Jeñe’e na ô vu ôsimesane Yéhôva a wu Yésus

1-2. (a) Jé ja tinane na e nye’e Yéhôva? (b) Aval avé Yésus a nga liti na a nye’e Yéhôva?

“WO YIANE nye’e Yéhôva Zambe wôé a nleme wôé ôse a ényiñe jôé ése a ngule jôé ése a ôsimesane wôé ôse.” (Luc 10:27) Yésus a mbe a yeme’e na atiñ éte nde da dañe metiñe mese ya Metiñe me Moïse. Te vuane na bia yiane nye’e Yéhôva a nleme wongan ôse. Nalé a tinane na bia yiane nye’e nye a minkômbane miangan a avale bia wô’ôtane mam. Bia yiane fe nye’e nye a ényiñe jangan ése a ngule jangan ése, nje éte é ne fe ngule ya minsône jangan. Ve bia yiane fe nye’e Yéhôva a ôsimesane wongan ôse, ñwô ôte ô ne avale bia yene mam. Bia jeñe na bi vu ôsimesane Yéhôva. É ne été na bi se ngule ya kôme mane yem ôsimesane wé. Ve bi ne kui na bi bo de éyoñe bia yé’é “ôsimesane Krist,” amu asimesane Yésus é ne ane asimesan Ésa wé.—1 Cor. 2:16.

² Yésus a mbe a nye’e Yéhôva a ôsimesane wé ôse. A mbe a yeme’e jôme Yéhôva a mbe a yiik asu dé, jôme te nje a nga ve ngule jé ése na a bo nkômban Ésa wé, ja’a é mbe é sili’i na a jibi minjuk a ékpwe’ele amu zôsô. A nga bem ôsimesane wé mfa’a ya bo nkômban Ésa wé. A nji jô’é na jôm éziñ é kamane nye na a bo nkômban Ésa wé.

3. Jé nlômane Pierre ô nga yé’é be Yésus, a jé ô nga lebe bekristene na be bo? (1 Pierre 4:1)

³ Pierre a minlômane mivo’o be nga bi beta mvome ya lôt abui éyoñ a Yésus a yé’é abui mame be nye. Éyoñe Pierre a nga tili kalate wé ôsu, a nga lebe bekristene na be tabe nkômesane ya bi aval ôsimesane Krist a mbe a bili.a (Lañe’e 1 Pierre 4:1.) Pierre a nga belan éfia bezimbi ba belane je éyoñ a nga tili na: “Taba’ané nkômesan.” Ajô te, nge bekristene ba jeñe na be bi aval ôsimesane Krist a mbe a bili, a yene mam aval a mbe a yene’e mam, ba ye bo ngule ya wosane nkômban ôse ya bo mbia be mam, a ngule ya wosan émo Satan a jôé ji.—2 Cor. 10:​3-5; Éphé. 6:12.

4. Jé bia zu yen ayé’é di?

⁴ Bia zu yen aval ôsimesane Krist a mbe a bili a avale bi ne ve ngule ya vu nye. Bia zu fe yen (1) avale bi ne vu ôsimesane Yéhôva, (2) avale bi ne bo éjote nyul a (3) avale bi ne bi mbamba été nsisim.

BI VU ÔSIMESANE YÉHÔVA

5. Aval avé Pierre a nga liti môs éziñe na a nji vu ôsimesane Yéhôva?

⁵ Môs éziñ, Pierre a nga liti na a nji vu ôsimesane Yéhôva. Yésus a nga kate beyé’é bé na a yiane ke Jérusalem, a na bemvendé, bejôô beprêtre a bescribe ba ye tibili nye a wôé nye. (Matt. 16:21) Pierre a mbe a yeme’e na Yésus a ne Messie a yiane nyii ayoñ Israël. Ajô te, é mbe é yiane bo ayaé na a kañese na Yéhôva a ye kôme jô’é na be wôé Yésus. (Matt. 16:16) Ane Pierre a nga loone nye fefel a jô nye na: “A Tate, ô ye’e ñhe womien, avale jam éte da yiane ke kui wo.” (Matt. 16:22) Pierre ba Yésus be nji be tyiñe jia amu Pierre a nji be a bili ôsimesane Yéhôva.

