Kalate ôsu Paul a nga tili Becorinthien

10 Éyoñe ji a bobejañ, ma kômbô na mi yeme na, bemvamba bangane bese be mbe nkute si, a bese be nga tyi’ilane mañ. 2 Bese be nga dubane be Moïse a zene ya nkut a mañ. 3 Bese be nga di avale bidi ya nsisime da. 4 Bese be nga nyu avale menyu da, menyu ya nsisim. Amu be mbe be nya’a ako’o Zambe a nga ve be é mbe é tôñe’e be, a akok éte da tinane na* Krist. 5 Ve Zambe a nji yen abui ya be be mvaé, amu jam éte, be nga wu nkôte si.

6 A mame mete me nga bo bive’an asu dangan, sa ke na bi kômbô bo mbia be mam, avale be nga bi nkômbane ya bo me. 7 Nge bo bekañe bengulemelan ane bevo’o ya be be be nga bo; fo’o ve aval é ne ntilane na: “Bôte be nga tabe si a di a nyu. Nde be nga tebe tetele a vôman.” 8 Nge na, mbo’ané te bo mvite mame ya bisôk* ane bevo’o ya be be, be nga bo mvite mame ya bisôk,* nde fo’o ve môse wua, bôte 23 000 ya be be be nga wu. 9 Nge na, te bia ve’ele Yéhôva,* avale bevo’o ya be be be nga ve’ele nye, akekui benyo be nga mane wôé be. 10 Nge na, te kobané menyiñ, avale bevo’o ya be be be nga kobô menyiñ, akekui ñwôé bôt a nga mane wôé be. 11 Éyoñe ji, mame ma me nga kui be ane bive’an, a mame mete me nga tilibane mfa’a ya bo bia ayemé, bia bi nga nyiñe memane ya émo* ji.

12 Nde, nyu a simesane na a tele tetele, a tabe’e ntyele na a bo te ku. 13 Éyoñ ô tele meve’ele été, ô nji tebe meve’ele ma selan a ma bôte bese ba tôbane me, ve Zambe a ne zôsô, a ye ke jô’é na ô tôbane meve’ele ô vo’o ki jibi, ve éyoñ ô tele meve’ele, a ye bo jôm ése ja sili asu na ô bo ngule ya jibi me.

14 Nde a bôte ma nye’e, tubané nkañane bengulemelan. 15 Ma kobô ane nge ma kobô bôte be bili atyeñe meyen; miabebiene tyi’ané nge jame ma jô é ne été, nge momo. 16 Élaé ya ébotane bia botan, ye nalé a nji tinane na bia nyoñe ngap a metyi me Krist? E belete ya bia bek, ye nalé a nji tinane na bia nyoñe ngap a nyule Krist? 17 Amu belet é ne jia, bia, akusa bo bi ne abui, bi ne nyule jia amu bia bese bi ne benyoñe ngabe ya belet éte jia.

18 Tama yenan Israël ya minsôn: Ye bôte ba di biôme ba ve metuna’a autel, be nji bo benyoñe ngabe ya autel? 19 Nde, jé ma jô? Ye na mimveane ba ve bengulemelan, mi ne jôm a na ngulemelan é ne jôm? 20 Teké’é; ve ma jô na, metuna’a meyoñe ma ve, ma ve me mbia minsisim, sa ke Zambe; a me nji kômbô na mi bo benyoñe ngap a mbia minsisim. 21 Mi vo’o ke nyu élaé Yéhôva* a élaé mbia minsisim; mi vo’o ke di “e tebele Yéhôva”* a e tebele mbia minsisim. 22 Nge na ‘ye bia tindi Yéhôva* na a bo aban’? Bi nji dañe nye ngule nga?

23 Mame mese me ne boban avale Metiñe me Moïse ma kañese* na me boban, ve sa ke mese mme me ne mfi. Mame mese me ne boban avale Metiñe me Moïse ma kañese na me boban, ve sa ke mese mme ma ve ngule nyul. 24 Môt ase a kele’e ôsu a jeñ, sa ke mfi wé émien, ve mfi môte mbok.

25 Ja’ané jôm ése ba kuane vôme ba kuane betite makit, teke sili minsili amu mone môte wônane ya nlem. 26 Amu Yéhôva* nnye a nee si a biôme bise bi ne été. 27 Nge môt a ne te buni a bañete mia, a mi kômbô’ô ke mbañete ôte, ja’ané jôm ése a ye telé mia ôsu teke sili minsili, amu mone môte wônane ya nlem. 28 Ve nge môt a jô mia na, “Be nga ve jôme ji metuna’a,” te mia di je, amu môt a te kate mia de, a amu mone môte ya nlem. 29 Me nji kômbô jôô mone môte wônane ya nlem, ve nyi môte mfe. Amu jé mone môte ya nleme môte mfe, nnye a ye tyi’i ma ajô mfa’a ya fili jam? 30 Nge ma nyoñe ngabe jame me va’a Zambe akiba, amu jé ba ye kobô ma abé, amu bidi ma te nyoñe me va’a Zambe akiba?

31 Nde, nge mia di, nge nyu, nge bo jôm éziñ éfe, bo’ané mame mese asu duma Zambe. 32 Te boané na bejuif, begrec a ékôane Zambe be kolé ôbak, 33 fo’o ve avale mamiene ma ve ngule na me yené mvaé be bôte bese, mfa’a ya mame mese, sa ke na me jeñe mfi wome mamien, ve na me jeñe mfi abui bôt, ndembene be ne nyiiban.