JAPTA 10
Ol Rod Blong Mekem Moa Long Wok Blong God
BIFO we Jisas i sanem ol disaepol blong hem oli go talemaot Kingdom, hem i talem long olgeta se: “I gat plante kakae blong havestem, be ol man blong wok oli no plante.” Yes, bigfala wok i stap, taswe Jisas i talem se: “Yufala i mas plis long Masta blong havest, blong hem i sanem sam moa man blong wok oli kam havestem ol kakae ya blong hem.” (Mat. 9:37, 38) Jisas i tijim ol disaepol blong hem blong oli prij. Hem i soemaot se taem i sot, i se: “Bambae yufala i no save goraon long evri taon mo vilej blong Isrel yet, be Pikinini blong man bambae i kam.”—Mat. 10:23.
2 Tede tu, i gat plante samting blong mekem long wok blong prij. Taem i sot, mo gud nius blong Kingdom i mas kasem olgeta ples bifo we en i kam. (Mak 13:10) Wok blong yumi i sem mak long wok blong Jisas mo ol disaepol blong hem, be from we garen i minim fulwol, wok blong yumi i bigwan moa. I gat plante milian man long wol, be yumi no plante. Nating se i olsem, yumi save se Jehova bambae i givhan long yumi. Gud nius blong Kingdom bambae i kasem olgeta ples blong wol, mo en bambae i kam long stret taem we Jehova i makemaot. Yumi mas putum Kingdom blong God fastaem long ol narafala samting, blong yumi save finisim gud wok ya blong prij. Ale, ?yumi save traehad blong kasem wanem mak long wok blong Jehova?
3 Jisas i tokbaot samting we Jehova i wantem se ol man we oli givim laef blong olgeta i go long hem oli mekem, i se: “Yu mas lavem Jehova we i God blong yu, long olgeta hat blong yu mo long olgeta sol blong yu mo long olgeta tingting blong yu mo long olgeta paoa blong yu.” (Mak 12:30) Yumi mas mekem wok blong God wetem olgeta laef blong yumi. Hemia i min se yumi traehad long wok blong Jehova, blong soemaot se yumi lavem hem mo yumi wantem holem promes we yumi mekem taem yumi givim laef blong yumi i go long hem. (2 Tim. 2:15) Yumi save mekem olsem, nating se i gat sam trabol long laef blong yumi wanwan, mo nomata se save blong yumi i bigwan o i smol nomo. Naoia i gud yu tingbaot sam janis we yu yu gat, mo afta, yu save mekem desisen se bambae yu traehad blong kasem wanem mak long wok blong God.
PABLISA LONG KONGREGESEN
4 Olgeta man we oli bilif long trutok oli gat wok ya blong tokbaot o kam pablisa blong gud nius. Hemia nao wok we Jisas i givim long ol disaepol blong hem. (Mat. 24:14; 28:19, 20) Plante disaepol blong Jisas Kraes oli stat blong tokbaot gud nius long ol narafala, jes afta we oli harem gud nius ya. Andru, Filip, Konilias, mo plante narafala man bifo oli mekem olsem. (Jon 1:40, 41, 43-45; Wok 10:1, 2, 24; 16:14, 15, 25-34) ?Be sipos wan man i no baptaes yet, hem i save talemaot gud nius long ol narafala? !Yes! Sipos wan man i naf blong kam wan pablisa we i no baptaes, hem i save joen long wok blong prij long ol haos wanwan. Mo sipos hem i naf, hem i save joen tu long ol narafala haf blong wok blong prij.
5 Afta we wan pablisa i baptaes finis, hem i wantem mekem bes blong hem blong givhan long ol narafala blong oli kasem save long gud nius. Ol man mo ol woman tu oli save joen long wok blong prij. Yumi gat nambawan blesing ya blong givhan blong mekem wok blong Kingdom blong God i go moa, nating se yumi mekem plante wok o smol nomo. Wan man we i mekem moa long wok blong Kingdom, hem i harem gud tumas.