6. Aval avé Yésus a nga liti na ôsimesane wé wo lu’an a wu Yéhôva?

⁶ Yésus a mbe a bili ôsimesan Ésa wé. Jôme te nje a nga jô Pierre na: “A Satan lôte’e ma mvus! Ô ne jôme ja bo na, me kolé ôbak, amu wo fase ki ane Zambe, ve wo fas ane bone be bôt.” (Matt. 16:23) Éko éziñe Pierre a mbe a yiik mvo’é Yésus, ve Yésus a nga bene melebe mé. Pierre a nga yé’é na a yiane ve ngule ya bi ôsimesane Zambe. A ne fe beta sikôlô bia fe bia yiane nyoñ.

7. Jé Pierre a nga su’ulane bo ja liti na a mbe a kômbô’ô vu ôsimesane Yéhôva? (Fombô’ô ya ékô’ôla.)

⁷ Mvuse ya valé, Pierre a nga ve ngule ya vu ôsimesane Yéhôva. Éyoñ é mbe é kuiya asu na begentil fe be nyiin ékôane Zambe. Pierre a nga bi beta mbe’e ya kañete Corneille, mone gentil ôsu a nga bi fane ya kañe Yéhôva. Bejuif a begentil be nji be be bo’o mame fufulu, jôme te nje é nga sili na Pierre a taté bi mvolan ôsusua na a ke bo ésaé Yéhôva a nga ve nye. Éyoñe Pierre a nga yeme nkômbane Yéhôva, ane a nga sôan ôsimesane wé a lat a begentil. Éyoñe Corneille a nga lôme bôte na be ke loone Pierre, a nga ke “teke fete” jam éziñ. (Mame mi. 10:​28, 29) A nga kañete Corneille a nda bôte jé, mvuse ya valé ane be nga duban.—Mame mi. 10:​21-23, 34, 35, 44-48.

8. Aval avé bi ne liti na bia vu ôsimesane Yéhôva? (1 Pierre 3:8 a ayemé)

⁸ Mimbu mi nga lôte valé, Pierre a nga lebe bekristene na be ‘bi ôsimesane wua.’ (Lañe’e 1 Pierre 3:8 a ayemé.) Bi ne bi ôsimesane wua a bobejañ a besita éyoñe bia vu ôsimesane Yéhôva ô ne Kalate Zambe. Éve’an é ne na, Yésus a nga jô beyé’é bé na be telé Éjôé Zambe ôsu binyiñe biap. Mojañ éziñe ya ékôane bekristene jôé a ne nyoñe ntyi’ane na a zu bo nkpwa’a mefane nge bo ésaé éfe ya nsisim é ne ngum aval. A lôte na bi kate nye na a yiane ye’e émien, bi ne ve nye ngule nyul a zene ya mbamba be mame be tii a ésaé a kômbô bo a su’u nye.

BO’O ÉJOTE NYUL

9-10. Aval avé Yésus a nga liti na a ne angôndô ya éjote nyul?

⁹ Alu Yésus a nga kandane lôte ba minlômane mié ôsusua na ba wôé nye, a nga ye’ele be avale be ne bi fulu éjote nyul. Yésus a nga taté lôme Pierre ba Jean na be ke kômesan étune nda ba ye bo abô’ô paska. Be mbe be yiane kômesane fandé mendim a betawôlô ba ye belane be na be sôbe mebo ôsusua na ba di. Ve za a mbe na a ye bo aval ésaé éte éyoñ awolo da ye kui?

