Mbamba foé Matthieu a nga tili

18 Éyoñe te nje beyé’é be Yésus be nga ke koone nye a sili nye na: “Za a dañe bôte bese Éjôé ya yôp?” 2 Nde a nga loone mone mongô a telé nye zañe jap. 3 Nde a nga jô na: “Ma kate fo’o mia na, nge mia tyendé ki a bo ane bone be bongô, mia ye ke nyiin Éjôé ya yôp. 4 Nde, môt ase a sili émiene si ane mone mongô nyi, nnye a ne môt a dañe bôte bese Éjôé ya yôp; 5 nde fe, nyu ase a nyoñ avale mone mongô di mvo’é amu jôé dam a nyoñe fe ma mvo’é. 6 Ve nge môt éziñ a bo na mone mongô wua ya ba ba buni ma a kolé ôbak,* da ye dañe bo mvo’é mfa’a wé na, be tiñeti nye ako’o ba ko’o de bidi tyiñ, aval akok éjakas ja limiti, a wua nye mañ été.

7 “Ngo’o bôte ya émo ji! Amu ja bo mame ma bo na bôte be kolé ôbak. Mame ma bo na bôte be kolé ôbak ma ye fo’o bo, ve ngo’o môt a soo mame mete! 8 Nge ébu’a ya nyule jôé ane wo nge abo, ja tindi wo na ô bo nsem,* tyi’i je a wua je fé. É ne mvo’é asu dôé na ô bi ényiñ ô bili abo da nge ke wo wua, a lôte na be wua wo nduane ja yôñe nnôm éto a mo môé mese mebaane, nge ke mebo môé mebaane. 9 Nde fe nge dise dôé da tindi wo na ô kolé ôbak,* té de ô wua de fé, amu é ne mvo’é asu dôé na ô bi ényiñ a dise da, a lôte na be wua wo Géhenne* a mise mebaé. 10 Taba’ané ntyele ya biasé mongô wua ya bone be bongô ba, amu ma kate mia na kom ése, beéngele ba ba’ale be be bili fane ya tebe* asu Ésa wom a ne yôp été. 11 *——

12 “Mia simesan aya? Nge môt a bili mintômba 100 éyoñ éte wua ya été wo jañ, ye a ye ke li’i mintômba 99 nkôle yôp, a ke jeñe wu ô ne njañan? 13 Nge a su’ulane yene wô, ma kate fo’o mia na, a ye dañe vak asu ntômba wua wu, a lôt abim a vak asu mintômba 99 mi nji jañ. 14 Avale te da da, Ésa wome* ya yôp été a nji ve’ele yi na mongô wua ya bone be bongô ba a jañ.

15 “Nde fe, nge monyoñ a bo wo abé, kele’e yene nye ve mia nye bebaé, ô kate nye nsem a te bo,* nge a vô’ôlô wo, yeme’e na ô volôya monyoñe na a bulane mbamba zen. 16 Nge a bene vô’ôlô wo, kele’e yene nye a môte wua, nge bebaé befe mfa’a ya na, jam éte é bo fo’o été, amu bengaa bebaé nge belale ba* yemete de. 17 Nge a bene vô’ôlô be, kele’e ajô éte ékôane bekristen, nge a bene vô’ôlô to’o ékôane bekristen, yene nye ane môt a nji buni Zambe a ane nyoñe toya.

18 “Ma kate fo’o mia na, jam ése mia ye tiñeti si va da ye bo jam é ntoo ntiñetane yôp, a jam ése mia ye kuli si va da ye bo jam é ntoo nkulane yôp. 19 Ma ba’alane fo’o mia na, e si va, nge bôte bebaé ya be mia ba kui tyiñe na ba sili Zambe jôm éziñ é ne mfi meye’elan, Ésa wome ya yôp a ye ve be jôm éte. 20 Amu vôme bôte bebaé nge belale ba tôkane amu jôé dam, mamiene me ne a be.”

21 Ane Pierre a nga subu nye bebé a sili nye na: “A Tate, biyoñe tañ aya mojañ a ne bo ma mbia jam, me ki me jamé nye? Ye biyoñe zangbwal?” 22 Nde Yésus a nga yalane nye na: “Ma kate wo na, sa ke ve biyoñe 7 étam, ve biyoñe 77.

23 “Ajô te nde bi ne jô na, Éjôé ya yôp é ne ane njô bôt a nga tyi’i na, a zu bo alo dé sito’o ya akum a nga ve de. 24 Éyoñ a nga taté na, a bo be sito’o, nde be nga soo nye môt éziñ a bili nye be talent 10 000.* 25 Ve, amu a nji be ngule ya bulane nye abime moné éte, nde masa wé a nga tyi’i na be kuane môt ate a minga wé a bone bé a biôme bi mo bié bise, na be bulane nye moné a mbe a bili nye. 26 Ane ôlo ôte ô nga kute meboñe si, a vitibi ôsu wé a ye’elane nye ô jo’o na, ‘Éngôngol, jibi’i ma, ma ye mane bulane wo moné ase me bili wo.’ 27 Nde masa ate a nga wôk ôlo wé éngôngol, ane a nga jô’é wô, a jô wô na ô nji yiane beta ya’ane mvôla ô mbe ô bili nye. 28 Ve ôlo ôte ô nga kui nseñ, a ke koon ôlo ôvok ô mbe ô bili nye bedenier 100, nde ô nga bi nye a taté na wo miate nye éngoñ ô jô’ô na, ‘Bula’ane ma moné ase ô bili ma.’ 29 Nde ôlo ôvok ô nga kute meboñe si a taté na wo ye’elane nye ô jô’ô na, ‘Éngôngol, jibi’i ma, ma ye bulane wo moné ase me bili wo.’ 30 Ve ô nji bisi nye, ô nga bo na be futi nye mimbôk akekui wo ye mane bulane moné ase ô bili nye. 31 Éyoñ alo avok é nga yene jam é nga boban, nde é nga wô’ô mbia ôlun, ane é nga ke yene masa wop a kañete nye jam é nga boban. 32 Nde masa wé a nga loon ôlo a sili wô na, ‘A mbia ôlo, éyoñ ô nga ye’elane ma, nga me nga jô wo na ô nji yiane beta ya’ane mvôla ô mbe ô bili ma? 33 Nga wo fe wo te yiane mvaman ôlo ôvok avale ma fe me nga mvamane wo?’ 34 Nde masa wé a nga yaa mbia ñyaan a ve wô be beba’ale mimbô’ô na, be fete wô akekui wo ye mane ya’ane moné ase ô bili nye. 35 Avale te fe, Ésa wome ya yôp a ye bo môt ase ya be mia a bene jamé monyañe wé a nlem ôse.”