Jeñe’e na ô vu ayôñ ésaé nkañete Yésus

1. Amu jé bebo bisaé be Yéhôva ba selan a bôte ba jô anyu na be ne bekristen?

BETA jame wua a bo na bebo bisaé be Yéhôva be bo ngum aval a ne na be ne ayôña ésaé nkañete ane Yésus. (Tite 2:14) Ve biyoñe biziñ é ne bo ayaé ya bo ayôñ ésaé nkañete. Éko éziñe wo fe ô ne wô’ôtan ane étôtôlô mvendé é nga meme na: “Biyoñe biziñe me wô’ô wô’ô nju’u ya kañete.”

2. Jé é ne bo na biyoñe biziñe bi wô’ô nju’u ya kañete?

² Biyoñe biziñe bi ne nye’e bi bo’o mame mefe ésaé Yéhôva a lôte na bi ke nkañete. Amu jé? Éyoñe bia bo bisaé biziñe ya Éjôé aval ane ésaé melôñ a nkômane menda ya Éjôé, ésaé ya su’u bôte ba tôbane bibubua nge ji ya ve bobejañe ngule nyul, bi ne ji’a yene bibotane bia so été. Nté bia bo bisaé bite fufulu a bobejañ, bia saé e mvo’é été a môt ase a liti nyi mbo’o nye’an. Bia yeme na bobejañe be ne mevak amu mame bia bo asu dap. Ve é wô’ô kui na bi kañete mimbu mimbu abeñe nkañete da, teke ve môte wua a kañese benya mejôô. Bi ne fe tôbane bôte ba wosane foé bia kañete. Bia yeme fe na nté môse Yéhôva wo ye subu bebé, nde fe bôte ba ye tu’a biasé foé bia kañete be nalé. (Matt. 10:22) Jé é ne bia volô na bi ba’ale ayôñe dangan ésaé nkañete?

3. Aval avé kalate Luc 13:​6-9 a liti na Yésus a mbe ayôñ ésaé nkañete?

³ Éve’ela Yésus é ne liti bia avale bi ne bo ayôñ ésaé nkañete. Éyoñe Yésus a mbe si va, a nji ve’ele telé ésaé nkañete a mbe a bo’o a ayôñ ése. Nté éyoñ é mbe é lôtek, nde fe a mbe a va’a ngul ésaé éte. (Lañe’e Luc 13:​6-9.) Yésus a nga belan éve’ane môt a nga saé afube mindik. A nga saé a ngule jé ése tañe mimbu milal a nyoñe’e ngap a mindik, ve mi teke ve atañ ébuma. Aval éte da da Yésus a nga bo mimbu milal a kañete’e bejuif, ve abui ya be be é nga bene bo beyé’é bé. Ve mbo ésaé ya afube mindik a nji sili mo si, avale te fe Yésus a nji sili mo si, a nga kee ésaé nkañete jé ôsu. A nga tu’a bo bo ésaé éte a ayôñ ése asu na a nambe minleme mi bôt.

4. Mame menyine mevé ya éve’ela Yésus bia zu yen?

⁴ Ayé’é di bia zu yen avale avé Yésus a mbe ayôñ ésaé nkañete, e dañedañe ngon ésaman a nga kandane bo ésaé nkañete jé si va. Bi ne ba’ale ayôñe dangan ésaé nkañete nge bia tôñe mame Yésus a nga ye’ele a vu nye. Bi tame yene mame menyine ya éve’ela Yésus bi ne vu: (1) A nga telé nkômbane Yéhôva ôsu ényiñe jé, (2) a nga baa alo minkulane mejô ya Kalate Zambe, (3) a nga tabe ndi na Yéhôva a ye su’u nye, (4) a nga tabe ndi na bôte béziñe ba ye vô’ôlô nye.

