?Yu yu nidim blong mekem tingting blong yu i longfala moa? Sipos yes, yu save prea from. Longfala tingting i wan haf blong frut blong tabu spirit. (Gal. 5:​22, 23) Taswe, yumi save prea long Jehova blong i givim tabu spirit mo halpem yumi blong wokem ol frut blong tabu spirit. Sipos yumi fesem wan situesen we i traem longfala tingting blong yumi, i gud yumi “gohed blong askem” long Jehova blong i givim tabu spirit, blong i givhan long yumi blong gat fasin ya. (Luk 11:13) Mo tu, yumi save askem long Hem blong i halpem yumi blong gat sem tingting olsem hem long situesen we yumi fesem. Afta we yumi prea, yumi mas mekem bes blong yumi blong gat longfala tingting evri dei. Sipos yumi gohed blong prea mo traehad, Jehova bambae i givhan long yumi blong gat longfala tingting, nating se bifo yumi no wan man olsem. I gud tu blong tingting dip long ol eksampol long Baebol. Long Baebol i gat plante eksampol blong ol man we oli gat longfala tingting. Taem yumi tingting dip long olgeta, yumi save lanem olsem wanem blong soemaot fasin ya. w23.08 22 ¶10-11

Jisas i mekem aposol Pita i luksave se Jehova bambae i lukaot gud long hem. Afta we Jisas i laef bakegen, hem i mekem merikel bakegen blong Pita mo ol narafala aposol oli kasem plante fis. (Jon 21:​4-6) Merikel ya i mekem Pita i sua se Jehova i naf blong givim ol samting we oli nidim blong laef. Maet Pita i tingbaot tok blong Jisas se Jehova bambae i givim evri samting we oli nidim, sipos oli gohed blong ‘lukaot Kingdom fastaem.’ (Mat. 6:33) Ol samting ya i halpem Pita blong putum wok blong prij i stap fasples long laef blong hem, bitim bisnes blong hem blong kasem fis. Long dei blong Pentekos long 33 K.T., Pita i no fraet blong givim wan gudfala witnes we i halpem plante taosen man blong oli bilif long gud nius. (Wok 2:​14, 37-41) Biaen, hem i halpem plante man Sameria mo plante narafala man we oli no man Jiu, blong oli folem Kraes. (Wok 8:​14-17; 10:​44-48) Tru ya, Jehova i yusum Pita long wan bigfala fasin, blong halpem plante defdefren kaen man blong oli joen long kongregesen. w23.09 20 ¶1; 23 ¶11

Tu yia afta we Babilon i distroem Jerusalem, King Nebukadnesa i luk wan drim long saed blong wan bigfala statiu, we i mekem hem i wari tumas. Hem i givim oda se bambae oli kilim i ded evri waesman wetem Daniel, sipos oli no talemaot drim blong hem wetem mining blong hem. (Dan. 2:​3-5) Daniel i mas kwik blong tekem aksen, sipos no plante man bambae oli ded. Hem “i askem long king blong i givim taem long hem, blong hem i talemaot mining blong drim ya.” (Dan. 2:16) Hemia i soemaot se Daniel i gat strong tingting mo i bilif. I no gat wan vas long Baebol we i talem se bifo Daniel i stap talemaot mining blong ol drim. Hem i askem long ol fren blong hem “blong oli prea long God blong heven blong i sore long olgeta, i soemaot sikret ya long olgeta.” (Dan. 2:18) Jehova i ansarem ol prea ya. Wetem help blong God, Daniel i naf blong talemaot mining blong drim blong Nebukadnesa. From samting ya, Daniel mo ol fren blong hem oli no ded. w23.08 3 ¶4