Mbamba foé Luc a nga tili

10 Éyoñe mame mete me lôteya, Tate a nga tobe beyé’é befe 70, a nga lôme be bebaé bebaé na be ke ôsu tison ése a vôm ase a mbe na a yiane ke. 2 Ane a nga kate be na: “Bidi ya kôane bi ne fo’o abui, ve bôte ba kôane bie be ne tyôtyoé. Ye’elané ñhe Masa ya nkôane bidi na a lôme bebo bisaé be zu kôane bidi afube dé. 3 Nde kelané, ve taba’ané ntyel! Ma lôme mia ane mintômba ézezañe beta bemvu mefan. 4 Te mia nyoñ ékpwaé moné, nge ékpwaé bidi, nge besilefase minkol a te mia batane môte* zene zen. 5 Nda ése mia ye nyiin, tata’a jôané na, ‘Mvo’é é bo’o nda nyi.’ 6 Nge môte ya mvo’é a ne valé, mvo’é jenan é kele’e be nye, ve nge a nji bo valé, mvo’é jenan é bula’ane be mia. 7 Nde taba’ané nda éte, mi di a nyu biôme ba ye ve mia, amu mbo ésaé a yiane ma’ane mé. Te mia beta ke mia jeñe nda ya tabe.

8 “Nde fe tison ése mia ye nyiin, a vôm ase ba ye nyoñe mia, ja’ané jôm ése ba ye ve mia 9 saané fe minkôkone ya valé a kate mie na: ‘Éjôé Zambe é ntoo mia bebé.’ 10 Ve tison ése mia ye nyiin a bôte be bene’e nyoñe mia, kelané beta minjoñ a jô na: 11 ‘To’o mbulu’u ya tisone jenane wo te ke bia mebo, bia mane wô sas, ve yemané na Éjôé Zambe é ntoo bebé.’ 12 Ma kate mia na, jam é nga kui Sodome da ye bo tyi’ibi ya jibi a lôte jame da ye kui tison éte môs ôte.

13 “Ngo’o wo, a Korazîn! Ngo’o wo, a Bethsaïda! Amu nge mesimba me nga bobane be mia, me nga bobane Tyr a Sidon, ve bôte ya wôé be nga kôñelane minlem ayap, a jaé biyé minkuta a tabe asup été. 14 Ajô te nde, jame da ye kui Tyr a Sidon da ye bo tyi’ibi ya jibi a lôte jame da ye kui mia môse ntyi’ane mejô. 15 A wo, Capernaüm, ye wo buni na wo ye beteban akekui yôp? Momo, wo ye viane sis akekui Soñ* été!

16 “Nyu a bene vô’ôlô mia a bene fe vô’ôlô ma, a nyu a bene nyoñe mia a bene fe nyoñe ma, nde fe nyu a bene nyoñe ma a bene fe nyoñe Nyu a nga lôme ma.”

17 Nde beyé’é 70 be nga bulane njalan a mevak, be jô’ô na: “A Tate, ja’a mbia minsisime mia bo bia mewôk éyoñe bia belane jôé dôé.” 18 Ane a nga jô be na: “Me mbe me nga yene Satan a so’o yôp a kpwa’a si ane feleves. 19 Tama yenan! Me nga ve mia ngule ya tibi benyo a bekata ôlete a mebo menan, a ngule ya jôé nsiñe wônan, a teke jôm éziñe ja ye bo mia mbia jam. 20 Nde fe, te mia vak amu na mbia minsisime mia bo mia mewôk, ve va’ané amu biyôlé bienane bi ntoo ntilan e yôp été.” 21 Awolo éte ébien, mfufube nsisim a nga bo na nlem ô jaé nye a mevak, ane a nga jô na: “A Ésa wom, ma ve wo duma bôt été, amu ô nga kôme solé mimfefek a beyeme mam, mame mete, ve ô nga bo na bôte be ne éjôte nyul ane bone be bongô, mbe be yeme me. Ôwé a Ésa wom, amu ô nga yene mvaé ya bo nalé. 22 Ésa wom a nga ve ma ngule ya tebele biôme bise, a teke môt éziñ a yeme za a ne Mon, ane ô vaa ve Ésa, nde fe, teke môt éziñ a yeme za a ne Ésa, ane ô vaa ve Mon a nyu ase Mon émien a kômbô de kat.”