GO LONG PLES WE I NIDIM MOA MAN BLONG PRIJ
6 Ating kongregesen we yu stap long hem i stap wok bakegen mo bakegen long semfala teritori blong hem, mo yufala i stap givim wan gudfala witnes. Sipos i olsem, maet yu wantem muv i go long wan ples we i no gat plante pablisa, blong yu mekem moa wok. (Wok 16:9) Sipos yu yu wan elda o wan man blong givhan, maet i gat wan narafala kongregesen we i glad long help blong yu. Eria elda i save givim sam advaes long yu, olsem wanem blong givhan long wan narafala kongregesen. Sipos yu wantem go long wan narafala ples long kantri blong yu, branj ofis bambae i givim moa save long yu.
7 ?Olsem wanem? ?Yu wantem go long wan narafala kantri? Sipos yes, yu mas tingting gud fastaem. I gud yu tokbaot plan blong yu wetem ol elda long kongregesen. Sipos yu muv i go long narafala kantri, hemia wan bigfala jenis long laef blong yu mo long olgeta we bambae oli go wetem yu. (Luk 14:28) Sipos yu gat tingting blong stap smoltaem nomo, maet i moagud yu go long wan ples long kantri blong yu.
8 Long sam kantri, ol brata we oli lukaot long kongregesen oli no bin stap longtaem tumas long trutok. Ol brata ya we tingting blong olgeta i stap daon, oli glad taem ol elda we oli stap long trutok longtaem oli muv i kam long kongregesen, mo oli save lidim wok. Sipos yu yu wan elda mo yu stap tingbaot blong muv i go long narafala kantri, yu mas tingbaot se yu no go blong tekem ples blong ol brata long kantri ya. Yu go blong wok wetem olgeta. Yu pulum olgeta blong oli traehad blong kasem wok long kongregesen. (1 Tim. 3:1) Sipos oli no mekem ol samting long sem fasin we ol brata oli mekem long kantri blong yu, yu mas gat longfala tingting. Ol save we yu yu gat from we yu mekem wok blong elda plante yia, yu mas yusum blong givhan long ol brata. Nao sipos wan dei yu gobak long kantri blong yu, ol elda we oli manples bambae oli naf blong lukaot long kongregesen.
9 Bifo we branj ofis i save givim nem blong sam kongregesen we i gat moa nid, Sevis Komiti Blong Kongregesen blong yu i mas raetem wan leta blong talem se yu yu naf blong wok long ples we i gat nid. Oli mas raetem leta ya, nating se yu wan elda, wan man blong givhan, wan paenia, o wan pablisa. Sevis komiti bambae i sanem leta ya mo samting we yu wantem askem, i go long branj ofis blong kantri we yu yu wantem go long hem.
PRIJ LONG NARAFALA LANWIS
10 Maet yu wantem lanem wan narafala lanwis, o maet yu lanem saen lanwis, blong yu save mekem moa long wok blong God. Sipos yu wantem lanem blong prij long wan narafala lanwis, i gud yu toktok wetem ol elda long kongregesen blong yu mo eria elda. Oli save givim advaes mo ol gudfala toktok long yu. Long sam eria, branj ofis i givim raet long eria elda blong i mekem plan blong gat wan kos blong narafala lanwis. Hemia i blong trenem sam pablisa mo paenia blong oli save prij long lanwis ya.
WOK BLONG PAENIA
11 Ol pablisa oli mas save ol mak blong kam haftaem paenia, fultaem paenia, mo spesel paenia, mo blong mekem sam narafala wok blong God fultaem. Blong wan pablisa i kam paenia, hem i mas baptaes, i mas soemaot gudfala eksampol, mo i no mas gat plante samting long laef blong hem we i blokem hem blong i no save kasem aoa blong hem. Sevis Komiti Blong Kongregesen bambae i jekem ol pepa we pablisa i fulumap blong kam haftaem mo fultaem paenia, mo i givim raet blong hem i mekem wok ya. Be branj ofis i putumap ol spesel paenia.
