Mbamba foé Luc a nga tili

22 A nga bo na, Abô’ô ya belet é ne te mvusu ba loone na Paska é mbe é ntoo bebé. 2 A bejôô beprêtre a bescribe be mbe be jeñe’e mbamba zene ya bi Yésus, amu be mbe be ko’o bôte woñ. 3 Ane Satan a nga nyiine be Judas, nyu be mbe be lo’one na Iscariot, a mbe môte wua ya minlôman Awôm a mibaé. 4 Ane a nga ke, a laan a bejôô beprêtre a bivete beba’ale Temple ajô ya aval a ne koñe Yésus be be. 5 Be mbe beta mevak a be nga kui tyiñe na ba ye ve nye minsañe mi moné. 6 Nde a nga kañese a taté na a jeñe mbamba zene ya kuane be nye teke na bôte be yeme de.

7 Éyoñe môs ôsu ya Abô’ô ya belet é ne te mvusu ô nga kui, ñwô be wô’ô ve mimveane ba yiane ve Paska; 8 ane Yésus a nga lôme Pierre a Jean, a jô’ô be na: “Kele’e kômesané bia vôme bia ye di abô’ô Paska.” 9 Be nga sili nye na: “Nne wo yi na bi ke de kômesane vé?” 10 A nga jô be na: “Tama yenan! Éyoñe mia ye nyiine tison, môt a ye zu tôbane mia a be’e nde’e mendim, tôñané nye akekui nda a ye nyiin. 11 A jô’ané mie ndaa na, ‘Ñye’ele a sili wo na: “Aba beyeñ é ne vé, vôme me ne di abô’ô Paska a beyé’é bam?”’ 12 A môt ate a ye liti mia beta aba nda yôp, a aba éte é bili biôme bise ya nda. Kômesa’ané bia abô’ô valé.” 13 Ane be nga ke a koone mame fo’o ve aval a nga kate be, ane be nga kômesan abô’ô Paska.

14 Nde éyoñ awolo é nga kpwaan, Yésus a nga tabe si a di tebele a minlômane mié. 15 A nga jô be na: “Me nga jaé kômbô di Paska nyu a mia ôsusua na ma tôbane minjuk; 16 amu ma kate mia, ma ye ke nye beta di akekui mame mese ma ye tôéban éyoñ Éjôé Zambe ja ye zu jôé.” 17 A a nga kañese élaé, a ve Zambe akiba a jô na: “Nyoñané je, mi ke mia kalane je mo mo, 18 amu ma kate mia na, ataté éyoñe ji, ma ye ke beta nyu woon, akekui éyoñ Éjôé Zambe ja ye zu jôé.”

19 A nga to’é fe belet, a ve Zambe akiba, a be’e je a ve be je a jô’ô na: “Nyuna a ne ndeme ya nyule jam, nje ja ye veban asu denan. Kelané ôsu a bo jame di mi simesa’ane ma.” 20 A nga bo fe avale da a élaé éyoñe be maneya di, a jô’ô na: “Nyuna a ne élaé é ne ndeme ya mfefé élate ja ye boban a zene ya metyi mam, mme ma ye fo’o sôéban asu denan.

21 “Ve Tama yenan! Môt a koñe ma a ne a ma tebele va. 22 Amu, é ne été na, Mona môt a ke zene jé avale mintilane mia jô, ve ngo’o môt a ye koñe nye!” 23 Ane be nga taté na ba kobô be be, mfa’a ya yeme za ya be be a ne bele bo avale jam éte.

24 Ve beta nsañeta’ane a nga kui fe zañe jap mfa’a ya yeme za ya be be a dañe ba bevok. 25 Ve a nga jô be na: “Bejô bôte ya meyoñe ba jôé bôt ane bemasa, a ba be bili éjôé ba loobane na mbamba be bôt. 26 Mi mi nji yiane bo nalé. Ve nyu a ne beta môt e zañe jenan a yiane bo ane nyu a dañe mone mongô, a nyu a tele mia ôsu a yiane bo ane mbo ésaé wônan. 27 Za a dañe beta môt, ye nyu a di, ye nyu a belane* bôte bevok? Ye sa ke nyu a di? Ve ma, me ne zañe jenan ane nyu a belane* bôte bevok.

28 “Ve mia mi ne ba be jaéya tabe a ma minju’u miam été; 29 a ma bo élat a mia, fo’o ve aval Ésa wom a nga bo élat a ma asu éjôé, 30 ndembene mi ne di a nyu e tebele wom Éjôé jam été, a tabe bito minjôan a tyi’i meyoñ 12 ya Israël mejô.

31 “A Simon, a Simon, tame yen! Satan a yete mia na a ve’ele môt ase ya be mia aval ane môt a bo éyoñ a kandé blé a ékôbe jé. 32 Ve me nga bo meye’elane me nja’an asu dôé na mbunane wôé ô bo te tek, wo fe éyoñe wo ye bulan, wônô’ô bobenyoñ.” 33 Ane a nga jô nye na: “A Tate, me ne nkômesane ya ke nda mimbôk a wo, a wu a wo.” 34 Ve a nga jô nye na: “Ma kate wo a Pierre, nnôme kup a ye ke loñe den, ôsusua na wo jô biyoñe bilale na ô nji yeme ma.”

