Mbamba foé Marc a nga tili

1 Atata’a ya mbamba foé a fombô Yésus Krist, Mona Zambe. 2 Nkulu mejô Ésaïe a nga jô na: “(Tame yen! Ma lôme môt ôsu wôé,* nnye a ye kôme wo zen.) 3 Tyiñe ja yôtane nkôte si é jô’ô na: ‘Kômané zene Yéhôva!* Sôané mezene mé.’” 4 Jean Baptiste a mbe nkôte si a kañete’e nduan, ñwô ô ne ndeme ya nkôñelane nlem asu njamane mam abé. 5 Bôte bese ya Judée, a ba bese ya Jérusalem be nga ke koone nye, ane a nga du be* Ôsôé ya Jourdain, ane be nga meme minseme miap e bôt été. 6 Jean a mbe a be’e biyé bi too a mimvote mi chameau, a be’e kandé ékôp angeteñ, a mbe a ja’a bitandak a wôé ya afan. 7 A mbe a kañete’e a jô’ô na: “Môt a dañe ma ngul a zu ma mvus, a minkole besilefase mié, me vo’o mie tiñeti nge tiine mie. 8 Me nga du mia mendim été, ve nye a ye du mia a mfufube nsisim.”

9 Melu mete, Yésus a nga so Nazareth ya Galilée, ane Jean a nga du nye Jourdain. 10 Été été, ane a nga vame mendime yôp, a nga yen ane yôbe da yombô, a mfufube nsisim a nga zu be nye, a yené’é ane zum. 11 Nde tyiñ é nga so yôp, é jô’ô na: “Ô ne Mone wome ma nye’e; ma wô’ô wo mvaé.”

12 Été été, nsisim ô nga bo na a ke nkôte si. 13 A nga tabe nkôte si wôé tañe melu 40, nde Satan a nga ve’ele nye wôé, betite ya afan, be mbe fe wôé, ve beéngele be mbe be saane nye.

14 Éyoñe be nga bi Jean Baptiste, ane Yésus a nga ke Galilée a kañete mbamba foé Zambe 15 a jô’ô na: “Éyoñe be nga jô je é kpwaaneya, a Éjôé Zambe é ntoo bebé, kôñela’ané minlem a bunané mbamba foé.”

16 Nté a mbe a wulu’u abôñe mañe ya Galilée, a nga yene Simon ba monyañe wé André be wu’a mevote mañ été amu be mbe beyobe kos. 17 Yésus a nga jô be na: “Tôñané ma, ma ye bo mia beyobe bôt.” 18 A été été, be nga li’i mevote map a tôñe nye. 19 Éyoñ a wuluya ôbe nté, a nga yene Jacques mone Zébédée a monyañe wé Jean, be too éfunga jap été, be kôme’e mevote map, 20 ane a nga loone be teke jañele éyoñ. Nde be nga lik ésa wop, Zébédée éfunga été a bebo bisaé bé, a tôñe nye. 21 Ane be nga ke Capernaüm.

Nné ane môse Sabbat ô nga kui, ane Yésus a nga ke synagogue a taté na a ye’ele. 22 A bôte be mbe fe’e ne vema, éyoñe be nga yen aval a mbe a ye’ele’e, amu a mbe a ye’ele’e be ane môt a bili éjôé, a nji be a ye’ele’e be ane bescribe bap. 23 Awolo éte ébien, môt éziñ a mbe synagogue valé, mbia nsisim a mbe a too nye nyul, a nga bete tyiñe yôp a jô na: 24 “A Yésus ya Nazareth, bi bili ajô avé a wo? Ye ô soya na, wo zu bia mane wôé, ma kôme yeme za nye ô ne, Môt a ne Étyi Zambe a nga lôm!” 25 Ve Yésus a nga komekane wô a jô’ô wô na: “Dibik anyu a kôlô’ô be nye!” 26 Éyoñe mbia nsisim a maneya bo na, môt a li’ibane mbia nli’iban* a na mise me tyi’i nye yôp, a nga tate mbia ntatan, ane a nga kôlô be nye. 27 Bôte bese be mbe fe’e ne vema aval é mbe na, be nga taté na ba jôane be be na: “Za aval étua jame di? Bi ngenane teke yene môt a ye’ele’e avale di! Amu a kate to’o mbia minsisime mame mia yiane bo a mia bo nye mewôk.” 28 Foé é mbe é fombô’ô Yésus é nga ji’a mialane bevôme bese ya ngoto ya Galilée.

29 Éyoñe be kôlôya synagogue, Yésus Jacques a Jean be nga ke nsamba nda be Simon ba André. 30 Nde be nga koone na, ntyi minga Simon a mbe a bôô énoñ ôkon, ayôñ é nga bete nye nyul, nde be nga kate nye de. 31 Nde Yésus a nga ke vôm a mbe a bôô, a bi nye wo a volô nye na a tebe, ane tit* é nga man, a taté na a belane be.

32 Mame ngô’é, éyoñe jôp é nga dim, bôte be nga zuu nye minkôkone mise a bôte mbia minsisime mi mbe mi jô’é be; 33 ane bôte bese ya tisone be nga zu jaé mbé yôp. 34 Nde a nga mane saé abui bôt é mbe é konô’ô akone mevale meval, a nga mane fe vaa abui mbia minsisim, ve a nji jô’é na, mbia minsisime mi kobô ajô dé, amu mi mbe mi yeme’e na a ne Krist.*

35 Ndibe tyé, e zu koone dibi é ngenane nseñ, a nga kôlô si a ke nseñ, vôm a ne ngule ya tabe étam, nde a nga taté na a ye’elane wôé. 36 Ve Simon a bôte be mbe nsamba a nye, be nga ke ba jeñe nye; 37 éyoñe be nga koone nye, be nga jô nye na: “Bôte bese ba jeñe wo.” 38 Ve a nga jô be na: “Nkelané vôme mfe, bitisone bi ne bebé a va na me ke fe kañete wôé, amu ajô te nde me nga so de.” 39 A nga ke fe a kañete besynagogue bap ya Galilée ase, a vaa mbia minsisim.

40 Nzezam ôfe ô nga zu koone nye, ô taté na wo ye’elane nye, ô kute’e meboñe si ô jô’ô nye na: “A Tate, nge wo kañese, ô ne saé ma.” 41 Ane a nga wô’ô nye éngôngol a same wo wé a nambe nye, a jô nye na: “Ma kañese! Bo’o mvo’é.” 42 Été été, zam é nga mane nye nyul, ane nzezam ô nga yet. 43 Ôsusua na Yésus a jô nye na a ke, a nga taté ve nye metiñe ma, 44 a jô’ô nye na: “Te kate môt éziñe jame da te boban, ve kele’e liti womiene be prêtre, a yene na ô ntoo mfuban, amu ô ntoo mvo’é, va’a biôme Moïse a nga jô na môt a ntoo mvo’é a yiane ve, na ô liti bôte bevo’o na ô ntoo mvo’é.” 45 Ve nné ane a nga kui nseñ, ane môt ate a nga taté na a kañete jam ése é nga kui nye, amu nalé Yésus a mbe ki fe beta nyiine tison asoé. Ve Yésus a nji nyiine tison, a nga ke tabe vôme bôte be nji be, ve to’o nalé, bôte be nga ke ôsu a zu be nye be so’o bevôme bevôm.