Teklah Kam, Ngena Ate Jahwe Ngidah Kam!

1. Banci saja kai si igejapken piga-piga umat Jahwe si setia?

PASTI meriah kel ukurta perban ikataken bas Pustaka, “Meriah ukur Jahwe ngidah umatNa.” (Ms. 149:4) Tapi mon-mon, piga-piga arah kita pernah kitik ukurna, janah bagenda ia rukur, ‘Ngena nge ate Jahwe ngidah aku?’ Bas jaman Pustaka pe, enterem umat Jahwe si bage perasanna.—1 Sam. 1:​6-10; Jop 29:​2, 4; Ms. 51:11.

2. Ise si banci ndatken ngena ate Jahwe?

² I bas Pustaka, jelas ituriken maka manusia si la sempurna banci ndatken ngena ate Jahwe, ntah pe erban meriah ukurNa. Uga carana? Arus kita erkiniteken man Jesus Kristus janah iperidiken. (Joh. 3:16) Alu bage, sicidahken man jelma si enterem maka enggo ertobat kita arah dosa-dosata, janah enggo erjanji kita man Dibata guna ngelakoken peratenNa. (Perb. 2:38; 3:19) Meriah ukur Jahwe adi silakoken si e ndai kerina, gelah banci kita jadi temanNa si rembak. Adi terus silakoken si mehulina guna nepati janjita sanga mbaktiken diri man Jahwe, ngena ate Jahwe kita janah anggapNa kita temanNa si rembak.—Ms. 25:14.

3. Kai nge kari sibahas?

³ Tapi, engkai maka lit kalak si mon-mon erpengakap maka la ngena ate Dibata ngidah ia? Uga Jahwe mbuktiken maka ngena ateNa ngidah kita? Janah uga kita banci tek maka ngena ate Jahwe ngidah kita sekalak-sekalak?

ENGKAI MAKA LIT SI ERPENGAKAP LA NGENA ATE JAHWE NGIDAH IA?

4-5. Amin pe la siakap merga banta, banci kita tek nandangi kai?

⁴ Lit kalak si erjuang ngelawan perasan la kapna merga bana mulai kitik-kitik nari. (Ms. 88:15) Sekalak turang senina si gelarna Adrián ngataken, “Lalap la kuakap merga bangku. Kuinget sanga aku kitik denga, kutotoken keluargaku gelah banci masuk ku Pardis, tapi tek aku, labo aku mungkin masuk ku je.” Tony, si orang tuana labo Saksi Jahwe ngataken, “La pernah ikataken orang tuaku keleng atena aku, ntah pe bangga ia ngidah aku. Emaka, kai pe si kulakoken labo kuakap banci erban meriah ukur kalak e.”

⁵ Adi mon-mon la siakap merga banta, perlu siinget maka Jahwe kap si narik kita. (Joh. 6:44) Idah Jahwe sipat-sipatta si mehuli si banci saja la siidah, janah tehNa isi pusuhta. (1 Sam. 16:7; 2 Kro. 6:30) Emaka, banci kita tek man baNa sanga katakenNa maka meherga akapNa kita.—1 Joh. 3:​19, 20.

6. Uga perasan Rasul Paulus kerna dosa-dosana si mbarenda?

⁶ Sope erlajar kebenaren, piga-piga arah kita ngelakoken kai si la mehuli. Enda banci saja erban lalap salah siakap banta. (1 Pet. 4:3) Kalak Kristen si enggo setia ngelayani Jahwe pe, arus erjuang ngelawan kelemahenna. Adi kam uga? Pernah nge akapndu la ampuni Jahwe salahndu? Adi bage, pasti terapuli kam sanga tehndu maka umat Jahwe si setia pe, erjuang ngelawan perasan si bage. Contohna, latih kel ukur Rasul Paulus sanga ukurina kelemahenna. (Rom. 7:24) Memang enggo ertobat Paulus arah dosa-dosana janah iperidiken. Tapi, tetap denga ikatakenna maka ia “si rendahna i antara rasul-rasul” ras “si erdosana.”—1 Kor. 15:9; 1 Tim. 1:15.

