Mbamba foé Luc a nga tili

3 Mbu awôm a tane ya éjôé Tibère César, éyoñe Ponce Pilate a mbe ngovina ya Judée, a Hérode* a mbe njôô ya ngoto* ya Galilée, Philippe monyañe wé a mbe njôô ya ngoto ya si ya Iturée a Trachonitide, a Lysanias a mbe njôô ya ngoto ya Abilène, 2 melu Anne a Caïphe be mbe bejôô beprêtre, Zambe a nga ve Jean mone Zacharie foé nkôte si.

3 Nde a nga ke minlame mi mbe fefele Jourdain, a kañete nduan,* ñwô ô ne ndeme ya nkôñelane nlem asu njamane mam abé, 4 fo’o ve aval é ne ntilan e kalate nkulu mejô Ésaïe na: “Tyiñe ja so nkôte si é yôta’ane na: ‘Kômané Yéhôva* zen! Sôané zene jé. 5 Mbi’ili ôse wo yiane jineban, beta nkôl ase a mone nkôl ase ba yiane silibane si, zen é bili mekot, ba yiane sôane je, zen é bili bikpwekpwek, ba yiane je mane bôk. 6 Bôte bese ba ye* yene nyiiane Zambe.’”*

7 Nde a nga taté na a jô nsamba bôt ô nga zu dubane be nye na: “Mia mvoñe mekpwe, za a nga lebe mia na mi tup ayaa da zu? 8 Nde, bo’ané mame ma liti na mi kôñelaneya minlem. Te mia taté jô miabebiene na, ‘Bi bili ésa wongan Abraham.’ Amu ma jô mia na, Zambe a ne ngule ya bo na meko’o ma me veñesane bone be Abraham. 9 Ôwé, ôvôn ô mbôô fo’o tine bilé. Ba ye ba’é élé ése é nji wume mbamba bibuma a wua je nduan été.”

10 A minsamba mi bôte mi mbe mi sili’i nye na: “Jé ñhe bia yiane bo?” 11 A nga yalane be na: “Môt a bili biyé bibaé* a ve môt a nji bi jôm, a nyu a bili jôme ya di a bo’o fe avale da.” 12 To’o benyoñe toya be nga zu duban a be nga sili nye na: “A Ñye’ele, jé bia yiane bo?” 13 Nde a nga yalane be na: “Te mia yemete* bôte na be ve mia moné toya a dañ abim atiñe da jô na mi sili be.” 14 Bôte be mbe be bo’o ésaé bezimbi fe be mbe be sili’i nye na: “Jé bia yiane bo?” Ane a nga yalane be na: “Te mia wone môt éziñe jôm,* nge bôte môt éziñ ajô, ve mia yiane vak a abime mi bili.”*

15 Mbôle bôte bese be mbe be yange’e Krist, be mbe be sili’i minleme miap été na: “Ye Jean nnye a ne ne Krist?” 16 Jean a nga yalane bese a jô’ô na: “Mfa’a wome ma du mia mendim été, ve môt a dañe ma ngul a zu ma mvus, a me nji bo nyu a yiane tiine nye minkole besilefas, a ye du mia a mfufube nsisim a nduan. 17 A mbili ése’ese jé mo, a ye mane fubu vôme ba bôme blé, a ye ba’ale blé nda ba ba’ale bidi, ve a ye di’i bivua nduane môt éziñ a vo’o ki dim.”

18 A nga ke ôsu a kañete bôte mbamba foé, a nga ve fe bôt abui melep afe. 19 Ve amu Jean a nga komekane Hérode, njôô ya ngoto ajô Hérodiade minga monyañe wé a ajô mbia be mame bese a nga bo, 20 nge ô vaa mbia be mame bete bese, Hérode a nga beta fe kô’ôlane jame di: A nga fete Jean mimbôk.

21 Éyoñe bôte bese be nga mane duban, ane Yésus fe a nga duban. Nté a mbe a ye’elan, ane yôp é nga yombô, 22 ane mfufube nsisim a nga sise be nye a yené’é a too ane éyeka’a, ane zum, ane tyiñ é nga so yôp é jô’ô na: “Ô ne Mone wome ma nye’e, ma wô’ô wo mvaé.”