23 Ane a nga ke vôme beyé’é bé be mbe a loone be ésok a jô be na: “Mevak a mise ma yene mame mia yene ma. 24 Amu ma jô mia na, abui bekulu mejô a bejô bôt é nga kômbô yene mame mia yene ma, ve be nji yene me, be nga kômbô fe wô’ô mame mia wô’ô ma, ve be nji wô’ô me.”

25 Tame yen! Môt éziñ a mbe a yeme’e Metiñe me Moïse a nga tebe tetele na a zu ve’ele nye, ane a nga jô nye na: “A Ñye’ele, jé ma yiane bo mfa’a ya na me bi ényiñe ya nnôm éto?” 26 Yésus a nga jô nye na: “Jé é ne ntilane Metiñe me Moïse? Wo lañ aya?” 27 A nga yalane nye na: “‘Wo yiane nye’e Yéhôva* Zambe wôé a nleme wôé ôse a ényiñe jôé ése* a ngule jôé ése a ôsimesane wôé ôse,’ a ‘nye’e môte mbok ane wo nye’e womien.’” 28 A nga jô nye na: “Ô yemeya yalan; kele’e ôsu a bo nalé a wo ye bi ényiñ.”

29 Ve mbôl a mbe a kômbô’ô liti na a ne zôsô, môt ate a nga sili Yésus na: “Za fo’o a ne môte mbok?” 30 Yésus a nga yalan a nkana wu: “Môt éziñ a mbe a siliki’i mfa’a ya Jéricho a so’o Jérusalem, a nga ku ézezañe beze mimfaka, mbe bete be nga mane wôlé nye biyé bié a biôme bise a mbe a bili, be mane fe tya’a nye ébôm, be mane ke a li’i nye a bôô ane mbim. 31 E teme na, prêtre a mbe a siliki’i njoñ ôte, ve nné ane a nga yene nye, nde a nga sa’ale nye a ke mfa’a njoñ ôvok. 32 Aval éte da da, éyoñe mone Lévite a nga zu lôte vôm ate, nné ane a nga yene nye, nde a nga sa’ale nye a ke mfa’a njoñ ôvok. 33 Ve môt éziñe ya Samarie a mbe dulu zañ, éyoñ a nga yene nye, a nga wô’ô nye éngôngol. 34 Nde a nga subu nye bebé a sôé nye mbon a woone meveñ. A mane ka’ate me a bebandas, ane a nga nyoñe nye a toé nye tite jé yôp, a kee nye nda beyeñe na be ba’ale nye. 35 Môs ô nga tôñe valé, nde a nga nyoñe bedenier bebaé a ve môt a mbee auberge, a jô nye na: ‘Ba’ale’e nye, a nge moné ma te ve wo a teke yian, ma ye zu bulane wo nyi ya yôp éyoñe ma ye beta so.’ 36 Za ya bôte belale ba a te liti na a nye’e môte mbok, e nyu beze mimfaka be nga mane wôlé biôm?” 37 A nga yalane na: “Nyu a te mvamane nye.” Nde Yésus a nga jô nye na: “Wo fe kele’e bo avale da.”

38 Nté be mbe be kele’e dulu dap ôsu, nde be nga ke nlam éziñ, minga éziñ a mbe wôé a too jôé na Marthe, nnye a nga nyoñe Yésus nda jé. 39 A mbe fe a bili monyañ a too jôé na Marie, nnye a nga ke tabe bebé mebo me Tate a vô’ôlô’ô mam a mbe a jô’ô.* 40 Marthe ki a mbe a yeme a abui bisaé, nde a nga zu vôm a mbe, a sili nye na: “A Tate, ye wo bisi ki na monyañe wom a li’i ma a bisaé bi bise? Jô’ô nye na a zu ma volô.” 41 Ane Tate a nga yalane nye na: “A Marthe, Marthe, nlem ô tyele wo yôp amu abui mam. 42 Bi nji yi abui, jôme jia étam é ne yian. Ye ô lôô Marie nyi, a tobeya jôme ja dañe mfi, a teke môt éziñ a ye vaa nye je.”