STADI 18
Leftemap Tingting Blong Ol Narafala Long Ol Miting
“I gud yumi stap tingbaot yumi . . . , leftemap tingting blong yumi.”—HIB. 10:24, 25.
SINGSING 88 Yu Tijim Mi Long Ol Rod Blong Yu
BIGFALA TINGTINGa
1. ?From wanem yumi givim ansa long ol miting?
?FROM wanem yumi stap go long ol Kristin miting? Faswan risen, hemia blong presem Jehova. (Sam 26:12; 111:1) Mo tu, yumi go long ol miting blong yumi save lefleftemap tingting blong yumi long taem blong ol trabol. (1 Tes. 5:11) Taem yumi leftemap han blong yumi mo givim wan ansa, yumi joen blong mekem tufala samting ya, hemia blong presem Jehova mo leftemap tingting blong narafala.
2. ?Wetaem yumi save givim ansa long ol miting?
2 Evri wik, yumi gat janis blong givim ansa long ol miting. Eksampol, long ol wiken, yumi save givim ansa long taem blong Wajtaoa Stadi. Long miting blong medel wik, yumi save givim ansa long haf blong Faenem Ol Gudgudfala Samting, Baebol Stadi Blong Kongregesen, mo ol narafala haf we i gat kwestin mo ansa.
3. ?Wanem ol problem we maet yumi fesem? ?Olsem wanem Hibru 10:24, 25 i save halpem yumi?
3 Yumi evriwan i wantem presem Jehova mo leftemap tingting blong ol narafala. Be samtaem maet i had blong yumi givim ansa. Maet yumi fraet blong ansa, o maet yumi wantem ansa, be oli no jusum yumi. Taswe, ?olsem wanem yumi save dil wetem ol problem ya? Yumi faenem ansa blong kwestin ya long leta we aposol Pol i raetem i go long ol Kristin long Hibru. Taem hem i tokbaot impoten risen blong joen wanples long ol miting, hem i talem se yumi mas tingbaot moa blong “leftemap tingting blong yumi.” (Ridim Hibru 10:24, 25.) Taem yumi luksave se smol ansa we yumi givim i save leftemap tingting blong ol narafala, bambae yumi glad moa blong givim wan ansa. Mo sipos oli no jusum yumi oltaem, yumi glad se ol narafala oli gat janis tu blong givim wan ansa.—1 Pita 3:8.
4. ?Wanem ol trifala poen we bambae yumi tokbaot long stadi ya?
4 Long stadi ya, fastaem bambae yumi tokbaot olsem wanem yumi save leftemap tingting blong ol narafala long wan smol kongregesen, we i no gat plante man blong givim ansa. Biaen, bambae yumi luk olsem wanem blong leftemap tingting blong ol narafala long wan bigfala kongregesen we plante man oli pusum han blong givim ansa. Mo laswan, bambae yumi tokbaot sam rod blong givim ol ansa we i leftemap tingting blong narafala.
LEFTEMAP TINGTING BLONG NARAFALA LONG WAN SMOL KONGREGESEN
5. ?Yumi save mekem wanem blong leftemap tingting blong narafala, sipos i no gat plante man blong givim ansa?
5 Long wan smol kongregesen o grup, i no gat plante man we brata i save jusum blong ansa. Samtaem, hem i mas wet smoltaem bifo we wan i glad blong ansa. Long taem olsem, maet i luk olsem we miting ya i boring, mo i no leftemap tingting blong narafala. Taswe, ?yu save mekem wanem? Yu mas rere blong leftemap han blong yu oltaem. Long rod ya, maet yu save pulum ol narafala tu blong oli mekem sem mak.
6-7. ?Yumi save mekem wanem blong yumi no fraet tumas blong givim ansa?
6 ?Samtaem, yu yu harem se yu wantem givim wan ansa be yu fraet? Plante oli harem olsem. Be yet, yumi save leftemap tingting blong ol brata mo sista sipos yumi mekem sam samting blong yumi no fraet tumas. ?Yumi save mekem samting ya olsem wanem?
