Gohed “Blong Mekem Ol Gudfala Fasin”
1 Yu mekem wan gudfala samting taem yu kam wan man blong wok blong Jeova God. Be, tede we laef i had tumas, i no isi nating blong “mekem ol gudfala fasin” oltaem. (Gal. 6:9) Nating se i no isi, be yu save win. ?Olsem wanem?
2 Gat Tingting Blong Jisas: Olsem Jisas, yu save winim ol traem sipos yu putum hop blong yu i stap oltaem long Kingdom. (Hib. 12:2, 3) Yu mas sua gud se Jeova i lavem yu mo hem i wantem se bambae yu kasem gudfala frut. (2 Pita 3:9) Trastem Jeova fulwan, mo bilif se bambae hem i givhan long yu. (1 Kor. 10:13) Prea oltaem, askem Jeova blong i halpem yu blong stanap strong tru long ol traem. (Rom. 12:12) Yumi haremgud blong bilif se God i glad taem yumi stanap strong tru long ol traem. (Rom. 5:3-5) Taem yu gohed oltaem blong “gat sem tingting . . . . blong Jisas Kraes,” samting ya bambae i mekem yu glad mo tu i mekem hat blong Jeova i glad.—Rom. 15:5; Prov. 27:11.
3 Gohed Blong Mekem Samting We i Gud: I gud we yumi yusum gud ol samting we Jeova i givim long yumi, blong i givhan long yumi blong mekem samting we i gud. Folem wan gudfala program blong ridim Tok blong God mo stadi long ol buk we i kamaot long grup blong slef we i stret mo waes. Gohed oltaem blong rerem ol miting, kam long ol miting mo joen long ol miting blong kongregesen. Bifo mo afta long ol Kristin miting, traem frengud wetem ol Kristin brata mo sista blong yu. Putum ol mak we yu save kasem long minista wok blong yu. Long rod ya, yu save joen moa long wok blong prij, mo kamgud moa long fasin blong yu blong talemaot gud nius long ol narafala.
4 Long rod ya, yu save gohed blong mekem samting we i gud mo long sem taem faenem bigfala glad. Wan brata long Itali i talem se: “Taem naet i stap kam, mo mi kambak long haos afta we mi mekem wok blong Jeova, i tru se bodi blong mi i taed. Be mi glad, mo mi talem tangkiu long Jeova from hem i givim wan glad long mi we wan man i no save karemaot.” From samting ya, gohed blong mekem samting we i gud, mo yu tu, bambae yu kasem bigfala glad.