Olgeta We Oli Lidim Kongregesen—Elda We i Lidim Wajtaoa Stadi
1 Wajtaoa i Talemaot Kingdom Blong Jeova, hemia stamba rod we ‘slef we i stret mo waes’ i yusum blong givim kakae long saed blong spirit long yumi, long “stret taem.” (Mat. 24:45) Elda we i lidim Wajtaoa Stadi i gat wan impoten responsabiliti, hem i mas wan gudfala tija we i soem ol nambawan Kristin fasin long laef blong hem.—Rom 12:7; Jem 3:1.
2 Blong tijimgud ol man, elda we i lidim Wajtaoa Stadi i mas gat strong tingting blong stap reregud evri wik. Hem i prea taem hem i mekem rere Wajtaoa Stadi, mo hem i tingting dip. Hem i rili intres long kongregesen mo hem i traehad blong tajem hat blong yumi wetem ol haf blong stadi. Hem i eksplenemgud ol bigfala poen blong stadi mo hem i halpem yumi blong luksave olsem wanem ol poen ya oli joen long stamba tok blong stadi.
3 Taem elda we i lidim Wajtaoa Stadi i rerem stadi blong hem fastaem, hem i ridim olgeta vas we stadi i givim, blong save olsem wanem ol vas ya oli laenap wetem stadi. Blong leftemap Tok blong God, hem i pulum evriwan long kongregesen blong yusumgud Baebol long taem blong stadi. Taem ol memba blong kongregesen oli fogetem blong tokbaot wan impoten poen long ol ansa blong olgeta, no oli no tokbaot wan stamba vas, elda i askem wan spesel kwestin we i pulum evriwan blong tingbaot poen ya. Long rod ya, hem i givhan long yumi blong kasem ol stret poen, mo blong luksave olsem wanem ol samting we yumi lanem oli save wok long laef blong yumi.
4 Elda we i lidim Wajtaoa Stadi i traehad oltaem blong kam gud moa long fasin blong hem blong tijim man. Hem i no toktok tumas, be hem i pulum yumi blong givim ol ansa we oli sot, we oli go stret long stamba poen, mo we yumi talem long prapa tok blong yumi. Sam samtaem, hem i save talem bakegen long yumi se taem hem i askem kwestin blong wan paragraf, i gud we faswan we i ansa, i givim ansa we i sot mo stret long kwestin. Evriwan i save givim sam narafala ansa blong soem olsem wanem yumi save yusum wan long ol vas we oli stap long paragraf, no givim ansa blong sapotem wan tok, no blong soem olsem wanem ol poen ya oli save wok long laef blong yumi. Blong pulum evriwan blong givim sam ansa blong joen long stadi, elda we i lidim Wajtaoa Stadi i soem se i gud we evriwan i mekem rere stadi hem wan, no wetem famle.
5 Yumi ‘ol man we Jeova i tijim,’ mo yumi glad se Jeova i ‘givim sam man olsem presen.’ Ol elda we oli lidim stadi blong Wajtaoa, oli sam man olsem, we oli “stap hadwok blong . . . tijim man.”—Aes. 54:13; Efes. 4:8, 11; 1 Tim. 5:17.