7. Kai si perlu siinget adi lalap salah siakap banta?

⁷ Enggo erjanji Bapakta si i surga ngampuni kita adi tuhu-tuhu kita menyesal ras ertobat. (Ms. 86:5) Emaka, adi enggo ertobat kita, banci kita tek maka enggo ampuni Jahwe kita, bagi si ijanjikenNa.—Kol. 2:13.

8-9. Kai si perlu siinget adi la pernah siakap banci siban meriah ukur Jahwe?

⁸ Kita kerina merhat ngelakoken si mehulina bas ngelayani Jahwe. Tapi, banci saja lit kalak si la kapna ndigan pe banci banna meriah ukur Jahwe. Sekalak turang senina si gelarna Amanda ngataken, “Adi kuakap, mere si mehulina man Jahwe berarti arus lalap kulakoken terbuen man baNa. Emaka, rusur aku rusaha ngelakoken kai si lebihen asangken si banci kulakoken. Sanga ‘gagal’ aku, kecewa aku ngidah bangku, janah tek aku Jahwe pe bage perasanNa.”

⁹ Kai si perlu siinget adi la siakap banci siban meriah ukur Jahwe? Ingetlah, maka Jahwe e masuk akal. Labo pernah arapkenNa silakoken lebihen asangken si banci silakoken. ErgaiNa kai pe si mehulina si enggo silakoken sedekah enda. Selain si e, cuba ukuri contoh-contoh si lit bas Pustaka kerna kalak si ngelayani Jahwe alu bulat ukur. Contohna Paulus. Kerja keras ia ngelayani Jahwe ertahun-tahun dekahna. Lakokenna perdalanen si dauhna ribun kilometer, janah ibentukna mbue runggun. Tapi, sanga berubah keadanna janah lanai ia banci erberita bagi si sange buena, lanai nge ngena ate Jahwe ngidah ia? Labo bage. Tetap pasu-pasu Jahwe ia perban terus lakokenna kai si banci lakokenna. (Perb. 28:​30, 31) Bage ka pe, mon-mon berubah kai si banci silakoken man Jahwe perban keadanta. Tapi, si penting man Jahwe eme kai alasenta ngelakokenca. Gundari, mari sibahas piga-piga cara Jahwe mbuktiken maka ngena ateNa ngidah kita.

UGA CARA JAHWE MBUKTIKEN MAKA NGENA ATENA NGIDAH KITA?

10. Uga carana gelah banci “sibegi” ikataken Jahwe ngena ateNa ngidah kita? (Johanes 16:27)

¹⁰ Arah Pustaka. Meriah ukur Jahwe mbuktiken maka ngena ateNa kalak si ikelengiNa. Bas Pustaka, lit dua kali kataken Jahwe man Jesus maka keleng ateNa ia janah ngena ateNa ngidah AnakNa e. (Mat. 3:17; 17:5) Merhat nge kam megi Jahwe ngataken maka ngena ateNa ngidah kam? Gundari, labo langsung ngerana Jahwe man banta arah surga nari. Tapi, ngerana Ia banta erkelangken Pustaka. Banci “sibegi” sora Jahwe sanga sibaca kata-kata Jesus bas Injil. (Baca Johanes 16:27.) Rusur ikataken Jesus ngena atena ngidah murid-muridna si setia amin pe kalak e la sempurna. Sanga sibaca kata-kata Jesus e, banci sibayangken bage ka nina Jahwe man banta. Engkai? Perban usih Jesus sipat-sipat Bapakna alu sempurna.—Joh. 15:​9, 15.

11. Engkai maka adi siadapi kiniseran, labo ertina lanai ngena ate Jahwe ngidah kita? (Jakup 1:12)

¹¹ Arah perbahanenNa. Merhat kel Jahwe nampati kita. Contohna alu mereken keperlunta. Mon-mon, ipediat Jahwe sinanami kiniseran, bali bagi Jop si setia. (Jop 1:​8-11) Tapi, labo ertina lanai ngena ate Jahwe ngidah kita. Situhuna, si e jadi kesempaten man banta guna mbuktiken maka keleng kel ateta Jahwe janah siandalken Ia. (Baca Jakup 1:12.) Selain si e, sanga siadapi kiniseran, banci sigejapken kekelengen Jahwe ras penampat si iberekenNa gelah banci kita megenggeng.

