Nye’an ô kele ôsu a ve wo éva’a ya kañete mbamba foé!

1. Jé bi nga yé’é Beta ésulan a nga bobane mbu 2023?

E BETA ésulan a nga bobane mbu 2023,a Tin ékôan é nga faé bia éfufup a lat a miñye’elane miziñ. Bi nga bi fe mbamba mefoé a lat a ésaé nkañete jangan. Bi nga yé’é na, bôte béziñe be ne bi fane ya tebe ngame Yéhôva to’o éyoñe beta Babylone a ye bo a maneya tyamban. Bi nga yé’é fe na, ataté Ngon awôm a jia ya mbu 2023, bekañete mbamba foé ba ye ke beta suu ésaé nkañete jap avale be mbe be bo’o melu mvus. Nde, ye mintyendane mite mia liti na bia yiane nyoñ ésaé nkañete jangan éngbwemese? Momo!

2. Amu jé ésaé nkañete jangane ja yiane dañe bo mfi ane éyoñe ja lôt? (Marc 13:10)

² Ésaé nkañete jangane ja yiane dañe bo mfi ane éyoñe ja lôt. Amu jé? Amu éyoñ é ntoo étun. Tame yene jame Yésus a nga jô a lat a ésaé nkañete ja bobane melu ma su’ulane ma. (Lañe’e Marc 13:10.) E kalate Matthieu fe, Yésus a nga jô na, mbamba foé ya Éjôé a ye katebane si ése ôsusua na “asu’ulane” da so. (Matt. 24:14) Be nga belan éfia éte asu na be kobô ajô memane ya mbia émo Satan nyi. Yéhôva a nga telé “môs a awolo” asu mame ma zu boban ana’ana. (Matt. 24:36; 25:13; Mame mi. 1:7) Môs ôse wo lôte wo bo na bi subu éyoñ éte bebé. (Rom. 13:11) Ve nté bia yange, bia yiane ke ôsu a kañete akekui asu’ulan.

3. Jé ja tindi bia na bi kañete?

³ Bia bese bia yiane jeñe na bi fas éyalane ya beta nsili nyi: Amu jé bia kañete mbamba foé? Bi ne yalane tyi’ibi na, nye’ane ñwô wo tindi bia na bi kañete. Éyoñe bia kañete, bia liti nye’ane bia nye’e mbamba foé,— nye’ane bia nye’e bôt, e dañedañe nye’ane bia nye’e Yéhôva a éyôlé jé. Bi tame zu la’ase mame mete melal.

BIA KAÑETE AMU BIA NYE’E MBAMBA FOÉ

4. Bi wô’ô bo aya éyoñe ba kate bia mbamba foé éziñ?

⁴ Ye ô ngenan ô simesan aval ô nga wô’ôtan éyoñe be nga kate wo mbamba foé éziñ,—éko éziñ na mon a te bialé nda bôte jôé, nge ke na ba kañese ve wo asu ésaé ô jaéya yi? Teke bisô na, ô mbe ôjeja’a ya kate bibu’a ya nda bôte jôé, a bemvôé bôé mbamba foé ate. Ye ô nga wô’ôtan fe nalé éyoñ ô nga wô’ô foé ja dañ abeñ a lôte mefoé mete mese,—mbamba foé ya Éjôé Zambe?

5. Ô nga wô’ôtan aya éyoñ ôsu ô nga yé’é benya mejôô ya Kalate Zambe? (Fombô’ô fe befôtô.)

⁵ Tame beta simesan aval ô nga wô’ôtan éyoñe be nga kañete wo mejô me Zambe éyoñ ôsu. Ô nga yé’é na, Ésa wôé ya yôp été a nye’e wo, na a yi na ô bo ébu’a jia ya nda bôte bebo bisaé bé, a na a ka’ale na a ye mane va’a mintaé a minjuk. Nde fe, ô ne ngule ya beta yene bôte bôé be nga mane wu be za’a nyiñe si va mfefé émo—a ô nga yé’é fe abui bone be mame befe. (Marc 10:​29, 30; Jean 5:​28, 29; Rom. 8:​38, 39; Nlitan 21:​3, 4) Benya mejôô bete be nga nambe wo angôndô ya abui. (Luc 24:32) Ô nga nye’e mam ô nga yé’é a teke na ô mbe ve ba’ale mbamba be mame bete asu dôé étam!—Fombô’ô Jérémie 20:9.

