Talemaot Trutok Long Fasin We i Mekem Man i Glad

1. ?Yumi mas mekem wanem blong yumi joen long famle blong Jehova?

TAEM yumi jes mitim wan brata o sista long kongregesen, wan long ol faswan kwestin we bambae yumi askem long hem, hemia se: “?Yu lanem trutok olsem wanem?” Maet samfala bambae oli ansa se oli “gruap long trutok.” Maet sam narafala bambae oli talem se oli bin stadi, nao oli “kam long trutok.” Yumi talem ol tok olsem, from we trutok blong Baebol i jenisim fulwan laef blong yumi. Yumi luksave se sipos yumi wantem joen long famle blong Jehova, yumi mas soemaot se yumi lavem trutok mo yumi folem long laef blong yumi. Wan rod we yumi mekem olsem, hemia taem yumi tok tru oltaem mo yumi mekem i stret long olgeta samting.—Sam 15:​1-3.

2. (1) ?Ol man oli luksave se Jisas i stap mekem wanem? (2) ?Ol man oli gat wanem tingting long ol trutok we Jisas i stap talemaot?

² Oltaem Jisas i tok tru. Ol enemi blong hem tu oli luksave se hem i stap tok tru, nating se ol man oli no glad long samting we hem i talem. (Mat. 22:16) Jisas i tokbaot samting we bambae i hapen from we hem i stap talemaot trutok, i se: “Mi mi kam blong mekem ol man oli seraot. Man i agensem papa blong hem, mo gel i agensem mama blong hem, mo waef i agensem mama blong hasban blong hem.” (Mat. 10:35) Jisas i no wantem se ol man oli agensem mesej we hem mo ol man blong hem oli stap talemaot, be hem i save se samting ya bambae i hapen. (Mat. 23:37) Hem i save se mesej ya bambae i mekem ol man long wol oli seraot long tu grup, hemia olgeta we oli laekem ol trutok blong Baebol mo olgeta we oli no laekem ol trutok ya nating.—2 Tes. 2:​9-11.

3. ?Bambae yumi tokbaot wanem long stadi ya?

³ Yumi tu yumi wantem tok tru oltaem olsem Jisas, nating se hemia i save mekem se ol narafala oli no laekem yumi. Mo taem yumi prij mo tij, yumi stap talemaot ol trutok blong Baebol, nating se sam man oli no glad long samting we yumi talem. ?Be olsem wanem? ?Hemia i minim se fasin blong yumi blong talemaot trutok mo wetaem yumi talemaot trutok i no impoten? Si, hemia tu i impoten. Long stadi ya, fastaem bambae yumi tokbaot kwestin ya se: ?Weples yumi save faenem trutok? Biaen, bambae yumi tokbaot kwestin ya se: ?From wanem, olsem wanem, mo wetaem yumi mas talemaot trutok? Ansa blong ol kwestin ya bambae i givhan long yumi blong talemaot trutok long fasin we i mekem man i glad, hemia i min se yumi toktok kaen mo long stret taem.

?WEPLES YUMI SAVE FAENEM TRUTOK?

4. ?From wanem yumi save talem se Jehova i Stamba blong trutok?

⁴ Jehova hem i Stamba blong trutok. Evri samting we hem i talem i tru. Eksampol, oltaem hem i tok tru taem i tokbaot ol fasin we i stret mo ol fasin we i no stret. (Sam 19:9; 119:​142, 151) Evri samting we hem i talem se bambae i hapen long fiuja, i stap kamtru. (Aes. 55:​10, 11) Taem hem i promes blong mekem wan samting, oltaem hem i mekem. (Nam. 23:19) !Jehova i no save giaman! (Hib. 6:18) Taswe, Baebol i singaot hem se “God blong trutok.”—Sam 31:5.

5. ?From wanem i no had blong faenem Jehova we i “God blong trutok”? Yu eksplenem. (Ol Wok 17:27)

⁵ Sam man oli ting se i had blong faenem Jehova we i “God blong trutok,” be hemia i no tru. I gat plante pruf raonabaot long yumi we i soemaot se hem i stap. (Rom 1:20) Taem aposol Pol i stap toktok long ol man Gris long Atens we oli skul gud, hem i talem se God i wantem we yumi “faenem hem,” mo se hem “i no stap longwe nating long yumi evriwan.” (Ridim Ol Wok 17:27.) Mo tu, Baebol i talem se Jehova i stap pulum ol man we oli gat tingting daon mo oli stap lukaotem trutok, oli kam long hem.—Jon 6:44.

6. ?Wanem sam long ol trutok we i stap long Baebol? ?Mo from wanem yu yu glad blong save ol trutok ya?

