Edukesen Long Skul Mo Ol Wok Long Saed Blong Spirit
1 Taem yu yang i gud yu kasem wan gudfala edukesen long skul. Nao biaen, ating yu save kam naf blong rid mo raet gud mo kasem save long plante samting long saed blong ol kantri, histri, matematik mo ol narafala save blong man. Samting ya i save tijim yu olsem wanem blong tingtinggud, we yu skelem olgeta samting blong faenem rod blong winim ol problem. Yu save mekem ol tingting blong yu oli karem frut. Biaen, olwe long laef blong yu yu save yusum save ya. ?Olsem wanem edukesen we yu kasem long skul i save laenap wetem ol narafala mak we yu wantem kasem long laef blong yu long saed blong spirit? ?Mo olsem wanem samting ya i save halpem yu blong “kam waes” mo blong “tingtinggud”?—Prov. 3:21, 22, NW.
2 Gat Gudhan Long Wok Blong God: Taem yu stap long skul, lesingud long klas mo mekemgud homwok blong yu. Sipos yu lanem fasin blong rid mo stadi, bambae i isi moa long yu blong stadigud oltaem long Tok blong God mo stanap strong long saed blong spirit. (Wok 17:11) Man we i kasem save gud long olgeta poen blong trutok fastaem, bambae hem i save storeyan long ol man blong ol defdefren ples, laen mo jos, taem hem i mitim olgeta long wok blong prij. Mo edukesen we yu kasem long skul, bambae i givhan long yu blong lukaot long ol impoten wok insaed long ogenaesesen blong God tu.—Skelem wetem 2 Timoti 2:21; 4:11.
3 Traem Dipen Long Yu Wan: Sipos yu traehad, afta we yu kasem stefeket blong yu, bambae yu naf blong kasem wan gudfala wok. (Skelem wetem 1 Timoti 5:8.) Jusumgud samting we yu wantem mekem. I nogud yu stadi long wan wok we biaen bambae i hadwok blong faenem. Maet i moa gud yu tekem wan kos we biaen bambae i givhan long yu blong faenem wan gudfala wok. (Prov. 22:29) From trening ya, bambae yu save dipen long yu wan nomo, sipos yu wantem muf i go long wan narafala ples we i nidim man blong prij.—Skelem wetem Ol Wok 18:1-4.
4 Sipos yu kasem wan gudfala edukesen long skul, bambae yu save kasem sam nambawan wok long saed blong spirit tu. Yu mas wokhad blong kasem wan wok we biaen i save sapotem yu long saed blong mane, blong gohed long wok blong Jeova. Olsem ya nao, edukesen long skul bambae i halpem yu blong kasem sam nambawan mak long saed blong spirit.