Kalate baa Paul a nga tili Becorinthien
12 Da sili na me bo éngelezek. Nalé a nji fo’o bo mfi, ve ma zu mia kat ajô ya bitua miñyenan a mefoé ma so be Tate. 2 Ma yeme môt éziñ a nga wulu ba’aba’a a Krist den a ntoo mimbu 14, a nga betebane yôbe lale, nge a mbe a nyule jé nge sa ke a nyule jé, me nji yem, ve Zambe a yem. 3 Ôwé, ma yem avale môt éte, me nji yeme nge a mbe a nyule jé nge a nji be a nyule jé, ve Zambe a yem, 4 be nga kee nye paradis, a a nga wô’ô bifia bi vo’o toteban a bi atiñ é nji kañese na môta binam a tot. 5 Ma ye bo éngeleze’e mfa’a ya avale môt éte, ve sa ke mfa’a wome mamien, nge ô vaa ve na me bo éngelezek ajô ya ate’e dam. 6 Amu, nge ma kômbô bo éngelezek, ma ye ke bo akut amu ma ye kobô benya mejôô. Ve ma bi nleme ya bo te bo de asu na, môt a bo te ve ma duma a lôte nné ya abim a yene nge wô’ô be ma, 7 fo’o ve amu me nga bi bitua miñyenane bite.
Mfa’a ya kamane ma na me bete mamiene yôp, éyo é nga vebane be ma minsôn été, éngele Satan, a nga ke ôsu a bibi ma abaé,* ndembene mebune ma ye bo te jaé ma nlem. 8 Biyoñe biyoñe bilal, me nga ye’elane Tate ajô éte, na a vaa ma éyo éte. 9 Ve a nga yalane ma na: “Beta mvame wom a yiane wo, amu ngule jame ja yené ate’e dôé été.” Ajô te, ma ye fo’o dañe vak ate’e dam été asu na, ngule Krist é ke ôsu a tabe be ma ane nda éndelé. 10 Nde ma yene mevak ate’e dam été, e meta été, njembane biôm été, e bitibila’a a minjuk été amu Krist. Amu éyoñe me ne atek, éyoñe te nje ñhe me ne ngul.
11 Me ntoo akut. Mia mia te tindi ma na me bo nalé, amu mia mia te yiane se’e ma. Nde fe to’o me ne zezé jôm, teke jôm éziñe ja liti na beta minlômane benane ba dañe ma afôla éziñ. 12 Nya ajôô, mendeme ma liti na me ne nlômane me nga yené zañe jenan a abui mbane ya jibi a mendem, bitua bi mam a mesimba. 13 Mfa’a ôvé bikôane bekristene bivo’o bi nga dañe mia, éko éziñe fo’o ve amu me nji be mbe’e asu denan? Ma ja’é mia na mi jamé ma asu mbia mboon ate.
14 Tama yenan! Éyoñe lale ji me tele na ma zu be mia, a ma ye ke bo mbe’e asu denan. Amu sa ke biôme bi mo bienane mbie ma jeñ, ve miabebien; nya ajôô, sa ke bone mbe ba ba’ale moné asu bebiaé bap, ve bebiaé mbe ba bo de asu bone bap. 15 Mfa’a wom, ma ye bo abui meva’a na me jañele biôme bi mo biame bise a mamien asu denan.* Nge ma nye’e mia abui, ye da sili na mi nye’e ma tyôtyoé? 16 Ve aval ése é ne, me nji be mbe’e asu denan. Akusa bo nalé, mia jô na, me nga “du’u” mia, a me nga bi mia a “fe’e medu’an.” 17 Ye me nga diane mia a zene ya bôte me nga lôme be mia? 18 Me nga lebe Tite na a zu be mia, a me nga lôme nye a mojañ. Ye Tite a nga diane mia? Nga bi nga wulu a avale nsisime da, nga bi nga tôñ avale bibô’a mebo da?
19 Ye mia too mi simesa’ane nté ôse wu na, bia kamane biabebiene be mia? A ne ôsu Zambe a ôsu Krist nnye bia kobô. Ve a bôte ma nye’e, jam ése bia bo é ne ve na bi ve mia ngule nyul. 20 Amu jame ma ko woñ é ne na, éyoñe ma ye suane wôé, me bo teke koone mia avale ma yi na me koone mia, a na me bo teke bo avale mia yi na me bo, ve na me koone môman, éviele, mbia ñwô’an ôlun, besañeta’ane, ékobôkobô, nkobane menyiñ,* mebun a jo’ojo’o. 21 Éko éziñ éyoñe ma ye beta zu be mia, Zambe wom a ye samele ma ôsu wônan, a da ye sili na me yôn abui ya ba be nga taté bo minseme ve teke kôñelane minlem, mfa’a ya nyé mboone mam, mvite mame ya bisôk* a mvite mame teke wô’ô nyé nge ôson.*