¹⁰ Été été, Yésus a nga bo ésaé éte a liti a zen éte na a ne angôndô ya éjote nyul. Minlômane mié mi mbe fe’e ne vema ya yen ane Yésus a bo ésaé mbo bisaé. Yésus a nga vaa éyé jé ya yôp, a to’é tawôlô a tiñeti angeteñe dé. Éyoñ a nga mane sôé mendime fandé, ane a nga taté na a sôbe be mebo. (Jean 13:​4, 5) A nga sôbe minlômane mié 12 mebo, to’o Judas a nga su’ulane nye koñ a jam éte é nga nyoñe nye abui éyoñ. Ve Yésus a nga bo de a éjote nyul ése. A évôvoé ése, Yésus a nga jô be na: “Ye mia yem amu jé ma te sôbe mebo menan? Mia loone ma na, ‘Ñye’ele’ a na, ‘Tate,’ a mia bele amu me ne Ñye’ele a Tate. Nde, nge ma, Tate a Ñye’ele, ma te sôbe mia mebo, aval éte da da môt ase a yiane sôbe nyu mbo’o mebo.”—Jean 13:​12-14.

11. Aval avé Pierre a nga liti na a nga yé’é fulu éjote nyul? (1 Pierre 5:5) (Fombô’ô fe fôtô.)

¹¹ Pierre a nga yé’é fulu éjote nyule be Yésus. Éyoñe Yésus a beteya yôp, Pierre a nga saé môt a nga bialé mbômbôk. (Mame mi. 1:​8, 9; 3:​2, 6-8) Bôte be mbe fe’e ne vema, ane be nga téé mimbil a ke koone nye vôm a mbe. (Mame mi. 3:11) Pierre a nji kañese na bôte be kañe nye, akusa bo a mbe a so’o vôme bôte ba nye’e duma. Ve a nga ve Yéhôva ba Yésus duma éyoñ a nga jô na: “A zene ya éyôlé [Yésus] a mbunane bi bili e jôé dé, môte mi lôô nyi, nyi mia kôme yem a te bo mvo’é.” (Mame mi. 3:​12-16) Bifia Pierre a nga belane bie éyoñ a nga tili bekristene kalate na a liti be mfi ya bo éjote nyul, bia yiane bo na bi simesane jame Yésus a nga bo môs a nga tiñeti tawôlô angeteñ a sôbe minlômane mié mebo.—Lañe’e 1 Pierre 5:5.

12. Aval ane Pierre, aval avé bia fe bi ne ke ôsu a yé’é fulu éjote nyul?

¹² Bi ne vu éve’ela Pierre a yé’é fulu éjote nyul. Te vuane na nya éjote nyulu a su’u ki ve na bi bi mbamba bifia. Éfia Pierre a nga belane je ba kôñelane na “éjote nyule” ja liti na fulu éjote nyul é ne fe ôsimesane bi bili a lat a biabebien a bôte bevok. Bia bo bôte mam amu bia nye’e Yéhôva a bôte bevok, sa ke amu bia kômbô bo miñyené. Éyoñe bia ve ngule ya bo Yéhôva ésaé a saane bobejañe bangan a meva’a mese, to’o ba yene de nge momo, bia liti na bi ne éjote nyul.—Matt. 6:​1-4.

BO’O “FEK”

13. E bo “fek” a tinan aya?

¹³ E bo “fek” a tinan aya? (1 P. 4:7) Kristen é ne fe’e ja ve ngule ya nyoñe mintyi’ane mia lu’an a ôsimesane Yéhôva. A yeme na élat a bili a Yéhôva nje ja dañe mfi ényiñe jé. A bili mbamba été nsisim a lat a émien, a a yeme na a nji yeme mame mese. A kôme liti jam éte éyoñ a subu Yéhôva Zambe bebé a zene ya meye’elan.b

14. Éyoñ évé nje Pierre a nji liti na a too ndi a Yéhôva?

