Niufala Program Blong Spesel Dei Asembli
1 Nating se ol niuspepa, televisin mo ol tija oli leftemap fasin blong kam rij long saed blong bodi, Tok blong God i leftemap tingting blong yumi blong ‘Mekem Ol Gudfala Wok Mo Kam Rij Long Fasin Ya.’ (1 Tim. 6:18) Hemia stamba tok blong program blong spesel dei asembli, we bambae i stat long Septemba 2002. ?Wanem gudfala tok we bambae yumi kasem long asembli ya?
2 Bambae seket elda i tokbaot mining blong tok ya “Kam Rij Long Ae Blong God,” mo bambae hem i askem kwestin long sam we oli stap wokhad blong kam rij long saed blong spirit. Long faswan tok blong hem, brata we i visitim yumi bambae hem i tokbaot olsem wanem ol man blong God oli stap mekem ol “Ol Gudfala Wok Long Taem Ya Blong Karem Kakae Blong Garen.” Bambae hem i pulum yumi evriwan blong tingbaot olsem wanem yumi save joen moa long wok we God i givim long yumi tede blong karem kakae long garen.
3 !Yumi glad tumas taem yumi luk ol Kristin yangfala we oli traem kam rij long saed blong spirit! Samting ya i leftemap Jeova, mo i halpem ol yangfala blong putum wan gudfala fandesen blong mekem ol nambawan wok blong Jeova biaen. Tok ya, “Talem Gudfala Tok Long Ol Yangfala From Wok Blong Olgeta Blong Presem Jeova” bambae i makem ol nambawan wok we ol Kristin yangfala oli stap mekem long ples blong yumi.
4 ?Wanem frut we i kamaot from fasin blong mekem ol gudfala wok? Brata we i visitim yumi bambae i tokbaot samting ya long laswan tok blong hem, “Kasem Blesing Blong Jeova From Ol Gudfala Wok Blong Yumi.” Bambae hem i tokbaot fo samting we yumi stap kasem ol rij blesing long olgeta: (1) long laef blong yumi wanwan, (2) long famle, (3) insaed long kongregesen, mo (4) long ogenaesesen long fulwol.
5 Olgeta we oli givim laef blong olgeta long Jeova finis, bambae oli gat janis blong tekem baptaes. Sipos yu rere blong tekem step ya talem long presiden elda kwiktaem.
6 Taem ol brata oli talemaot dei blong asembli long ples blong yu, yu mas kwik blong mekem ol gudfala plan blong stap long asembli ya. Traehad blong kam eli, blong yu save joen long faswan sing mo prea. Sipos yumi stap mo lesin gud long fulwan program blong spesel dei asembli, bambae yumi kasem paoa blong gohed folem rod ya we i mekem yumi rili rij long ae blong God blong yumi, Jeova.