Lukluk i Go Long Jehova Blong i Leftemap Tingting Blong Yu

1. ?Laef blong ol man Jiu long Babilon i olsem wanem?

TRAEM tingbaot filing blong ol man Jiu we oli laef long Babilon. Oli bin luk we ol enemi oli distroem kantri blong olgeta. Mo from sin blong olgeta mo blong ol olfala blong olgeta, ol enemi oli tekemaot olgeta long kantri blong olgeta mo sanem olgeta i go long wan narafala kantri. (2 Kron. 36:​15, 16, 20, 21) I tru se long Babilon oli save mekem ol samting we oli stap mekem evri dei. (Jer. 29:​4-7) Be yet, i no isi from we i no olgeta we oli jusum blong kam laef long ples ya. Taswe, ?wanem filing blong olgeta? Makem tok we wan long olgeta i talem i se: “Taem mifala i stap sidaon klosap long ol reva blong Babilon. Mifala i krae taem mifala i tingbaot Saeon.” (Sam 137:1) Yes, ol man Jiu oli nidim ol tok blong leftemap tingting blong olgeta. ?Be hu bambae i mekem samting ya?

2-3. (1) ?Jehova i mekem wanem long ol man Jiu? (2) ?Bambae yumi tokbaot wanem long stadi ya?

² Jehova i “God ya we i mekem olgeta samting blong leftemap tingting blong man.” (2 Kor. 1:3) Jehova i lavem ol man, taswe hem i leftemap tingting blong ol man we oli stap klosap long hem. Hem i save se sam long ol man Jiu ya we oli kalabus long Babilon, bambae oli akseptem we hem i stretem olgeta mo oli kambak long hem. (Aes. 59:20) Taswe, bitim wan handred yia bifo we oli go kalabus, hem i pulum profet Aesea blong raetem wan buk we i karem nem blong hem. ?From wanem hem i raetem buk ya? Aesea i talem se: “God blong yufala i talem se: ‘Yufala i toktok gud long ol man, yufala i toktok gud long ol man blong mi.’” (Aes. 40:1) Yes, Jehova i yusum profet ya blong raetem ol tok we i save leftemap tingting blong ol man Jiu long ol yia we i kam.

³ Wanwan taem, yumi tu yumi nidim ol tok blong leftemap tingting sem mak olsem ol man Jiu ya. Taswe, long stadi ya bambae yumi tokbaot tri samting we Jehova i mekem blong leftemap tingting blong ol man Jiu: (1) Hem i promes blong fogivim olgeta we oli tanem tingting blong olgeta, (2) hem i givim hop long ol man blong hem, mo (3) hem i mekem se oli no moa fraet. Taem yumi stap tokbaot ol trifala poen ya, makem olsem wanem ol tok we Jehova i talem oli save leftemap tingting blong yumi.

JEHOVA I GLAD BLONG FOGIVIM YUMI

4. ?Olsem wanem Jehova i soemaot se hem i God ya we i gat sore? (Aesea 55:7)

⁴ Jehova i “Papa we i gat sore.” (2 Kor. 1:3) Hem i soemaot fasin ya taem hem i promes blong fogivim ol man Jiu we oli tanem tingting blong olgeta. (Ridim Aesea 55:7.) Hem i se: “From we mi mi lavem man oltaem, bambae mi sore long yu.” (Aes. 54:8) ?Olsem wanem Jehova i soemaot se hem i gat sore? Nating se ol man Jiu oli stap kasem yet nogud frut blong samting we oli mekem, be Jehova i promes se bambae oli no stap olwe long Babilon. Bambae oli stap blong smoltaem nomo. (Aes. 40:2) I sua se olgeta we oli tanem tingting blong olgeta, oli harem gud long ol tok ya. !Mo hemia i leftemap tingting blong olgeta!

5. ?From wanem yumi talem se yumi gat moa pruf i bitim ol man Jiu bifo, se Jehova i glad blong fogivim yumi?

⁵ ?Yumi lanem wanem? Jehova i glad nomo blong fogivim ol man blong hem long wan fasin we i bigwan tumas. Tede yumi gat moa pruf i bitim ol man Jiu bifo, se Jehova i glad blong fogivim yumi. ?From wanem yumi talem olsem? Hemia from we yumi kasemsave long bigfala samting we Jehova i mekem blong fogivim yumi. Plante handred yia afta we Aesea i talemaot profet tok ya, Jehova i sanem Boe blong hem i kam long wol, blong i givim wan ransom blong i pemaot ol sinman we oli tanem tingting blong olgeta. Ransom ya i mekem se Jehova i save “tekemaot” sin fulwan. (Wok 3:19; Aes. 1:18; Efes. 1:7) !Yumi glad tumas blong wosipim wan God olsem we i gat sore!