⁶ Wan rod blong faenem Jehova, hemia blong stadi long Baebol. Tabu spirit blong God nao i pulum ol man blong oli raetemdaon ol tok blong Baebol. Taswe evri samting we Baebol i talem i tru, mo yumi save trastem. (2 Pita 1:​20, 21) Eksampol, yumi save trastem samting we Baebol i talem, taem i tokbaot olsem wanem God i wokem heven mo wol mo ol laef samting. (Jen. 1:​1, 26) Mo tu, yumi save trastem Baebol, taem i eksplenem from wanem yumi gat sin, yumi safa, mo yumi ded. (Rom 5:12; 6:23) Mo yumi save trastem Baebol, taem i talem se Jehova bambae i yusum Boe blong hem Jisas blong finisim olgeta trabol we i kamaot long Setan we i “papa blong ol giaman toktok.” (Jon 8:44; Rom 16:20) Mo tu, yumi save trastem promes blong Baebol se Jisas bambae i spolem ol rabis man, i mekem ol dedman oli laef bakegen, i mekem wol ya i kam paradaes, mo i mekem ol man oli kam stret gud olgeta. (Jon 11:​25, 26; 1 Jon 3:8) Yes, !Jehova i givim wan nambawan blesing long yumi! Hem i tijim trutok long yumi, mo i givim janis long yumi blong tijim trutok ya long ol narafala.—Mat. 28:​19, 20.

?FROM WANEM YUMI STAP TALEMAOT TRUTOK?

7-8. ?Risen we i pulum yumi blong talemaot trutok i impoten? Talem wan eksampol. (Mak 3:​11, 12) (Mo tu, yu luk ol pija.)

⁷ Olsem we yumi tokbaot finis, yumi mas tok tru sipos yumi wantem joen long famle blong Jehova. Be blong mekem Jehova i glad, yumi mas tingbaot wan narafala samting tu, hemia risen from wanem yumi stap talemaot trutok. Traem tingbaot wan samting we i hapen taem Jisas i stap long wol. (Ridim Mak 3:​11, 12.) Taem Jisas i stap prij klosap long Si Blong Galili, wan bigfala hip blong ol man oli kam long hem. Taem sam man we ol dimon i stap long olgeta oli luk hem, oli kam foldaon long fored blong hem mo oli singaot bigwan se: “Yu yu Pikinini blong God.” ?From wanem ol dimon ya oli talemaot trutok long saed blong Jisas? Maet oli wantem se ol man oli trastem olgeta, nao oli save pulum ol man ya i gowe long Jehova. Nating se ol dimon ya oli tok tru, be oli stap tingbaot samting we olgeta nomo i wantem. Jisas i luksave samting ya, taswe hem i no glad long olgeta mo i tok strong long olgeta se oli no mas talemaot hem long ol man.

⁸ ?Yumi lanem wanem long stori ya? Yumi lanem se risen we i pulum yumi blong talemaot trutok i impoten long Jehova. Taswe yumi mas meksua se yumi stap talemaot trutok from we yumi lavem Jehova. Nao sipos ol man oli presem yumi, yumi mas pulum olgeta blong presem Jehova nomo.—Mat. 5:16; skelem wetem Ol Wok 14:​12-15.

9. ?Yumi no mas mekem wanem? ?Mo from wanem?

⁹ Yumi wantem se ol narafala oli leftemap Jehova nomo. Taswe i gat wan narafala samting we yumi no mas mekem. Traem tingbaot sipos wan brata we i gat plante wok long oganaesesen i talemaot sam save long yumi we yumi no mas talemaot long ol narafala, be biaen yumi go tokbaot long sam brata mo sista. Sipos ol brata mo sista ya oli faenemaot se samting we yumi bin talem i tru, maet bambae oli sapraes mo oli ting se yumi save plante samting we ol narafala oli no save. Hemia i save pulum olgeta blong oli tinghae moa long yumi. Be hemia i no mekem God i glad. (Prov. 11:13) ?From wanem? From we yumi no gat raet blong talemaot samting ya nating se i tru, mo risen we i pulum yumi blong talemaot samting ya i no stret.

?OLSEM WANEM BLONG TALEMAOT TRUTOK?

10. Taem Baebol i talem se: “Ol tok blong yufala i mas kaen oltaem,” ?hemia i minim wanem? (Kolosi 4:6)

¹⁰ Ridim Kolosi 4:6. Aposol Pol i mekem ol Kristin long Kolosi oli tingbaot se ol tok blong olgeta i mas “kaen oltaem.” ?Hemia i minim wanem? Grik tok we oli yusum long vas ya, i minim se ol tok blong yumi i mas givhan long ol narafala mo i mas mekem olgeta oli harem gud.

11-12. ?From wanem yumi mas lukaot gud taem yumi stap tijim trutok long narafala? Talem wan eksampol. (Mo tu, yu luk ol pija.)

¹¹ Yumi mas folem advaes ya blong Pol blong toktok kaen long ol narafala, taem yumi stap tijim trutok long olgeta. Ol trutok blong Baebol i olsem wan naef blong faet we i sap mo i save seraotem sol mo spirit. Hemia i minim se Baebol i save soemaot ol filing we i stap dip insaed long hat blong yumi, mo ol tingting we i pulum yumi blong mekem samting. (Hib. 4:12) Be sipos yumi no lukaot gud, yumi save yusum Baebol long wan fasin we i mekem narafala i harem nogud o i wantem rao. ?Olsem wanem samting ya i save hapen?

