Talemaot Gud Nyus Wetem Tingting Se Hem i Impoten Tumas
1 Yumi soem bigfala tangkyu from ol promes long saed blong Kingdom blong God, taem yumi joen wetem fulhat blong yumi long Kristin wok blong prij. Taem yumi stap mekem wok ya, yumi mas mekem long fasin we i soem se wok ya i impoten tumas. ?From wanem? From we i no gat plante man blong wok, mo en blong rabis wol ya i stap kam kolosap, mo tu, laef blong ol man long ples blong yumi i stap long denja. (Esik. 3:19; Mat. 9:37, 38) Blong mekem wan wok we i impoten olsem, yumi mas traehad fulwan. Taem yumi stap prij, ?olsem wanem yumi save soem se yumi tingbaot wok ya olsem samting we i impoten tumas? Yumi mas mekemrere fastaem ol gudfala rod blong storeyan, rili traehad blong faenem ol man long evri ples, raetemdaon olgeta we oli bin soem intres, gobak kwiktaem long olgeta, mo tingbaot se yumi mas tinghevi long wok blong prij from we laef blong ol man i dipen long hem. Ol advaes we i kam biaen, maet i givhan long yu blong mekemrere ol rod blong talemaot gud nyus long Febuwari, long fasin we yumi soem se hem i impoten tumas. Bambae yumi seremaot buk ya Revelesen—Kolosap i Kasem Nambawan En Blong Hem!
2 Maet yu save statem wan storeyan taem yu toktok smol long sam trabol we ol man oli stap kasem long ples blong yu. Nao yu save talem se:
◼ “Plante man oli bilif se God i stap, be oli askem se: ‘?God i wantem se yumi gat wanem kaen fyuja?’ ?Wanem tingting blong yu long kwestin ya? [Wet long ansa.] ?Yu yu save se Baebol i eksplenem klia wanem samting we God i wantem givim long ol man, mo ol samting we hem i stap mekem blong givim fyuja ya long olgeta?” Openem Revelesen buk i go long pej 301. Ridim Revelesen 21:1 long haf 1, nao ridim tok we i eksplenem vas ya long en blong haf 2. Soem pija long pej 302 blong eksplenem olsem wanem i joen wetem fyuja blong yumi. Ridim Revelesen 21:4 long haf 6. Askem man blong haos blong karem buk ya, mo putum wan stret taem blong kambak blong storeyan bakegen.
3 Yu save gohed long storeyan ya long saed blong Revelesen 21:1, 4 wetem sot tok ya:
◼ “Lastaem we mi kam luk yu, yumitu bin tokbaot promes blong God blong mekem wan nyufala fasin blong laef blong ol man long wol ya. [Pulum tingting i go bakegen long pija long pej 302 long Revelesen buk.] ?Yu yu glad blong luk we famle blong yu i haremgud long wan laef olsemia? [Wet long ansa.] Kwestin i stap se, ?Yumi save trastem ol promes blong God? Plis makem samting we hem wan i talem.” Ridim Revelesen 21:5, 6a long haf 8 long pej 303. Askem kwestin long haf 9 long pej 304, nao ridim ansa, wetem lastok long haf 9. Talem long man blong haos se yumi stap mekem ol Baebol stadi wetem ol man, we oli no pem. Talem se nekis taem bambae yumi soemaot olsem wanem yumi stap mekem stadi.
4 Plante man oli stap wari long ol trabol we i kasem olgeta mo we i stap kam antap moa, taswe maet yu talem samting olsem long faswan taem we yu mitim olgeta:
◼ “Kolosap olgeta man oli stap wari long ol trabol we yumi stap kasem long ples blong yumi. [Talem sam trabol.] Plante yia finis, ol man blong politik oli stap mekem promes se bambae oli winim ol problem ya blong olwe, mo samfala oli bin traehad blong mekem olsem. ?Yu ting se wanem samting nao i stap mekem se ol trabol ya i kam antap moa? [Wet long ansa.] Baebol i eksplenem samting ya long fasin we plante man oli no bin tingbaot. Buk blong Revelesen i tokbaot wan faet we i bin kamaot long heven. Traem luk wanem samting i hapen long faet ya, olsem Revelesen 12:9 i talem.” Ridim vas ya, nao openem Revelesen buk i go long pej 182. Tokbaot pija ya blong eksplenem olsem wanem Setan i gat paoa long wol ya. Askem man blong haos blong karem buk ya long stret praes blong hem. Mekem plan blong kambak bakegen blong tokbaot olsem wanem God bambae i winim ol trabol we ol man oli fesem.
5 Sipos yu bin promes blong kambak blong eksplenem olsem wanem bambae God i stretem ol trabol long wol, maet yu talem olsem:
◼ “Mi mekem wan spesel visit long yu blong gohed long storeyan ya blong yumitu, long saed blong wan rod nomo blong winim ol trabol we ol man oli stap kasem. Lastaem, yumitu bin luk long Baebol se, Setan nao i stap lidim olgeta man blong wol oli go krangke. From we hem i wan speret man we i gat bigfala paoa bitim ol man blong wol ya, ?yu ting se i gat wan rod blong kilim paoa blong hem? [Wet long ansa.] Plis makem tok blong Baebol.” Ridim mo eksplenem Revelesen 20:1-3. Yusum pija long pej 4 mo 5 blong Save buk, blong soem wanem samting bambae i kamaot taem Setan i no moa gat paoa long wol ya. Askem man blong haos blong mekem Baebol stadi, mo traem statem stadi ya wantaem nomo.
6 Plante man oli stap wari long doti we i stap spolem win, wora mo graon. Taswe, yu save talem samting olsem blong statem wan storeyan:
◼ “Mifala i faenem se kolosap olgeta man oli wari long saed blong ol doti we i stap spolem win, wora, mo kakae blong yumi. Long sam kantri, trabol ya i kam nogud tumas, mekem se i hadwok long ol man blong stap laef. From we God i Wokem wol ya fastaem, ?yu ting se bambae hem i mekem wanem blong stretem trabol ya? [Wet long ansa.] Baebol i talem se bambae ol man oli mas talemaot long fes blong God from wanem oli yusum wol ya long fasin olsem. [Ridim Revelesen 11:18b.] !Traem tingbaot sipos yu stap long wan wol we i no moa gat doti long win, wora, mo kakae!” Soem promes blong God long saed blong paradaes, we i stap long Revelesen 21:3, 4. Soem pija long pej 302 long Revelesen buk. Askem hem blong karem buk ya mo mekem plan blong kambak bakegen.
7 Taem yu gobak long wan man we i soem intres long Paradaes long wol ya, maet yu talem se:
◼ “Lastaem we mi bin kam luk yu, yumitu bin agri se blong stretem trabol blong ol doti long wol ya, God i mas mekem wan samting blong blokem wok blong ol man. Be, kwestin i stap se, ?Yumi mas mekem wanem blong laef tru long ol trabol ya, mo go insaed long nyufala wol blong stret fasin we bambae God i mekem?” Ridim Jon 17:3. Askem man blong haos blong mekem wan Baebol stadi we hem i no pem, blong hem i save kasem spesel save ya.
8 !Hem i wan nambawan blesing, we God i stap yusum yumi tede olsem ol man blong karem kakae long garen, mo blong mekem wok blong prij we i save sevem laef blong ol man! Yumi evriwan i mas stap bisi long wok blong talemaot gud nyus wetem tingting we i soem se wok ya i impoten tumas, from we yumi save se “wok ya bambae i gat frut blong hem.”—1 Kor. 15:58.