12 Wan pablisa i save mekem wok blong haftaem paenia blong wan manis, plante manis, o i save gohed olwe sipos hem i naf. Plante pablisa oli glad blong mekem wok ya long sam spesel manis, olsem manis blong Memoriol mo manis we eria elda i visitim kongregesen. Samfala oli mekem long taem blong spel. Ol yangfala pablisa we oli stap skul yet be oli baptaes finis, oli save mekem haftaem paenia taem oli spel. Sipos ol pablisa oli jusum blong mekem haftaem paenia long manis Maj, Eprel o long manis we eria elda i visitim kongregesen, namba blong ol aoa we oli mekem i save godaon. Nating se yu gat wanem narafala wok long laef blong yu, be sipos yu gat klin fasin blong laef, mo yu naf blong kasem ol aoa, mo yu gat strong tingting se yu save mekem haftaem paenia blong wan manis o plante manis, ale ol elda bambae oli glad blong kasem pepa we yu yu fulumap.
13 Blong kam wan fultaem paenia, yu mas naf blong kasem aoa blong yu long wan yia. Sipos yu kam fultaem paenia, yu mas wok gud wetem kongregesen. Taem paenia i wok strong, hem i wan blesing long kongregesen. Ol paenia oli pulum ol pablisa blong oli prij plante, mo oli pulum sam blong oli joen long wok blong paenia. Be bifo we yu fulumap pepa blong kam wan fultaem paenia, yu mas wan pablisa we i soemaot gudfala eksampol, mo yu mas baptaes bitim sikis manis finis.
14 Sipos wan fultaem paenia i gat gudhan long wok blong prij, maet branj ofis i askem long hem blong i kam wan spesel paenia. Hem i mas rere blong go long eni ples we branj ofis i wantem. Plante taem, i nidim spesel paenia long ples we i no gat kongregesen, o ples we i stap longwe long wan kongregesen. Spesel paenia i prij mo i faenem ol man we oli laekem trutok, nao i statem wan niufala kongregesen. Sam kongregesen oli no gat naf pablisa blong finisim teritori blong olgeta kwik, ale branj ofis i sanem spesel paenia i go long ples ya. Sipos spesel paenia i wan elda, maet oli sanem hem i go long wan smol kongregesen, nating se i no nidim sam moa man blong prij. Ol spesel paenia oli kasem smol mane evri manis blong pem ol samting we oli nidim blong laef. Sam spesel paenia, branj ofis i sanem olgeta oli go long wan ples blong smoltaem nomo.
WOK BLONG MISINARI
15 Sevis Komiti Blong Hed Kampani i putumap ol misinari. Branj Komiti long kantri we misinari i go long hem, i sanem hem i go long ples we i gat plante man long hem. Ol misinari oli wok had blong mekem wok blong prij i kam antap moa, mo blong mekem ol wok blong kongregesen i gohed gud. Plante brata mo sista we oli kam misinari oli kasem trening long Skul Blong Kingdom Ivanjelis. Oli gat wan ples blong slip, mo oli kasem smol mane blong pem ol samting we oli nidim blong laef.
ERIA ELDA
16 Ol brata we Hed Kampani i putumap olgeta blong oli mekem wok blong eria elda, fastaem oli kasem trening mo ekspiriens taem wanwan taem oli tekem ples blong eria elda. Ol brata ya oli laekem tumas wok blong prij mo ol brata mo sista blong olgeta. Oli wok strong long wok blong paenia, oli stadi dip long Baebol, oli givim ol gudfala tok, mo oli tij gud. Oli soemaot ol fasin we oli frut blong tabu spirit, oli save skelem gud ol samting, oli no mekem i strong tumas long narafala, mo oli luksave wanem i stret mo wanem i no stret. Sipos eria elda i mared, woman blong hem we i mekem wok blong paenia, i gat gudfala fasin, mo i joen gud wetem ol narafala. Hem i gat gudhan long wok blong prij, mo hem i kasem save tu se hem i stap daon long man blong hem, taswe hem i no toktok long ples blong man blong hem mo i no toktok tumas. Ol eria elda mo ol woman blong olgeta oli folem wan program we i no isi, taswe olgeta we oli wantem wok ya oli mas gat gud helt. Ol paenia oli no fulumap pepa blong kam eria elda. Be oli talemaot long eria elda se oli glad blong mekem wok ya, nao eria elda bambae i givim advaes long olgeta.