6. ?Sipos yumi tingbaot se Jehova i glad blong fogivim yumi, hemia i mekem i gud long yumi olsem wanem? (Mo tu, yu luk pija.)

⁶ Ol tok blong Jehova long Aesea 55:7 i save leftemap tingting blong yumi sipos yumi harem se yumi gilti. Maet sam long yumi, afta we oli tanem tingting blong olgeta, oli gohed yet blong gilti from ol sin we oli mekem bifo. Antap moa sipos oli stap kasem yet nogud frut blong ol nogud samting we oli bin mekem. Be sipos yumi talemaot sin blong yumi finis mo yumi no moa mekem sin ya bakegen, yumi save sua se Jehova i fogivim yumi. Mo taem Jehova i fogivim yumi, hem i jusum blong no moa tingbaot ol sin ya. (Skelem wetem Jeremaea 31:34.) Taswe, sipos Jehova i no moa tingbaot ol sin blong yumi, yumi tu yumi no mas tingbaot. Samting we Jehova i tingbaot moa, hemia ol samting we yumi stap mekem naoia, be i no ol mastik we yumi mekem bifo. (Esik. 33:​14-16) Mo i no longtaem, Papa blong yumi we i gat sore bambae i tekemaot fulwan ol nogud samting we yumi stap kasem from ol sin we yumi mekem.

7. ?Wanem i save pulum yumi blong go toktok long ol elda, sipos yumi harem se yumi stap haedem wan sin?

⁷ ?Yumi mas mekem wanem sipos yumi gilti from we yumi haedem wan bigfala sin? Baebol i talem se yumi mas askem help long ol elda. (Jem. 5:​14, 15) Be maet i had blong yumi talemaot nogud samting we yumi mekem. Be sipos yumi tanem tingting blong yumi, mo yumi tingbaot se Jehova mo ol man we hem i putumap bambae oli soemaot lav mo sore long yumi, bambae yumi glad blong go toktok wetem olgeta. Hemia wan eksampol we i soemaot olsem wanem Jehova i leftemap tingting blong wan brata we nem blong hem Arthur,a we tingting blong hem i stap stikim hem. Hem i talem se: “Blong klosap wan yia, mi stap lukluk ponografi. Be afta we mi harem wan tok long miting we i tokbaot tingting blong yumi we stikim yumi, mi talemaot long waef blong mi mo ol elda. Afta long hem, mi harem se tingting blong mi kwaet. Be mi stil harem nogud yet from samting we mi bin mekem. Ol elda oli mekem mi tingbaot bakegen se Jehova i no lego mi. Hem i stretem yumi from we hem i lavem yumi. Samting we oli talem i tajem hat blong mi mo i halpem mi blong jenisim tingting blong mi.” Tede, Arthur i mekem wok blong paenia mo i wan man blong givhan. !I gud tumas blong save se Jehova i sore long yumi, taem yumi tanem tingting blong yumi!

JEHOVA I GIVIM HOP LONG YUMI

8. (1) ?Jehova i givim wanem hop long ol man Jiu? (2) Folem Aesea 40:​29-31, ?hop ya i mekem wanem long ol man Jiu we oli tanem tingting blong olgeta?

⁸ Long lukluk blong ol man, ol man Jiu we oli stap long Babilon oli no gat hop. Ol man oli save se Wol Paoa ya Babilon i neva letem ol man we oli kalabus oli go fri. (Aes. 14:17) Be Jehova i givim wan hop long ol man blong hem. Hem i promes se bambae hem i mekem olgeta oli kam fri, mo i no gat wan samting i save stopem hem. (Aes. 44:26; 55:12) Long ae blong Jehova, Babilon i olsem das nomo. (Aes. 40:15) Wan smol win nomo i save tekem das ya i gowe. ?Hop ya i mekem wanem long ol man Jiu? I leftemap tingting blong olgeta. Be i no hemia nomo. Aesea i raetem se: “Olgeta we oli putum hop blong olgeta long Jehova, bambae oli kasembak paoa.” (Ridim Aesea 40:​29-31.) Yes, hop i mekem oli harem gud, i olsem we “oli gat wing olsem igel, oli flae i go antap.”

9. ?Wanem i halpem ol man Jiu blong trastem ol promes blong Jehova?

