23 se: “Tru ya, evri kristin minista i mas prea blong faenemaot sipos hem i save mekem paenia no nogat. Wan man mo woman blong hem we tufala i paenia long fiftin yia finis oli talem se: ‘?From wanem yumi mekem paenia? ?Yumi save gat gudfala risen fored long Jeova sipos yumi no save mekem?’ Plante we oli no paenia yet oli save askem kwestin ya: ‘?Mi save givim wan gudfala risen fored long Jeova from wanem mi no paenia?’”

⁴ Wan narafala haf blong Wajtaoa we i tokbaot poen ya i talem olsem se: “Wanwan long yumi i mas mekem i stap tru long hem wan. ?Olsem wanem, yu stap talem se ‘tingting i wantem be bodi i slak’? ?Be olsem wanem, tingting i rili wantem? Yumi mas blokem tingting ya blong yusum slak fasin blong bodi olsem wan eskyus, be rili tingting i no wantem.”—⁠wE78 8/15 p. 23 no wF78 11/15 p. 21.

⁵ Ol Papa Mama We Oli Wantem Se Pikinini Blong Olgeta i Win: Proveb 15:20 i talem long yumi se: “Wan pikinini we i waes i mekem papa blong hem i glad.” Ol papa mama we oli fasgud long God oli glad taem ol pikinini boe mo gel blong olgeta oli folem wan fasin blong laef we i fulwan long wok blong Jeova. I tru, ol pikinini blong yufala bambae oli no save jusum stret rod olgeta nomo. Ol samting blong wol we oli save pulum man oli gat bigfala paoa. Ol papa mama, gudfala fasin blong yufala i save halpem ol pikinini blong yufala. Sipos oltaem yufala i tokbaot ol gudfala samting we oli save kamaot long fultaem servis, sipos yufala i leftemap tingting blong ol yangfala blong yufala blong joen wetem ol paenia we oli wok strong, sipos yufala i rili ting se fultaem minista wok i bigfala wok blong ona we ol pikinini blong yufala oli save mekem, positif tingting ya bambae i gat paoa long pikinini blong yufala. Halpem olgeta blong luksave se i impoten blong gat wan gud nem wetem Jeova bitim we oli save gat wetem ol man.

⁶ Ol yangfala, Proveb 22:1 i tokbaot jus we yu mas mekem: “Gud nem i moa gud, i bitim fulap mane. I moa gud sipos man i tinghae long yu, i bitim we yu faenem selva mo gol.” ?Wanem kaen nem bambae yu gat? Tingbaot ol man mo woman we yumi stap ridim long Baebol we oli gat wan nem wetem God tru long wok we oli mekem long hem. I gat Luk, dokta ya we oli laekem hem tumas, mo Inok, we i wokbaot wetem trufala God. Samuel we i kasem wan gudfala edukesen, taem hem i statem wok blong hem long haos blong Jeova taem hem i smol nomo. ?Yu ting se ol man ya blong holem strong oli sore long jus we oli bin mekem? ?From wanem bambae oli mekem olsem? Olgeta evriwan oli kasem glad, oli karem frut, mo wan gudfala laef. Mo oli kasem gladhat blong Jeova we i save stap oltaem!—⁠Ol Sam 110:3; 148:12, 13; Prov. 20:29a; 1 Tim. 4:8b.

⁷ Taem ol pikinini oli winim wan samting long laef, ol papa mama oli harem glad from. Wok blong olgeta blong trenem, stretem, mo tijim “presen ya we i kamaot long Jeova” i givim pei long olgeta plante taem bageken. (Ol Sam 127:3) ?Wanem samting i save mekem ol papa mama oli glad bitim wan boe no gel we i mekem olgeta samting we hem i save mekem blong ona long Jeova? Plante yangfala tede oli stap folem rod blong Luk, Inok, mo Samuel, olsem leta ya i soem: “Mi gat 16 yia. Mi statem wok blong fultaem paenia. . . naen manis afta we mi baptaes, mo mi bin kasem plante blesing long Jeova stat long taem ya. . . Wok blong paenia i halpem yu tu taem yu stap long skul. Bifo, ol fren blong klas blong mi oli jikim mi from we mi wan Wetnes. Naoia, stat taem mi mekem plante stadi blong mi wan, mi save ‘ansa long wan we i stap jikim mi.’ ”

⁸ Edukesen Blong Halpem Wan We i Stap Long Minista Wok: Naoia maet yumi save luk long kwestin long saed long edukesen long skul. Hemia wan ples we i nidim blong skelemgud tingting blong yumi long hem. Wajtaoa blong Novemba 1, 1992, p. 15 i tokbaot haf ya “Skul From Wan Risen.” Aninit long stampa tok ya “Skulgud” oli makem poen ya long hem: “Ol kristin oli mas sapotem olgeta wanwan, nating se oli mekem fultaem paenia. (2 Tesalonaeka 3:10-12). . . Wan yangfala kristin i mas kasem wanem mak long skul, blong hem i save ona long ol rul ya blong Baebol mo mekem ol kristin wok blong hem? . . . ?I naf pei i minim wanem? . . . Olgeta ya oli nidim haftaem wok nomo, blong oli no save putum trabol long ol brata no famle blong olgeta.—⁠1 Tesalonaeka 2:9.”