OL SKUL
17 Skul Blong Kingdom Ivanjelis: I nidim plante moa man blong talemaot Kingdom. Olgeta oli save go long ol ples we i no gat naf pablisa blong finisim gud teritori blong olgeta, mo oli save givhan blong mekem kongregesen i kam strong. Taswe ol brata o sista we oli no mared, mo ol brata mo sista we oli mared, oli save fulumap pepa blong kasem trening long Skul Blong Kingdom Ivanjelis. Taem oli finisim skul ya, maet ol brata oli sanem olgeta blong mekem wok blong fultaem paenia, long wan ples long kantri blong olgeta we i nidim moa man blong prij. Samfala oli mekem narafala wok long kantri blong olgeta, o oli go long narafala kantri sipos i no gat wan samting i blokem olgeta. Samfala oli mekem wok blong spesel paenia blong smoltaem o maet oli gohed olwe. Long bigfala asembli, i gat wan miting blong tokbaot skul ya, mo blong givim moa save long ol paenia we oli wantem go long hem.
18 Wajtaoa Baebol Skul Blong Gilead: Oli jusum ol brata o sista we oli no mared, mo ol brata mo sista we oli mared, blong oli go long skul ya. Oli toktok Inglis, mo oli stap mekem spesel fultaem wok blong Jehova. Oli gat ol fasin we man i nidim blong mekem wok blong prij i kam antap moa, givhan long ol kongregesen, mo givhan long branj ofis blong i ron gud. Oli soemaot finis se oli glad blong givhan long ol brata, mo oli givhan long olgeta long kaen fasin blong oli save mo obei long ol rul blong Baebol mo oganaesesen blong Jehova. Taem Branj Komiti i luk se brata o sista i stret blong go long skul ya, oli askem long hem blong i fulumap pepa. Afta long skul ya, maet oli sanem hem i go prij o i go wok long branj ofis blong wan narafala kantri, o long kantri blong hem nomo.
WOK LONG BETEL
19 I wan spesel blesing blong wok long Betel. Nem ya Betel i minim “Haos blong God.” Nem ya i stret nomo, from we God nao i stap lidim wok we i gohed long ol Betel. Ol brata mo sista long Betel oli mekem impoten wok blong wokem, transletem mo sanemaot ol buk we oli tokbaot Baebol. Oli givhan bigwan long Hed Kampani we i stap lidim mo givim advaes long olgeta kongregesen long wol. Plante we oli mekem wok blong translesen long Betel, oli stap long teritori blong branj, mo oli prij long ol man we oli toktok sem lanwis we oli tanem buk i go long hem. Oli harem lanwis ya evri dei, mo oli luk sipos ol man oli kasem save long ol tok we oli yusum long ol buk.
20 Plante wok long Betel i had, mo man i mas gat paoa blong mekem. Taswe bighaf blong olgeta we branj ofis i singaot olgeta blong wok long Betel, oli ol yangfala brata we oli baptaes finis, oli gat paoa, mo oli no sik. Sipos i gat nid long Betel we i lukaot long kantri blong yu, mo yu wantem wok long Betel, yu save tokbaot ol mak we yu mas kasem, wetem ol elda long kongregesen blong yu.
BILDIM OL HAOS WOSIP
21 Wok blong bildim ol haos we oli joen wetem wosip blong yumi, i wan tabu wok, sem mak olsem wok ya we Solomon i mekem blong bildim haos blong God. (1 King 8:13-18) Plante brata mo sista oli soemaot se oli rere blong wok strong, taem oli givim taem, paoa, mo mane blong olgeta, blong joen long wok ya.
22 ?Olsem wanem? ?Yu yu naf blong givhan long wok ya? Sipos yu wan pablisa we i baptaes finis, ol brata we oli lukaot long wok ya blong bildim ol haos wosip long ples blong yu, bambae oli glad tumas we yu wantem givhan. Nating sipos yu no gat plante save long wok blong bildim haos, be oli rere blong trenem yu. I gud yu talemaot long ol elda sipos yu wantem givhan. Sam pablisa we oli baptaes finis mo oli naf, oli volontia blong bildim ol haos wosip long ol narafala kantri.
