ˈCƖƐCƖƐKÏBHË 6

-Yɩ kää ˈŋlɩ ˈn -n yiɛ Biblë a gbɛlɩ ˈmö zɛlɩ, -sɩɩ zɛmö

Zaah 10:33-36

ˈSAA -N ˈKÄÄ NƲ: Tɩ ˈfʋ Biblë a gbɛlɩ ˈmö zɛlɩ nzɩ -n ˈkä ˈyukusɛ mö ˈyize. Maa, sɛɛ Biblë a gbɛlʋ -n zɛlɩɛ ˈmö -ɲɛ -naˈa wɛlɩɩ -n bhïlaa ˈsɔ mönɩɛ yɔwʋ, ˈyukwlipʋnɩwa nɩ ˈyɩ -sɩbhä ˈylɩmö.

SƐƐ -N ˈKÄÄ ˈZƲ:

Pɩɛnɩ dɛsɛkäkïbhï ˈwʋ. -N -kä Biblë a gbɛlʋ ˈmö zɛlɩ ˈwë, gbɛlʋ ˈla ˈmö a wɛlɩkïbhï -yɩ -glɛ -naˈa bhïlawɛlɩɩ a dɛsɛkäkïbhï ˈwʋ, mö -n nɩ pɩɛnɩ ˈwʋ. -N ˈkä -sɩbhä ˈzʋ a dɔˈwʋ, -n bhɛnɩ -n ˈkɩ -bɛ ˈwʋ ˈŋlɩ -dɩ, -n -käˈɛ -wa, ghlɛnɩ nimïyɩbhäkïbhë ˈmö nzɩ dɛsɛkäkïbhï -n pɩɛnɩɛ ˈwʋ, ˈyukwlipʋnɩwa ˈkɩ yɩbhlɩnɩ cuu.

-N -kä kïbhï -mimii ˈmö ghlɛnɩ -n ˈkä Biblë a gbɛlʋ zɛmö -sɛ, sɛɛ -naˈa bhïlawɛlɩɩ a dɛsɛkäkïbhï -ɲɛ gbɛlʋ ˈla ˈsɔ mönɩɛ yɔwʋ, ˈyukwlipʋnɩwa nɩ ˈyɩ -sɩbhä ˈylɩmö.
Kïbhëa -a kää dɛsɛ, ˈyukwlipʋnɩwaa ˈkää ˈwlumö ˈzʋ, mö -n nɩ pɩɛnɩ ˈwʋ. -N -kä Biblë a gbɛlʋ ˈmö zɛlɩɛ yi, -yɩ kää ˈŋlɩ ˈn gbɛlʋ ˈla ˈmö a dɛsɛkäkïbhï -ɲɛ -naˈa bhïlawɛlɩɩ ˈsɔ mönɩɛ yɔwʋ, -sɛsɛni ˈmö.

-N -kä Biblë a gbɛlʋ ˈmö -sɛsɛnɩ dɔˈwʋ -wʋ, -naˈa Biblë nɩ -kälɩ ˈklʋ. Mii ˈkää ˈyukwlipʋwaa kwänɩ, wa ˈkɩ ˈmö ˈnʋ nɩɩ, Biblë a gbɛlʋ -n zɛlɩɛ ˈmö ˈn ˈsaa -n bhïlaa, yɩ -glɛglɛnɩ -tiamö.
Sɛɛ -n ˈkää Biblë a gbɛlʋ ˈmö -sɛsɛnɩ wa ˈkʋ ˈmö ˈnʋʋ, ˈzʋ -sɩbhä. -Mä gbɛlʋ ˈmö a ˈkïbhïyiea ˈwuë -yɩ cɛlɩɛ -mä, mö -n ˈnɩɛ -kä, -n ˈkä ˈmö -sɛsɛnɩ. ˈSaa ˈyukwlipʋnɩwa -yiɛ ˈkɩ, ˈn kïbhï -yɩ kää dɛsɛ, sɛɛ -n ˈkää ˈzʋ wa ˈkɩ sasɛ ˈmö ˈnʋʋ, mö -n nɩ tɛlɩ sɛ.