“Tok We Wan Man i Talem Long Prapa Taem Blong Hem”
1 ?I wan traem long yu blong serem mesej blong laef long ol narafala? ?Yu gat tingting ya se i nidim bigfala save blong mekem se ol tok blong yu oli gat paoa long ol man we oli lesin? Taem Jisas i sanem ol disaepol blong hem, hem i talem long olgeta se: “Mo taem yufala i go, yufala i mas talemaot se, ‘Taem blong God i kam King blong olgeta man long wol, i kam klosap finis.’” (Mat. 10:7) Mesej ya i no fasfas tumas mo i isi blong talemaot. Samting ya i sem mak tede.
2 Plante taem, i jes nidim smol toktok nomo blong statem wan storian. Taem Filip i mitim man Itiopia ya, hem i askem long hem se: “?Olsem wanem? ?Yu yu save mining blong tok ya we yu stap ridim?” (Wok 8:30) !Gudfala frut i kamaot long storian ya from “tok we wan man i talem long prapa taem blong hem”!—Prov. 25:11, NW.
3 Yu save yusum sem rod ya long minista wok blong yu. ?Olsem wanem? Taem yu traem gat fasin luksave mo jusum ol tok we i stret long man. Askem wan kwestin long man, mo lesin long ansa blong hem.
4 Sam Stamba Kwestin: Maet yu save traem wan long ol kwestin ya blong statem wan storian:
◼ “?Yu stap yusum Lodsprea (no, Prea Blong Masta) long wosip blong yu?” (Mat. 6:9, 10) Talem bakegen wan haf blong prea ya, nao talem se: “Sam man oli askem se, ‘?Wanem ya nem blong God we Jisas i talem se ol man oli mas mekem i kam tabu?’ Sam narafala man oli askem se, ‘?Wanem ya Kingdom we Jisas i talem se yumi mas prea from?’ ?Yu bin faenem ol gudfala ansa long ol kwestin ya?”
◼ “Samtaem yu stap tingbaot se: ‘?Wanem nao mining blong laef?’” Soem se mining blong laef i joen wetem save blong God.—Pri. 12:13; Jon 17:3.
◼ “?Yu yu ting se ded bambae i finis samtaem?” Yusum Aesea 25:8 mo Revelesen 21:4 blong givim wan ansa we man i save trastem.
◼ “?I gat wan isi rod blong winim olgeta trabol long wol ya?” Soem we God i tijim yumi blong “lavem ol man we oli stap raonabaot long [yumi].”—Mat. 22:39.
◼ “?Bambae wan bigfala trabol long skae i spolem wol blong yumi samtaem?” Serem promes blong Baebol se wol ya bambae i stap blong olwe.—Sam 104:5.
5 Talemaot gud nius long wan fasin we i isi blong man i harem save, go stret long poen mo gat fasin we i kaen. Jeova bambae i blesem ol traehad blong yu nating sipos yu serem wan sotfala “tok” nomo long saed blong trutok long ol narafala.