A NGA TELÉ NKÔMBANE YÉHÔVA ÔSU ÉNYIÑE JÉ

5. Aval avé Yésus a nga liti na a telé nkômbane Yéhôva ôsu ényiñe jé?

⁵ Yésus a mbe a kañete’e “mbamba foé ya Éjôé Zambe” a ayôñ ése amu a mbe a yeme’e na nkômban Ésa wé le. (Luc 4:43) Ésaé nkañete nje é mbe é tele ôsu ényiñe jé. To’o bengon a nga kandane kañete si va, a nga ke “bitisone bitison a minlame minlam,” asu na a ye’ele bôte bevo’o mejô me Zambe. (Luc 13:22) A nga yañele fe beyé’é befe ésaé nkañete.—Luc 10:1.

6. Nja ôvé ô ne zañ ésaé nkañete a mimbe’e mivo’o ya ékôane Yéhôva? (Fombô’ô fe fôtô.)

⁶ Melu ma fe, ésaé nkañete é ne ésaé Yéhôva ba Yésus ba yi na bi telé ôsu. (Matt. 24:14; 28:​19, 20) Beta nja a ne zañ ésaé éte a mimbe’e mivo’o mise bi ne bi ékôane Yéhôva. Éve’an é ne na, éyoñe bia nyoñe ngap ésaé nlôñane Meba me Éjôé, nalé a volô na bôte bia kañete be zu kañe Yéhôva meba mete. Aval éte da da, ésaé bia bo Béthel nge bevôme befe é ne mfi asu ésaé nkañete. Nde fe éyoñ ébubua ja kui, bia ve fo’o ngule na bobejañ a besita be bi biôme bia jembane be, ve bia volô fe be na be beta taté na ba tabe bisulan a suk ésaé nkañete. Nge ô bo te vuane na ésaé nkañete é ne ésaé ja dañe mfi Yéhôva a yi na bi bo, wo ye bi éva’a ya ve ngule jôé ése na ô bo mban ésaé nkañete. János, mvendé ja nyiñe Hongrie ja jô na: “Me wô’ô jô mamien éyoñ ése na teke mbe’e éziñ ô ne fol ésaé nkañete; ésaé nkañete nje é ne mbe’e bia yiane taté be’e.”

7. Amu jé Yéhôva a yi na bi ke ôsu a kañete? (1 Timothée 2:​3, 4)

⁷ Bi ne kui na bi ba’ale ayôñ ésaé nkañete éyoñe bia ve ngule ya yene bôte bevok avale Yéhôva a yene be. Nkômbane Yéhôva ô ne na abui bôt é yé’é benya mejôô a kañese be. (Lañe’e 1 Timothée 2:​3, 4.) Mbôle mbamba foé ate a nyii bôt, Yéhôva a yañele bia na bi yeme nye kate bôte bevok. Éve’an é ne na, nsoé kalate Liti’i nye’an a bo’o bôte beyé’é wo ve bia melep a wo liti bia avale bi ne taté minlañ a bôt a tôé nsôñane ya bo be beyé’é. To’o bôte ba vô’ôlô ki bia den, be ne bi fane ya bo de ôsusua na beta étibila’a a man. Mame bia kate be dene me ne volô be na be kañese vô’ôlô mbamba foé melu ma zu. Ve nalé a ne bobane vengevenge ve nge bia ke ôsu a kañete.

A NGA BAA ALO MINKULANE MEJÔ YA KALATE ZAMBE

8. Aval avé minkulane mejô ya Kalate Zambe mi nga volô Yésus na a yeme belan éyoñe jé?

⁸ Yésus a mbe a yeme’e aval avé minkulane mejô mia ye tôéban. A mbe a yeme’e na ésaé nkañete jé ja ye bobane tañe mimbu milal a étun. (Dan. 9:​26, 27) A mbe fe a yeme’e na, avale minkulane mejô mia liti, a mbeme tôbane minjuk a wu. (Luc 18:​31-34) Yésus a nga jô’é na ñyeman ôte ô volô nye na a yem aval a yiane belan éyoñe jé. Nalé a nga volô nye na a kañete a ayôñ ése a na a man ésaé a nga zu bo.

