?Yu Yu Wantem Mekem Olsem Jisas?
“Hem i luk we plante man oli stap, nao hem i sore tumas long olgeta, from we oli olsem ol sipsip we i no gat man blong lukaot long olgeta. Nao hem i stat tijim olgeta long plante samting.”—MAK 6:34.
1. ?From wanem yumi kasem save se samfala man oli soemaot ol nambawan fasin?
LONG ol taem bifo i kam kasem tede, plante man oli soemaot ol gudfala fasin we narafala man i presem olgeta from. Yumi kasem save from wanem i olsem. Jeova God i gat ol fasin olsem lav, kaen fasin, fasin blong givim wetem gladhat, mo plante narafala fasin bakegen we hem i stap soemaot long yumi, mo yumi tinghae long ol fasin ya. God i wokem man long pija blong hem. Taswe yumi luksave from wanem plante man oli soem sam long ol fasin olsem lav, kaen fasin, sore, mo ol narafala fasin we oli kamaot long God, olsem we plante man oli soem se oli gat wan tingting we i jajem olgeta. (Jenesis 1:26; Rom 2:14, 15) Be, ating yu luksave se sam man oli soemaot ol fasin ya moa i bitim ol narafala.
2. ?Wanem ol gudfala wok we sam man maet oli mekem, we oli ting se hemia rod blong folem fasin blong Kraes?
2 Maet yu save long sam man mo woman we oltaem oli stap visitim no halpem ol sikman. Oli stap soem sore long olgeta we oli handikap, no oli rere blong givim presen long ol puaman. Mo tu, tingbaot ol man ya we fasin sore blong olgeta i pusum olgeta blong spenem ful laef blong olgeta blong wok long ol ples blong ol man we oli gat leprosi, no long ol haos blong ol pikinini we oli no gat papa mama. Tingbaot olgeta ya we oli wok fri nomo long ol hospital no long ol ples blong lukaot long man we bambae oli ded from we oli gat sam nogud sik. Tingbaot olgeta we oli wok fri blong traehad blong givhan long ol man we oli no gat haos no ol refuji. I sua se, sam long olgeta man ya oli tingting se, oli stap folem fasin blong Jisas, we i bin soem eksampel long ol Kristin blong oli folem. Long ol Gospel yumi ridim se Kraes i mekem ol sikman oli kamgud bakegen mo i givim kakae long olgeta we oli hanggri. (Mak 1:34; 8:1-9; Luk 4:40) Ol fasin blong Jisas olsem lav, kaen fasin, mo fasin sore, oli soemaot wanem we i stap long ‘tingting ya blong Kraes,’ we hem wan i stap folem eksampel blong Papa blong hem long heven.—1 Korin 2:16.
3. ?Sipos yumi wantem gat wan tingting we i skelgud long saed blong ol gudfala wok blong Jisas, yumi mas tingbaot wanem?
3 Be, plante long olgeta ya we lav mo fasin sore blong Jisas i gat paoa long olgeta, oli mestem wan stamba samting long ‘tingting ya blong Kraes.’ ?Yu yu luksave wanem samting ya? Yumi save kasem moa save long saed ya sipos yumi tingbaot Mak japta 6. Long japta ya yumi ridim se ol man oli karem ol sikman oli kam long Jisas blong hem i mekem olgeta oli kamgud bakegen. Mo tu, yumi ridim se taem Jisas i luk we olgeta man ya we oli kam long hem oli hanggri, hem i mekem merikel blong fidim olgeta. (Mak 6:35-44, 54-56) Wok blong mekem ol sikman oli kamgud bakegen mo fidim ol man we oli hanggri, hemia sam nambawan rod we oli soemaot lav mo fasin sore blong Jisas, be, ?hemia nomo stamba rod we Jisas i yusum blong halpem ol man? ?Mo wanem beswan rod blong folem eksampel we i stretgud olgeta long saed blong lav, kaen fasin, mo sore, we Jisas i mekem, folem fasin blong Jeova?
Hem i Wantem Givim Help Long Saed Blong Spirit
4. ?Wanem stori i stap long Mak 6:30-34?
