Mekem Samting We Jeova i Askem Yumi Blong Mekem
1. ?Sam samtaem yumi save gat wanem tingting mo filing, mo from wanem?
1 Beswan fasin blong laef tede, i blong folem ol loa blong Jeova mo ol tingting blong hem. Samting ya bambae i givhan long yumi blong putum wan gudfala fandesen blong laef we i no save finis long fiuja. (Sam 19:7-11; 1 Tim. 6:19) Be wol blong Setan i traem yumi long plante rod. Mo sin we i stap long bodi blong yumi i mekem laef i had tu. Ating sam samtaem yumi harem se i strong tumas blong mekem ol wok we Baebol i putum long yumi. (Sam 40:12; 55:1-8) Maet yumi ting se yumi no naf blong mekem olgeta samting we Jeova i askem yumi blong mekem. ?Wanem i save halpem yumi blong stretem tingting ya?
2. ?From wanem yumi save talem se samting we Jeova i askem yumi blong mekem i no strong tumas?
2 Ol Tok Blong Jeova i No Strong Tumas Blong Folem: Jeova i no save askem yumi blong mekem samting we i strong tumas long yumi. Ol tok blong hem oli no strong tumas blong folem, be oli blong mekem i gud long yumi. (Dut. 10:12, 13; 1 Jon 5:3) Hem i save se yumi sinman, “oltaem hem i stap tingbaot we yumi kamaot long asis nomo.” (Sam 103:13, 14) God i gat sore, taswe hem i glad taem yumi mekem bes blong yumi long wok blong hem, nating sipos sam samting long laef blong yumi oli blokem yumi blong wok plante. (Lev. 5:7, 11; Mak 14:8) Hem i talem long yumi blong putum ol trabol blong yumi long hem, mo hem i promes se bambae hem i mekem rod blong yumi save stanap strong.—Sam 55:22; 1 Kor. 10:13.
3. ?Olsem wanem Jeova i stap givim paoa long yumi blong stanap strong?
3 Yumi Mas Mekem Tingting Blong Yumi i Longfala: Long ol stori blong Baebol long saed blong ol man we oli holem strong bilif, olsem Elaeja, Jeremaea, mo Pol, yumi luk se olgeta evriwan ya oli mekem tingting blong olgeta i longfala. (Hib. 10:36) Jeova i givhan long olgeta taem oli kasem trabol no taem tingting blong olgeta i foldaon. (1 King 19:14-18; Jer. 20:7-11; 2 Kor. 1:8-11) Mo eksampol blong ol brata tede we oli stap tru long God, hemia tu i save givim paoa long yumi blong stanap strong. (1 Pita 5:9) Sipos yumi tingting dip long ol eksampol ya, tingting blong yumi i no save foldaon.
4. ?From wanem i impoten blong tingting oltaem long ol promes blong God?
4 Taem yumi putum tingting blong yumi i stap strong long ol promes blong God, hemia “i olsem wan angka blong holem laef blong yumi.” (Hib. 6:19) Tingting olsem i pulum Ebraham mo Sera blong obei long tok blong Jeova, nao tufala i lego ples blong tufala blong go “stap long kantri ya we God i mekem promes blong hem” long tufala. Moses tu i putum tingting blong hem i stap strong long ol promes blong God, nao hem i no fraet blong stanap strong long saed blong trufala wosip. Mo semfala tingting i givim paoa long Jisas blong stanap strong go kasem we hem i ded long wan pos. (Hib. 11:8-10, 13, 24-26; 12:2, 3) Sipos yumi holem ol promes blong God oli stap klia long tingting mo hat blong yumi, long saed blong niufala wol we stret fasin nomo bambae i stap long hem, samting ya bambae i givhan long yumi tu blong stanap strong.—2 Pita 3:11-13.
5. ?From wanem i gud blong tingtingbak long ol gudfala wok we yumi mekem finis blong stap tru long God?
5 Wan narafala samting we i save givim paoa long yumi blong mekem wok blong God, hemia taem yumi tingtingbak long ol gudfala wok we yumi mekem finis blong stap tru long God. Maet yumi tingbaot sam samting we yumi bin livim blong mekem wok blong God, mo olsem wanem yumi bin soem strong tingting long ol yia we oli pas. (Hib. 10:32-34) Samting ya bambae i pulum yumi blong tingbaot glad we yumi bin kasem taem yumi mekem samting we Jeova i askem yumi blong mekem—hemia blong ona long hem wetem ful paoa mo laef blong yumi.—Mat. 22:37.