I Stret We Ol Man Oli Leftemap Nem Blong Jeova
Lodsapa We Bambae Yumi Mekem Long Eprel 16
1 Yumi evriwan i stap wet long Eprel 16, 2003. Mo taem dei ya i stap kam moa klosap, yumi harem se yumi glad. Long naet blong Eprel 16 bambae yumi tingbaot ded blong Jisas. Bambae yumi joen wetem plante milian brata mo sista raon long wol, blong leftemap nem blong Jeova. Jeova i mas kasem ona from nambawan samting ya we hem i givim, hemia ransom sakrefaes. Yes, tru long sakrefaes ya bambae hem i karem plante blesing i kam long ol man we oli obei. Taswe, wetem fulhat blong yumi, yumi joen wetem man ya blong raetem Sam we i talem se: “Hae God, hem i hae we i hae, mo i stret blong ol man oli stap leftemap nem blong hem i go antap.”—Sam 145:3.
2 Hemia i stret taem blong tingting dip long gudfala fasin blong God. I gud tu blong tingbaot bigfala tangkiu we yumi mas soem long Jeova from we hem i ‘sanem pikinini blong hem i kam long wol ya, blong mekem rod blong yumi, blong yumi kasem laef.’ (1 Jon 4:9, 10) Taem yumi obei long oda ya blong mekem Lodsapa, samting ya i makem gud long hat blong yumi se ‘God i gat sore long yumi mo oltaem hem i stap lavem yumi.’ (Sam 145:8) Yes, ransom sakrefaes hem i beswan samting we God i givim blong soemaot se hem i lavem ol man long wol. (Jon 3:16) Taem yumi tingtinggud long lav blong God mo tingbaot fasin blong Jisas blong stanap strong oltaem, yumi wantem tumas blong presem Jeova. Stat naoia i go kasem olwe, bambae yumi presem hem from bigbigfala lav blong hem, we hem i soemaot taem hem i mekem rod blong yumi save kasem laef we i no save finis.—Sam 145:1, 2.
3 Halpem Narafala Blong Leftemap Nem Blong Jeova: Taem yumi gat tangkiu long God from nambawan presen ya ransom, yumi wantem singaot ol narafala tu blong oli joen wetem yumi blong leftemap nem blong Jeova. Tabu spirit i pusum man we i raetem Sam blong talem se: “Bambae oli stap tokbaot olgeta gudgudfala fasin blong yu, mo bambae oli stap singsing blong talemaot we yu yu kaen tumas.” (Sam 145:7) Las yia nomo, ol Witnes Blong Jeova raon long wol oli spenem moa long wan bilian aoa long wok blong prij. ?Wanem frut i kamaot from traehad blong olgeta? Evri wik, i gat bitim 5,100 man we oli tekem baptaes. Ful namba blong olgeta we oli kam long Memoriol hem i 15,597,746. Hemia i min se bitim 9 milian man oli no joen yet long wok blong talemaot gud nius we i leftemap nem blong Jeova. !Tru ya, bigfala wok i stap yet! Yumi we yumi man blong talemaot Kingdom, yumi tinghae long spesel blesing ya we yumi gat blong talemaot gud nius mo blong pulum ol man oli kam long Jeova, Pikinini blong hem, mo Kingdom.
4 Wan gudfala rod blong pulum ol narafala blong leftemap nem blong Jeova hemia blong singaot olgeta oli kam joen wetem yumi long Lodsapa. ?Yu yu mekem wan lis finis blong olgeta man we yu wantem singaot olgeta oli kam? ?Yu tingbaot blong gobak bakegen long olgeta we yu singaot olgeta finis, blong oli rimemba stret taem mo dei? ?Yu givim pepa finis blong singaot olgeta ya? Sipos yu no mekem yet, i gud blong yusum taem we i stap naoia blong mekem olsem. Givhan long olgeta blong kasem save from wanem yumi mekem lafet ya. Mo long naet blong lafet ya, yu mas rere blong welkamem olgeta we oli kam. Welkamem gud olgeta, mekem oli save long sam narafala brata sista, mo talem sam gudfala toktok long olgeta from we oli traehad blong kam.
5 Taem ol niuwan oli kam long Memoriol, samting ya i save givhan long olgeta blong gohed gud long saed blong spirit. I gat wan Baebol studen we i stap fraet blong go long ol ples we plante man oli stap long hem, from we wan samting i bin hapen long hem bifo, we i mekem tingting blong hem i trabol bigwan. Nating se i olsem, hem i kam long Memoriol. Taem oli askem tingting blong hem long saed blong miting ya, hem i se: “Naet ya i wan spesel mo tabu naet, mo mi glad tumas we mi bin stap.” Afta long taem ya, Baebol studen ya i stat kam long evri miting.
6 Afta Long Memoriol: ?Yumi save mekem wanem blong halpem olgeta ya we oli intres, blong oli kam ol man blong leftemap nem blong Jeova? Ol elda bambae oli luksave hu ol niuwan we oli kam long Memoriol mo mekem plan se sam pablisa we oli naf oli save visitim ol niuwan ya stret afta long Memoriol. Ol pablisa ya bambae oli storian wetem ol niuwan ya long ol samting we oli lanem mo we maet oli wantem save moa long hem. Sam long ol niuwan ya maet bambae oli wantem stadi Baebol. I gud tu sipos yumi singaot olgeta ya oli kam long miting blong kongregesen evri wik. Hemia wan gudfala rod blong mekem oli gru kwiktaem long save blong Baebol.
7 I gat plan i stap blong halpem olgeta we oli prij wanwan taem nomo mo olgeta we longtaem nao oli no moa prij, blong oli kam oltaem long ol miting. Sipos ol elda oli askem yu blong givhan long wan pablisa we i no moa prij, blong hem i stat prij bakegen, i gud yu glad blong mekem wok ya. Taem yumi soem lav mo fasin kea long ol brata blong yumi, yumi folem advaes ya blong aposol Pol we i talem se: “Oltaem, sipos yumi gat janis, yumi mas mekem i gud long olgeta man. Antap moa, yumi mas mekem olsem long olgeta ya we oli brata mo sista blong yumi from we olgeta tu oli bilif long Kraes.”—Gal. 6:10.
8 I gud yumi evriwan i traem bes blong yumi blong stap long Memoriol long Eprel 16. Yumi no wantem mestem impoten lafet ya we i blong leftemap nem blong Jeova. !Yes, stat naoia gogo i no save finis, i gud yumi presem Jeova from ol bigbigfala wok blong hem!—Sam 145:21.