⁹ Sipos paenia i nidim blong gohed moa long edukesen blong halpem hem blong gohed long fultaem wok, Wajtaoa blong Novemba 1, 1992, p. 20 haf 19, i talem se: “Sipos wan yangfala Wetnes i wantem tekem sam moa kos long skul, i gud hem i save mekem taem hem i stap yet wetem famle blong hem nao hem i save holem fasin blong kristin stadi, go long ol miting, mo wok blong prij.”

¹⁰ Hemia wan ekspiryens long Afrika long saed long wan yangfala blong 22 yia we i mas go long wan skul blong lanem wok, be hat blong hem i stap long wok blong paenia. Taem hem i stap long skul ya blong lanem wok, hem i givim nem blong hem blong mekem haftaem paenia. Ol fren blong hem long skul oli stap jikim hem, oli talem se bambae hem i no winim eksam blong hem. Oltaem hem i ansa long olgeta se: “Gohed blong lukaot Kingdom mo stret fasin blong God fastaem. Ale, bambae hem i givim olgeta samting ya tu long yufala.” From we hem i wokem fasin blong stretem hem, hem i stap girap long eli moning evri dei mo mekem tu haoa blong rere long ol wok blong klas mo afta hem i joen long wok blong prij long aftenun taem skul i finis. Olgeta long skul oli sapraes tumas taem oli luk se oli putum yangfala ya long namba tri ples blong wan spesel eksam blong jusum ol tri gudfala studen blong wan spesel praes blong gohed moa long skul blong olgeta. Studen we i kam namba tu i wan man we i intres mo we paenia brata blong yumi i mekem stadi wetem hem long skul. Studen we i kam faswan i wan narafala yangfala Wetnes we i wok strong long skul.

¹¹ Ol Elda Oli Mekem Wok Blong Olgeta: Ol elda long Kongregesen, we oli glad long wok we oli paenia oli stap mekem, oli givhan plante blong leftemap tingting blong ol minista ya we oli wok strong. Ol elda oli glad blong mekem olsem, from oli save se ol paenia we oli wok strong mo karem frut, i wan blesing long eni Kongregesen. Afta we oli spenem sam yia long fultaem paenia wok, olgeta ya oli rere blong kasem sam moa trening long paenia skul. Kos ya i soem se i wan gudfala tul blong mekem ol paenia oli wok gud moa. From we ol paenia oli stap lidim wok ya, olgeta tu oli nidim se man i soem lav long olgeta mo ol elda oli mas rere blong mekem samting ya.—⁠1 Pita 5:1-3.

¹² ?Olsem wanem ol elda oli save pulum tingting long paenia wok? Wan gud samting blong mekem i blong jekem oltaem blong luksave hu i save gat jans blong mekem wok ya. Ol elda oli save toktok wetem olgeta we oli save mekem paenia, wetem olgeta ya tu we oli mekem haftaem paenia plante taem, olgeta man we oli no moa wok, mo ol studen. I no gat man i mas harem olsem se oli fosem hem blong givim nem blong hem blong mekem wok ya, be maet olgeta we oli wantem be oli fraet taswe wetem wan smol tok blong leftemap tingting blong olgeta, nao oli luk save se oli save mekem paenia tu.

¹³ Taem oli leftemap tingting blong olgeta we oli wantem givim nem blong olgeta, ol elda oli mas save se i no nidim blong man we i givim nem blong hem blong mekem haftaem paenia sam manis bifo hem i save mekem fultaem paenia. (km 9/86 p. 6 haf 24-26) I tru, ol elda oli wantem savegud sipos wan we i givim nem i no gat wan samting we blokem hem blong kasem mak blong ol haoa we oli mas kasem.

¹⁴ Afta we servis komiti blong Kongregesen i jekem ol pepa blong askem blong mekem paenia mo sekretari i jekem se oli ansagud long ol kwestin, nao oli mas sanem i go long Sosaeti.

