Wan Kwestin

Efesas 3:​14, 15 (NW) i talem se: “God i givim nem long olgeta famle long heven mo long wol.” ?I gat ol famle long heven? ?Mo evri famle long wol oli kasem nem blong olgeta long Jeova?

I no gat ol famle long heven olsem we i gat long wol, wetem wan papa, wan mama, mo ol pikinini​—we oli joen olsem stret famle. (Luk 24:39; 1 Korin 15:50) Jisas i soemaot klia se ol enjel oli no stap mared, mo i no gat wan samting blong soem se oli save karem pikinini.​—Matyu 22:30.

Be, long wan pijatok, Baebol i tokbaot Jeova God se hem i mared long ogenaesesen blong hem long heven. Hem i mared long saed blong speret. (Aesea 54:5) Ogenaesesen ya long heven i gat ol pikinini, hemia ol enjel. (Job 1:6; 2:1; 38:​4-7) Taswe, i gat wan nambawan famle long saed blong speret long heven.

Antap long samting ya, wan pijatok i tokbaot wan nyufala famle we i stap stanap long heven, hemia Jisas Kraes mo kongregesena blong ol 144,000, we oli olsem woman blong hem. (2 Korin 11:2) Bighaf blong olgeta ya we tabu speret i makemaot olgeta, oli ded finis, mo oli gat hop blong laef long heven. Sam long olgeta oli stap laef yet long wol ya. Olgeta ya oli wet wetem glad long taem ya we ‘Smol Sipsip bambae i mared’ long heven. Baebol i joenem mared ya wetem taem blong bigfala trabol we i stap kam kolosap​—taem Bigfala Babilon i lus, mo biaen, ol narafala haf blong rabis wol blong Setan oli lus olgeta.​—Revelesen 18:​2-5; 19:​2, 7, 11-21; Matyu 24:21.

Long saed blong ol famle long wol, aposol Pol i no stap talem long Efesas 3:​15, se olgeta famle wanwan oli karem nem blong olgeta stret long Jeova. Be, long vas ya, Pol i stap tokbaot ol man blong wan laen we oli holem nem blong famle blong olgeta longtaem finis i kam. Josua 7:​16-19 i givim wan eksampel. Vas ya i tokbaot taem ya we Jeova i soemaot sin blong Eken long klia ples. Fastaem, i kam klia se man we i mekem sin ya i stap long laen blong Juda. Biaen, oli luksave se man ya i stap long famle blong Sira. Mo laswan olgeta, se man ya i stap long haos blong Eken. Ol man oli tingbaot mo tokbaot Eken, waef blong hem, mo ol pikinini blong hem, olsem haf blong haos (no famle) blong Sabdi, bubu blong Eken. Mo, famle ya i holem nem blong bubu blong olgeta bakegen, hemia Sira.

Ol man Hibru, oli tinghevi long ol famle laen blong olgeta, mo Baebol i tokbaot plante long ol laen ya. God i givhan blong lukaotgud long ol famle laen ya. Sipos i gat nid, hem i mekem rod blong nem blong famle i no lus. Taswe, sipos wan man i mared be hem i ded bifo we hem i gat pikinini, brata blong hem i mas mared wetem woman blong hem, nao fasbon pikinini blong tufala i save karem nem blong man ya we i ded.​—Jenesis 38:​8, 9; Dutronome 25:​5, 6.

Yumi luk wan narafala eksampel blong wan longfala famle laen, hemia Jisas, pikinini blong Deved. I klia we Jisas i no stret pikinini blong King Deved, from we hem i bon plante handred yia afta we Deved i ded. Be, wan samting we i save givhan long ol man Jyu bifo blong luksave Mesaea, hemia se hem i mas kamaot long famle blong Deved. (Matyu 22:42) Mama blong Jisas mo papa we i adoptem hem, tufala evriwan oli kamaot long laen blong Deved. Taswe, Jisas tu i kamaot long laen ya.​—Matyu 1:1; Luk 2:4.

?Be olsem wanem ol famle olsem oli kasem nem blong olgeta long Jeova? I tru se i gat wanwan taem​—olsem long saed blong Ebraham mo Aesak​—we Jeova i putum nem long hed blong famle. (Jenesis 17:​5, 19) Be Jeova i no mekem olsem long olgeta man. Jeova i no givim nem long bighaf blong ol famle, blong oli save pasem nem ya i go long ol pikinini blong olgeta.

Jeova i stanemap fasin blong famle taem hem i talem long Adam mo Iv se ‘tufala i mas gat pikinini mo tufala i mas kam plante blong fulumap wol.’ (Jenesis 1:​28, NW) Jeova i letem Adam mo Iv, we tufala i sinman, blong gat pikinini. Olsem nao, oli kam stampa blong olgeta famle blong man long wol. (Jenesis 5:3) Taswe, long plante fasin, yumi save talem se God i givim nem long olgeta famle.

Long plante kantri tede, ol man oli no moa harem se oli mas holem nem blong famle gogo ol yia oli stap pas. Nating se i olsem, long olgeta kantri, ol Kristin oli talem tangkyu long Jeova from we hem i stanemap plan blong famle. Mo oli givim ona long hem taem oli wok had blong mekem famle blong olgeta i stanap strong.

[Futnot]