Mbamba foé Luc a nga tili
2 A nga bo na, melu mete, César Auguste a nga ve atiñe na, bôte bese ya si be ke tilibane môé map. 2 (Ntilane môé ôte ô mbe wu ôsu ô nga boban éyoñe Quirinius a mbe ngovina ya Syrie.) 3 Ane bôte bese be nga ke tiliban, môt ase tisone jé, vôm a nga bialé. 4 Nde Joseph fe a nga téé Nazareth, tisone ya Galilée a ke Judée, tisone David, nje éte ja loobane na Bethléhem; amu a mbe ébu’a jia ya nda bôte David. 5 A nga ke tilibane ba Marie minga wé,* e zu koone na a ntoo bebé ya biaé. 6 Nté be mbe wôé, ane éyoñe Marie a mbe na a biaé é nga kpwaan. 7 Ane a nga biaé mona fam, ntôle mone wé, a vute wô biyé bi too ane bebandas a bôé nye vôme betite be mbe be ja’ak, amu étune nda éziñ é nji be é yoo asu dap vôme be mbe be bôé beyeñ.
8 Vôm ate beba’ale mintômba be mbe be bômbô’ô nseñe na ba ba’ale mintômba miap. 9 E teme na, éngele Yéhôva* a ntele be ôsu, a étôto’o Yéhôva* é nga faé vôme be mbe, ane be nga taté na ba ko mbia woñ. 10 Ve éngele a nga jô be na: “Te mia ko woñ, amu ma kate mia mbamba foé a ye soo bôte bese abui mevak. 11 Amu môse wu, nyii a bialéya mia tisone David, nnye a ne Krist Tate wônan. 12 Ndeme ma ve mia nyi: Mia ye koone ntyene mon ô too mvutane biyé bi ne ane bebandas ô bôô vôme betite ba di.” 13 E teme teme na, abui beéngele* é nga suane vôm éngele ate a mbe, be nga ve Zambe duma be jô’ô na: 14 “Duma é bo’o be Zambe a dañ ôyabe yôp été, a mvo’é é bo’o si be ba Zambe a yene mvaé.”*
15 Éyoñe beéngele be bulaneya yôp, ane beba’ale mintômba be nga kobô be be, be jô’ô na: “Ntame keané Bethléhem, bi ke yen avale mame Yéhôva a te bo na bi yeme ma te boban.” 16 Ane be nga ke avôl avôl a koone Marie a Joseph a ntyene mon ô bôô vôme betite ba di. 17 Éyoñe be nga yene jam éte, ane be nga kañete be jame be nga kate be mfa’a ya mone mone nyi. 18 A bôte bese be nga wô’ô mame beba’ale mintômba be nga kañete, be be mbe fe’e ne vema, 19 ve Marie a nga ba’ale mame mete mese, a mbe a fase’e atinane ya mame mete nleme wé été. 20 Éyoñe beba’ale mintômba be nga wôk a yene mame fo’o ve avale beéngele be nga kate be, nde be nga bulane a ve Zambe duma a ékaña’a.
21 Mvuse melu muam, éyoñ éyoñe ya tyi’i nye atyel é nga kui, ane be nga yôlé nye na Yésus, éyôlé éngele a nga ve nye ôsusua na nyia a nyoñ abume dé.
22 Nde fe éyoñ éyoñe ya fubu be é nga kui avale Metiñe me Moïse me mbe me jô’ô, be nga bete nye Jérusalem a ke liti nye Yéhôva,* 23 fo’o ve aval é ne ntilane Metiñe me Yéhôva:* “Ntôle mona fam* ôse, wo ye loobane na étyi be Yéhôva.”* 24 Ane be nga bo metuna’a avale Metiñe me Yéhôva* me mbe me jô’ô na: “abeñ abaé nge ke bone bezume bebaé.”
