LESEN 11
?Yu Save Mekem Wanem Blong Baebol i Givhan Long Yu?
?Samtaem yu bin fraet blong mekem wan bigfala samting? Blong mekem se i no had tumas, maet yu seraotem samting ya long ol smosmol haf, blong i isi long yu. Hemia i tru tu long fasin blong ridim Baebol. Maet yu askem se: ‘?Bae mi stat wea mo olsem wanem?’ Long lesen ya, bambae yumi tokbaot sam isi rod blong halpem yu blong enjoem riding mo stadi Baebol.
1. ?From wanem yumi mas ridim Baebol oltaem?
Wan man we i ridim Baebol o “loa blong Jehova” oltaem, bambae hem i glad mo laef blong hem bambae i rongud. (Ridim Ol Sam 1:1-3.) Blong statem, traem rid blong sam minit evridei. Moa we yu save tok blong God, moa we bambae yu enjoem Baebol riding blong yu.
2. ?Olsem wanem Baebol riding i save givhan moa long yu?
Blong Baebol riding i givhan moa long yumi, i gud yumi stop smol mo tingting long samting we yumi ridim. Yumi mas rid mo “tingting dip long hem.” (Josua 1:8, futnot) Taem yu rid, askem yu wan se: ‘Long riding ya, ?mi mi lanem wanem long saed blong Jehova? ?Olsem wanem mi save yusum save ya long laef blong mi? ?Olsem wanem blong yusum ol vas ya blong halpem ol narafala?’
3. ?Wetaem i stret blong ridim Baebol?
?Yu faenem i had blong gat taem blong ridim Baebol? Plante long yumi i olsem. I gud yu ‘yusum gud taem blong yu.’ (Efesas 5:16) Yu save mekem olsem, taem yu putum wan stret taem blong ridim Baebol evridei. Sam man oli tekem taem blong ridim Baebol eli long moning. Sam narafala oli jusum wan defren taem, maet long medel dei taem oli lanj. Sam narafala bakegen oli ridim Baebol long naet, bifo we oli slip. ?Wanem taem i stret moa long yu?
DIGIM MOA
Lanem olsem wanem blong mekem Baebol riding blong yu i intresting. Lanem blong rerem gud ol riding, blong yu lanem plante samting long Baebol stadi blong yu.
Olsem we yumi save lanem blong laekem ol defren kakae, yumi save lanem tu blong enjoem Baebol riding
4. Lanem blong enjoem Baebol riding
Maet i no isi blong stat ridim Baebol. Be yu save “lan blong laekem tumas” blong ridim Baebol, sem mak olsem we yu save lan blong laekem wan kakae we yu neva testem bifo. Ridim 1 Pita 2:2, mo tokbaot kwestin ya:
?Sipos yu ridim Baebol evridei, yu ting se yu save enjoem mo wantem ridim moa?
Plei VIDEO blong luk olsem wanem ol narafala oli stat blong enjoem Baebol riding. Mo tokbaot ol kwestin ya.
Long video ya, ?wanem ol samting we ol yangfala ya oli mas winim fastaem?
?Wanem i halpem olgeta blong gohed blong ridim Baebol oltaem?
?Olsem wanem oli mekem Baebol riding i kam intresting moa?
Sam rod blong halpem yu blong stat rid:
Jusum wan Baebol we translesen blong hem i stret, mo i isi blong kasemsave. Traem ridim Niu Wol Translesen sipos i gat long lanwis blong yu.
Fastaem, ridim ol buk blong Baebol we yu laekem moa. Luk sam eksampol long jat ya “Stat Ridim Baebol.”
Makem ol buk we yu ridim finis. Yusum jat blong “Trakem Baebol Riding” we i stap insaed long buk ya.
Yusum JW Library® app. Yu save yusum blong ridim Baebol mo lesin long Baebol riding, long eni ples we yu stap long hem tru long smat fon o wan narafala divaes.
Yusum ol apendiks insaed long Niu Wol Translesen. I gat ol map, jat, mo diksonari blong mekem riding blong yu i intresting moa.
5. Rere from Baebol stadi blong yu
Ridim Ol Sam 119:34, mo tokbaot kwestin ya:
?From wanem i gud blong prea bifo we yu ridim Baebol o rerem stadi blong yu?
?Yu mas mekem wanem blong wanwan stadi i givhan long yu? Taem yu stap rerem wanwan lesen, traem folem rod ya:
Ridim ol faswan paragraf blong wan lesen.
Jekem ol vas mo ridim, mo traem save olsem wanem i joen wetem stadi ya.
Makem wan impoten tok o ol toktok, we i givim ansa long ol wanwan kwestin. Hemia bambae i halpem yu blong tokbaot wetem tija blong yu.
?Yu yu save?
Ol Witnes blong Jehova oli yusum sam defren translesen blong Baebol. Be mifala i laekem Baebol Long Niu Wol Translesen from we translesen blong hem i stret, i klia, mo i yusum nem blong God.—Luk Web atikol ya “?Ol Witnes Blong Jehova Oli Gat Prapa Baebol Blong Olgeta?”
SAM MAN OLI SE: “I hadwok tumas blong stadi Baebol. Mi bisi, mi nogat taem mo paoa blong mekem.”
?Wanem tingting blong yu?
SAMARI
Blong kasem moa save long Baebol, i gud yu makemaot wan stret taem blong ridim Baebol, prea blong kasemsave samting we yu ridim, mo rerem stadi blong yu.
Tingtingbak
?Wanem bambae i halpem yu blong kasem moa save long Baebol?
?Wetaem i stret long yu blong ridim mo stadi long Baebol?
?From wanem i gud blong rerem ol stadi blong yu?
FAENEMAOT
Lukluk sam narafala rod we maet i halpem yu blong kasemsave moa Baebol.
Lanem tri rod blong ridim Baebol.
Faenemaot olsem wanem blong enjoem Baebol riding.
“?Olsem Wanem Baebol i Save Givhan Long Mi?—Haf 2: Laekem Blong Ridim Baebol” (Web atikol)
Lanem sam gudfala rod blong stadi, long olgeta we oli ridim Baebol plante yia finis.