Avale Yéhôva a yalane meye’elane mangan

1-2. Minsili mivé bi ne sili biabebien a lat a meye’elane bia bo?

YE Ô tameya sili womiene môs éziñe nge Yéhôva a yalane fo’o meye’elane môé? Nge é ne nalé ô nji bo étam. Abui bobejañ a besita afe é siliya bebien avale nsili éte, e dañe dañ éyoñe ba tôbane minjuk. Nge bia tôbane minjuk, bia fe bi ne jeñe na bi yemelan avale Yéhôva a yalane meye’elane mangan.

² Bi tame taté zu yen amu jé bi ne tabe ndi na Yéhôva a yalane meye’elane bebo bisaé bé. (1 Jean 5:15) Bia zu fe yene biyalane ya minsili mi: Amu jé bi ne yene biyoñe biziñe ve ane Yéhôva a vô’ôlô ki meye’elane mangan? A aval avé Yéhôva a yalane meye’elane mangane den?

YÉHÔVA A NE BO TE YALANE MEYE’ELANE MANGAN AVALE BIA TE KÔMBÔ

3. Amu jé Yéhôva a yi na bi ye’elane nye?

³ Kalate Zambe a liti bia na Yéhôva a nye’e bia nya abuii, a na bi ne édima mise mé. (Habak. 2:7; 1 Jean 4:10) Jôme te nje a jô bia na bi sili nye mvolan a zene ya meye’elan. (1 P. 5:6, 7) A kômbô volô bia na bi ke ôsu a wulu ba’aba’a a nye a na bi dañe minjuk mise bia tôbane mie.

4. Aval avé bia yeme na Yéhôva a yalane meye’elane bebo bisaé bé? (Fombô’ô fe fôtô.)

⁴ Kalate Zambe a liti na Yéhôva a nga yalane meye’elane bebo bisaé bé. Ye wo simesane môte wua ya été? Bi ne lañe Njô bôte David. A nga bi angôndô ya abui bésiñ ényiñe jé, a nga jaé sili Yéhôva mvolane meye’elan été. Môs éziñ a nga ye’elan a jô’ô na: “Wô’ô meye’elane mam, A Yéhôva, ke’ alo mfa’a ya minja’ane miam: Yala’ane ma a mvo’é jôé, a zôsô wôé.” (Bsa. 143:1) Yéhôva a nga yalane meye’elane me David a nyi nye. (1 Sam. 19:10, 18-20; 2 Sam. 5:17-25) David a mbe ve jô a ndi nlem ése na: “Yéhôva a ne bebé be ba bese ba loene nye.” Bia fe bi ne bi ndi nlem éte.​—Bsa. 145:18.

5. Ye Yéhôva a mbe a yalane meye’elane bebo bisaé bé ya melu mvus avale be mbe be yiik éyoñ ése? Va’a éve’an. (Fombô’ô fe fôtô.)

⁵ É ne kui na Yéhôva a bo te yalane meye’elane mangan avale bia yi. Nlômane Paul ô nga tebe aval été éte. A nga ye’elane Zambe na a vaa nye éyo é mbe nye minsôn été.’ Biyoñe bilal, Paul a nga ye’elane Zambe a kobô’ô nye ajô ya njuk ôte. Ye Yéhôva a nga yalane meye’elane mete? Mvo’é mvo’é, ve sa ke avale Paul a mbe a yiik. Yéhôva a nji vaa nju’u a mbe a bili, ve a nga ve nye ngul é mbe é sili’i asu na a ke ôsu a bo nye ésaé.​—2 Cor. 12:7-10.

6. Amu jé bi ne yene ve ane Yéhôva a nji yalane meye’elane mangan?

⁶ É ne kui biyoñe biziñe na éyalane ya meye‘elane mangan é bo te bo nji bi mbe bi yange’e. Ve bi ne tabe ndi na Yéhôva a kôme yeme mvolane wo sili bia. A ne fe “bo étua abui mam, adañe mam mese bia sili nge simesan.” (Éphé. 3:20) Ajô te, a ne yalane meye’elane mangan éyoñe bi nji be bi buna’an a avale bi nji be bi simesa’an.