4 Faswan risen we i pulum Jisas blong gat sore long ol man hemia from nid we oli gat long saed blong spirit. Ol nid ya oli impoten tumas, i bitim ol nid long saed blong bodi. Tingbaot stori we i stap long Mak 6:30-34. Stori ya i hapen long so blong lugun blong Galili, klosap long taem blong Pasova long yia 32 K.T. Ol aposol oli glad tumas, mo i gat gudfala risen blong samting ya. Afta we oli finisim longfala trep blong olgeta, oli kambak long Jisas. Maet oli kambak blong talemaot long hem olgeta samting we i bin hapen long wok blong olgeta. Be, wan bigfala hip blong man i kam raon long olgeta. Ol man ya oli plante tumas mekem se Jisas mo ol disaepol blong hem tu, oli no save kakae mo oli no save spel. Jisas i talem long ol aposol blong hem se: “Yufala i kam. Yumi go long wan ples we i no gat man, we yufala i save spel smol.” (Mak 6:31) Oli klaem long wan bot, ating klosap long Kapenaum, ale oli go long wan ples we i kwaet, long narasaed blong lugun blong Galili. Be hip man ya i hareap folem so, i go kasem narasaed lugun ya bifo long Jisas mo ol aposol blong hem. ?Jisas bambae i mekem wanem nao? ?Hem i harem nogud from we ol man oli no save letem hem i tekem smol taem blong spel? !No gat!
5. ?Wanem filing blong Jisas long ol man we oli kam long hem, mo filing ya i pusum hem blong mekem wanem?
5 Jisas i luk bigfala hip ya blong plante taosen man, wetem ol sikman tu, we oli stap wet long hem from we oli wantem tumas blong luk hem. Nao samting ya i tajem hat blong hem. (Matiu 14:14; Mak 6:44) Mak i poenemaot samting we i pulum Jisas blong gat sore, mo wanem we Hem i mekem, i se: “Hem i luk we plante man oli stap, nao hem i sore tumas long olgeta, from we oli olsem ol sipsip we i no gat man blong lukaot long olgeta. Nao hem i stat tijim olgeta long plante samting.” (Mak 6:34) Jisas i no luk olgeta ya olsem wan hip man nomo. Hem i luk olgeta olsem ol man we oli gat nid long saed blong spirit. Oli olsem ol sipsip we oli stap wokbaot olbaot nomo, we i no gat man blong lidim olgeta i go long wan ples we i gat grin gras long hem, mo i no gat man blong protektem olgeta. Jisas i save se ol lida blong skul oli no gat sore. Ol lida ya oli mas mekem wok olsem wan man blong lukaot sipsip we i kea gud long ol sipsip blong hem, be nogat. Oli no laekem nating ol man ya mo oli no tingbaot nid blong olgeta long saed blong spirit. (Esikel 34:2-4; Jon 7:47-49) Jisas i wantem mekem i defren, hem i wantem yusum beswan rod we i gat blong mekem i gud long olgeta ya. Hem i stat tijim olgeta long saed blong Kingdom blong God.
6, 7. (a) ?Ol Gospel oli soemaot se taem Jisas i givhan long ol man, wanem samting we i impoten moa long tingting blong hem? (b)?Wanem tingting i pulum Jisas blong mekem wok blong prij mo tij?
6 Makem gud wanem oda we wan narafala aposol i folem taem hem i raetem semfala stori ya, mo wanem samting we hem i wantem soemaot se i mas stap fastaem. Hemia stori we Luk i raetem. Luk i wan dokta mo hem i gat bigfala intres long wok ya blong mekem narafala i kamgud bakegen long saed blong bodi. “Ol man . . . oli girap, oli biaen long [Jisas], mo Jisas i glad nomo blong luk olgeta. Nao hem i stap tijim olgeta long fasin we God i stap kam King blong ol man blong hem, mo hem i mekem ol sikman blong olgeta oli gud bakegen.” (Luk 9:11; Kolosi 4:14) I tru se, i no evri stori long saed blong merikel we oli sem mak, be long stori ya, ?wanem samting we tabu spirit i pulum Luk blong makem fastaem? Hemia poen ya se, Jisas i tijim man.
