Talemaot Mesej Blong Kingdom
1 “Mi mas talemaot gud nius blong kingdom blong God long ol narafala taon tu, from we God i sanem mi blong mi mekem olsem.” (Luk 4:43, NW ) Long toktok ya, Jisas i soemaot klia wanem nao stamba samting we hem i tokbaot long wok blong prij—hemia Kingdom blong God. Mesej we yumi talemaot tede tu hem i long saed blong Kingdom. Matiu 24:14 (NW ) i bin tokbaot samting ya i se: “Gud nius ya blong Kingdom, bambae ol man oli talemaot long olgeta ples long wol, blong oli witnes long hem long fes blong olgeta man, nao biaen bambae en i save kam.” ?Wanem ol trutok long saed blong Kingdom blong God we ol man oli mas harem?
2 Kingdom blong God i stap rul finis long heven mo i no longtaem bambae hem i finisim ol gavman blong man. Olgeta long heven oli sakemaot Setan finis long heven i kamdaon long wol. Mo rabis wol blong naoia i stap long ol las dei blong hem. (Rev. 12:10, 12) Fulwan rabis wol ya blong Setan bambae i lus olgeta be Kingdom blong God bambae i neva lus. Bambae Kingdom ya i stap blong olwe.—Dan. 2:44; Hib. 12:28.
3 Kingdom bambae i givim olgeta samting we ol gudfala man oli nidim. Bambae hem i mekem we olgeta ya oli no moa safa from ol faet, ol man blong brekem loa, ol rabis rula, mo fasin pua. (Sam 46:8, 9; 72:12-14) Bambae i gat plante kakae blong evri man. (Sam 72:16; Aes. 25:6) Ol sik mo trabol long bodi bambae oli ol samting blong bifo nomo. (Aes. 33:24; 35:5, 6) Sloslo, ol man bambae oli kam stretgud olgeta, mo long semtaem, ful wol bambae i kam wan paradaes, mo ol man bambae oli laef tugeta long pis.—Aes. 11:6-9.
4 Fasin we yumi mekem naoia i soem se yumi wantem we Kingdom blong God i rulum yumi. Mesej blong Kingdom i mas gat paoa long laef blong yumi fulwan, hem i mas gat paoa long ol mak we yumi jusum blong kasem mo long ol samting we yumi putum fasples. Eksampol, sipos yumi gat wan famle, hem i wok blong yumi blong givim samting we famle blong yumi i nidim. Be long semtaem we yumi mekem olsem, yumi no mas letem ol samting blong bodi oli blokem ol wok blong Kingdom. (Mat. 13:22; 1 Tim. 5:8) Defren olgeta, bambae yumi folem advaes blong Jisas we i se: “Yufala i mas gohed blong lukaot kingdom mo stret fasin blong hem fastaem. Nao bambae hem i givim olgeta narafala samting ya tu long yufala.”—Mat. 6:33, NW.
5 I impoten tumas we ol man oli harem mo lesin long mesej blong Kingdom bifo we i let tumas. I gud yumi halpem olgeta ya taem yumi “pulum olgeta blong oli bilif se God i King blong olgeta, mo oli mas ona long hem.”—Wok 19:8.