⁹ Jehova i pruvum tu long ol man Jiu se oli save trastem ol promes blong hem. ?Hem i mekem samting ya olsem wanem? Tingbaot ol profet tok blong hem we oli bin kamtru finis. Ol man Jiu oli save se Asiria i winim kingdom blong Isrel long not mo i tekem ol man oli go kalabus. (Aes. 8:4) Mo tu, oli bin luk we Babilon i distroem Jerusalem mo i tekem ol man oli go kalabus. (Aes. 39:​5-7) Mo oli bin luk tu taem king blong Babilon i mekem ae blong King Jedekia i kam blaen nao i tekem hem i go long Babilon. (Jer. 39:7; Esik. 12:​12, 13) Evri samting we Jehova i talem oli bin kamtru. (Aes. 42:9; 46:10) !I sua se hemia i mekem bilif blong olgeta i strong, se promes we Jehova i mekem blong tekemaot olgeta long Babilon bambae i mas kamtru!

10. ?Long ol las dei ya wanem i save halpem yumi blong gohed blong tingbaot hop we yumi gat?

¹⁰ ?Yumi lanem wanem? Taem yumi harem nogud, hop i save mekem yumi harem gud mo i givim paoa long yumi bakegen. Yumi laef long wan taem we i had mo yumi fesem plante enemi we oli gat paoa. Nating se i olsem, tingting blong yumi i no mas foldaon. Jehova i givim wan nambawan hop long yumi, hemia laef olwe long wan wol we i gat pis mo i sef. Yumi mas mekem se hop ya i stap strong long tingting mo hat blong yumi. Sipos no, bambae i olsem we yumi lukluk tru long wan doti windo blong lukluk wan naesfala ples. ?Be yumi save mekem wanem blong “klinim windo” o mekem hop ya i stap strong long tingting blong yumi? I gud we oltaem yumi pijarem laef long niufala wol. Mo tu, yumi save ridim ol atikol, wajem ol video, lesin long ol singsing we i tokbaot hop ya, prea long Jehova, mo tokbaot ol promes we yumi wantem tumas blong luk oli kamtru.

11. ?Wanem i halpem wan sista we i kasem wan bigfala sik blong i kasembak paoa?

¹¹ Tingbaot olsem wanem hop i leftemap tingting mo i givhan long wan sista we nem blong hem Joy, we i kasem wan bigfala sik. Hem i talem se: “Taem mi harem nogud mi talemaot ol dip filing blong mi long Jehova, from mi tingbaot se hem i kasemsave long mi. Nao Jehova i givim ‘paoa ya we i bigwan bitim mak’ long mi.” (2 Kor. 4:7) Mo tu, Joy i pijarem hem wan long niufala wol we “bambae i no gat wan man long ples ya i talem se: ‘Mi mi sik.’” (Aes. 33:24) Yumi tu, sipos yumi talemaot ol wari blong yumi long Jehova mo yumi tingbaot nomo hop we yumi gat, bambae yumi kasembak paoa.

12. ?Wanem i mekem se yumi trastem ol promes blong Jehova? (Mo tu, yu luk pija.)

¹² Tede tu, yumi gat plante risen blong trastem ol promes blong Jehova sem mak olsem ol man Jiu. Tingbaot ol profet tok we oli stap kamtru naoia. Eksampol, yumi luk finis wol paoa ya we ‘haf blong kingdom blong hem i strong mo haf i no strong.’ (Dan. 2:​42, 43) Mo tu, yumi harem we ‘olbaot long wol graon i seksek,’ mo yumi joen blong talemaot gud nius long “olgeta ples long wol.” (Mat. 24:​7, 14) Ol profet tok ya mo plante narafala moa, oli mekem yumi bilif strong long ol promes blong Jehova we oli no kamtru yet.

JEHOVA I MEKEM YUMI NO FRAET

13. (1) ?Ol man Jiu bambae oli fesem wanem problem long taem ya we klosap oli go fri? (2) Folem Aesea 41:​10-13, ?olsem wanem Jehova i leftemap tingting blong olgeta?

