Mbamba foé Matthieu a nga tili

26 A nga bo na, éyoñe Yésus a nga mane jô mame mete mese, nde a nga jô beyé’é bé na: 2 “Mia yeme na, dene melu mebaé, bia ye bo abô’ô Paska, a na Mona môt a ye vebane mo be besiñe bé na be tyelé nye élé yôp.”

3 Nde bejôô beprêtre a bemvendé ya ayoñ, be nga ke sulane nseñe beta prêtre a mbe jôé na, Caïphe, 4 mfa’a ya na be bôndé mefe’e ya bi Yésus a atyeñe medu’an, a wôé nye. 5 Ve be nga jô na: “Bi nji yiane bo de éyoñ abôk é ne, bôte be za bo zô’é.”

6 Éyoñe Yésus a mbe Béthanie, nda Simon, môt a mbe a konô’ô zam, 7 minga éziñ a nga so a bili albâtre, nde’e mbon ô ne dia ô bili mbamba menyum, nde a nga zu koone Yésus a ja’a, ane a nga taté na a sôé nye mbon ôte nlô. 8 Éyoñe beyé’é bé be nga yene jam éte, nde be nga wôk ôlun a sili na: “Aval éndamane di? 9 Mbone wu ô ne dia, nga ba be ngule ya kuane wô, a ve minzôzoé moné ate?” 10 Éyoñe Yésus a nga yeme jame be mbe be jô’ô, nde a nga sili be na: “Amu jé mia kômbô ndeñele minga nyu? Ke a te bo ma mbamba jam. 11 Amu minzôzoé mi ne a mia kom ése, ve ma ma ye ke tabe a mia kom ése. 12 Éyoñ a te sôé ma mbone wu, a te bo de na a kômesane ma asu éjame mbim. 13 Ma kate fo’o mia na, vôm ase mbamba foé nyu a ye katebane be bôte ya si ése, ba ye fe kañete jame minga nyu a te bo, a simesane nye.”

14 Nde wua ya beyé’é bé Awôm a bebaé, nyu ba loone na Judas Iscariot, a nga ke yene bejôô beprêtre, 15 a sili be na: “Mia ye ve ma jé na me ve* mia nye?” Ane be nga kui tyiñe na, ba ye ve nye minsañe mi moné 30. 16 Éyoñe te nje a nga taté na a jeñe fane ya koñe Yésus be be.

17 Môs ôsu ya Abô’ô ya belet é ne te mvusu, beyé’é be Yésus be nga ke sili nye na: “Nne wo yi na bi ke kômesane wo vôme wo ye bo abô’ô Paska vé?” 18 Ane a nga yalane be na: “Kelané tisone be kala a jô nye na, ‘Ñye’ele a jô na: “Éyoñe jam é ntoo bebé ya kpwaan, ma ye bo abô’ô Paska a beyé’é bame nda jôé.’” 19 Ane beyé’é be Yésus be nga bo aval a nga lebe be na be bo a kômesan abô’ô Paska.

20 Éyoñe ngô’é é nga vin, Yésus a mbe a too tebele a ja’ak a beyé’é bé 12. 21 Nté be mbe be ja’a, nde a nga jô be na: “Ma bele fo’o ane ma jô mia na, môte wua ya be mia a ye koñe ma.” 22 Mejô mete me nga bo be mintaé nlem angôndô, ane môt ase a nga taté na a sili nye na: “A Tate sa ke ma, nga?” 23 Nde a nga yalane be na: “Môte bia nye bia dube wo éyoñe jia ésua été, nnye a ye koñe ma. 24 Mona môt a ye fo’o ke aval é ne ntilane mfa’a wé, ve ngo’o môt a ye koñe nye. É nga ye dañe bo mvaé asu dé na a bo teke bialé.” 25 Judas, nnye a mbe bebé ya koñe nye, a nga sili nye na: “A Rabbi a nji bo ma, nga?” Ane Yésus a nga yalane nye na: “Womiene wo jô nalé.”