7. Amu jé é ne sili na bi tyendé jam éziñe bia te sili Yéhôva meye’elan? Va’a éve’an.

⁷ Biyoñe biziñ é ne kui na bi tyendé mame bia sili Yéhôva meye’elan éyoñe bia tu’a wô’ô nkômbane wé. Bi tame yene jam é nga kui Mojañe Martin Poetzinger. Be nga fete nye camp de concentration Nazi e zu koon a ndôme luk. Atata’a a nga ye’elane Yéhôva na a volô nye na a ji’a kui nda mimbôk asu na a ke nyoñe ngap a minga wé a beta taté ésaé nkañete jé. Ve mvuse sondô ébaé a nji yene jam éziñ é mbe é liti’i na Yéhôva a mbe a yiik na a kui mimbôk. Nde a nga beta taté meye’elan a jô’ô na: “A Yéhôva, éngôngol liti’i ma jame wo yi na me bo.” Nde a nga taté na a simesane minju’u bobejañe ba be nye be mbe camp de concentration be mbe be tôba’ane mie. Abui ya be be é mbe é tyelé’é minleme yôp ajô ya binga bap a bone bap. Ane Mojañe Poetzinger a nga taté na a ye’elane na: “Akiba a Yéhôva amu mfefé ésaé ô ndôme me ve. Volô’ô ma na me ve bobejañe bete ngule nyul.” A nga bo ésaé éte nda mimbôk wôé mimbu ébul!

8. Jam avé bia yiane ba’ale ôsimesan éyoñe bia ye’elane Yéhôva?

⁸ Bia yiane ba’ale na Yéhôva a bili ngume nsôñan a na a ye tôé wô éyoñ môse wé wo ye kpwaan. Nsôñan ôte ô ne na a mane vaa mame mese ma bo na bi tôbane minju’u den aval ane bibubua, akon, a awu. Yéhôva a ye belan Éjôé jé asu na a tôé nsôñan ôte. (Dn. 2:44; Nlitan. 21:3, 4) Ve ôsusua na môs ôte wo kui, Yéhôva a jô’é na Satan a jôô émo.b (Jean 12:31; Nlitan. 12:9) Nge Yéhôva a mane kôme minjuk mise bia tôbane mie den, da ye yené ve ane Satan a ne mbamba njô. Nté bia yange na Yéhôva a tôé bengaka’a bé, bia yiane tabe ndi na a suu ki bia étam. Bi tame zu yene mezene Yéhôva a belane me asu na a yalane meye’elane mangan.

AVALE YÉHÔVA A YALANE MEYE’ELANE MANGANE DEN

9. Aval avé Yéhôva a ne volô bia éyoñe da sili na bi nyoñe mintyi’an? Va’a éve’an.

⁹ A ve bia fek. Yéhôva a ka’ale na a ye ve bia fek asu na bi nyoñe mbamba mintyi’an. Bi wô’ô dañe yi fe’e Zambe éyoñe da sili na bi nyoñe mintyi’ane mia ye nambe ényiñe jangan ése, aval ane ntyi’ane ya tabe nkoé nge ke luk. (Jacq. 1:5) Bi tame zu kobô ajô nkoé sita éziñ ô ne jôé na Maria.c Maria a mbe a bu’uban ésaé nkpwa’a mefane jé éyoñ a nga tôbane mojañ éziñ. A jô na: “Nté bi mbe bi yema’an, nde fe nye’an ô mbe zañe jangan ô mbe ô yaék nalé. Me mbe me yeme na ma yiane nyoñe ntyi’an. Ajô te, me nga jaé kobô Yéhôva ajô éte meye’elan été. Me mbe fo’o me yi na Yéhôva a liti ma zen, ve me mbe me yeme’e na a ye ke nyoñe ntyi’an señe jam.” Sita Maria a nga yemelane na Yéhôva a nga yalane meye’elane mé. Aval avé? A nga vune bekalate bangane nde a nga yene minlô mejô mi nga ve nye biyalane ya minsili mié. A nga vô’ôlô fe mbamba melep étôtôlô nyia jé é nga ve nye. Melebe mete me nga volô Maria na a tu’a fas émien. Nalé a nga volô nye na a nyoñe mbamba ntyi’an.

