Oli Mekem Samting We Jeova i Wantem

Elaeja i Leftemap Nem Blong Trufala God

KING i givim oda long olgeta man long Isrel blong lukaot man ya. Sipos king i faenem hem, i sua se bambae i kilim hem i ded. ?Hu ya man ya we oli stap traehad blong faenem? Hemia Elaeja, profet blong Jeova.

King Ehab mo hiten waef blong hem, Jesebel, tufala i mekem wosip blong Bal i kam strong long Isrel. From samting ya, Jeova i blokem ren i no moa foldaon long kantri ya. Draetaem ya i gohed bitim tri yia. Nao Jesebel i kam kros tumas, ale hem i wantem kilim i ded olgeta profet blong Jeova. Be Ehab i lukaot Elaeja nomo. Elaeja nao i bin talem long Ehab moa long tri yia bifo, se: “!Long ol yia we oli kam, bambae i no moa gat wora blong naet mo ren, gogo mi mi givim oda!” (1 King 17:1) Mo draetaem ya i gohed yet.

Long taem ya we i denja tumas, Jeova i talem long Elaeja se: “Yu go luk Ehab, from we mi mi gat strong tingting blong mekem ren i foldaon long graon.” Elaeja i obei long oda blong Jeova, nating se Ehab i save kilim hem i ded.​—1 King 18:​1, 2.

Tufala Enemi i Mitim Tufala

Taem Ehab i luk Elaeja, hem i askem se: “?Yu yu Elaeja, man ya we i karem bigfala trabol ya i kam long Isrel?” Elaeja i no fraet blong talem se: “Mi no karem bigfala trabol ya i kam long Isrel. Yu nao, wetem laen blong papa blong yu, yufala i mekem samting ya, from we yufala i lego ol loa blong Jeova, mo yufala i wosipim ol Bal.” Ale, Elaeja i givim oda se olgeta man Isrel wetem “fo handred fefte profet blong Bal, mo fo handred profet blong ol tabu pos,” oli mas hivap long Hil ya Kamel. Nao, Elaeja i tok long bigfala hif blong man ya, i se: “?Go kasem wetaem bambae yufala i wokbaot nogud from we yufala i gat tu tingting?a Sipos Jeova i trufala God, yufala i folem Hem. Be sipos Bal i trufala god, yufala i folem hem.”​—1 King 18:17-​21.

Ale, ol man oli stap kwaet. Ating oli luksave se oli gat fol from we oli no stap mekem wosip i go long Jeova nomo. (Eksodas 20:4, 5) Sipos no, ating tingting blong olgeta i no moa jajem olgeta nating, taswe oli no moa ting se i wan sin blong wosip long Bal mo Jeova long semtaem. Nating se i olsem wanem, Elaeja i givim oda blong karem tu yangfala buluk i kam —⁠wan i go long ol profet blong Bal mo narawan i go long Elaeja. Oli mas mekemrere tufala buluk ya blong bonem olsem sakrifaes, be oli no mas laetem faea. Elaeja i talem se: “Yufala i mas singaot long nem blong god blong yufala, mo mi, bambae mi singaot long nem blong Jeova. Mo God ya we i sanem faea i kam blong ansa long yumi, hemia nao trufala God.”​—1 King 18:23, 24.

Hem i Leftemap Nem Blong Jeova

Ol profet blong Bal oli stat blong “wokbaot nogud raon long olta ya we oli mekem.” Long ful moning, oli stap singaot se: “!O Bal, ansa long mifala!” Be Bal i no ansa. (1 King 18:26) Ale, Elaeja i stat jikim olgeta, i se: “Yufala i mas singaot long voes we i antap moa, from we hem i wan god.” (1 King 18:27) Mo tu, ol profet ya blong Bal oli katkatem bodi blong olgeta wetem naef mo spia​—⁠wan fasin we ol hiten man oli mekem blong wekemap sore blong ol god blong olgeta.b​—1 King 18:28.

Nao medel dei i pas finis, be ol man blong wosip long Bal oli gohed nomo blong “mekem fasin blong ol profet”​—hemia wan tok we, long store ya, i soem se oli mekem fasin blong man we i krangke mo i lusum hed. Long sapa, Elaeja i talem long olgeta man ya se: “Yufala i kam kolosap long mi.” Oli wajemgud Elaeja taem i bildim bakegen olta blong Jeova, i digim wan hol raon long olta ya, i katkatem yangfala buluk, mo i putum ol pis blong buluk ya oli go antap long olta wetem faeawud. Nao, oli go karem wora (i klia se hemia wora blong Mediterenian Si), mo oli kafsaedem wora ya i go long buluk, long olta, mo long faeawud, gogo oli wetwetgud, mo oli fulumap hol raon long olta tu. Ale, Elaeja i prea long Jeova, i se: “Tede, mekem ol man oli save se yu yu God blong Isrel, mo se mi mi man blong yu, mo se tok blong yu nao i mekem olgeta samting ya oli kamaot. Ansa long mi, O Jeova, ansa long mi, blong mekem se ol man ya oli save se yu, Jeova, yu yu trufala God, mo yu nao yu pulum hat blong olgeta blong kambak long yu.”​—1 King 18:29-​37.

Kwiktaem nomo, faea i kamdaon long heven, “i kakae sakrifaes, ol pis wud, ol ston, ol ases, mo wora we i stap fulap long hol raon long olta.” Wantaem nomo, ol man we oli lukluk samting ya oli bodaon kasem graon, oli talem se: “!Jeova i trufala God! !Jeova i trufala God!” Nao Elaeja i givim oda blong holem ol profet blong Bal, karem olgeta oli go long vali blong Kison, mo kilim olgeta oli ded.​—1 King 18:38-​40.

Lesen Blong Yumi

Elaeja i soemaot fasin no fraet we i bigwan moa i bitim samting we wan man i naf blong soem. Nating se i olsem, wan man blong raetem Baebol, Jemes, i talem se: “Elaeja i wan man wetem ol filing olsem yumi nomo.” (Jemes 5:​17, NW) Hem tu i save fraet mo wari. Eksampel, biaen, Jesebel i talem strong se bambae hem i panisim olgeta we oli bin kilim ol profet blong Bal oli ded. Ale, Elaeja i girap i ronwe, mo i krae long Jeova long prea, se: “!I naf ya! Naoia, O Jeova, letem mi mi ded nomo.”​—1 King 19:4.

Jeova i no letem Elaeja blong i ded. No gat. Wetem fasin sore, hem i givhan long hem. (1 King 19:​5-8) Ol man blong God tede oli save bilif strong se Jeova bambae i givhan long olgeta tu, taem oli fesem ol bigfala wari, maet from we ol man oli agensem olgeta. Tru ya, sipos oli prea long Jeova blong askem help, hem i save givim ‘paoa we i bigfala tumas i blong Hem, i no blong man.’ From samting ya, nating we ‘oli gat plante trabol, be neva se tingting blong olgeta i foldaon.’ Yes, bambae oli kasem help blong stanap strong, olsem Elaeja i bin kasem.​—⁠2 Korin 4:7, 8.

[Ol futnot]