7 Maet yu save faenem sam gudfala advaes long ol Wajtaoab blong yumi. Eksampol, yu mas rere gud. (Prov. 21:5) Sipos yu save gud samting we atikol i tokbaot, bambae i moa isi blong yu givim ansa. Mo tu, i gud yu givim wan sot ansa nomo. (Prov. 15:23; 17:27) Bambae yu no fraet tumas sipos ansa blong yu i sot. Sipos ansa blong yumi i sot, ol brata sista bambae oli kasemsave moa long hem i bitim wan ansa we i longfala mo i gat tumas poen long hem. Sipos yu givim wan sot ansa long prapa tok blong yu, hemia i soemaot se yu rere gud mo yu kasemsave gud long atikol we yumi stadi long hem.
8. ?Wanem tingting blong Jehova taem yu mekem bes blong yu blong givim ansa?
8 ?Olsem wanem sipos yu traem blong folem ol advaes ya, be yu harem yet se yu fraet blong givim wan o tu ansa? I gud blong tingbaot se Jehova i glad sipos yu mekem bes blong yu blong givim ansa. (Luk 21:1-4) Mekem bes blong yu, i no min se yu mekem moa long wanem we yu naf blong mekem. (Fil. 4:5) I gud blong tingbaot samting we yu naf blong mekem, yu putum mak blong kasem, mo yu prea blong Jehova i mekem hat blong yu i kwaet. Blong stat, yu save putum mak ya blong givim wan sot ansa.
LEFTEMAP TINGTING BLONG NARAFALA LONG WAN BIGFALA KONGREGESEN
9. ?From wanem i had blong givim ansa long wan bigfala kongregesen?
9 Sipos kongregesen blong yu i gat plante pablisa, yu save fesem wan defren problem. Maet i gat plante brata mo sista we oli glad blong ansa, mo plante taem oli no jusum yu blong ansa. Tingbaot eksampol blong Danielle, hem i glad oltaem blong givim ansa long ol miting.c Hem i tingbaot samting ya olsem wan haf blong wosip, wan rod blong leftemap tingting blong narafala, mo hem i tingbaot se hemia i olsem wan rod blong mekem bilif blong hem long ol tijing blong Baebol i kam strong. Be taem hem i muv i go long wan bigfala kongregesen, hem i no moa ansa plante, mo samtaem hem i no ansa nating long wan ful miting. Hem i talem se: “Mi mi harem olsem se mi lusum wan privilej. Taem samting olsem i hapen oltaem, yu save stat blong gat tingting ya se, oli minim nomo blong mekem olsem.”
10. ?Yumi save mekem wanem blong gat moa janis blong givim wan ansa?
10 ?Samtaem yu yu gat sem filing olsem Danielle? Sipos yes, maet i isi blong yu givap, mo yu jes sidaon mo lesin nomo long miting. Be yu no mas stop blong traehad. ?Yu save mekem wanem? Maet i gud yu rerem plante ansa blong givim long wan miting. Olsem nao, sipos oli no jusum yu blong ansa long ol faswan haf blong stadi, yu gat janis yet blong givim ansa long ol narafala haf blong miting. Taem yu stap rerem Wajtaoa blong yu, i gud yu tingbaot olsem wanem wanwan paragraf i joen wetem taetel blong stadi ya. Olsem nao, long taem blong stadi, yu save givim ol gudfala ansa. Antap long hemia, maet yu save rerem ol ansa blong ol paragraf we oli tokbaot ol dip trutok blong Baebol, we i had blong ol man oli eksplenem. (1 Kor. 2:10) ?From wanem? From we maet i no gat plante man i ansa long ol haf ya. ?Be olsem wanem sipos yu folem ol advaes ya, be long plante miting yu no gat janis yet blong givim wan ansa? Maet long stat blong miting, yu save go luk brata we i lidim stadi, mo yu talem stret paragraf we yu wantem ansa long hem.
