Mak 11:24—“Wanem Samting We Yu Askem Tru Long Prea, Yu Mas Bilif Se Yu Kasem Finis”

“From samting ya, mi talem long yufala se, olgeta samting we yufala i askem long prea, yufala i mas bilif se yufala i kasem finis, nao bambae yufala i save kasem.”—Mak 11:24, Niu Wol Translesen.

“Taswe mi talem long yufala se, wanem samting we yu askem tru long prea, yu mas bilif se yu kasem finis, nao bambae yu kasem.”—Mak 11:24, English Standard Version.

Mining blong Mak 11:24

Wetem ol tok ya, Jisas i soem long ol man blong hem from wanem i impoten blong oli gat strong bilif long paoa blong prea. Hem i mekem oli sua se God i no stap lesin nomo long ol prea, be i stap ansa long olgeta tu. Wan man we prea blong hem i laenap wetem wil blong God, hem i sua se samting we hem i prea from bambae i mas kamtru. I olsem se hem i kasem finis ansa blong prea blong hem.

Jisas i tokbaot from wanem i impoten blong prea wetem bilif. Hem i eksplenem se taem wan man i prea hem i ‘no mas gat tu tingting,’ be hem i mas “bilif strong se samting we hem i talem bambae i hapen.” (Mak 11:23) ?From wanem? From we sipos man i gat tu tingting “hem i no mas ting se hem i save kasem samting long Jehova.”a—Jemes 1:5-8.

Wan man we i bilif, i gohed blong prea nating se i fesem ol defdefren situesen. (Luk 11:9, 10; Rom 12:12) Long rod ya, hem i soem se hem i rili nidim samting we hem i askem mo hem i bilif strong se God i save ansarem prea blong hem. From samting ya, hem i kasemsave tu se God bambae i ansarem prea blong hem long wan rod we maet hem i no tingbaot mo long wan taem we hem i no ekspektem.—Efesas 3:20; Hibru 11:6.

Mo tu, samting we Jisas i talem i no min se eniman i save kasem ol samting we hem i askem long God. Jisas i stap toktok wetem ol man blong hem, hemia ol man blong bilif we oli stap traehad blong mekem bes blong olgeta blong wosipim Jehova long fasin we i stret. Baebol i talem se, Jehova i stap lesin nomo long ol prea we i laenap wetem wil blong hem. (1 Jon 5:14) Hem i no lesin long prea blong ol man we oli jus blong no folem ol loa blong hem mo oli gohed blong mekem ol rabis fasin we oli no tanem tingting blong olgeta. (Aesea 1:15; Maeka 3:4; Jon 9:31) Blong save moa long ol prea we God i stap lesin long olgeta, wajem sot video ya.

Ol vas raonabaot long Mak 11:24

Long ol laswan dei blong minista wok blong Jisas long wol ya, Jisas i eksplenem long ol disaepol blong hem se i impoten blong oli bilif strong long God. Hem i yusum wan parabol blong soemaot from wanem i impoten. Taem oli stap go long Jerusalem, hem i luk wan figtri we i gat plante lif. Nating se i olsem, tri ya i nogat eni frut, so Jisas i tok long tri ya. (Mak 11:12-14) Tri ya i giaman long ol man, hemia i pija blong nesen blong Isrel, nating se oli stap wosipim God, be bilif blong olgeta i no strong. (Matiu 21:43) Smol taem biaen, figtri ya i drae, mo hemia i soemaot samting we i no longtaem bambae i hapen long ol man Isrel we oli nogat strong bilif.—Mak 11:19-21.

Be Jisas i wantem se ol man blong hem oli gat strong bilif, blong oli naf blong fesem ol hadtaem mo mekem ol bigfala wok. (Mak 11:22, 23) Advaes we Jisas i givim long saed blong prea long taem ya, i stret gud long ol man blong hem. I no longtaem bambae i gat ol samting we oli save traem bilif blong olgeta, hemia taem Jisas i ded mo taem ol man oli agensem olgeta long wok blong prij. (Luk 24:17-20; Ol Wok 5:17, 18, 40) Ol man blong Jisas tede oli save winim ol hadtaem, taem oli soemaot se oli bilif long God mo long paoa blong prea.—Jemes 2:26.

Wajem sot video ya blong luk wanem samting we buk blong Mak i tokbaot.