Holemtaet Fasin Blong Talemaot Hop Blong Yu We Yu No Save Lego
1 Wajtaoa Stadi nao i bigfala rod blong ol man blong God tede oli kasem kakae ‘long saed blong speret long stret taem blong hem.’ (Mat. 24:45) Yumi stap go long impoten miting ya from tu stampa risen: Blong kam strong moa long saed blong speret, mo blong talemaot hop blong yumi long pablik.—Hib. 10:23-25.
2 Yumi Wanwan i Givhan Long Yumi Bakegen: Wan stadi i soemaot se long bighaf blong ol kongregesen, wan nomo long evri tri man we oli kam long miting ya oli rere long stadi fastaem. Kolosap sem namba ya i joen blong givim ol ansa. Long miting ya nomo, yumi no save kasem save fulwan long strong kakae blong speret we Wajtaoa stadi i givim. I nidim blong yu putumap wan taem blong stadi fastaem long haf we bambae oli stadi long hem.
3 Taem yu rere long stadi, maet yu faenem se i gud blong ridim fastaem mo tingting long ol kwestin we oli stap long bokis long en blong atikol ya. Bambae samting ya i givhan long yu blong lukluk long ol bigfala poen we bambae stadi ya i tokbaot.
4 Long taem blong stadi lesingud long wanem oli talem. Lesingud long ol fastok blong man we i lidim stadi ya; ol tok ya oli putum faondesen blong stadi. Maet bambae hem i askem tri no fo kwestin we bambae i gat ansa blong olgeta long stadi, no maet hem i tokbaot bakegen sam bigfala poen long stadi blong las wik, sipos stadi blong wik ya i gohed blong tokbaot sem poen. Sipos i gat sam jenis long save blong yumi long profet tok blong Baebol no wan rul blong Baebol, bambae hem i pulum tingting blong yumi long poen ya. I tru, man blong lidim stadi i no mas talem plante samting tumas, from we risen blong stadi i blong givim jans long olgeta long kongregesen blong talemaot hop blong olgeta. Lesingud taem ol narafala oli givim ansa long wanem oli lanem; samting ya bambae i givhan blong mekem bilif blong yu i moa strong.
5 Talemaot Hop Blong Yu: ?Yu yu stap joen oltaem blong givim ansa long taem blong stadi? Ol sotfala ansa we oli go stret long poen oli gud moa. (Skelem wetem Luk 21:1-4.) Evriwan i glad blong harem wan ansa we i isi we i kamaot long hat. Kolosap oltaem faswan ansa long kwestin i mas sot mo stret long poen. Hemia blong letem ol narafala blong talem sam vas blong Baebol no pulum tingting long wan narafala poen long paragraf. Long rod ya plante oli save talemaot hop blong olgeta long pablik. Oltaem ol ansa oli mas positif mo leftemap tingting.
6 Sipos yu jes stat blong kam long stadi no sipos yu fraet blong givim ansa, yu save askem help long man we i lidim stadi. Askem hem blong lukaot han blong yu we yu leftemap, long wan stret paragraf. Maet yu save ridim wan vas we i stap long stadi mo talem olsem wanem mining blong vas ya i laenap wetem stadi. Maet yu save raetem sam not long saed blong pej blong givhan long yu blong tingbaot wanem yu wantem talem long ansa blong yu. Sipos yu wan yangfala nomo, tingbaot se ol brata oli glad mo oli laekem tumas blong harem ansa blong yu.—Mat. 21:16.
7 I impoten tumas blong talemaot bilif blong yumi, mo Wajtaoa stadi i givim wan gudfala jans blong mekem samting ya. Buk ya Qualified to Be Ministers i talem olsem se: “Nomata wanem trabol i blokem yu blong givim ansa, winim problem ya mo mekem se yu mas givim wan ansa no moa. Sipos yu givim wan ansa, bambae yu givhan blong mekem miting i moa gud, mo bambae yu haremgud from.” (Pej 99) I gud blong mekem plan blong givim wan ansa no moa long nekis Wajtaoa Stadi.—Prov. 15:23.