¹³ Nating se Jehova i givim wan nambawan hop long ol man Jiu, be hem i save se bambae oli gohed blong fesem trabol taem oli kam fri. Jehova i bin talemaot se long taem we klosap ol man Jiu bambae oli go fri, ol enemi bambae oli kam spolem gud ol nesen raonabaot mo biaen distroem Babilon. (Aes. 41:​2-5) ?Olsem wanem? ?Ol man Jiu oli wari? Nogat. Jehova i talemaot finis long olgeta se: “Yu no mas fraet, from we mi mi stap wetem yu. Yu no mas wari, from we mi mi God blong yu.” (Ridim Aesea 41:​10-13.) ?Hem i minim wanem taem hem i talem se “Mi mi God blong yu”? ?Hem i stap talem long ol man Jiu blong oli wosipim hem? Nogat. Olgeta oli wosipim Jehova finis, be hem i mekem oli tingbaot se hem i stap long saed blong olgeta.—Sam 118:6.

14. ?Jehova i mekem wanem moa blong ol man Jiu oli no fraet?

¹⁴ Jehova i mekem ol man Isrel oli no fraet tu, taem hem i mekem oli tingbaot bigfala paoa mo save blong hem. Hem i askem ol man Jiu blong oli lukluk ol sta long heven. Hem i talem long olgeta se hem nao i krietem ol sta, mo tu hem i save gud nem blong ol sta ya wanwan. (Aes. 40:​25-28) !Sipos Jehova i save gud nem blong ol sta ya, i sua se hem i save gud nem blong ol man blong hem tu! Mo sipos Jehova i gat paoa blong krietem ol sta, i sua se hem i gat paoa blong halpem ol man blong hem. Yes, ol man Jiu oli no nid blong wari o fraet.

15. ?Olsem wanem Jehova i rerem ol man Jiu from ol samting we bambae oli hapen biaen?

¹⁵ Jehova i rerem ol man blong hem tu from ol samting we bambae oli hapen biaen. Long buk blong Aesea, God i talem long ol man blong hem se: “Yufala i go insaed long ol rum blong yufala we i stap insaed olgeta, mo yufala i stap insaed, yufala i satem doa. Yufala i haed smoltaem gogo kasem we kros blong God i godaon.” (Aes. 26:20) Ol tok ya oli kamtru taem King Saeras i winim Babilon. Wan man Grik we i stadi long histri i talem se taem Saeras i kam insaed long Babilon, hem i “givim oda long [ol soldia blong hem] blong oli kilim eni man we i stap aotsaed.” !Traem tingbaot filing blong ol man we oli laef long Babilon, oli mas fraet ya! Be ol man Jiu oli sef from we oli obei long advaes we Jehova i givim.

16. ?From wanem yumi no mas wari bitim mak from ol samting we bambae oli hapen long fiuja? (Mo tu, yu luk pija.)

¹⁶ ?Yumi lanem wanem? I no longtaem bambae yumi fesem wan bigfala trabol we i neva hapen bifo. Taem trabol ya i stat, ol man bambae oli konfius mo oli fraet. Be yumi ol man blong Jehova, bambae yumi no fraet, from yumi save se Jehova i God blong yumi. Bambae yumi stanap strong from yumi save se “klosap nao bambae [yumi] fri.” (Luk 21:28) Long taem ya we wan grup blong ol nesen bambae i atakem yumi, bambae yumi stanap strong. Jehova bambae i yusum ol enjel blong protektem yumi mo i givim advaes blong yumi save stap sef. ?Olsem wanem yumi save kasem ol advaes ya? Yumi mas wet mo luk. Be i luk olsem se bambae yumi kasem ol advaes ya long ol kongregesen blong yumi. Maet hemia nao ‘ol rum blong yumi we i stap insaed olgeta,’ we bambae yumi go long hem blong stap sef. ?Olsem wanem blong rerem yumi from ol samting we bambae i hapen long fiuja? Yumi mas stap klosap long ol brata mo sista, glad blong obei long ol advaes we yumi kasem long oganaesesen, mo trastem fulwan se Jehova nao i stap lidim oganaesesen blong yumi.—Hib. 10:​24, 25; 13:17.

17. ?Olsem wanem yumi save lukluk i go long Jehova blong i leftemap tingting blong yumi?

¹⁷ Nating se laef blong ol man Jiu long Babilon i no isi, be Jehova i mekem ol samting blong leftemap tingting blong olgeta. Mo hem i save mekem sem mak tu long yumi tede. Taswe, nomata wanem bambae i hapen long fiuja, i gud yumi gohed blong lukluk i go long Jehova blong leftemap tingting blong yumi. Yes, yumi mas trastem se Jehova i gat bigfala sore. Yumi gohed blong mekem hop blong yumi i stap strong long tingting blong yumi. Mo yumi mas tingbaot se wetem help blong Jehova we i God blong yumi, i no gat wan samting we i save mekem yumi fraet.