11. ?Filipae 2:4 i enkarejem yumi blong mekem wanem?
11 Ridim Filipae 2:4. Long Baebol, aposol Pol i enkarejem ol Kristin blong oli no tingbaot olgeta nomo, be oli mas tingbaot ol narafala tu. ?Olsem wanem yumi save folem advaes ya long taem blong ol miting? Hemia blong tingbaot se ol narafala tu oli wantem ansa.
Yumi mas letem narafala i givim ansa long ol miting, sem mak olsem we yumi letem narafala i joen long wan storian Haf 12)
12. ?Wanem beswan rod blong enkarejem ol narafala long ol miting? (Yu luk pija tu.)
12 Traem tingbaot. Sipos yu stap storian wetem ol fren blong yu, ?yu ting se bambae yu nomo yu toktok, mo yu no givim janis long olgeta blong toktok? !I sua se no gat! Yu wantem se olgeta tu oli joen long storian. Hemia i sem mak long ol miting, yumi wantem letem plante man oli givim ansa. Beswan rod blong enkarejem ol brata mo sista, hemia blong givim janis long olgeta blong talemaot bilif blong olgeta. (1 Kor. 10:24) Naoia bambae yumi luk olsem wanem yumi save mekem olsem.
13. ?Olsem wanem yumi save letem plante moa man oli givim ansa?
13 Wan samting blong tingbaot, hemia se yumi save givim ol sot ansa nomo, olsem nao plante moa man oli save givim ansa. Ol elda mo ol narafala pablisa we oli gat ekspiriens oli save soem eksampol. Taem yu givim wan sot ansa, i gud yu no tokbaot tumas poen. From sipos yu tokbaot evri samting long paragraf, bambae i no moa gat samting blong ol narafala oli talem. Eksampol, long paragraf ya i gat tu poen, hemia blong givim wan sot ansa, mo no tokbaot tumas poen. Sipos oli jusum yu nao blong ansa faswan long paragraf ya, i gud yu tokbaot wan poen nomo.
?Wetaem maet yumi save jusum blong leftemap han blong yumi long taem blong miting? (Haf 14)f
14. ?Yumi mas tingbaot wanem taem yumi stap disaed se hamas taem bambae yumi ansa? (Yu luk pija tu.)
14 Yumi mas waes taem yumi tingbaot hamas taem yumi wantem ansa. Sipos yumi leftemap han blong yumi oltaem, maet yumi save mekem se brata we i lidim stadi i wantem jusum yumi oltaem, nating se ol narafala oli no gat janis yet blong ansa. Hemia i save mekem tingting blong ol narafala i foldaon, mo oli no moa wantem leftemap han blong olgeta.—Pri. 3:7.
15. (1) ?Yumi mas gat wanem tingting sipos oli no jusum yumi blong ansa? (2) ?Olsem wanem brata we i lidim stadi i soemaot se hem i tingbaot evriwan? (Yu luk bokis ya “Sipos Yu Stap Lidim Wan Haf.”)
15 Taem i gat plante pablisa we oli leftemap han blong olgeta long taem blong stadi, maet yumi no ansa oltaem olsem we yumi wantem. Samtaem, maet brata we i lidim stadi i no gat janis blong jusum yumi. Long taem olsem yumi save harem nogud, be yumi no mas kam kros taem oli no jusum yumi.—Pri. 7:9.
16. ?Olsem blong leftemap tingting blong olgeta we oli givim ansa?
16 Sipos yumi no givim plante ansa olsem we yumi wantem, i gud yumi lesin gud long ol narafala taem oli givim ansa. Mo afta long miting, yumi save talem ol gudfala toktok long olgeta from ansa blong olgeta. Ol brata mo sista oli save haremgud long ol gudfala tok ya, sem mak olsem we sipos yumi givim wan ansa. (Prov. 10:21) Ol gudfala tok we yumi talem long olgeta, i wan narafala rod blong leftemap tingting blong olgeta.
