!God i Rili Kea!

SAMTING we God i mekem blong stretem fasin stronghed we i stat long Iden, i soemaot se hem i rili lavem yumi wanwan mo hem i wantem se yumi gat wan gudfala fiuja. Plis lukluk ol poen we oli kam biaen mo ridim ol vas long Baebol blong yu.

● God i givim wol ya long yumi. Wol ya i fulap long ol naesfala samting, i gat plante anamol long hem we yumi laekem olgeta, mo graon i givim gudfala kakae.​—Ol Wok 14:17; Rom 1:20.

● God i givim wan nambawan bodi long yumi we i mekem se evri dei yumi save haremgud long plante samting. Yumi save testem kakae, lukluk ol naesfala kala long skae taem san i stap godaon, harem laf blong ol pikinini, mo filim lav blong narafala taem i putum han blong hem i goraon long yumi.​—Ol Sam 139:14.

● God i givim ol waes tok long yumi blong lidim yumi mo blong givhan long yumi blong stanap strong tru long ol trabol mo wari.​—Ol Sam 19:​7, 8; 119:105; Aesea 48:​17, 18.

● God i promes blong givim wan gudfala fiuja long yumi, wetem janis blong laef long paradaes long wol ya mo blong lukluk ol fren mo famle blong yumi we oli laef bakegen long ded.​—Luk 23:43; Jon 5:​28, 29.

● God i sanem stret Pikinini blong hem i kam long wol ya, blong i ded from yumi, mo blong yumi save gat janis blong kasem laef we i no save finis.​—Jon 3:16.

● God i putumap Kingdom blong Mesaea long heven, mo i mekem plante samting blong soemaot se i no longtaem Kingdom ya bambae i rul fulwan long wol ya.​—Aesea 9:​6, 7; Matiu 24:​3, 4, 7; Revelesen 11:15; 12:10.

● God i singaot yumi blong prea long hem, blong talemaot evri samting we i stap long hat blong yumi. Mo taem yumi mekem olsem, hem i rili lesin.​—Ol Sam 62:8; 1 Jon 5:​14, 15.

● Hem i talem bakegen mo bakegen long ol man se hem i lavem olgeta mo i tingbaot olgeta.​—1 Jon 4:​9, 10, 19.