Program Blong Nekis Seket Asembli
Ol man blong wol ya oli traem pulum yumi blong bilivim se ol fasin blong wol bambae oli stap blong olwe. Be Tok blong God i no talem olsem. (1 Jon 2:15-17) Hem i givhan long yumi blong kasem save se yumi westem taem nomo sipos yumi ‘hivimap ol gudgudfala samting blong yumi long wol ya.’ Seket asembli blong sevis yia 2007 bambae i mekem ol man blong God oli kam strong moa, stamba tok blong hem, hemia “Hivimap Ol Gudgudfala Samting . . . Long Heven.”—Mat. 6:19, 20.
Tingting blong ronem ol sas samting i joen wetem samting we Efesas 2:2 (NW ) i tokbaot se, “paoa blong win, hemia spirit ya we i stap mekem wok naoia long ol pikinini we oli no obei long God.” Trufala win i stap long evri ples raonabaot long yumi nao yumi save pulum win ya. Long sem fasin “spirit we i kamaot long wol” i stap long evri ples long wol ya. (1 Kor. 2:12) Spirit ya i gat strong paoa, taswe Baebol i kolem hem se “paoa blong win.” Program blong nekis seket asembli bambae i givhan long yumi blong ronwe long tingting blong wol ya blong ronem ol sas samting, mo i givhan long yumi blong mekem tingting blong yumi i stap kliagud long wanem samting we oli moa impoten. (Mat. 6:33) Mo tu, asembli ya bambae i givhan long yumi blong trastem Jeova blong halpem yumi blong gohed long wok blong prij taem yumi kasem ol traem mo trabol.
Meksua se yu stap long tufala dei blong asembli ya mo se ‘yu strong moa blong holem ol trutok ya we yu harem.’ (Hib. 2:1) Raetemdaon ol poen we yu save mekem i wok long laef blong yu mo long wok blong prij. !Program blong asembli ya i rij long saed blong spirit! !Sipos yu stap long ful asembli ya, stat long faswan tok blong hem go kasem en blong hem, bambae hem i leftemap tingting blong yu mo i givim paoa long yu blong gohed blong ‘hivimap ol gudgudfala samting blong yu long heven!’