¹⁵ Sekretari i mas letem ol elda oli save oltaem sipos wan paenia i kasem wan trabol long wok blong hem. Samting ya i impoten moa long ol Kongregesen we i gat plante paenia long olgeta. Antap moa long fasin blong jekem wok blong ol paenia long en blong servis yia, olsem we i stap long ripot blong Kongregesen (S-10), sekretari i mas askem elda we i lukaot long wok blong prij blong toktok wetem hem stat blong Maj blong luk hu i no kasem ol haoa blong hem mo i nidim help. (Luk advaes long Kingdom Wok Blong Yumi blong Febuwari 1993.) Sipos oli givim help kwik taem, bambae paenia i save finisimgud servis yia.

¹⁶ Plante nyufala paenia oli yangfala mo oli nyu long trutok. Fasin blong olgeta blong wantem wok i mekem yumi glad! Be, ol nyuwan ya oli nidim trening yet blong gat gud han long wok blong prij long ol haos wanwan, blong mekemgud ol visit, mo blong tij long ol Baebol stadi. Sipos oli no kasem trening olsem, tingting blong ol nyuwan i save foldaon afta wan no sam yia mo hem oli save stop long wok blong paenia from oli no kasem gud frut long minista wok. Ol elda we oli rere oltaem oli save luksave ol smol trabol we oli stap no taem wok i godaon. Sipos oli givhan kwiktaem mo oli halpem paenia long ol trabol blong hem, bambae hem i harem glad long plante yia we hem i save kasem frut long wok blong hem.

¹⁷ ?Yu Save Kasem Fis Long Ol Wora We Oli Stap Longwe? Sam long disaepol blong Jisas oli man blong kasem fis. Wan taem, afta we oli sakem net fulnaet, ol net blong olgeta oli stap emti yet. (Jon 21:⁠3) Long ol haf blong teritori blong yumi we ‘fasin blong pulum man olsem fis’ i stap gohed long olgeta plante yia finis, sam paenia oli save talem se i gat smol “fis” nomo oli stap long “wora” blong Kongregesen blong olgeta. (Matyu 4:19) Ale, sipos sam paenia we oli wok strong oli faenem sam narafala ples long teritori blong yumi we i gat bigfala nid long hem, oli mas tokbaot samting ya wetem branj ofis bifo oli mekem wan samting.

¹⁸ Fastaem, samfala oli statem paenia wok from oli save se hemia wan stret samting blong mekem be oli no savegud sipos bambae oli save kasem frut from. Ating oli bin givim nem blong olgeta be tingting blong olgeta i hafhaf mo oli wet long sam samting. Long stat maet frut blong wok blong olgeta i smol nomo. Be taem i pas, mo oli gat gudhan moa long wok blong olgeta, mo i gat pruf se Jeova i blesem wok blong olgeta. Nao fasin glad mo strong tingting blong wok i gru moa.

¹⁹ Long samfala, paenia wok i faswan step long olgeta blong oli save go wok long Betel, trening long Giled mo misinari wok, Ministeriol trening skul, mo tu wok blong elda we i goraon. Wan plan olsem i nidim blong stretem olgeta samting blong laef blong yu, be ol blesing blong speret bambae oli bigwan moa.—⁠Matyu 6:19-21.

²⁰ No sipos i no gat samting long laef we i blokem yu, maet yu save halpem wan Kongregesen long seket blong yu. Sipos yu kasem mak, seket elda blong yu bambae i glad blong talem sam tingting long saed long ol Kongregesen long seket we oli save haremgud long wan narafala paenia.

²¹ Sam paenia mo pablisa oli givhan long sam nid long ples blong olgeta taem oli stap long haos blong olgeta nomo. Ating oli save wan narafala lanwis. ?Olsem wanem yu faenem se wan bighaf haf blong ol man long teritori blong yu oli toktok long wan narafala lanwis? Olgeta we oli save wan narafala lanwis oli save givhan blong talemaot mesej blong Kingdom long olgeta defren kaen man. Nating se samtaem i had, be i save karem gud frut tu.—⁠1 Timote 2:4; Taetas 2:11.

²² Sipos naoia yu stap mekem olgeta samting we yu save mekem blong ona long Jeova, yu mas glad long wok ya blong yu naoia. Sipos yu harem se yu save mekem moa, tokbaot samting ya wetem Jeova long prea. Jekemgud wanem sam jenis we yu save mekem long laef blong yu naoia. Tokbaot plan blong yu wetem wan elda we i gat speret blong paenia no wetem seket elda. Taem yu mekem wan desisin we i save wok, folemgud oltaem, trastem promes blong Jeova blong ona long olgeta we oli stap ona long hem.—⁠Heb. 13:5, 6; 1 Samuel 2:30.