7 Hemia i laenap wetem impoten poen we yumi bin ridim long Mak 6:34. Vas ya i soemaot klia olsem wanem Jisas i wantem soem fasin sore. Hem i tijim ol man from we hem i luk se oli gat nid long saed blong spirit. Long stat blong minista wok blong hem, Jisas i bin talem se: “Mi mas go long ol narafala vilej tu, mi mas talemaot gud nius ya long olgeta, se God i stap kam King blong olgeta man long wol, from we God i sanem mi blong mi mekem olsem.” (Luk 4:43) Be, sipos yumi gat tingting olsem se, Jisas i talemaot mesej blong Kingdom from we hemia wan wok nomo, yumi rong olgeta. Hem i no mekem wok ya blong prij, olsem we hem i wan mesin. No gat. Fasin sore mo lav we hem i gat long ol man, hemia nao samting we i pusum hem blong serem gud nius wetem olgeta man. Beswan rod we Jisas i save folem blong mekem i gud long ol man—olgeta ya we oli sik wetem olgeta we devel i stap long olgeta, ol puaman, mo olgeta we oli hanggri—hemia blong halpem olgeta blong kasem save, blong bilif, mo blong laekem trutok long saed blong Kingdom blong God. Trutok ya i moa impoten i winim ol narafala samting from we Kingdom ya nao bambae i mekem wok blong leftemap hae rul blong Jeova mo givim blesing long olgeta man blong olwe.
8. ?Wanem filing blong Jisas long saed blong wok we hem i mekem blong prij mo tijim man?
8 Wok blong prij we Jisas i mekem i olsem fandesen blong risen ya we hem i kam long wol. Klosap long en blong minista wok blong Jisas long wol ya, hem i talem long Paelet se: “Mi mi bon, mi kam long wol ya blong wan samting nomo, blong mi talemaot [“trutok,” NW]. Mo man we i glad blong folem ol [“trutok,” NW], hem i save harem ol tok blong mi.” (Jon 18:37) Long tufala faswan stadi blong yumi, yumi makem se Jisas i wan man we i gat filing—hem i kea, i mekem man i no fraet blong kam klosap long hem, i tingbaot filing blong narafala, i gat tras, mo antap long olgeta fasin ya, hem i gat lav. Yumi mas luksave ol defren haf ya blong fasin blong hem sipos yumi rili wantem kasem save long “tingting blong Kraes.” Long sem fasin, i impoten blong luksave se tingting blong Kraes i minim tu, fasin blong hem blong putum wok blong prij mo tij long fasples long laef blong hem.
Hem i Pulum Ol Narafala Blong Givim Witnes
9. ?Hu olgeta we oli mas putum wok blong prij mo tijim man, fasples long laef blong olgeta?
9 Fasin ya blong putum wok blong prij mo tij fastaem, i soemaot lav mo fasin sore long man. Be, hem i no wan samting we Jisas nomo i mas mekem. Jisas i pulum ol man blong hem blong oli folem eksampel blong hem. Oli mas gat sem tingting we i pusum hem blong wok. Samting we hem i putum i stap fasples long laef blong hem, olgeta tu oli mas putum i stap fasples long laef blong olgeta. Mo oli mas mekem ol aksin we oli olsem hem. Tingbaot eksampel ya. Afta we Jisas i jusum ol 12 aposol blong hem, ?oli mas mekem wanem? Mak 3:14, 15 i talem se: “Hem i jusumaot twelef man long olgeta mo i putum nem blong olgeta se aposol. Hem i putumap olgeta blong oli biaen long hem, mo blong i sanem olgeta oli go talemaot gud nius, mo blong oli gat paoa blong ronemaot devel long man.” Long ples ya, ?yu yu makem wanem samting i mas stap fastaem long tingting blong ol aposol?
10, 11. (a) ?Taem Jisas i sanem ol aposol blong hem, hem i talem long olgeta blong mekem wanem? (b)?Wanem stamba risen biaen long rod ya blong sanem ol aposol oli go long ol man?