¹⁴ Alu Yésus a nga kandane lôt a minlômane mié ôsusua na ba wôé nye, a nga ve be abendé di: “Mia bese mia ye kolé ôbak alu di ajô dam.” Pierre a nga yalan a ndi ése a jô na: “To’o bôte ba bese ba kolé ôbak ajô dôé, me vo’o kolé ôba’a môs éziñ!” Alu éte ébien, Yésus a nga jô beyé’é bé béziñe na: “Momba’ané a ye’elan éyoñ ése.” (Matt. 26:​31, 33, 41) Nge Pierre a nga ye tôñe melebe me Yésus, a nga ye bi ayo’o nleme ya mem amvôé dé a Yésus. Ve sa ke nde a nga bo nalé, a nga viane jô na a yeme ki nye.—Matt. 26:​69-75.

15. Aval avé Yésus a nga ba’ale fe’e jé akekui alu a nga kandane nyiñe si vaa ane môta binam?

¹⁵ Yésus a mbe a too ndi a Yéhôva a nleme wé ôse. Akusa bo a mbe zôsô teke ayeñ, a mbe a lôte’e abui éyoñe na a ye’elan Ésa wé. Jam éte é nga ve nye ayo’o nleme ya bo nkômbane Yéhôva. (Matt. 26:​39, 42, 44; Jean 18:​4, 5) Pierre a nji vuan abim éyoñe Yésus a nga lôte na a ye’elan Ésa wé.

16. Aval avé Pierre a nga liti na a mbe a ntoo fek? (1 Pierre 4:7)

¹⁶ Ane éyoñ é nga lôt, Pierre a nga yé’é na a tabe ndi a Yéhôva a zene ya meye’elan. Éyoñe Yésus a nga wômô, a nga bôé Pierre a minlômane mivo’o minleme si. A nga ka’ale be na ba ye bi mfufube nsisim, ndembene ba ye bo ngule ya kee ésaé nkañete ôsu. Ve Yésus a nga jô be na be tabe Jérusalem akekui ngaka’a jé ya ye tôéban. (Luc 24:49; Mame mi. 1:​4, 5) Jé Pierre a nga bo nté ôse a mbe a yange’e? Pierre a bekristene bevo’o be mbe be “ye’elane mban.” (Mame mi. 1:​13,14) Mvuse ya valé, e kalate Pierre a nga tili, a nga lebe bobenyañe bé ya nsisime na be tabe Yéhôva ndi asu na be bo fek. (Lañe’e 1 Pierre 4:7.) Pierre a nga yé’é na a tabe Yéhôva ndi, a a nga bo fe akône ya ékôane bekristen.—Gal. 2:9.

17. Jé bia yiane ke ôsu a bo to’o bi ne atyeñe mfa’a ya bo mame méziñ? (Fombô’ô fe fôtô.)

¹⁷ Nge bia kômbô bo fek, bia yiane bo mbane ya subu Yéhôva bebé a zene ya meye’elan. To’o bi ne atyeñe mfa’a ya bo mame méziñ, bia yeme na bia yiane ke ôsu ya ye’elane Yéhôva. Ve bia yiane dañe bo de éyoñe bi bili beta mintyi’ane ya nyoñ, bi ye’elane Yéhôva na a liti bia zen amu bi too ndi na a yeme jôme ja dañe mvo’é asu dangan.

18. Ntyi’an ôvé wo nyoñ?

¹⁸ Bia ve Yéhôva akiba amu a nga té bia éve’ela jé. Nalé a tinane na bi ne bi mefulu mé. (Mett. 1:26) É ne été na bi vo’o vu Yéhôva ne tiññ. (Ésa. 55:9) Ve ane nlômane Pierre, bi ne jeñe na bi tu’a bi ôsimesane Yéhôva. Ngo’o nge bia bo de éyoñe bia vu ôsimesane Zambe, éyoñe bi ne éjote nyul a éyoñe bi ne fek.