¹² Traem tingbaot sipos long wok blong prij, yumi mitim wan man we i stap traehad blong wosipim God, be oltaem hem i stap prea long ol aedol mo i laekem blong mekem lafet blong Krismas mo Ista wetem famle blong hem. Maet yumi save yusum Baebol blong soemaot long hem se i krangke nomo blong prea long ol aedol, mo soemaot tu se Krismas mo Ista oli ol hiten lafet. (Aes. 44:​14-20; 2 Kor. 6:​14-17) Nating se yumi stap talemaot trutok, be sipos yumi tokbaot ol samting ya long faswan taem we yumi storian wetem hem, maet yumi no stap yusum Baebol long fasin we i waes.

13. ?Olsem wanem yumi save putum sol long ol toktok blong yumi?

¹³ Pol i talem tu se yumi mas “putum sol” long ol toktok blong yumi. Taem hem i talem olsem, hem i no minim se yumi mas traem blong haedem trutok, be hem i stap pulum yumi blong talemaot trutok long wan fasin we i mekem se narafala i glad blong harem. (Job 12:11) Be samtaem i no isi blong mekem olsem. Traem tingbaot wan pijatok: Taem yumi rerem kakae blong narafala, maet yumi ting se bambae hem i laekem sipos yumi mekem i stret long tingting blong yumi, be maet samting we hem i laekem i defren. Long sem fasin, maet yumi ting se ol narafala bambae oli glad long fasin blong yumi blong toktok, be samtaem i no olsem. Eksampol, long sam kalja ol man oli lan blong tok stret long narafala, nating sipos hem i olfala moa long olgeta. Be long sam narafala kalja, ol man oli harem se i no stret blong mekem olsem, mo hemia i save mekem oli harem nogud. Pol i talem se yumi mas save “olsem wanem blong givim ansa long evri man.” Hemia i soemaot se taem yumi toktok, yumi no mas tingbaot nomo kalja blong yumi mo fasin blong toktok we yumi lan long hem, be yumi mas tingbaot samting we bambae i mekem man ya we yumi toktok long hem i glad.

?WETAEM YUMI MAS TALEMAOT TRUTOK?

14. Taem Jisas i stap long wol, ?hem i tijim ol disaepol blong hem long evri samting we hem i save? Yu eksplenem.

¹⁴ Oltaem Jisas i toktok kaen long ol man blong hem, mo hem i tijim plante samting long olgeta. (Mak 6:34) Be Jisas i no traem blong tijim ol disaepol blong hem long evri samting we hem i save, from we hem i save se i no stret taem yet blong oli lanem sam long ol trutok ya. Mo hem i talem se sam long ol trutok ya oli strong tumas blong oli kasem save long olgeta. (Jon 16:12) ?Hemia i tijim wanem long yumi?

15. Sipos wan man i jes stat blong stadi Baebol, ?i waes blong tijim hem long evri samting we yumi save? Yu eksplenem. (Ol Proveb 25:11) (Mo tu, yu luk pija.)

¹⁵ Eksampol blong Jisas i soemaot se samtaem yumi no nid blong talemaot long narafala evri trutok we yumi save. ?Olsem wanem yumi save folem eksampol blong Jisas? Hemia taem yumi tingbaot filing blong narafala. Traem tingbaot bakegen man ya we i laekem blong mekem lafet blong Krismas mo Ista. Yumi save se ol lafet ya oli joen wetem ol hiten bilif mo God i no glad long olgeta. Be traem tingbaot sipos yu jes stat blong stadi Baebol wetem man ya wan o tu wik bifo long Krismas, nao yu soemaot long hem samting we Baebol i talem long saed blong ol hiten lafet, mo yu talem long hem se hem i mas stop naoia blong mekem lafet blong Krismas. ?Yu ting se bambae hem i glad? I tru, sam Baebol stadi oli kwik blong folem samting we oli lanem. Be sam narafala oli tekem moa taem blong jenisim tingting blong olgeta mo folem trutok long laef blong olgeta. Taswe sipos yumi wantem givhan long ol Baebol stadi blong oli mekem ol jenis, yumi mas talemaot ol trutok long stret taem, hemia long taem we oli naf blong kasem save long hem mo folem.—Ridim Ol Proveb 25:11.

16. ?Olsem wanem yumi save givhan long ol Baebol stadi blong yumi blong oli “gohed blong wokbaot long trutok”?

¹⁶ Yumi kasem bigfala glad taem yumi givhan long ol narafala blong oli save trutok long saed blong Jehova. Yumi save givhan long ol Baebol stadi blong oli “gohed blong wokbaot long trutok” sipos yumi mekem ol samting ya: Gohed blong soemaot gudfala eksampol long olgeta. (3 Jon 3, 4) Meksua se ol desisen we yu mekem i pruvum se yu bilif long ol promes blong Baebol. Talemaot trutok from stret risen, yu toktok kaen, mo yu talem long stret taem. Mo sipos ol narafala oli presem yu, i gud yu pulum olgeta blong oli presem Jehova nomo. Olsem nao, bambae yu pruvum se yu stap wosipim Jehova we i God blong trutok.