9. Aval avé minkulane mejô ya Kalate Zambe mia volô bia na bi kañete a ayôñ ése?

⁹ Mame minkulane mejô ya Kalate Zambe ma ye’ele bia me ne volô bia na bi kañete a ayôñ ése. Bia yeme na memane ya nta’ane mame wu me ntoo bebé. Bia tu’a yene na mame ma bobane den a mefulu bôte be bili ma kôme wô’an a mame Kalate Zambe a nga jô a lat a melu ma su’ulan. Bia yen aval avé mewosane ma bobane zañ éjôé Anglo-Américaine a Russie a bijôé bia su’u nye. Mame mete ma tôé nkulan ajô wo kobô ajô njô bôte ya nord a nyi ya sud “melu ya asu’ulan.” (Dan. 11:40) Bia tu’a fe wô’ô na éjôé Anglo-Américaine nje é ne mebo ya beta éve’ela ya kalate Daniel 2:​43-45. Bi too ndi na teke vaa nge beté, avale minkulane mejô ya Kalate Zambe mia liti, ana’ana Éjôé Zambe ja zu mane bu’u bijôé ya si nyu. Minkulane mejô mite mise mia kôme liti na bi nga nyiñe melu ma su’ulan. Ajô te, bia yiane jeñe na bi kañete mbamba foé a ayôñ ése.

10. Aval avé afe minkulane mejô ya Kalate Zambe mia bo na bi bo ayôñ ésaé nkañete?

¹⁰ Minkulane mejô ya Kalate Zambe mi bili fe foé ja ve bia éva’a ya kañete bôte bevok. Carrie, sita a nyiñe République dominicaine a jô na: “Éyoñe ma simesane mbamba ényiñe Yéhôva a ka’ale bia melu ma zu, ma bi éva’a ya kañete de bôte bevok.” A ke ôsu a jô’ô na: “Éyoñe ma yene minju’u bôte ba batane mie den, nalé a bo na me kôme wô’ô na bengaka’a bete be nji bo asu dam étam, be ne fe asu dap.” Minkulane mejô ya Kalate Zambe mia ve bia ngule nyul a mia volô bia na bi bo teke bulane mvus, amu bia yeme na Yéhôva a su’u bia ésaé nkañete. Leila, sita a nyiñe Hongrie a jô na: “Kalate Ésaïe 11:​6-9 a ve ma ngule ya kañete bôte mbamba foé, to’o bôte ba yené ve ane be vo’o kañese nye. Ma yeme na a mvolane Yéhôva môt ase a ne tyendé.” Mojañe Christopher a nyiñe Zambie a jô na: “Avale kalate Marc 13:10 a liti, mbamba foé a ye katebane si ése. A ne beta édima jam asu dame na ma fe me volô na nkulan ajô ôte ô tôéban.” Minkulane mejô mivé ya Kalate Zambe mia ve wo éva’a ya ke ôsu a kañete?

A NGA TOO NDI NA YÉHÔVA A YE SU’U NYE

11. Amu jé Yésus a mbe a yiane tabe ndi a mvolane Yéhôva asu na a ke ôsu a kañete a ayôñ ése? (Luc 12:​49, 53)

¹¹ Yésus a mbe a too ndi na Yéhôva a ye volô nye na a ke ôsu a kañete a ayôñ ése. Akusa bo Yésus a mbe a yeme’e tobe bifia bié éyoñ a laan a bôt, ve a mbe a yeme’e na mbamba foé ya Éjôé a ye soo mewosan a metyama’ane. (Lañe’e Luc 12:​49, 53.) Betebe ôsu ya miñyebe be nji be be wô’ô mvaé amu Yésus a mbe a kañete’e. Ajô te, be nga jeñe na ba wôé nye. (Jean 8:59; 10:​31, 39) Ve Yésus a nga kee ésaé nkañete jé ôsu amu a mbe a yeme’e na Yéhôva a su’u nye. A nga jô na: “Me nji bo étam, ve Ésa wom a nga lôme ma a ne a ma . . . a nji li’i ma étam amu ma bo kom ése ve mam a nye’e.”—Jean 8:​16, 29.