10 Biaen, Jisas i givim paoa long ol 12 aposol ya blong oli save mekem ol man we oli sik oli kamgud bakegen, mo blong oli ronemaot devel long man. (Matiu 10:1; Luk 9:1) Ale, hem i sanem olgeta i goraon long ol laen blong Isrel we oli “olsem ol sipsip we oli lus.” ?Blong mekem wanem? Jisas i givim oda long olgeta se: “Taem yufala i go, yufala i mas talemaot se, ‘Taem blong God i kam King blong olgeta man long wol, i kam klosap finis.’ Mo yufala i mas mekem ol sikman oli gud bakegen, mo yufala i mas mekem ol dedman oli laef bakegen. Ol man we oli gat rabis sik blong skin, yufala i mas mekem bodi blong olgeta i klin bakegen, mo ol man we oli gat ol devel i stap long olgeta, yufala i mas ronemaot ol devel ya i gowe long olgeta.” (Matiu 10:5-8; Luk 9:2) ?Wanem samting we olgeta ya oli mekem? “Nao olgeta oli goaot, [1] oli prij oli stap talem long ol man, se oli mas tanem tingting blong olgeta from ol sin blong olgeta. Mo [2] oli stap ronemaot plante devel long man, mo oli stap kafsaedem oel i go long bodi blong ol sikman, oli mekem olgeta oli gud bakegen.”—Mak 6:12, 13.
11 I no long evri taem we Baebol i tokbaot wok blong tij fastaem. Taswe, taem yumi yusum vas antap blong traem soemaot wanem we i mas stap long fasples long laef blong yumi no wanem tingting i mas pusum yumi blong wok, ?yumi bitim mak lelebet? (Luk 10:1-9) No gat. Yumi no mas fogetem se plante taem ol vas ya oli tokbaot wok blong tij bifo long wok blong mekem ol sikman oli kamgud bakegen. Tingbaot ol narafala vas we oli stap raonabaot long vas ya. Jes bifo we Jisas i sanem ol 12 aposol oli go, hem i sore blong luk ol hip man ya we oli trabol. Yumi ridim se: “Jisas i stap wokbaot, i stap pas long ol taon mo ol vilej, mo i stap tij insaed long ol haos blong prea blong olgeta. Hem i stap talemaot gud nius ya we God i stap kam King blong olgeta man long wol, mo i stap mekem olgeta we oli sik, mo olgeta we bodi blong olgeta i nogud, oli gud bakegen. Mo taem hem i luk ol man we oli plante tumas, hem i sore tumas long olgeta, from we olgeta oli trabol tumas, oli no moa gat paoa, oli olsem ol sipsip we i no gat man blong lukaot long olgeta. Nao hem i talem long ol man blong hem se, ‘Yufala i luk. I gat plante kakae tumas i stap long garen we i rere finis, be smol man nomo oli stap blong karem i go long haos. Yufala i mas askem strong long masta blong garen ya, blong hem i save sanem sam moa man oli kam blong karem ol kakae ya i go long haos blong hem.’”—Matiu 9:35-38.
12. ?Ol merikel we Jisas mo ol aposol blong hem oli mekem, i givhan long saed blong wanem narafala samting?
12 Taem ol aposol oli kampani wetem Jisas, oli save kasem sam long ol ‘tingting ya blong Kraes.’ Oli luksave se sipos oli rili gat lav mo fasin sore long man, bambae oli prij mo tijim olgeta long saed blong Kingdom—hemia nao wan stamba haf blong ol gudfala wok ya we oli mas mekem. From samting ya, ol gudfala wok we oli mekem long saed blong bodi, olsem wok blong mekem sikman i kam gud bakegen, oli givhan long olgeta tu long saed blong spirit. Yumi save finis se, maet sam man oli kam nomo from we oli luk ol merikel ya we oli karemaot sik blong ol man mo we oli givim kakae long plante man. (Matiu 4:24, 25; 8:16; 9:32, 33; 14:35, 36; Jon 6:26) Be antap long help ya long saed blong bodi, olgeta merikel ya oli pulum ol man blong luksave se Jisas hem i Pikinini blong God mo hem i “profet” ya we Moses i bin tokbaot.—Jon 6:14; Dutronome 18:15.
13. ?Profet tok blong Dutronome 18:18 i makem gud se “profet” ya we bambae i kam, i mas mekem wanem wok?