10. Bephilippien 4:13 a liti na Yéhôva a bo jé asu na a volô bebo bisaé bé? Va’a éve’an. (Fombô’ô fe fôtô.)

¹⁰ A ve bia ngule ya jibi minjuk. Aval a nga suk nlômane Paul, Yéhôva a ye ve bia ngule ja sili asu na bi jibi minjuk bia tôbane mie. (Lañe’e Bephilippien 4:13.) Bi tame zu yen avale Yéhôva a nga volô mojañ a too jôé na Benjamin na a jibi minjuk a nga tôbane mie. Éyoñe Benjamin a mbe ésoé, ba nda bôte jé be nga ke nyiñe camp des réfugié éziñ Afrika. Benjamin a jô na: “Me mbe me ye’elane Yéhôva éyoñ ése, me jô’ô nye na a ve ma ngule ya bo mame ma ve nye nlem avak. Yéhôva a nga yalane meye’elane mam amu a nga bo na nlem ô bômbô ma si ne mieññ, a ve ma ayo’o nleme ya ke ôsu a kañete. A nga ve fe ma fane ya bi bekalate be nga volô ma na me ke ôsu a wulu ba’aba’a a nye.” A ke ôsu a jô’ô na: “Éyoñe me nga lañe minkañete mi bobejañe bevok a yen ane Yéhôva a nga ke ôsu a volô be na be jibi, nalé a nga tu’a yemete mbunane wom.”

11-12. Aval avé Yéhôva a belane nda bôte jangane ya nsisim asu na a yalane meye’elane mangan? (Fombô’ô fe fôtô.)

¹¹ A belane nda bôte jangane ya nsisim. Alu a nga kandane nyiñe si va, Yésus a nga ye’elan a nleme wé ôse. A nga ye’elane Yéhôva na a bo te kañese na a yené mise me bôt ane ntyame metiñ. Yéhôva a nga lôm éngele na a ke ve Yésus ngule nyul. (Luc 22:42, 43) Yéhôva a ne fe belane mojañe nge ke sita éziñe na a loone bia téléfôn nge ki na a zu jome bia asu na a ve bia ngule nyul. Môt ase ya be bia a yiane jeñe na a bi fane ya ve bobejañe bevok ngule nyul a zene ya “mbamba éfia.” ​—Mink. 12:25.

¹² Bi tame kobô ajô sita a ne jôé na Miriam. Bone besondô mvuse awu nnôme wé, Miriam a mbe a too nda jé étam a wô’ô émien éngôngol. A mbe a ye’e wu a ñyôn a yi môte ba nye be mbe ve laan. A jô na: “Mbôle me nji be me bili ngule ya loone môt éziñ, ane me nga taté na ma Ye’elane Yéhôva. Nté me mbe me ye’elane Yéhôva me yônô’ô, me nga teme téléfôn wom a nga loñ. A mbe mvendé éziñ, mvôé jam.” Mvendé éte ba ngale be nga ve Miriam ngule nyul. A nga kôme wô’ôtane na Yéhôva nnye a nga belane mojañ ate asu na a loone nye.

13. Va’a éve’ane ja liti aval avé Yéhôva a ne belane bôte be nji be be kañe nye asu na a yalane meye’elane mangan.

¹³ A ne belane bôte be nji kañe nye. (Mink. 21:1) Biyoñe biziñ é wô’ô sili na Yéhôva a belane bôte ba kañe ki nye asu na a yalane meye’elane bebo bisaé bé. Éve’an é ne na, a nga belan Njô bôt Artaxerxes asu na a yalane meye’elane Néhémie a nga bo nye a jô’ô na a kômbô ke beta lôñe tisone ya Jérusalem. (Néh. 2:3-6) Melu ma fe, Yéhôva a ne bo na bôte be nji kañe nye be nyii bia éyoñe bi tele minjuk été.

