Tsá Nóóhkanistsiiwa Ipáítapiiyssini Anníhka Matsowáʼpiʼnssimaani?

Jehovah kanáómiaʼnistssokaʼpiistsi iihkotsííwaiksi Adam ki Eve. Genesis 1:28

Jehovah áʼpistotoyiiwa matóómaakiiwa Eve, ki iitohkotsííwayi Adam ááhkitohpokáópiimahsáyi.​—Genesis 2:21, 22.

Jehovah iihpáʼpistotoyiiwaiksi ááhkssoksístomssaawa ki ááhkáísoksskskaʼtakssaawa, máátohkaaniaʼsiyaawa.

Ookóówanoaawa niitsínihkatooʼpa Eden matsowáʼpiʼnssimaani, iitssítokstsiiwa niítahtaanistsi ki oyʼssátaiksi miistsííksi ki iitáíksowaʼpáómaahkaiksi.

Jehovah iitssitsípssatsiiwaiksi, issksínimaʼtsiiwaiksi, ikkamóóhksisstsiiyssaawa áakomanistáípaitapiiyaawa anníhka matsowáʼpssksááhkoyi.

Niʼtókskamma miistsísa Iihtsipáítapiiyoʼpa áánistsiiwaiksi ááhkssawohtsoyssaawa. Genesis 2:16, 17

Jehovah áíʼstamáttsiyiiwa Adam ki Eve ámohka niʼtókskamma oyʼssátayi miistsísa ki iitánistsiiwaiksi ááhkssawohtsoyssaawa, ikkámohtsoyssaawa otáaksiʼnssaawa.

Ámohka niʼtókskamma naatoyítapiwa aʼpímmiiwa Iihtsipáítapiiyoʼpa. Stámiitokáʼpatoʼsiwa.

Makáʼpatoʼsiwa máátsstatsiiwa Adam ki Eve ááhkanistaiʼtoahsi Jehovah. Ohtsíssitapiiwa piksííksiinaawa ááhkohtááttsiistotoahsi Eve kiánnáyi stámiitssáyiwa, áániiwa ikkámohtsoyssi ánnahka miistsísa otáakssawo­nawáíʼnssi, otáakiʼtomanistsissi Iihtsipáítapiiyoʼpa.​—Genesis 3:1-5.