12. Kai si banci sipelajari arah pengalamen Dmitrii?

¹² Perdiateken pengalamen Dmitrii, sekalak turang senina si tading i Asia. Lanai ia erdahin janah erbulan-bulan dekahna lalap la datna dahin. Emaka, reh rusurna ia erberita guna mbuktiken maka tek ia man Jahwe. Erbulan-bulan kenca si e pe, lalap la datna dahin. Dung e, mekelek ka penakitna, la ia banci ku japa pe, bas ingan medem ia lalap. Emaka mulai gagal kapna bana selaku perbulangen ras perbapan. Tersungkun-sungkun ka ia, ntah lanai bo ngena ate Jahwe ngidah ia. Bas sada berngi, anakna si diberu ncetak kata-kata bas Jesaya 30:15 bas sada lembar kertas. Isina: “Adi tetap kena tek janah la kena mbiar, megegeh pagi kena.” Nce, ibaba anakna kertas e ku samping ingan medem bapakna, janah nina, “Pak, adi sedih kam, banci ingetndu ayat enda.” Dungna, sadar Dmitrii maka perban pasu-pasu Jahwe, lit denga pangan, paken, ras ingan tading keluargana. Nina Dmitrii ka, “Si perlu kulakoken eme tetap tenang ras terus tek man Dibataku.” Adi sangana adapindu masalah si bage, banci kam tek maka ermediate Jahwe man bandu, janah pasti sampatiNa kam gelah megenggeng.

13. Ise si ipake Jahwe guna mbuktiken maka ngena ateNa ngidah kita, janah uga carana?

¹³ Arah turang senina. Banci ka ipake Jahwe turang seninata guna mbuktiken maka ngena ateNa ngidah kita. Contohna, banci iahkenNa kalak e mpeseh kata-kata si mpegegehi i bas waktu si tepat. Bage me si igejapken sekalak turang senina bas Asia sanga latih kel ukurna. Lanai lit dahinna janah mekelek penakitna. Selain si e, ilakoken perbulangenna dosa si serius, emaka lanai ia banci ngelayani jadi pertua. Bagenda nina turang senina e, “La kuteh engkai maka kerina e terjadi. Kuakap, lit kulakoken kesalahen si erban lanai ngena ate Jahwe ngidah aku.” Ertoto turang senina e man Jahwe. Ipindona gelah ipetetap Jahwe ukurna maka ngena denga ate Jahwe ngidah ia. Kai si ilakoken Jahwe? Nina turang senina e, “Ngerana pertua-pertua ras aku. Petetap kalak e ukurku maka keleng denga nge ate Jahwe aku.” Kenca piga-piga waktu, mulihi ka pindona penampat Jahwe. Nina, “Bas wari e ka, kualoken surat arah turang senina bas runggun. Sanga kubaca kata-kata kalak e si mpegegehi, kugejapken maka enggo ijawap Jahwe totoku.” Payo, rusur kel ibuktiken Jahwe maka ngena ateNa ngidah kita arah kata-kata si mpegegehi si ikataken kalak si deban.—Ms. 10:17.

14. Alu cara kai ka Jahwe mbuktiken maka ngena ateNa ngidah kita?

¹⁴ Ibuktiken Jahwe ka maka ngena ateNa ngidah kita alu nggunaken turang seninata bas mere nasehat si iperluken. Contohna, bas abad si pertama, igunaken Jahwe Rasul Paulus guna nulis 14 surat man turang seninana. Bas surat-suratna e, lit nasehat si perkeleng tapi tegas. Engkai maka isuruh Jahwe Paulus erban surat si bage? Perban Jahwe e Bapak si mehuli janah persingetiNa anak-anakNa ‘si keleng ateNa.’ (Kua. 3:​11, 12) Emaka, adi sidat nasehat erpalasken Pustaka, e ertina keleng ate Jahwe kita, labo perban lanai ngena ateNa ngidah kita. (Heb. 12:6) Kai bukti si deban maka ngena ate Jahwe ngidah kita?