23 I gat plante janis blong joen long wok blong bildim ol haos wosip. Ol pablisa we oli baptaes finis, mo oli soemaot gudfala eksampol, mo oli save smol long wok blong bildim haos, mo oli naf blong joen long wok ya long ples blong olgeta, oli save kam volontia blong Lokol Disaen/Konstraksen (LDK). Sam narafala oli naf blong go smoltaem long ples we i longwe moa, ale branj ofis i agri blong oli kam ol volontia blong konstraksen. Oli save wok tu wik o maet oli stap kasem tri manis. Olgeta we oli gohed longtaem moa blong mekem wok ya, oli ol man we oli wok fultaem long konstraksen. Sipos wan long olgeta i go long narafala kantri, hem i man we i kam ovasi blong konstraksen. Wan Grup Blong Konstraksen, hemia olgeta we oli wok fultaem, mo ol volontia tu. Olgeta ya oli lidim wok, mo ol volontia blong Lokol Disaen/Konstraksen wetem ol volontia long ol kongregesen raonabaot, oli givhan long olgeta. Ol Grup Blong Konstraksen oli muv i go long ol defdefren ples long teritori blong branj blong bildim ol haos wosip.
?YU YU WANTEM KASEM WANEM MAK LONG WOK BLONG GOD?
24 Sipos yu givim laef blong yu i go long Jehova finis, bambae yu wantem mekem wok blong Jehova gogo i no save finis. Be taem yu stap folem rod ya, ?yu yu wantem kasem wanem mak long wok blong God? Sipos yu traehad blong kasem sam mak, bambae yu yusum taem mo paoa blong yu long waes fasin. (1 Kor. 9:26) Taem yu traehad blong kasem sam mak, hemia i givhan long yu blong yu gohed gud long wok blong God mo yu stap tingbaot ol samting we oli moa impoten.—Fil. 1:10; 1 Tim. 4:15, 16.
25 Aposol Pol i soemaot rod long yumi. (1 Kor. 11:1) Hem i wok strong long wok blong Jehova. Hem i luksave se Jehova i openem rod blong hem i kasem plante moa wok. Hem i talem long ol brata long Korin se: “Long ples ya, wan bigfala doa i open finis long mi blong mi mekem wok.” Sem mak long yumi, yumi gat plante janis blong mekem wok blong Jehova wetem kongregesen, antap moa, wok ya blong talemaot gud nius blong Kingdom. Be olsem Pol, taem yumi pastru long ‘bigfala doa ya,’ bambae “i gat plante man tu we oli agens.” (1 Kor. 16:9) Pol i rere blong mekem i strong long hem wan. Hem i talem se: “Mi kilim bodi blong mi mo mi fosem hem olsem wan slef.” (1 Kor. 9:24-27) ?Olsem wanem? ?Yu tu yu gat tingting olsem?
Sipos yu traehad blong kasem sam mak, bambae yu yusum taem mo paoa blong yu long waes fasin
26 Nating se laef blong yumi evriwan i defdefren, be yumi save traehad blong kasem sam mak long wok blong God. Plante brata mo sista we oli traehad blong kasem sam mak taem oli yangfala nomo, oli stap mekem wok blong God fultaem. Papa mo mama blong olgeta mo sam narafala oli pulum olgeta long rod ya taem oli pikinini. Ale oli gat wan gudfala laef long wok blong Jehova. Mo oli no rigret se oli bin jusum rod ya. (Prov. 10:22) Sam narafala mak we yumi save kasem, hemia blong traehad blong joen evri wik long wok blong prij, o blong statem mo lidim wan Baebol stadi, o blong spenem moa taem blong rerem ol miting. Bigfala samting, hemia se yumi stanap strong mo yumi joen fulwan long wok blong prij. Sipos yumi mekem olsem, bambae yumi givim ona long Jehova, mo bambae yumi kasem bigfala mak ya blong mekem wok blong hem gogo i no save finis.—Luk 13:24; 1 Tim. 4:7, 8.