13 ?From wanem tok ya “profet” i gat mining long Jisas? ?Wanem bigfala wok we Baebol i talem se profet ya i mas mekem? ?“Profet” ya i wan man we olgeta man bambae oli save hem from we hem i gat paoa blong mekem merikel long ol sikman no from we hem i gat sore taswe hem i givim kakae long olgeta we oli hanggri? Dutronome 18:18 i talemaot se: “Bambae mi mi putumap wan profet blong olgeta olsem yu [Moses], we bambae i kamaot long olgeta. Mi bambae mi talem ol tok blong mi long hem, mo hem bambae i go talemaot ol tok ya long olgeta.” Taswe taem ol aposol oli lanem blong gat ol semfala fasin olsem Jisas, oli luksave se narafala rod blong soemaot tingting blong Kraes hem i tru long wok blong prij mo tij. Hemia nao beswan samting we oli save mekem blong givhan long ol man. Tru long samting ya, ol sikman mo ol puaman bambae oli no kamgud bakegen blong gat wan sotfala laef nomo long wol ya, no blong tekem kakae we i blong wan taem ya nomo. Be, bambae oli save kamgud bakegen mo harem gud fulwan, blong olwe.—Jon 6:26-30.
Wokem Tingting Blong Kraes Tede
14. ?Olsem wanem tingting blong Kraes i joen wetem wok blong yumi blong prij?
14 I no gat wan long yumi we bambae i talem se ol man long faswan handred yia nomo oli save gat tingting blong Kraes—olsem Jisas mo ol faswan disaepol ya we aposol Pol i tokbaot olgeta se: “Yumi kasem tingting blong Kraes.” (1 Korin 2:16) Mo i klia nomo se yumi mas mekem wok ya blong talemaot gud nius mo mekem disaepol. (Matiu 24:14; 28:19, 20) Nating se i olsem, i gud yumi tingting smoltaem long saed blong wanem we i stap pusum yumi blong mekem wok ya. I no stret sipos yumi tingting nomo se hem i wan wok we yumi mas mekem. Stamba risen we i mas pusum yumi blong joen long wok blong prij, hemia lav we yumi gat long Jeova. Mo sipos yumi rili folem fasin blong Jisas, i minim se yumi gat sore long man nao yumi wantem prij mo tijim olgeta.—Matiu 22:37-39.
15. ?From wanem fasin sore i impoten taem yumi joen long wok blong prij?
15 I tru se, i no isi oltaem blong soemaot sore long olgeta we oli no gat sem bilif olsem yumi, antap moa sipos oli no kea long mesej blong yumi, oli sakemaot yumi, no oli agensem yumi. Be, sipos yumi lusum lav mo fasin sore long ol man, yumi lusum wan impoten samting we i save pusum yumi blong joen long Kristin minista wok blong yumi. Taswe, ?olsem wanem yumi save kasem fasin ya blong sore long man? Yumi save traem lukluk ol man olsem we Jisas i luk olgeta se “oli trabol tumas, oli no moa gat paoa, oli olsem ol sipsip we i no gat man blong lukaot long olgeta.” (Matiu 9:36) ?Yu ting se i gat plante man olsem tede? Ol giaman lida blong skul we oli mekem wok blong lukaot sipsip, oli no lukaot gud long ol sipsip ya mo oli mekem olgeta oli blaen long saed blong spirit. From samting ya, ol sipsip ya oli no gat save long ol waes advaes we oli stap long Baebol mo oli no save se i no longtaem bambae Kingdom blong God i mekem wol blong yumi i kam wan Paradaes. Oli fesem ol problem long laef evri dei—olsem fasin pua, fasin seraot insaed long famle, sik, mo ded—mo oli no gat hop ya we Kingdom i givim. Yumi nao yumi holem samting ya we oli nidim: !gud nius blong Kingdom ya blong God we i stanap finis long heven, we i wan gud nius blong sevem laef!
16. ?From wanem yumi wantem serem gud nius long ol narafala man?
16 Taem yu tingbaot olgeta nid long saed blong spirit we ol man ya oli gat, ?hat blong yu i no pusum yu blong wantem traehad blong talem long olgeta wanem stamba tingting blong God ya we i gat lav? Yes, wok blong yumi i wan wok blong soem sore. Taem yumi gat filing long ol man, olsem Jisas, bambae ol man oli harem save samting ya long voes blong yumi, bambae oli luksave samting ya long fes blong yumi mo long fasin blong yumi blong tij. Ol samting ya oli save pulum ol man we oli “stret blong kasem laef blong olwe,” blong oli wantem harem mesej blong yumi.—Ol Wok 13:48, NW.