6. Jé nkañete Ernest ba Rose wo ye’ele wo?

⁶ Bi tame zu yen jam é nga kui Mojañ a ne jôé na Ernest.b A mbe a bili bebé mimbu awôm éyoñ ésa wé a nga wu. Ernest a jô na: “Me mbe me sili mamiene na: ‘Ye pepa a nga ke yôp? Nge ke na, ye a keya ékeké?’ Me mbe me kômbô’ô bongô bevok amu be mbe be ngenane be bili beésa.” Ernest a mbe a kele’e afube mesoñe mban, a kute’e meboñe si vôme soñ ésa wé é mbe a ye’elane na: “Éngôngol a Zambe, ma kômbô yeme vôm ésa wom a ne.” Bebé mimbu 17 mvus awu ésa wé, Ernest a nga bi fane ya yé’é Kalate Zambe, ane a nga kañese ayé’é été été. A mbe meva’a ya yé’é na bewu ba yeme ki fe jôm éziñ, a ne fo’o ve ane be ne ôyo melom, a na Kalate Zambe a ka’ale na bewu ba ye beta wômô. (Eccl. 9:​5, 10; Mame mi. 24:15) Ane a nga su’ulane bi biyalane ya minsili mi nga tyelé nye nleme yôp abui mimbu. Mam Ernest a nga yé’é Kalate Zambe me nga so nye angôndô ya abui mevak. Minga wé, Rose fe a nga taté na a yé’é Kalate Zambe, nye fe a mbe a nye’e mam a mbe a yé’é. Ane be nga dubane mbu 1978. Be mbe ôjeja’a ya kate bibu’a ya menda me bôte map, bemvôé bap, a bôte bese bevo’o be mbe be vô’ôlô be mbamba be mame bese be nga yé’é. Asu’ulane ya été é mbe na, Ernest ba Rose be nga volô bôt e lôte 70 na be yeme Yéhôva a duban.

7. Jé ja boban éyoñe nye’ane ya benya mejôô ya Kalate Zambe wo lame minkañe nleme wongan été? (Luc 6:45)

⁷ É ne été na, éyoñe nye’ane benya mejôô ya Kalate Zambe ô kômeya lame minkañe nleme wongan été, bi vo’o tabe évô. (Lañe’e Luc 6:45.) Bia kôme wô’ôtan avale beyé’é be Yésus ya ntete mimbu ôsu be nga wô’ôtan éyoñe be nga jô na: “Bi vo’o bo te kobô mame bi nga yen a wôk.” (Mame mi. 4:20) Bia nye’e benya mejôô angôndô ya abui a bia kômbô me kañete abime bôt ése bi ne ngule ya kañete.

BIA KAÑETE AMU BIA NYE’E BÔT

8. Jé ja tindi bia na bi kañete bôte bevo’o mbamba foé? (Fombô’ô nka’ale ô ne nlô ajô na, “Liti’i nye’an a bo’o bôte beyé’é.”) (Fombô’ô fe fôtô.)

⁸ Bia fe bia nye’e bôt ane Yéhôva ba Mone wé. (Mink. 8:31; Jean 3:16) Bia wô’ô bôte be ne “te Zambe” a ba be ne “te ndi nlem” éngôngol. (Éphé. 2:12) Mbôle ba tôban abui minju’u ényiñ, be ne yene ve ane nge be ne édo’o ébé été. Ve bi bi bili nkol ô ne limiti be édo’o ébé éte,—nkol ôte ô ne mbamba foé ya Éjôé Zambe. Mbôle bia nye’e be a ko be éngôngol, bia kômbô bo jam ése bi ne ngule ya bo asu na bi kañete be mbamba foé. Édima foé éte é ne ngule ya ve be ndi nlem, é ne fe volô be na be bi mbamba ényiñ éyoñe di, a ve be fane ya bu’ubane a “nya ényiñi”—nnôm éto—mfefé émo Zambe a ka’ale bia.—1 Tim. 6:19.