35 A nga jô fe be na: “Ye jôm éziñ é nga jeñebane mia éyoñe me nga lôme mia na mi ke kañete teke ékpwaé moné, ékpwaé bidi a besilefase minkol?” Be nga yalane na: “Teké’é!” 36 Nde a nga jô be na: “Ve éyoñe ji, nyu a bili ékpwaé moné a nyoñe’e je, avale da fe ékpwaé bidi, a nyu a nji bi nkpwaté mekôn a ku’an éyé jé ya yôp, a kuse wô. 37 Amu ma kate mia na, jam é ne ntilane da yiane tôébane mfa’a wom é ne na, ‘A nga lañeban a betyame metiñ.’ Amu jam éte é nga tôébane be ma.” 38 Ane be nga jô na: “Tame yen, a Tate! Minkpwaté mekône mibaé mi ne va.” A nga jô be na: “Abime te da yian.”

39 Ane a nga kôlô a ke Nkôle Beolivier aval a wô’ô ju’u bo, a beyé’é be nga tôñe fe nye. 40 Éyoñe be nga kui vôm ate, a nga jô be na: “Ye’elané na mi bo teke ku meve’ele été.” 41 A a nga li’i be ane nté môt a wua akok, ane a nga kute meboñe si a taté na a ye’elan, 42 a jô’ô na: “Ésa wom, nge wo kômbô, bo’o na élaé ji é ke ma ôyap. Ve sa ke nkômbane wom, ve éñwôé ñwô ô boba’an.” 43 Ane éngele a nga yené be nye a so’o yôp, a ve nye ngule nyul. 44 Ve mintaé mi mbe mi bili nye angôndô, nde a nga ke ôsu a ye’elan a ngul ése, a édudu’u jé é mbe ve ane metoé metyi ma toé tyia. 45 Éyoñ a nga mane ye’elan, a nga ke vôme beyé’é be mbe, a nga koone be be kele’e ôyo, amu be mbe be te’eya a éyôé. 46 A nga jô be na: “Amu jé mia ke ôyo? Kôla’ané si a ke ôsu a ye’elane na mi bo teke ku meve’ele.”

47 A ngenan a kobô’ô, tame yen! Nsamba bôt a môte ba loone na Judas, wua ya minlôman Awôm a mibaé a tele wô ôsu, ane a nga subu Yésus bebé a nyañe nye amañ. 48 Ve Yésus a nga sili nye na: “A Judas, ye wo koñe Mona môt ô nyañe’e nye amañ?” 49 Éyoñe bôte be mbe nye fefele be nga yene jame da zu boban, be nga sili na: “A Tate, ye bi jii be minkpwaté mekôn?” 50 Wua ya be be a nga bibi mbo ésaé beta prêtre, a tyi’i nye alo ya mbo nnôm. 51 Ve Yésus a nga yalan a jô’ô na: “Abim éte da yian.” Ane a nga nambe alo a saé nye. 52 Ane Yésus a nga jô bejôô beprêtre a bivete beba’ale Temple a bemvendé be nga zu bi nye na: “Ye mia te zu bi ma a minkpwaté mekôn, a mimbeñ, ane mia zu bi ñwuwup? 53 Nté me mbe a mia Temple môs ane môs, mi nji zu bi ma. Ve awolo denane nde di a di éjôé ya dibi.”

54 Ane be nga bi nye a kee nye a nyiñili nye nda beta prêtre, ve Pierre a mbe a tôñe’e nye ôyabe mvus. 55 Éyone be nga bo’é mbe’e nduane nseñ été a tabe si nsamba, Pierre a mbe a too a be. 56 Ve mbo ésaé minga a nga yene nye a too si a zene ya éfufube ya nkaba’a nduan, ane a nga tu’a nye fombô a jô na: “Môte nyu fe a mbe a nye.” 57 Ve a nga sôô de, a jô’ô na: “A minga me nji yeme nye.” 58 Mvuse mon éyoñ, môte mfe a nga yene nye, a jô na: “Wo fe ô ne môte wua ya be be.” Ve Pierre a nga jô na: “A môt, me nji bo môte wua ya be be.” 59 A éyoñe bebé ngumba awolo ô lôteya, môte mfe a nga taté na a yemete a ngule na: “Teke vaa nge beté, môte nyu fe a mbe a nye, amu a ne ne môte ya Galilée!” 60 Ve Pierre a nga jô na: “A môt, me nji yem ajô wo kobô le.” A été été, nté a mbe a ngenan a kobô’ô, nnôme kup a nga loñ. 61 Ane Tate a nga kôñelan a fombô mfa’a Pierre a mbe, ane Pierre a nga simesane bifia Tate a nga jô éyoñ a nga jô nye na: “Ôsusua na nnôme kup a loñe den, wo ye jô biyoñe bilale na ô nji yeme ma.” 62 Ane a nga kui nseñ a yône nya nyônane.

63 A nga bo na, befame be mbe be ba’ale’e Yésus be nga taté na ba kpwe’ele nye a bôme nye; 64 a éyoñe be nga buti nye asu, be nga taté na ba jô nye na: “Nge ô ne nkulu mejô, kate’e bia, za a te bibi wo?” 65 A be nga kobô nye abui minkobô mi ébiasé afe.

66 Tyé kpwaa, bemvendé ya ayoñ, nalé a tinane na bejôô beprêtre a bescribe be nga tôkan, a be nga kee nye Sanhédrin* wop a jô na: 67 “Nge ô ne Krist, kate’e bia.” Ve a nga yalane be na: “To’o ma kate mia, mia ye ke buni ma. 68 Nde fe, nge ma sili mia nsili, mia ye ke yalan. 69 Ve ataté éyoñe ji Mona môt a ye tabe mbo nnôme ngungule Zambe.” 70 Ane bese be nga jô nye na: “Nde, ye ô ne Mona Zambe?” A nga yalane be na: “Miabebiene mia jô na me ne nnye.” 71 Be nga jô na: “Amu jé bia beta yi bebo’olô befe? Amu biabebiene bia te de wôk é so’o anyu dé.”