25 Môt éziñ a mbe Jérusalem a too jôé na Siméon, môt ate a mbe zôsô a ko fe Zambe woñ, a yange’e éyoñe Zambe a ye zu volô Israël, a mfufube nsisim a mbe be nye. 26 Nde fe Zambe a nga kate nye a zene ya mfufube nsisime na, a ye ke wu ôsusua na a yene Krist, nyu Yéhôva* a nga top. 27 A ngule ya mfufube nsisim, a nga ke Temple. A éyone bebiaé be Yésus be nga zuu nye wôé, na be bo nye avale Metiñe me Moïse me mbe me jô’ô na ba yiane bo, 28 ane a nga nyoñe mone mon e mo mé été, a ve Zambe duma a jô’ô na: 29 “Éyoñe ji, a Beta Tate, kañese’e na mbo ésaé wôé a ke wo’one mvo’é, aval ô nga mane jô. 30 Amu me yeneya a mis, môte wo ye belane nye na ô kôté bôt. 31 Nnye ate ô nga kômesane na bôte bese be yene nye. 32 Éfufup éte ja vaa jôme ja bo na bôte ya meyoñe be kate yene duma bôte bôé ayoñ Israël.” 33 Éyoñe be nga wô’ô mame be mbe be jô’ô mfa’a mon, ésa wé a nyia be nga kam abui. 34 Nde Siméon a nga botane be a jô Marie, nyia mone na: “Ô lôô! Mone nyu a ne jôme ja ye bo na, abui bôte ya Israël é ku nge tebe, a ndeme bôte ba ye biasé* 35 (ôwé, ayabe nkpwaté mekône da ye jii wo*), na asimesan é ne abui bôte minlem é yené ne fômelé.”
36 Nkulu mejô minga a too jôé na Anne, ngone Phanouël ya nda bôt Aser a mbe valé, minga ate a mbe a ntoo nnôm; a nga ke aluk a too éndune ngon, ba nnôme be nga nyiñe fo’o ve mimbu zangbwal. 37 A mbe nkuse minga ô bili mimbu 84, teke môs éziñ ô nga jemban e Temple. Ô mbe ô bo’o Zambe ésaé alu a môs ô tyi bidi a bo fe meye’elane me nja’an. 38 Awolo éte ébien, nde a nga subu be bebé a taté na a ve Zambe akiba, a kate fe bôte be mbe be yange’e nyiiane ya Jérusalem za a mbe mon ate.
39 Nde, éyoñe be nga mane bo mame mese avale Metiñe me Yéhôva* me mbe me jô’ô, ane be nga bulane Galilée a ke tabe tisone jap e Nazareth. 40 A mone mon a nga ke ôsu a yaé a bo ngul, a nga ke fe ôsu a bi fek, a Zambe a mbe a yene’e nye mvaé.
41 Mbu ôse, bebiaé bé be mbe be kele’e Jérusalem asu beta abô’ô Paska. 42 Éyoñ a nga bi mimbu 12, ane be nga bete Jérusalem avale be wô’ô zu ba bo éyoñe Paska a ne. 43 Éyoñ abô’ô Paska é nga man, ane be nga bulan. Yésus a nga li’i Jérusalem bebiaé bé teke yeme na a li’iya. 44 Be mbe be buni’i na a ne nsamba a bôte bevok. Éyoñe be wuluya môse wua nje ñhe be nga taté na, ba jeñe nye be bivuvumane biap a be bôte bevok. 45 Ve amu be nji yene nye, nde be nga bulane Jérusalem a ke ba jeñe nye vôm ase. 46 Mvuse melu melal, be nga ke koone nye Temple été, a too zañe beye’ele, a vô’ôlô’ô be a sili’i fe be minsili. 47 Ve bôte bese be mbe be vô’ôlô’ô nye be mbe fe’e ne vema, aval a mbe a yeme wô’ô mam, a aval a mbe a yala’ane minsili. 48 Éyoñe bebiaé bé be nga yene nye, be nga kam, ane nyia wé a nga jô nye na: “A mon, amu jé wo bo bia ana? Bia éso bi jeñeya wo bi te’eya.” 49 Ve a nga sili be na: “Mia jeñe ma amu jé? Ye mia dimine na ma yiane tabe nda Ésa wom?” 50 Ve be nji tu’a wô’ô jam a mbe a jô’ô be.
51 Ane a nga siliki a be a bulane Nazareth. A nga ke ôsu a bo be mewôk, nde fe, nyia wé a nga kôme ba’ale mame mese a nga jô nleme wé été. 52 Yésus a nga ke ôsu a yaé a tu’a bo fek, Zambe a bôte be nga yene nye mvaé.