9. Jé bia kate bôt a lat a melu ma zu, a amu jé? (Ézéchiel 33:​7, 8)

⁹ Nye’ane bia nye’e bôte wo tindi fe bia na bi kate be na, asu’ulane ya mbia émo nyi é ntoo bebé. (Lañe’e Ézéchiel 33:​7, 8.) Bia wô’ô bôte bese éngôngol, to’o bibu’a ya menda me bôte mangane bi nji kañe Yéhôva. Abui bôte da nyiñe teke yeme na beta étibila’a a zu—“aval étibila’a da be tame kui nté ane si nyu é nga taté azukui éyoñe ji, téké’é, aval étibila’a éte da ye ke fe beta kui.” (Matt. 24:21) Bia yi na be yeme jame da ye boban éyoñe ya ntyi’ane mejô,—évuse ñyebe ja ye tyamban a mbia émo Satan nyi ase a ye jañ Armaguédon. (Nli. 16:​14, 16; 17:​16, 17; 19:​11, 19, 20) Bia ye’elane na abui bôt é kañese foé bia kate be a na be nyoñe ntyi’ane ya zu kañe Yéhôva a bia. Ve jé ja ye kui be bôte ba bene vô’ôlô foé bia kañete be éyoñe ji, to’o bibu’a ya menda me bôte mangane bia nye’e?

10. Amu jé é ne mfi na bi ke ôsu a kate bôte mame ma ye bobane melu ma zu?

¹⁰ Avale bi nga yen ayé’é ya mvus, éko éziñe nkômbane Yéhôva ô ne na a nyii bôte ba ye kôñelane minlem éyoñe ba ye yen ane Beta Babylone a tyamban. Nge nde é ne nalé, é ne nya mfii na bi ke ôsu a kañete mbamba foé éyoñe ji. Tame ve’ele simesane na: Jame bi ne kate be éyoñe ji é ne volô be na be bi jame be ne simesan éyoñe mame mete ma ye boban. (Fombô’ô fe Ézéchiel 33:33.) Éko éziñe ba ye nyoñ éyoñe ya fase foé bi nga kañete be a jam éte é ne tindi be na be zu kañe Yéhôva fufulu a bia nté ôsôé ô ngenane nné meboñ. Aval ane mba’ale ya nda mimbôk be nga fete Philippe a nga tyendé fo’o ve éyoñe “beta mfô’ôsane si” a mbe a maneya boban, é ne fe kui na bôte béziñe ba kañese ki mbamba foé éyoñe ji be su’ulane tyendé éyoñe ba ye yen ane beta Babylone a nga mane ndaman émo a tyamban.—Mame mi. 16:​25-34.

BIA KAÑETE AMU BIA NYE’E YÉHÔVA A ÉYÔLÉ JÉ

11. Aval avé bi ne ve Yéhôva duma, ékaña’a a ngul? (Nlitan 4:11) (Fombô’ô fe befôtô.)

¹¹ Beta jam a tindi bia na bi kañete bôte mbamba foé a ne na bia nye’e Yéhôva a éyôlé jé é ne étyi. Bia yen ésaé nkañete jangan ane zene ya kañe Zambe wongane bia nye’e. (Lañe’e Nlitan 4:11.) Bia kañese a nleme wongan ôse na: Yéhôva Zambe a yiane duma, ékaña’a a ngul. Bia ve Yéhôva duma a ékaña’a éyoñe bia volô bôte bevo’o na, be yeme mendeme ma bo’olô na nnye a “nga té biôme bise” a na, nnye fe a ve bia ényiñ. Bia ve Yéhôva ngul, ngule jangan—éyoñe bia belan éyoñe jangan a ngule minsône jangan a biôme bise bi bili asu na bi tu’a bo ésaé nkañete. (Matt. 6:33; Luc 13:24; Col. 3:23) Bi ne jô tyi’ibi na, bia nye’e bi kobô bôte bevo’o ajô Zambe wongane bia nye’e. Bi ne fe ntindane ya volô bôte na be yem éyôlé Zambe a aval a ne. Amu jé?

