Kalate Paul a nga tili Beromain

12 Nde a bobejañ, ma ye’elane mia a zene ya nkoon éngôngole Zambe na, mi liti menyule menan ane mvean ô ne vevee, étyi, a wu Zambe a kañese, ésaé é ne étyi mia bo a ngule ya mfasane wônan. 2 A te mia kañese na émo* ji é mé mia, ve jame da, bo’ané asimesane denane mimfefé, ndemben a zen éte miabebiene mi ne bo mimfefé, éyoñ éte mi ne kôme yeme* jôme Zambe a yi na mi bo, nalé a tinane na mame me ne mvaé a teke ayeñ, a ma a nye’e.

3 Amu a zene ya beta mvam a nga vebane be ma, ma jô môt ase ya be mia na a bo te simesan émien abui a lôte nné, ve na a simesan émien avale da yiane môt ase abime mbunane Zambe a nga ve* nye. 4 Amu fo’o ve avale bi bili nyule jia a abui bibu’a, ve bibu’a bise bi nji bo aval ésaé da. 5 Nde bia, bi kusa bo abui, bi ne nyule jia be Krist, ve môt ase ya be bia a ne ébu’a be môte mbok. 6 Nde bi bili mimveane mevale meval, avale beta mvam a nga vebane be bia, nde nge nkulane mejô ñwô bi bili, nkulané fo’o mejô abime mbunane wongan ô ne; 7 nge a ne ésaé nkañete, ntame fo’o boané ésaé nkañete éte, nyu a ye’ele, a ye’ele’e fo’o; 8 nyu a ve bôte ngule nyul,* a va’a fo’o be ngule nyul,* nyu a kap,* a bo’o de a nlem ôse,* nyu a tebele ékôan,* a tebele’e je nya ntebelane, nyu a mvamane bôt a bo’o de a mevak.

9 Nye’ane wônan ô bo’o te medu’an. Vina’ané mame me ne abé, jeñané na mi bo mame me ne mvaé. 10 Mfa’a ya nye’ane ya bobejañ, môt ase a nyeke’e nyu mbok, ane bobenyañe ya abume da ba nye’esan. Mfa’a ya na môt ase a liti nyu mbok ésemé, bo’ané bôte be ôsu.* 11 Bo’ané biwôlô* sa ke minleles.* Jôka’ané na mfufube nsisim a bo na mi bo ayôñ. Bo’ané Yéhôva* ésaé ane alo. 12 Vaka’ané e ndi nlem été. Jiba’ané minjuk. Bo’ané mbane meye’elan. 13 Vola’ané mimfufup avale miñyiane miap mi ne, kelané ôsu a bo anyep. 14 Kelané ôsu a botane ba ba tibili mia, botané, ve te mia yo’é. 15 Vaka’ané a ba ba vak; yônané a ba ba yôn. 16 Nyoñané bôte bevo’o ngap, avale mia nyoñe miabebiene ngap; te mia bete miabebiene yôp,* ve bo’ané éjote nyul, te mia bo mimfefe’e mise menane miabebien.

17 Te mia bulane môt éziñ abé ba abé. Jeñané jam é ne mvaé mise me* bôte bese. 18 Nge mi ne de bo, a nge jam éte é tii be mia, nyiñané mvo’é a bôte bese. 19 Te kunané miabebien, a bôte ma nye’e, ve va’ané ayaa afôla; amu é ne ntilane na: “‘Akuna’a é ne éndam; ma ma ye ya’an,’ nne Yéhôva* a jô nalé.” 20 Ve “nge nsiñe wôé a wô’ô zaé, va’a nye jôme ya di; nge a wôk évé, va’a nye jôme ya nyu, amu éyoñe wo bo nalé, wo ye beté nye ma’a me nduane nlô.” 21 Te jô’é na abé é dañe wo ngul, ve kele’e ôsu a dañ abé a mvaé.