Kalate Jacques a nga tili

1 Ma Jacques, ôlo Zambe a wu Tate Yésus Krist, ma tili menda me bôt 12 me nga mane tyamelan:

Mbôlané!

2 A bobejañ, éyoñe mia tôbane meve’ele mevale meval, nyoñané de a mevak, 3 mia yeme na, éyoñe mbunane wônane wo tebe meve’ele été aval éte, nalé a ve mbane ya jibi. 4 Ve jôka’ané mbane ya jibi ô sondô ésaé jé ése, ndembene mi ne bo ngumba a bo mame mese mvo’é mimfa’a mise, teke jembane jôm éziñ.

5 Nde nge môt éziñe ya be mia a jembane fek, a kele’e ôsu a ja’é je Zambe, a Zambe a ye ve nye fek, amu a ne étua akap a môt ase, a a ye ke komekane* môt éziñ. 6 Ve a kele’e ôsu a ja’é fek a mbunan, teke ve’ele sôô, amu nyu a sôô a ne ane mintyôa ya mañ, mmie mite mfebe a kee mie li a li. 7 E nya ajôô, avale môt éte é nji yiane buni na a ye nyoñe jôm éziñe be Yéhôva;* 8 môt ate a ne minleme mibaé, a ndeñendeñe* mezene mé mese.

9 Ve mojañ a ne mone môt* a va’ak,* amu a te betebane yôp, 10 a môt a ne nkukum a va’ak, amu a te silibane si, amu môt a ne nkukum a ye jañ aval ane same ya mefup. 11 Amu avale nlô jôbô a tôô, a ayôñe dé da jimbi élok a same jé é mane kôt, abeñe dé ki é mane jañ, nne fe môt a ne nkukum a ye ku nalé, te tame mane mame mé.

12 Mevak a môt a ke ôsu a bo mbane ya jibi meve’ele, amu nge a mane me jibi, a ye bo avale môte Zambe a yene mvaé, a ye bi couronne* ya ényiñe Yéhôva* a nga ka’ale ba ba ke ôsu a nye’e nye. 13 Éyoñ a tele meve’ele été, môt éziñ a bo’o te jô na: “Me tele meve’ele amu Zambe.” Amu Zambe a ne te ve’eleban a mbia be mam, a émien a ne te ve’ele môt éziñ. 14 Ve môt ase a tebe meve’ele été éyoñ a jô’é na minkômbane mié mibiene mi wone nye. 15 Nde nkômban, éyoñ ô nyoñeya abum, wo biaé nsem; a nsem, éyoñ ô bobaneya, wo soo awu.

16 Te mia du’uban, a bobejañe ma nye’e. 17 Mbamba mvean ase a das ése bi ne teke ayeñe bia so e yôp été, e be Tate ya bifufube ya yôp, nnye ate a ne teke tyendé ane nsisiñ. 18 A mbe nkômbane wé na, a biaé bia a mejô ya benya mejôô, ndembene bia ye bo kane bembômô bibuma ya bitétéa bié.

19 Yemané jame di, a bobenyañe bame ma nye’e: Môt ase a yiane bo kom ése avôle ya vô’ôlô, ôte’ete’e ya kobô, ôte’ete’e ya yaa, 20 amu ôlune môta binam a wôk ô ne te tôé zôsô Zambe. 21 Va’ané ñhe jôm ése é ne mvit a mone jam ase a ne abé,* a kañesa’ané a évôvoé nleme na mejô me Zambe me faa mia minlem, mme mete me ne nyii mia.*

22 Ve, bo’ané bôte ba tôñe mejô me Zambe, sa ke ve ba ba vô’ôlô me, mi du’u miabebien a bivuse mimfasan. 23 Amu nge môt éziñ a wô’ô mejô me Zambe a teke tôñe me, môt ate a ne ane môt a fombô asu dé e ngobô. 24 Amu a fombô émien, a kele, a vuan été été avale môt a ne. 25 Ve môt a fombô e metiñe me Zambe me ne te ayeñ été, mme mete ma soo fili a bo jame ma jô, a nji bo môt a vô’ôlô a vuane ki, ve a bo ésaé Zambe; a a ye bo mevak éyoñ a bo je.

26 Nge môt éziñ a simesane na a ne nkañe Zambe,* ve a teke bo ngule ya tiñeti ôyeme wé,* a du’u nleme wé a ékaña’a jé é ne momo. 27 Fatan ékaña’a* é ne mfuban a teke ndamane mise me Zambe wongan a Ésa wongane nje nyi: mi ba’ale’e bobenyui a minkus e minju’u miap été, a ba’ale miabebiene teke ayeñe mfa’a ya si nyu.