12. Aval avé bia fubu éyôlé Yéhôva a zene ya ésaé nkañete jangan?

¹² Nye’ane bia nye’e Yéhôva wo tindi bia na bi fubu éyôlé jé. (Matt. 6:9) Nalé a tinane na, bia kômbô kate bôte na mame mese Satan a nga jô a lat a Yéhôva me ne minsos. (Mett. 3:​1-5; Job 2:4; Jean 8:44) Éyoñe bi ne nkañete, bi bili beta éva’a ya kate môt ase a kômbô vô’ôlô bia za a ne Yéhôva a avale môt a ne. Bia yi na môt ase a yeme na, beta fulu wé a dañ a ne nye’an, na a jôé bôte zôsô été, a na Éjôé jé é mbeme zu mane vaa minju’u mise a soo mvo’é si va. (Bsa. 37:​10, 11, 29; 1 Jean 4:8) Éyoñe bia kate bôte mame mete mese, bia fubu éyôlé Yéhôva. Bi ne fe meva’a amu bia bo ésaé ja lu’an a éyôlé Bengaa be Yéhôva bi be’e. Amu jé bia jô nalé?

13. Amu jé bi ne meva’a ya loobane na Bengaa be Yéhôva? (Ésaïe 43:​10-12)

¹³ Yéhôva a nga tobe bia na bi bo “Bengaa bé.” (Lañe’e Ésaïe 43:​10-12.) Den a ntoo bone mimbu, Tin ékôan é nga tili kalate éziñ é jô’ô na: “Môt ase ya be bia a bili beta mvome ya loobane na Ngaa Yéhôva.”c Amu jé bia jô nalé? Bi tame nyoñe mon éve’an. Nge da sili na ô tobe môt a ye bo ngaa wôé nda mejô, wo ye tobe môte wo yem a nyi ô too nye ndi, môt a bili mbamba éyôlé a nyi bôte bese be ne tabe nye ndi. Éyoñe Yéhôva a tobe bia ane Bengaa bé, a liti na a kôme bia yem a na a too ndi na bi ne kate bôte bevo’o na nnye étam a ne nya Zambee. A ne jame mevak asu dangane na bi loobane na Bengaa bé, a na bi belane mezene mese bi bili mfa’a ya bo na bôte be yem éyôlé jé, a na bi liti bôte bevo’o na mbia be mame bese be nga jôôban a lat a éyôlé jé be ne minsos. Éyoñe bia bo de, bia kôme tôé atinane ya éyôlé bi ne meva’a be’e, Bengaa be Yéhôva.—Bsa. 83:18; Rom. 10:​13-15.

BIA YE KE ÔSU A KAÑETE AKEKUI ASU’ULAN

14. Mbamba be mame bevé ba yange bia melu ma zu?

¹⁴ Bi ne ôjeja’a ya yene mbamba be mame ma zu boban ana’ana! A mvolane Yéhôva, bi too ndi na abui bôte da ye kañese benya mejôô ôsusua na beta étibila’a a taté. Bi ne fe meva’a ya yeme na, to’o éyoñe beta étibila’a a ye boban—abui bôte é ne kôlô mbia émo Satan nyi a zu kañe Yéhôva fufulu a bia.—Mame mi. 13:48.

15-16. Jé bia yiane ke ôsu a bo, a akekui éyoñ évé?

¹⁵ Nté bia yange mame mete, bi bili ésaé ya bo. Bi bili mvome ya bo aval ésaé da ye ke ve’ele beta bobane si va môs éziñ—ésaé ya kañete bôte mbamba foé ya Éjôé Zambe si ése. Nté ôte ôse, bia yiane fe ke ôsu a kañete bôte jame da zu boban ana’ana. Bôte ba yiane yeme na asu’ulane ya mbia nta’ane mame nyi é ntoo bebé. Ajô te, éyoñ awolo ya ntyi’ane mejô da ye kui, bôte ba ye yeme na, foé bi nga kañete be é mbe é so’o be Yéhôva Zambe.—Ézé. 38:23.

¹⁶ Nde, bia nyoñe ntyi’ane ya bo jé? Nye’ane bia nye’e mbamba foé—nye’ane bia nye’e bôte bevok a e dañedañe nye’ane bia nye’e Yéhôva Zambe a éyôlé jé—wo ye ke ôsu a tindi bia na bi kañete a évak, a ayôñ ése akekui éyoñe Yéhôva a ye jô bia na “téla’ané!”