Carana gelah Reh Ulina Totota

1. Erkai nge kita iundang Jahwe? (Nen ka gambar.)

ARAH ja banci sidat pengapul ras petunjuk? Si e banci sidat arah Dibata Jahwe alu ertoto. Jahwe pe undangNa kita ngelakoken si e. AteNa rusur min kita ertoto. Nina Pustaka, “Teruslah ertoto.” (1 Tes. 5:17) Banci situriken kai pe man baNa arah toto janah uga pa pe situasina banci sipindo petunjukNa. (Kua. 3:5, 6) Jahwe eme Dibata si nggit mere, emaka labo batasiNa piga kali kita banci ertoto.

2. Kai kari sibahas bas artikel enda?

² Ngata bujur kel kita perban bere Jahwe kehamaten guna ertoto. Tapi, mesera nge kapndu ndarami waktu guna ertoto perban sibukna kam tiap wari? Ntah, perlu nge kapndu ibanndu totondu reh ulina? Adi ue, banci kam isampati Pustaka. Bas artikel enda, sibahas kari usihen arah Jesus si banci nampati kita erban waktu guna ertoto. Sibahas ka kari lima hal penting si banci sitotoken gelah totota reh ulina.

IBAN JESUS WAKTUNA GUNA ERTOTO

3. Kai nge si iteh Jesus kerna perukuren Jahwe nandangi toto?

³ Iteh Jesus maka ergai Jahwe kel toto. Ndekah sope reh Jesus ku doni, enggo idahna uga Jahwe njawap toto umatNa si setia si ertoto arah ukurna nari. Contohna, Hanna, Daud, Elia, ras si debanna. (1 Sam. 1:10, 11, 20; 1 Raj. 19:4-6; Ms. 32:5) Emaka iajari Jesus murid-muridna gelah terus ertoto janah tek maka pasti ijawap Jahwe toto kalak e.​—Mat. 7:7-11.

4. Kai si banci sipelajari arah usihen Jesus i bas ertoto?

⁴ I bas ertoto, Jesus jadi usihen si mehuli man murid-muridna. Sedekah pelayanenna i doni, rusur Jesus ertoto man Jahwe. Amin pe sibuk ia janah rusur idahi jelma si enterem, lalap ibanna waktuna guna ertoto. (Mrk. 6:31, 45, 46) Lampas ia medak gelah banci ia ertoto janah la lit si ngganggusa. (Mrk. 1:35) Pernah ka ia ertoto sada berngin sope ibanna sada keputusen si penting. (Luk. 6:12, 13) Selain si e, sope ia mate, mulih-ulih ia ertoto perban ntisik nari arus idungina tugasna si meserana bas doni.​—Mat. 26:39, 42, 44.

5. Uga carata ngusih Jesus?

⁵ Usihen Jesus mbuktiken maka perlu siban waktu guna ertoto amin pe kita sibuk. Contohna, banci saja perlu kita lampas medak ntah melawen sitik kita tunduh gelah banci kita ertoto. Alu bage, sibuktiken man Jahwe maka siergai kehamaten guna ertoto. Sekalak turang senina si gelarna Lynne ingetna denga uga perasanna sanga tangtangna ia erlajar kerna toto. Bagenda nina, “Sanga kuteh katawari pe banci ngerana ras Jahwe, banci kuanggap Ia bagi teman kompakku janah kuban ateku totoku reh ulina.” Enterem arah kita pe pasti bage perasanta. Gundari, mari sibahas lima hal penting si banci sitotoken gelah totota banci reh ulina.

LIT LIMA SI PENTING SI BANCI SITOTOKEN

6. Engkai maka 24 pertua si ikataken bas Ketangkasen 4:10, 11 muji Jahwe?

⁶ Pujilah Jahwe. Bas sada pengenehenen, idah Rasul Johanes 24 pertua sujud nembah Jahwe. Puji kalak e Dibata perban akui kalak e maka Ia ‘si erkuasa janah metunggung ngaloken kemulian ras kehamaten.’ (Baca Ketangkasen 4:10, 11.) Malekat-malekat si setia pe melala alasenna muji Jahwe. Tading malekat e ras Dibata i surga janah enggo tandaina Ia alu mehuli. Banci idah malekat e sipat-sipat Jahwe alu mperdiateken kai si ilakokenNa. Emaka tersuruh ukurna muji Jahwe.​—Jop 38:4-7.

7. Kai saja si banci sikataken guna muji Jahwe?

⁷ Perlu sipuji Jahwe bas totota. Banci sikataken man baNa maka keleng ateta Ia janah siergai sipat-sipatNa. Sanga bacandu ras pelajarindu Pustaka, cuba perdiateken sipat-sipat Jahwe, khususna si ngena atendu. (Jop 37:23; Rom. 11:33) Kenca si e, ceritaken man Jahwe uga perasanndu kerna sipat-sipatNa e. Banci ka sipuji Jahwe perban kerina si enggo lakokenNa man banta ras turang seninata. Lalap lindungiNa kita ras bereNa keperlunta.​—1 Sam. 1:27; 2:1, 2.

