Wetem Revelesen Buk
1 Plante handred yia finis, ol man we oli traehad blong stadigud long Baebol, oli wantem kasem save long buk blong Revelesen. Ol man blong Jeova oli intres moa long Revelesen, wetem ol vison blong hem long “ol samting we bambae i no longtaem, oli kamtru.” (Rev. 1:1) Taswe, taem yumi kasem nyufala buk ya Revelesen long Bislama, yumi glad mo yumi talem tangkyu tumas. ?Yu yu stap ridim buk ya? Long manis Desemba, yumi gat jans blong seremaot nyufala buk ya long olgeta man.
2 Afta we yu talem halo, maet yu talem se:
“Plante man oli wantem tumas blong kasem save long buk blong Revelesen. Taem blong jajmen we Revelesen 14:7 i tokbaot i gat bigfala mining long yumi evriwan. [Ridim.] Maet yu sapraes blong save se hu nao bambae i kasem jajmen blong God. [Ridim Revelesen 18:2a, 4.] ?Yu yu harem tok ya Babilon we i hae we i hae, no Bigfala Babilon, samtaem? [Wet long ansa.] ?Wanem mining blong tok ya, mo from wanem yumi mas kamaot long hem? [Soem Revelesen buk.] Buk ya i pulum tingting mo givhan long yumi bigwan, from we hem i eksplenem mining blong olgeta vas wanwan long buk blong Revelesen long Baebol. Save we i stap long japta 33 kasem 38 i soem mining blong Bigfala Babilon, mo i tokbaot olsem wanem bambae i lus i no longtaem. [Tokbaot wan haf no wan pija long buk.] Ol save ya bambae i givhan bigwan long yu mo famle blong yu, blong mekem ol samting we yufala i mas mekem, blong God i glad long yufala, mo blong no kasem jajmen wetem Bigfala Babilon. Mi glad sipos yu karem buk ya Revelesen—Kolosap Nao i Kasem Nambawan En Blong Hem!, blong 350 VT nomo.”
3 Yu save jenisim fastok mo ol poen we yu tokbaot blong mekem i stret long hemia we yu storeyan wetem hem. Yu save yusum ol vas mo save we i stap aninit long stampa tok ya “Babylon the Great” (Babylone la Grande) long pej 49, 52, mo 53 (Fr. pej 42, 45, 46) blong Reasoning buk.
4 Maet yu save pulum intres blong ol man sipos yu yusum toktok ya:
“Evri yia long manis ya, plante man long olgeta ples blong wol oli stap tingbaot Jisas Kraes mo taem we hem i bon. ?Yu bin tingbaot wanem we Jisas i mekem taem hem i aot long wol i gobak long heven, kam kasem naoia? Plante bigfala samting we oli stap hapen long taem blong yumi, oli joen wetem wok we Jisas i stap mekem naoia folem stampa tingting blong God. Buk blong Revelesen i tokbaot sam long ol samting ya. ?Yu yu laekem blong lanem moa long saed blong tingting blong God taem hem i sanem Pikinini blong hem i kam long wol, mo wanem mining blong samting ya long yu mo ol famle blong yu?” Maet yu save pulum man blong haos blong lukluk haf 1 mo 2 blong japta 41 blong Revelesen buk. Nao yu save askem hem blong karem buk blong 350 VT. Sipos hem i no wantem karem, yu save soem sam poen long ol nyufala Wajtaoa no Wekap! no maet yu wantem yusum traket ya Laef Long Pis Long Nyufala Wol blong mekem intres blong man ya i kam bigwan moa.
5 Blong storeyan smoltaem nomo wetem man, maet yu save mekem olsem:
Yu save ridim Revelesen 18:4, nao openem buk i go long pija long pej 241. Yu save talem se buk ya i eksplenem mining blong Bigfala Babilon mo wael anamol ya, mo from wanem i impoten tumas we yumi harem woning blong God long saed blong olgeta ya. Ol nyufala pablisa mo olgeta we oli no bin prij plante yet, oli save eksplenem pija long pej 302, mo ridim Revelesen 21:4 long pej 303.
6 Yumi laekem tumas Jeova mo yumi laekem tumas ol man raonabaot long yumi. Samting ya i stap pusum yumi blong talemaot mesej blong jajmen blong God mo gud nyus blong Kingdom blong Hem. Ol man we hat blong olgeta i stret oli mas kasem jans blong stanap strong long saed blong trutok. Blong givim jans long olgeta we oli tosta from “wora blong laef,” yumi evriwan i mas singaot strong olsem wan voes nomo se, ‘Yufala i kam.’—Rev. 22:1.