12. Aval avé Yésus a nga volô bebo bisaé bé na be ke ôsu a kañete to’o ba tôbane mewosan?

¹² Yésus a nga ba’alane beyé’é bé abui biyoñe na ba yiane tabe ndi a Yéhôva. A nga ja fe kate be na Yéhôva a ye volô be éyoñe ba ye tôban étibila’a. (Matt. 10:​18-20; Luc 12:​11, 12) Jôme te nje a nga jô be na ba yiane tabe ntyel. (Matt. 10:16; Luc 10:3) A nga jô fe be na be bo te yemete bôte ba bene vô’ôlô benya mejôô na be mba’a mba’a ve vô’ôlô be. (Luc 10:​10, 11) A nga kate fe be na ba yiane tube nge ba tibili be vôm éziñ. (Matt. 10:23) Akusa bo Yésus a mbe ayôñ ésaé nkañete a too fe ndi a Yéhôva, ve a nji ve’ele vañe telé ényiñe jé mbia été môs éziñ.—Jean 11:​53, 54.

13. Amu jé bi ne tabe ndi na Yéhôva a ye volô bia?

¹³ Da sili bia mvolane Yéhôva asu na bi ke ôsu a kañete a ayôñ ése éyoñe bia tôban ékpwe’ele den. (Nlitan 12:17) Amu jé bi ne tabe ndi na Yéhôva a ye volô bia? Tame yene meye’elane Yésus a nga bo, bia koone me Jean kabetôlô 17. Yésus a nga sili Yéhôva na a ba’ale minlômane mié a Yéhôva a nga yalane meye’elane mé. Kalate Mame minlôman a liti aval avé Yéhôva a nga volô minlômane na mi kañete a ayôñ ése akusa bo bitibila’a. Meye’elane Yésus a nga bo, a nga sili fe Yéhôva na a ba’ale bôte be mbe be buni’i mame minlômane mi mbe mi kañete’e be. Ô ne môte wua ya bôte bete. Yéhôva a ngenan a kele’e ôsu a yalane meye’elane me Yésus mete den; a ye ke ôsu a volô wo fo’o ve aval a nga volô minlôman.—Jean 17:​11, 15, 20.

14. Amu jé bi ne tabe ndi na bi ne ke ôsu a kañete a ayôñ ése to’o bia tôbane minjuk? (Fombô’ô fe fôtô.)

¹⁴ Nté bia subu bebé a asu’ulan, é ne bo ayaé na bi ke ôsu a kañete mbamba foé. Yésus a nga ka’ale bia na bia ye bi mvolane wo sili asu na bi ke ôsu a kañete a ayôñ ése. (Luc 21:​12-15) Aval ane Yésus a beyé’é bé, bia jô’é na bôte bia kañete bebiene be tobe nge ba ye kañese foé bia kañete be nge momo a bia sa’ale môman. To’o bevôme ba tyili ésaé jangan, bobejañ bangane ba kui na be ke ôsu a kobô ajô ya mbunane wop, amu be too ndi a Yéhôva, sa ke a ngule jap bebien. Avale Yéhôva a nga volô bobejañe ya ntete mimbu ôsu, dene fe a ve bia ngule na ‘ésaé nkañete é bobane nya mboone.’ (2 Tim. 4:17) Yeme’e na, nge ô tabe ndi a Yéhôva, wo ye kui na ô ke ôsu a kañete mbamba foé a ayôñ ése.

