“?Bambae Mi Mekem Wanem?”
1 Olsem wan yangfala we i stap gruap, maet yu askem long yu wan se, ‘?Bambae mi mekem wanem long laef blong mi?’ Ol Kristin yangfala oli wantem mekem moa long minista wok blong Jeova. ?Be olsem wanem yu save mekem wok ya we long semtaem yu tingbaot ol narafala wok we yu mas mekem taem yu kam bigwan, olsem wok blong kasem samting we yu nidim long saed blong bodi? Maet i no isi blong ansa long kwestin ya. Sam yangfala oli wari tumas taem oli luk se i had blong kasem mane naoia long wol, mo oli wari taem oli harem ol nius long saed blong fiuja. Maet oli tingbaot se: ‘?Mi mas gohed blong skul moa? ?Mi save statem fultaem Kristin minista wok naoia?’ Blong tekem gudfala disisen, wan yangfala i mas givim wan trufala ansa long kwestin ya se: ‘?Wanem i stap fasples long laef blong mi?’ Ol yangfala oli mas tingbaot wanem tingting i stap pusum olgeta.
2 ?Wanem sam long ol samting we oli stap long tingting blong yu taem yu yang yet? ?Yu yu tingbaot olsem wanem blong kasem plante mane, no yu wantem tumas blong yusum ful laef blong yu blong mekem wok blong Kingdom i go moa? Nating se yu gat ol pepa blong yunivesiti, samting ya i no minim se bambae yu save faenem wan wok. Plante oli yusum wan narafala rod blong lanem wan wok, hemia tru long ol kos no ol spesel trening skul we oli no tekem plante yia blong stadi.
3 Yu Save Trastem Promes Blong Jeova: Yu mas tingbaot promes ya blong Jeova se, bambae hem i givim olgeta samting we wan man i nidim long saed blong bodi, sipos man i putum wok blong Kingdom fastaem. (Mat. 6:33) Hemia i no wan giaman promes. Plante brata we oli go long Ministeriol Trening Skul oli gat pepa blong hae skul bifo we oli lanem trutok. Be, ?wanem ol wok we oli stap mekem blong winim mane naoia? Smol nomo oli stap wok long bisnes ya we oli bin skul from. Plante long olgeta oli jes faenem ol wok we oli save givim inaf mane we oli nidim blong gohed long fultaem Kristin minista wok. From we oli traehad blong mekem moa long wok blong prij, oli kasem blesing we i moagud i bitim wanem we mane i save givim.
4 Bifo we yu mekem disisen long wanem samting we bambae yu mekem afta we finis long skul, yu mas skelemgud ol samting mo traem faenem ol tingting we oli pusum yu. Blong gat stret tingting long bisnes ya, ridim Wekap! (Engglis no Franis) blong Maj 8, 1998, pej 19 kasem 21. Toktok wetem papa mama blong yu, ol elda, seket elda blong yufala, mo olgeta paenia we oli gohedgud long eria blong yu. Hemia i save halpem yu blong mekem wan disisen we i waes long saed blong wanem we bambae yu mekem long laef blong yu.—Pri. 12:1, 13.