17. (a) ?Wanem sam rod we yumi save soemaot se yumi gat lav mo fasin sore long ol narafala? (b)?From wanem yumi no save jusum se bambae yumi mekem wok blong givhan long saed blong bodi no wok blong prij?
17 Be, i tru se, long olgeta haf blong laef blong yumi, yumi mas soemaot se yumi man we i gat lav mo fasin sore. Samting ya i minim se yumi mas kaengud long olgeta we oli no gat jans olsem yumi, olgeta we oli sik, mo olgeta we oli pua—mo yumi traem bes blong yumi blong mekem wanem we yumi naf blong karemaot fasin safa ya we oli gat. Hem i minim tu se, yumi traehad blong talem ol tok mo mekem ol wok we oli save daonem soasore blong olgeta we oli lusum wan famle no fren long ded. (Luk 7:11-15; Jon 11:33-35) Be, olkaen fasin ya blong soemaot lav, kaen gud fasin, mo sore, oli no mas stap olsem stamba samting long ol gudfala wok we yumi mekem, olsem ol man ya we stamba wok blong olgeta i blong givhan long olgeta we oli trabol. Traehad blong yumi i save gat moa mining mo i save karem frut we i stap olwe, sipos ol semfala fasin ya we oli kamaot long God, oli pusum yumi blong joen long Kristin wok ya blong prij mo tij. Tingbaot wanem we Jisas i talem long saed blong ol lida blong skul blong ol man Jiu: “Yufala i stap mekem taet blong yufala long ol smosmol lif ya, min mo dil mo kamin, we man i stap putum long kakae. Hemia i stret, i folem Loa, be yufala i tanem baksaed long ol nambawan tok blong Loa we i talem se man i mas mekem i stret, mo i mas gat sore long man, mo i mas holem promes blong hem. Hemia nao ol nambawan tok we yufala i mas folem. Be yufala i no mas lego ol taet ya blong yufala tu.” (Matiu 23:23) Taswe Jisas i no jusum weswan long tufala wok ya we hem i mas mekem—halpem ol man we oli gat nid long saed blong bodi no tijim ol samting long saed blong spirit we i save givim laef long man. No gat. Jisas i mekem tufala wok ya wantaem. Be, i klia se wok blong tijim man i impoten moa long tingting blong hem, from we wok ya i givim ol gudfala frut we oli save stap blong olwe.—Jon 20:16.
18. ?Fasin blong kasem tingting blong Kraes i mas pusum yumi blong mekem wanem?
18 !Yumi save tangkiu bigwan long Jeova se hem i soemaot tingting blong Kraes long yumi! Tru long ol Gospel, yumi save kasem moa long ol tingting, filing, fasin, wok, mo ol narafala samting we oli stap long fasples long laef blong man ya we i hae moa long olgeta man. I stap long yumi wanwan blong ridim olgeta samting we Baebol i talem long saed blong Jisas, tingting dip long olgeta, mo mekem oli wok long laef blong yumi. Rimemba, sipos yumi rili wantem mekem olsem Jisas, fastaem yumi mas gat tingting mo filing olsem hem mo yumi mas luksave samting olsem hem, go kasem mak we yumi sinman i naf blong mekem. Ale, i gud yumi gat strong tingting blong wokem mo soemaot “tingting blong Kraes.” I no gat wan laef we i moagud, i no gat wan fasin blong mekem long narafala we i moagud, mo i no gat wan rod we i moa gud, blong lidim yumi mo ol narafala i kam klosap long Jeova, nambawan God blong yumi, we Jisas i soemaot klia ol fasin blong hem.—2 Korin 1:3; Hibrus 1:3.
?Bambae Yu Yu Ansa Olsem Wanem?
• ?Baebol i givhan long yumi blong luksave wanem long saed blong fasin we Jisas i gat long ol man we oli gat nid?
• ?Jisas i mekem wanem poen i kam klia taem hem i lidim ol man blong hem?
• ?Olsem wanem yumi save soemaot “tingting blong Kraes” long ol wok we yumi mekem?
[Tok blong pija long pej 24]
?Wanem beswan rod we ol Kristin oli save folem blong rili givhan long ol narafala?