OL NARAFALA ROD BLONG LEFTEMAP TINGTING BLONG NARAFALA
17. (1) ?Olsem wanem ol perens oli save halpem ol pikinini blong olgeta blong rerem wan ansa? (2) Folem video, ?wanem ol fo step blong rerem wan ansa? (Yu luk futnot tu.)
17 ?Wanem sam narafala rod we yumi save enkarejem ol narafala long ol miting? Sipos yu wan perens, givhan long pikinini blong yu blong i rerem wan ansa we i stret long yia blong hem. (Mat. 21:16) Samtaem, yumi stadi long sam impoten topik olsem, ol problem blong mared, o ol rabis fasin, be maet i gat wan o tu paragraf we pikinini blong yu i save ansa long hem. Mo tu, givhan long pikinini blong yu blong i kasemsave se i no oltaem we bambae oli jusum hem blong ansa. Sipos yu eksplenem long hem, hemia bambae i mekem se hem i no harem nogud taem oli jusum narafala blong ansa.—1 Tim. 6:18.d
18. ?Olsem wanem blong givim wan ansa we yumi no tokbaot yumi wan tumas? (Ol Proveb 27:2)
18 Yumi evriwan i wantem rerem ol gudfala ansa blong presem nem blong Jehova mo leftemap tingting blong ol narafala Kristin. (Prov. 25:11) Taem yumi gat janis blong tokbaot prapa ekspiriens blong yumi, yumi mas lukaot se yumi no mas tokbaot yumi wan tumas. (Ridim Ol Proveb 27:2; 2 Kor. 10:18) Be yumi save pulum tingting blong ol narafala i go long Jehova, tok blong hem, mo ol man blong hem. (Rev. 4:11) Be sipos kwestin blong paragraf i askem yumi blong talemaot prapa tingting blong yumi, yumi save mekem olsem. Wan eksampol blong samting ya i stap long nekis paragraf.
19. (1) ?Wanem frut i save kamaot taem yumi tingbaot evriwan long kongregesen? (Rom 1:11, 12) (2) ?Yu yu harem olsem wanem taem yu lesin long ansa blong ol man long miting?
19 I no gat ol strong rul long fasin ya blong givim ol ansa. Taswe yumi evriwan i save traehad blong enkarejem narafala. Hemia i min se yumi mas traehad moa blong ansa, o yumi glad long janis we yumi mo ol narafala i gat blong givim ansa. Sipos yumi tingbaot ol narafala long kongregesen, yumi save glad from we yumi stap ‘lefleftemap tingting blong yumi.’—Ridim Rom 1:11, 12.
SINGSING 93 Plis Yu Blesem Miting Blong Mifala
a Yumi leftemap tingting blong ol narafala taem yumi givim ansa long ol miting. Be samfala oli harem se oli fraet blong givim ansa. Sam narafala oli glad blong givim ansa, be oli no jusum olgeta oltaem. Nomata wanem filing yumi gat, ?olsem wanem yumi soemaot se yumi tingbaot narafala, mo leftemap tingting blong olgeta? ?Mo olsem wanem yumi save givim ol ansa we i pulum ol brata mo sista blong oli lavlavem olgeta mo mekem gudfala wok? Stadi ya bambae i eksplenem moa.
b Yu save faenem moa advaes long Wajtaoa blong Jenuware 2019 pej 8-13, mo blong 1 Septemba 2003 pej 19-22.
c Mifala i jenisim sam nem.
d Wajem video ya Kam Fren Blong Jehova—Rerem Ansa Blong Yu, long jw.org.
e Yu luk Wajtaoa blong 15 Julae 2013 pej 32, mo blong 1 Septemba 2003 pej 21-22.
f PIJA: Long wan bigfala kongregesen, wan brata we i ansa finis, i letem ol narafala blong olgeta tu oli gat janis blong ansa.