A NGA TOO NDI NA BÔTE BÉZIÑE BA YE VÔ’ÔLÔ NYE

15. Jé ja liti na Yésus a mbe a too ndi na ésaé nkañete jé ja ye wume mbamba bibuma?

¹⁵ Yésus a mbe a too ndi na bôte béziñe ba ye vô’ôlô mbamba foé. Nalé a nga volô nye na a ke ôsu a bo ésaé nkañete jé a ayôñ ése. Éve’an é ne na, e memane ya mbu 30 ya É. J., Yésus a nga yene na abui bôt a mbe a kañete’e é mbe é ntoo nkômesane ya kañese mbamba foé. Ajô te a nga ve’e be a afup é ntoo étôtôlô asu nkoéane bidi. (Jean 4:35) Mvuse jôm ane ngume mbu, a nga jô beyé’é bé na: “Bidi ya koé bi ne fo’o abui.” (Matt. 9:​37, 38) A mvuse ya valé, a nga beta ba’alane na: “Bidi ya kôane bi ne fo’o abui . . . Ye’elané ñhe Masa ya nkôane bidi na a lôme bebo bisaé be zu kôane bidi afube dé.” (Luc 10:2) Yésus a mbe a too ndi na bôte ba ye vô’ôlô mbamba foé a a nga wô’ô mvaé éyoñe bôte be nga bo de.—Luc 10:21.

16. Aval avé bive’ane Yésus a nga belane bie bia liti na bia yiane bi mbamba été nsisim a lat a ésaé nkañete? (Luc 13:​18-21) (Fombô’ô fe fôtô.)

¹⁶ Yésus a nga ye’ele beyé’é bé na foé ba kañete ja ye wume mbamba bibuma, a nalé a ye volô be na be ke ôsu a bo ayôñ ésaé nkañete. Bi tame yene bive’ane bibaé a nga belane bie. (Lañe’e Luc 13:​18-21.) Yésus a nga vek Éjôé Zambe a mone fes, fese moutarde, nje éte ja yaé a bo beta élé. A nga belan éve’an éte asu na a liti na abui bôte da ye kañese mbamba foé, a teke jam éziñe da ye bo na mbamba foé ate a bo teke yaé. Éve’ane baa, a nga vek Éjôé Zambe a mvusu. A nga belan éve’an éte asu na a liti na foé ya Éjôé Zambe ja ye kañeteban abui mefôla ya si ése, a ja ye tyendé binyiñe bi abui bôt. To’o na bôte béziñe ba ye ke bo mintyendane mite été été. A zen éte, Yésus a nga volô beyé’é bé na be yeme na foé ba ye kañete ja ye volô abui bôt.

17. Beamu bevé ba tindi bia na bi bi mbamba été nsisim a lat a ésaé nkañete?

¹⁷ Éyoñe bia yen aval ésaé nkañete ja volô abui bôte si ése meku’u menyine den, nalé a volô bia na bi ke ôsu a kañete. Mbu ôse, mintete betoyini be bôte ba tabe Mesimesa’ane ya awu Yésus a ba yé’é Bible a bia. Bôte mintete betoyini ba duban a su’u bia ésaé nkañete. Bi nji yem abime bôte da ye kañese mbamba foé, ve bia yeme na Yéhôva a kôane beta nsamba bôt a ye nyiñ éyoñe ya beta étibila’a. (Nlitan 7:​9, 14) Yéhôva nnye a ne Masa ya kôane bidi, a too ndi na abui bôte da ye kañese mbamba foé. Bia fe bia yiane yene mam ane nye.

18. Jam avé bia yi na bôte bevo’o be yem a lat a bia?

¹⁸ Bôte ba yeme beyé’é be Yésus a ésaé nkañete ba bo a ayôñ ése. Éve’an é ne na, minlômane mi nga taté na mia kañete a ayôñ ése, bôte “be nga tu’a yeme na be mbe fo’o a Yésus.” (Mame mi. 4:13) Ngo’o nge bôte fe ba yen ane bia kañete, be ne bo ngule ya kôme bo’olô na bia fe bia kañete a ayôñ ése ane Yésus.