Putum Hop Blong Laef We i No Save Finis Long Hat Blong Ol Narafala Man
1 Nating se ol man oli traehad blong faenem rod blong no moa kam olfala mo blong laef plante moa yia, be yumi stap kam olfala yet mo yumi ded. Yumi glad tumas we Baebol i eksplenem from wanem yumi kam olfala mo yumi ded, mo olsem wanem ol problem blong kam olfala wetem ded tu, bambae oli finis. Buk ya Save Blong Lidim Yu Long Laef We i No Save Finis, i eksplenem ol trutok ya long fasin we i pulum ol man blong bilif long ol save ya. Buk ya i givim ol klia ansa long ol strongfala kwestin long saed blong laef mo ded, mo i pulum man we i ridim buk ya blong tingbaot taem we wol ya bambae i kam Paradaes bakegen.
2 Long Maj, bambae yumi seremaot Save buk ya wetem tingting blong statem ol nyufala Baebol stadi. (Mat. 28:19, 20) Biaen, bambae yumi visitim bakegen ol man we oli bin soem intres long mesej blong Kingdom. Long rod ya, ating yumi save putum hop blong laef we i no save finis i go long hat blong sam man. (Taet. 1:2) Maet yu faenem se ol advaes ya bambae i givhan long yu blong mekem samting ya.
3 Fastaem we yu mitim man, yu save askem long hem se:
◼ “?Yu bin tingbaot from wanem ol man oli wantem se laef blong olgeta i longfala moa? [Wet long ansa.] Ol Budis, ol Kristin, ol Hindu, ol Muslim, mo plante narafala, oli holemtaet hop ya blong gat wan narafala laef afta ded.” Openem Save buk i go long japta 6, “?From Wanem Yumi Kam Olfala Mo Yumi Ded?,” nao ridim haf 3. Tokbaot sam vas we oli stap. Soem tufala kwestin we oli stap long en blong haf ya, nao askem long man blong haos sipos hem i wantem faenem ansa long tufala ya. Sipos hem i talem yes, gohed blong tokbaot ol haf biaen. !Hemia wan stadi ya! Sipos yu no save mekem samting ya, givim buk long hem blong ridim, mo mekem wan stret taem blong kambak blong tokbaot ol ansa. I moagud blong traem gobak afta wan no tu dei nomo.
4 Taem yu gobak long wan man we i bin karem “Save” buk, yu save talem se:
◼ “Mi mi kam luk yu bakegen blong tokbaot tufala kwestin ya long saed blong ded, we yumitu no faenem ansa blong olgeta yet.” Talem tufala kwestin ya bakegen. Nao tokbaot save long japta 6 aninit long smol stampa tok ya, “Wan Rabis Plan.” Sipos man blong haos i gat taem, gohed blong stadi. Sipos no, yusum laswan kwestin long en blong haf 7 blong mekem rod blong kambak bakegen. Putum wan stret taem blong kambak. Givim wan pepa we i talem taem blong ol miting, mo eksplenem plan blong ol miting blong smoltaem. Wetem kaengud fasin, askem long hem blong kam.
5 Taem yu prij long evri haos wanwan no yu tekem jans blong prij, yu save statem wan storeyan wetem ol tok ya:
◼ “?Yu bin tingbaot wanem fyuja blong yumi mo wol ya? [Wet long ansa.] Baebol i yusum wan tok nomo blong eksplenem fyuja—!hemia Paradaes! Hem i talem se bifo olgeta, God i mekem wan haf blong wol ya i kam wan nambawan paradaes, mo i putum man mo woman we hem i wokem, i go long paradaes ya. Tufala i mas gat plante pikinini mo fulumap wol, mo sloslou oli mas mekem fulwol i kam paradaes. Traem luk sam tok we i eksplenem taem ya.” Openem Save buk i go long pej 8, mo ridim haf 9 aninit long smol stampa tok ya, “Laef Long Paradaes.” Nao tokbaot ol poen long haf 10, mo ridim vas ya we i stap, Aesea 55:10, 11. Talem se yu glad blong gohed blong storeyan long haf 11-16, long saed blong laef long Paradaes long fyuja. Sipos man blong haos i no gat taem, pulum hem blong ridim buk ya hem wan, mo putum wan stret taem blong storeyan tugeta bakegen.
6 Sipos yu no gat jans blong statem stadi long faswan taem we yu mitim man, yu save traem mekem samting ya taem yu visitim hem bakegen:
◼ “Olsem yumitu tokbaot lastaem, stampa tingting blong God hemia se fulwol bambae i kam Paradaes. Tingting ya i mekem wan kwestin i kamaot se: ?Paradaes ya bambae i olsem wanem?” Openem Save buk i go long japta 1, mo stadi long haf 11-16 aninit long smol stampa tok ya, “Laef Long Paradaes Bakegen.” Biaen, soem pija long pej 4-5, mo askem man blong haos sipos hem i laekem blong laef long wan ples olsem. Nao ridim ol faswan tok long haf 17 long pej 10. Sipos i gat taem, gohed blong stadi. Sipos no, talem se nekis taem, bambae yu eksplenem wanem we yumi mas mekem blong laef long Paradaes ya long fyuja. Givim wan pepa long hem blong talemaot taem blong ol miting, eksplenem plan blong ol miting, mo askem hem long kaen fasin blong kam long Haos Kingdom.
7 Save buk i wan nambawan tul blong eksplenem long ol man, “laef we i no save finis” we God i promes blong givim. Taem yu mekem Baebol stadi wetem ol man, yu save putum nambawan hop ya long hat blong olgeta, hop we i kamaot long God ya “we i no save gyaman.”