26 Nté be mbe be kele’e ôsu a di, Yésus a nga to’é belet, ane a nga mane ye’elan* a be’e je, a ve je beyé’é bé, a jô be na: “Nyoñan, mi di je. Belete nyi é ne ndeme ya nyule jam.” 27 A nga nyoñe fe élaé, a ve Zambe akiba,* ane a nga ve be je, a jô’ô na: “Nyoñané mia bese mi nyu. 28 Amu é ne ndeme ya ‘metyi mame ya élat,’ mme ma ye sôébane si asu njamane ya minseme ya abui bôt. 29 Ve ma kate mia na, ma ye ke beta nyu woone nyi akekui môse bia be mia bia ye beta nyu nye mfefé nyuan, Éjôé Ésa wom.” 30 Éyoñe be nga mane yia bia ya ve Zambe duma,* ane be nga kui nseñ, a ke Nkôle Beolivier.

31 Éyoñ éte, Yésus a nga jô be na: “Mia bese mia ye kolé ôbak alu di ajô dam, amu é ne ntilane na: ‘Ma ye bibi mba’ale mintômba, a mintômba ya abemba mia ye mialan.’ 32 Ve éyoñe ma ye wômô, mia ye zu koone ma Galilée.” 33 Ve Pierre a nga jô nye na: “To’o bôte ba bese ba kolé ôbak ajô dôé, me vo’o kolé ôba’a môs éziñ!” 34 Nde Yésus a nga jô nye na: “Ma bele fo’o ane ma jô wo na, alu ébiene di, ôsusua na nnôme kup a loñ, wo ye jô biyoñe bilale na ô nji yeme ma.” 35 Nde Pierre a nga jô nye na: “To’o da sili na, me wu a wo me vo’o jô na me nji yeme wo.” Ane beyé’é bevo’o bese fe be nga jô avale da.

36 Nde Yésus ba beyé’é bé, be nga ke vôme ba loone na Gethsémané, ane a nga jô beyé’é bé na: “Taba’ané si va, nté ma ke ye’elane valé.” 37 Ane a nga ke a Pierre a bone be Zébédée bebaé, ane nleme Yésus ô nga bo nye mbia mintaé, a nga bo fe mbia éyôé. 38 Nde Yésus a nga kate be na: “Nleme wo bo ma* mbia mintaé, mintaé ve ane ma zu wu. Taba’ané va, mi mombô a ma.” 39 Ane a nga ke ôbe nté, a buti asu si a ye’elane na: “Ésa wom, nge nalé a ne boban, bo’o na élaé ji é ke ma ôyap, ve sa ke ane nkômbane wom ô ne, ve ane éngôé ô ne.”

40 Ane a nga bulane vôme beyé’é bé be mbe, a koone be be too ôyo, nde a nga sili Pierre na: “Aya? Ye mia kate mombô ve awolo da a ma? 41 Momba’ané a ye’elan éyoñ ése na, mi bo teke ku meve’ele été. Nsisim ô ne ngul, ve nsôn ô ne atek.” 42 Ane a nga beta ke éyoñe baa, a ye’elane na: “A Ésa wom, nge me mba’a mba’a ve nyu élaé ji, nkômbane wôé ô boba’an.” 43 Ane a nga beta so a zu koone be be kele’e ôyo, amu ôyo ô mbe be mis. 44 Ane a nga li’i be, a ke ôbe nté a ye’elan éyoñe lale, a ye’elane ve avale da. 45 Nde a nga beta bulane vôme beyé’é bé be mbe, a jô be na: “Aval éyoñe di mi mia ke ôyo a wo’on! Tama yenan! Awolo ba kee Mona môte mo bebo minseme na be wôé nye é kuiya. 46 Kôla’ané si bi ke, tama yenan! Môt a koñe ma a nga zu.” 47 A ngenan a kobô’ô, tame yen, Judas, môte wua ya minlôman Awôm a mibaé, a nga suan a beta nsamba bôt a bili minkpwaté mekôn a mimbeñ, bejôô beprêtre, bescribe a bemvendé ya ayoñe be nga lôm.