BUKTI SI DEBAN MAKA NGENA ATE JAHWE NGIDAH KITA

15. Man ise nge ibere Jahwe kesah si badiaNa, janah si e erban kita tek nandangi kai?

¹⁵ Ibere Jahwe kesah si badiaNa man kalak si ngena ateNa. (Mat. 12:18) Cuba siukuri enda, ‘Enggo nge kucidahken piga-piga sipat si ihasilken kesah si badia?’ Contohna, reh sabarna nge kam gundari asangken mbarenda, sope tandaindu Jahwe? Adi terus usahakenndu ncidahken sipat-sipat si ihasilken kesah si badia, banci kam reh tekna maka ngena ate Jahwe ngidah kam.—Nen kotak “Sipat-Sipat si Ihasilken Kesah si Badia Eme . . . ”

16. Ise si ipake Jahwe guna mberitaken berita si meriah, janah uga perasanndu? (1 Tesalonika 2:4)

¹⁶ Ibereken Jahwe tugas si penting man kalak si ngena ateNa eme mberitaken berita si meriah. (Baca 1 Tesalonika 2:4.) Perdiateken manpaat si igejapken Jocelyn perban ia erberita. Bas sada wari, medak Jocelyn janah kitik ukurna. Nina, “La kuakap aku erguna janah la banci kulakoken kai pe. Tapi paksa si e aku merintis, janah bas wari e me waktuku guna erberita. Emaka, ertoto aku janah lawes aku erberita.” Bas erpagi-pagi e, jumpa Jocelyn ras Mary. Mekacar kel Mary janah nggit ia erlajar Pustaka. Piga-piga bulan kenca si e, ikataken Mary maka situhuna enggo piga-piga kali ia ertoto mindo penampat Dibata sope tuktuk Jocelyn pintuna. Sanga inget Jocelyn mulihi pengalamen e, nina, “Tempa-tempa ikataken Jahwe man bangku, ‘Ngena ateKu ngidah kam.’” Memang, labo kerina kalak nggit ngaloken berita si meriah. Tapi banci kita tek maka meriah ukur Jahwe adi siusahaken asa ngasupta guna erberita si meriah.

17. Kai si banci pelajarindu arah pengalamen Vicky? (Masmur 5:12)

¹⁷ Perban lit korban tebusen, iampuni Jahwe kalak si ngena ateNa. (1 Tim. 2:​5, 6) Banci saja tek kita man korban tebusen janah enggo iperidiken. Tapi uga adi lalap siakap la ngena ate Jahwe ngidah kita? Ingetlah, perasanta labo lalap terteki, tapi Jahwe lalap terteki. Ianggap Jahwe kalak si erkiniteken man korban tebusen eme kalak si benar janah erjanji Ia masu-masu kalak e. (Baca Masmur 5:12; Rom. 3:26) Perdiateken pengalamen sekalak turang seninata si diberu si gelarna Vicky. Bas sada wari, ukurina alu mbages kerna tebusen. Nina, “Sadar me aku maka sedekah enda enggo sabar kel Jahwe bangku. . . . Tapi, tempa-tempa ningku, ‘Bapak Jahwe, kekelengenNdu la bias man bangku. Korban tebusen AnakNdu la bias nutupi dosaku.’” Perban ngukuri tebusen si ibereken Jahwe, mulai me gejapkenna maka keleng ate Jahwe ia. Kita pe, adi siukuri tebusen, banci sigejapken maka keleng ate Jahwe kita, janah ngena ate Jahwe ngidah kita.

18. Adi terus keleng ateta Bapakta si i surga, banci kita tek nandangi kai?

¹⁸ Amin pe enggo siusahaken ngikutken saran-saran bas artikel enda, mon-mon banci saja kitik denga ukurta, janah ragu kita ngena nge ate Jahwe ngidah kita ntah lang. Adi bage si gejapkenndu, ingetlah maka ngena ate Jahwe ngidah “kalak si terus engkelengi Ia.” (Jak. 1:12) Emaka, teruslah reh rembakna ras Jahwe janah perdiateken uga Jahwe mbuktiken maka ngena ateNa ngidah kam. Selain si e, ula kam pernah lupa maka Jahwe “labo ndauh arah kita nari sekalak-sekalak.”—Perb. 17:27.