8. Kai saja alasenta ngata bujur man Jahwe? (1 Tesalonika 5:18)

⁸ Ngata bujur man Jahwe. Melala kel alasenta guna ngata bujur man Jahwe bas toto. (Baca 1 Tesalonika 5:18.) Banci sikataken bujur man Jahwe perban kerina si mehuli si lit bas kita, sebap kerina pemere si mehuli rehna arah Ia. (Jak. 1:17) Contohna, sikataken bujur perban enggo ciptakenNa doni enda si seh kel jilena bage pe melala ciptanNa si deban si luar biasa. Ngata bujur ka kita perban enggo bereNa kita kegeluhen, keluarga, teman kompak, ras arapen. Selain si e, ngata bujur ka kita perban bere Jahwe kita kehamaten jadi temanNa.

9. Engkai maka perlu terus siergai kerina si enggo lakoken Jahwe man banta?

⁹ Gelah banci kita ngata bujur man Jahwe, banci saja perlu siukuri kai si enggo lakokenNa man banta. Engkai? Perban kita nggeluh bas doni si la meteh ngata bujur. Teremen kalak ngukuri sura-surana saja janah la ingetna ngata bujur kerna kai si enggo lit bas ia. Adi mulai kita terpengaruh perukuren si bage, dungna isi totota pemindon kerina. Gelah si e la terjadi, perlu siergai kerina si enggo lakoken Jahwe man banta janah ngata bujur kita man baNa.​—Luk. 6:45.

10. Ceritaken uga sekalak turang seninata banci megenggeng perban lalap ia ngata bujur. (Nen ka gambar.)

¹⁰ Adi lalap kita ngata bujur, e banci nampati kita megenggeng ngadapi kesusahen. Cuba perdiateken pengalamen Kyung-sook, si lit bas majalah Menara Pengawal 15 Januari 2015. Kena kanker paru-paru ia janah parah kel. Nina, “Kitik kel ukurku perban penakit e. Enggo bene kuakap kerinana. Mbiar kel aku.” Kai si nampati ia gelah megenggeng? Ikatakenna maka tiap berngi sope medem, lawes ia ku tingkat rumahna guna ertoto alu ersora. Bas totona e, katakenna lima hal si erban ia ngata bujur bas wari e. Emaka terpegegehi ia janah teriahken ia nuriken kekelengenna man Jahwe. Igejapkenna uga Jahwe lalap ndukung umatNa si setia bas situasi si susah. Ikatakenna maka selaku umat Dibata, buen nge sidat pasu-pasu asangken kesusahen. Bali bagi Kyung-sook, mbue si banci erban kita ngata bujur man Jahwe, amin pe sangana siadapi kesusahen. Adi ngata bujur kita man Jahwe arah toto, banci kita megenggeng janah tetap ermeriah ukur.

11. Engkai maka murid-murid Jesus perlu sipat perpang kenca Jesus mulih ku surga?

¹¹ Pindolah man Jahwe gelah bereNa man bandu sipat perpang guna erberita. Sope Jesus mulih ku surga, ingetkenna murid-muridna kerna tugas kalak e eme erberita kerna ia “i Jerusalem, i belang-belang Judea ras Samaria, seh ku ujung doni.” (Perb. 1:8; Luk. 24:46-48) La ndekah kenca si e, itangkap peminpin kalak Jahudi me Rasul Petrus ras Rasul Johanes janah babana ku Pengadilen Agama. Kalak e iancam janah isuruh ngadi erberita. (Perb. 4:18, 21) Uga tanggapen Petrus ras Johanes?

12. Menurut Perbahanen Rasul-Rasul 4:29, 31, kai si ilakoken murid-murid?

¹² Sanga iancam peminpin Jahudi Petrus ras Johanes, bagenda nina kalak e, “Cuba ukuri kena, apai nge akap Dibata ulin, patuh man kena ntah man Dibata? Tapi kami, la terngadiken kami ngerana kerna kai si enggo idah kami ras si begi kami.” (Perb. 4:19, 20) Sanga Petrus ras Johanes ibebasken, ertoto kalak e ras murid-murid si deban gelah banci terus lakoken kalak e peraten Jahwe. Bagenda isi toto kalak e, “Ban min kami budak-budakNdu enda pang mberitaken kataNdu.” Ijawap Jahwe toto kalak e.​—Baca Perbahanen Rasul-Rasul 4:29, 31.

13. Kai si banci sipelajari arah pengalamen Jin-hyuk?

¹³ Banci siusih murid-murid bas abad pertama alu terus erberita amin pe ilarang pemerentah. Cuba perdiateken pengalamen Turang Seninata Jin-hyuk, si ipenjaraken perban la nggit ikut dinas militer. Bas penjara, ibereken tugas man bana guna naruhken pangan ras keperlun si debanna man tahanen bas sel si iasingken. Si banci icakapkenna eme kerna kai si iperluken kalak e saja, la banci ia erberita kerna Pustaka man kalak e. Emaka ertoto ia gelah pang ia erberita man kalak e ras gelah pentar ia bas tiap kesempaten. (Perb. 5:29) Nina, “Ijawap Jahwe totoku janah bereNa aku sipat si perpang ras kepentaren. Emaka mulai melala kalak si erlajar Pustaka ras aku i lebe-lebe pintu sel. Tiap pelajaren, kira-kira lima menit ngenca dekahna. Sanga berngi, kutulis surat janah paginna kubereken man tahanen e.” Kita pe tek maka pasti sampati Jahwe kita gelah terus erberita. Bali bagi Jin-hyuk, banci kita ertoto mindo sipat perpang ras kepentaren.