48 Môt a nga koñe nye a nga ve be ndem, a jô’ô be na: “Môte ma ye nyañ amañ, nnye le, biané nye mi kee nye.” 49 Ane a nga ke tetele be Yésus, a jô nye na: “Mbôlô a Rabbi!” a wubane nye a nye’an ôse. 50 Ve Yésus a nga sili nye na: “Wo te zu bo jé va?” Éyoñe te nje bôte be nga subu Yésus bebé, a bi nye, a kee nye. 51 Ve môte wua ya ba be mbe a Yésus, a nga vaa nkpwaté mekône wé abam, a bibi ôlo beta prêtre a tyi’i nye alo. 52 Nde Yésus a nga jô nye na: “Futi’i nkpwaté mekône wôé abam, amu bôte bese ba belane nkpwaté mekôn, ba ye wu a nkpwaté mekôn. 53 Ye wo simesane na me vo’o ki jô Ésa wome na a lôme ma minsamba beéngele 12, éto ébiene ji?” 54 Nge nalé, aval avé Mintilane mia jô na mame mete ma yiane boban, mia ye ñhe tôéban?” 55 Ane Yésus a nga sili nsamba bôte na: “Ye mia te zu bi ma a minkpwaté mekôn, a mimbeñ, ane mia zu bi ñwuwup? Môs ane môs, me nga jaé tabe Temple été, me ye’ele bôt, ve mi nji bi ma. 56 Ve, mame ma mese me nga boban asu na, Mintilane bekulu mejô mi tôéban.” Nde beyé’é bé bese be nga li’i nye étam a tup.

57 Bôte be nga bi Yésus be nga kee nye be Caïphe beta prêtre, vôme bescribe a bemvendé ya ayoñe be nga tôkan. 58 Ve Pierre a nga ke a tôñe nye ôbe nté, akekui nseñe beta prêtre; éyoñ a nyiineya été wôé, nde a nga ke tabe si a bebo bisaé ya nda na, a yene jame ba ye bo Yésus.

59 Ane bejôô beprêtre a Sanhédrin* ase, be nga ke ba jeñe mame ya bo’olô Yésus na, be wôé nye. 60 Ve be nji yen amu wua wua, akusa bo abui belaa minsos é nga so. Mvuse ya valé, bôte befe bebaé be nga so, 61 a jô na: “Môte nyu a nga jô na, ‘Me ne ngule ya tyame temple Zambe a beta lôñe nye tañe melu melal.’” 62 Ane beta prêtre a nga tebe tetele a sili nye na: “Wo dip anyu aya? Ye wo wô’ô ki mame bôte ba ba jô na ô nga bo?” 63 Ve Yésus a nji yalane nye. Ane beta prêtre a nga jô nye na: “Ane Zambe a vee, kate’e bia nge ô ne Krist, Mona Zambe!” 64 Yésus a nga jô nye na: “Womiene wo jô nalé. Ve ma kate mia na: Ataté éyoñe ji, mia ye yene Mona môt a too mbo nnôme Zambe ya ngul ése a za’a minkut été.” 65 Nde beta prêtre a nga nyabe biyé bié ya yôp, a jô na: “A kobôya Zambe ébiasé! Bebo’olô ba beta volô bia jé? Nga miabebiene mia te wôk ane a kobô Zambe ébiasé? 66 Bi bo nye aya?” Ane be nga yalane na: “A yian awu.” 67 Nde bôte be nga tui nye menden asu a lume nye bikuta, bevo’o ki be nga bibi nye mebaé asu, 68 be jô’ô nye na: “A Krist, nge ô ne nkulu mejô kate’e bia, za a te bibi wo?”

69 A nga bo na, nté Pierre a mbe a too nseñ, nde mbo ésaé minga a mbe a saé valé a nga zu koone nye, a jô nye na: “Wo fe ô mbe a Yésus ya Galilée!” 70 Ve a nga sôô de mise me bôte bese be mbe valé, a jô’ô na: “Me nji yeme jame wo jô.” 71 Éyoñ a nga ke fefele mbé ya akak, mona minga mfe a nga yene nye, a kate bôte be mbe valé na: “Môte nyu a mbe nsamba Yésus ya Nazareth.” 72 Ane a nga beta sôô de a kane’e ngana, a jô’ô na: “Me nji yeme môt ate!” 73 Mvuse mon éyoñ, bôte be mbe be tele valé, be nga zu koone Pierre, a jô nye na: “Wo fe ô ne môte wua ya be be, nkobô wôé ôbiene wo* liti de.” 74 Nde a nga taté na a sôô jam éte a kane’e ngana, a jô’ô na: “Me nji yeme môt ate!” Été été nnôme kup a nga loñ. 75 Ane Pierre a nga simesane jame Yésus a nga jô nye na: “Ôsusua na nnôme kup a loñ, wo ye jô biyoñe bilale na ô nji yeme ma.” Ane a nga kui nseñ a yône nya ñyônane.