14. Jam avé da te nambe wo nkañete Soo Hing? (Fombô’ô fe fôtô.)

¹⁴ Sita a ne jôé na Soo Hing a nga wô’ôtane na Yéhôva a nga volô nye a zene ya dokita wé. Mone wop a mbe é konô’ô nlô. Éyoñe a nga bo accident, Hing ba nnôme be nga li’i bisaé biap asu na be ke nyoñe ngap a nye. Nalé a nga bo na azoé é bi be. Soo Hing a nga jô na a mbe a wô’ôtane na a nji bo ngule ya jibi njuk ôte. Ane a nga yoé Yéhôva nleme wé a sili nye mvolan. Mvuse ya valé, dokita a mbe a saék mone wé a nga jeñe mezene ya volô nye a nda bôte jé. Éjôé ya si jap é nga kañese volô be a ve be mbamba étaba’a. Mvuse ya valé Soo Hing a jô na: “Bi nga yene wo Yéhôva njuk ôte. A ne fo’o nyi a ‘wô’ô meye’elan.’”​—Bsa. 65:2.

BIA YIANE BI MBUNAN ASU NA BI KAÑESE A YEN AVALE YÉHÔVA A YALANE MEYE’ELANE MANGAN

15. Jé é nga volô sita éziñe na a yeme na Yéhôva a nga yalane meye’elane mé?

¹⁵ Yéhôva a bo ki bitua bi mam éyoñ ése asu na a yalane meye’elane mangan. Ve a ve bia avale biyalane da volô bia na bi ke ôsu a wulu ba’aba’a a nye. Ajô te, bia yiane kôme yoé mis a jeñe na bi yemelan avale Yéhôva a yalane meye’elane mangan. Sita a ne jôé na Yoko a nga wô’ôtane na Yéhôva a nji yalane meye’elane mé, ve a nga tyi’i na a zu tili mame mese a nga sili Yéhôva meye’elan été mone ntili. Mvus abim éyoñ éziñ, éyoñ a nga ke fombô mone ntili wé a nga su’ulane yemelane na Yéhôva a nga yalane meye’elane mé abui biyoñ, to’o ma méziñ a mbe a maneya vuan. É ne mfi na bi bo bi nyoñ éyoñe ya fas avale Yéhôva a yalane meye’elane mangan.​—Bsa. 66:19, 20.

16. Aval avé bi ne liti na bi bili mbunan éyoñe bia ye’elane Yéhôva? (Behébreu 11:6)

¹⁶ Bia liti na bi too ndi a Yéhôva sa ke ve éyoñe bia ye’elane nye, bia liti fe de éyoñe bia kañese aval a yalane meye’elane mangan. (Lañe’e Behébreu 11:6.) Bi tame kobô ajô Mike ba minga wé Chrissy. Be mbe be bili nsôñane ya ke saé Béthel. Mike a jô na: “Bia minga wome bi nga jalé afep asu na bi ke saé Béthel a bi nga kate Yéhôva jam éte meye’elane été abui biyoñ. Ve be nji bañete bia môs éziñ.” Mike ba Chrissy be mbe be too ndi na Yéhôva nnye a kôme yem aval a ne belane be ésaé jé. Be nga ke ôsu a bo mame mese be mbe ngule ya bo asu ésaé Yéhôva. Be nga ke bo ésaé nkpwa’a mefane jap vôme bekañete mbamba foé be mbe be jemba’an a su’u ésaé melôñ. Dene ba jome mekônda. Mike a jô na: “Yéhôva a nji yalane meye’elane mangan éyoñ ése avale bi mbe bi simesa’an, ve éyalan a nga ve bia é nga dañe jame bi mbe bi buna’an.”

17-18. Besam 86:6, 7 a liti na jé bi ne tabe je ndi?

¹⁷ Lañe’e Besam 86:6, 7. Ntili besam David a mbe a too ndi na Yéhôva a wô’ô meye’elane mé a yalane fe me. Wo fe ô ne tabe de ndi. Minkañete bia te yen ayé’é di mia te liti bia na Yéhôva a ne ve bia ngul a fe’e ja sili asu na bi jibi minjuk. A ne belane nda bôte jangane ya nsisime nge ki bôte ba kañe ki nye asu na be volô bia mimfa’a miziñ.

¹⁸ To’o Yéhôva a yalane ki meye’elane mangan éyoñ ése aval bia kômbô, ve bia yeme na a ye yalane me. A ye ve bia jôme bia yi mbamba éyoñ. Ajô te kele’e ôsu a ye’elane Yéhôva, a liti na ô too ndi na a nyoñe ngap a wo den, a na a ye “jalé nkômbane ya jôm ése é vee” mfefé émo wo zu.​—Bsa. 145:16.