14. Kai si banci silakoken sanga siadapi masalah? (Masmur 37:3, 5)

¹⁴ Pindolah penampat man Jahwe sanga ngadapi masalah. Enterem arah kita si arus ngadapi erbage-bage masalah, bagi penakit, masalah mental, mate kalak si keleng ateta, masalah keluarga, ras si debanna. Selain si e, perban pandemi ras perang, reh serana siakap ngadapi masalah e ndai. Kai si banci silakoken? Siturikenlah isi pusuhta man Jahwe. Siceritaken uga situasita man baNa bali bagi sanga kita cerita man teman kompakta. Teklah kita pasti ‘ertindak pagi Jahwe guna kita.’​—Baca Masmur 37:3, 5.

15. Uga toto banci nampati kita ‘megenggeng ngadapi kiniseran’? Ban contohna.

¹⁵ Banci kita ‘megenggeng ngadapi kiniseran’ adi terus kita ertoto. (Rom. 12:12) Iteh Jahwe kai si iadapi umatNa janah “begikenNa sora kalak e mindo penampat.” (Ms. 145:18, 19) Kristie, sekalak perintis si umurna 29 tahun enggo nggejapken maka payo kel kata-kata si lit bas ayat e. La isangka-sangkana, mekelek kel penakitna. Emaka depresi ia. Bas pudi wari, itehna ka maka mamakna pe mekelek kel penakitna janah la banci malem. Nina Kristie, “Paksa si e, tutus kel ateku ertoto gelah banci kudat gegeh si kuperluken tiap wari. Kuusahaken gelah ratur aku ngelakoken kegiaten rohani, bagi perpulungen ras pelajaren pribadi.” Nina ka, “Toto nampati aku ngelewati situasi-situasi si seh kel sulitna. Kuteh maka Jahwe lalap ras aku janah e erban tenang kel kuakap. Amin pe labo mis malem penakitku e, tapi ijawap Jahwe totoku. BanNa tenang kel kuakap janah dame pusuhku.” Mbera-mbera terus siinget maka “teh Jahwe cara mbebasken kalak si nembah Ia arah percuban nari.”​—2 Pet. 2:9.

16. Engkai maka perlu kita penampat Jahwe guna ngadapi godan?

¹⁶ Pindolah penampat Jahwe guna ngadapi godan. Perban kita la sempurna, arus kita terus erjuang guna ngelawan godan ngelakoken kai si salah. Usahaken Setan kel gelah nyerah kita man godan. Contohna, gunakenna hiburen si la mehuli guna ncedai perukurenta. Hiburen si bage banci erban kita ngukuri si la mehuli ras la bersih i lebe-lebe Dibata. Dungna, si e erban kita ngelakoken dosa si serius.​—Mrk. 7:21-23; Jak. 1:14, 15.

17. Uga carana gelah sesuai perbahanenta ras totota? (Nen ka gambar.)

¹⁷ Perlu kita penampat Jahwe gelah ngasup kita ngadapi godan. Si e teridah arah toto si ajarken Jesus. Ajarina kita ertoto bagenda, “Ula min pediat kami nyerah man percuban, tapi selamatken min kami arah si jahat nari.” (Mat. 6:13) Nggit Jahwe nampati kita, tapi arus sipindo penampatNa. Arus ka sesuai perbahanenta ras totota. Bas doni Setan enda, melala kel perukuren si la sesuai ras Pustaka. Gelah la kita terpengaruh, ula sibaca ras sibegiken kerna si e. (Ms. 97:10) Tapi nggit kita mbaca ras ngukuri isi Pustaka gelah perukurenta sesuai ras sura-sura Dibata. Gelah la terpengaruh perukuren doni enda, banci ka kita ratur pulung ras erberita. Adi silakoken si e, erjanji Jahwe maka labo pediatNa kita ngadapi godan lebihen asangken gegehta.​—1 Kor. 10:12, 13.

18. Kai saja si perlu silakoken?

¹⁸ Kerina kita perlu terus ertoto man Jahwe gelah banci tetap setia bas wari-wari pendungi si susah enda. Banlah waktu tiap wari guna ertoto alu tutus. Ate Jahwe ‘situriken min isi pusuhta man baNa’ arah toto. (Ms. 62:8) Pujilah Jahwe janah kataken bujur nandangi kerina si enggo lakokenNa. Pindolah penampatNa gelah pang kam erberita. Pindolah gelah sampatiNa kam ngadapi masalah ras nulak godan. Ula pediat kai pe ras ise pe si erban kam lanai ertoto alu ratur. Tapi, uga nge cara Jahwe njawap totota? Sibahas kari penungkunen si penting enda bas artikel seterusna.