“Tobané môse wu . . . nyô mia ye bo ésaé”

1. Jé bia yiane bo asu na bi bi benya meva’a, a amu jé? (Ésaïe 48:​17, 18)

ÉSA wongane ya yôp été a nye’e bia nya abuii, a yi na bi bu’uban ényiñ ataté éyoñe ji akekui melu ma zu. (Eccl. 3:​12, 13) Éyoñ a nga té bia, a nga ve bia atyeñe mboone mam. Ve a nji ve bia ôva’a ngule ya jôé biabebien, nge ke na biabebiene bi tyi’i mame me ne mvaé a ma me ne abé. (Eccl. 8:9; Jér. 10:23) A yeme na asu na bi bi benya meva’a bia yiane nye kañ a tôñe memvinda mé.—Lañe’e Ésaïe 48:​17, 18.

2. Jé Satan a yi na bi buni, ve jé Yéhôva a ve bia?

² Satan a yi na bi buni na bi ne bi benya meva’a to’o bia kañe ki Yéhôva, a na bôte be ne jôé bebien avale da yian. (Mett. 3:​4, 5) Yéhôva a nga yalane Satan éyoñ a nga kañese na bôte be jôé bebien asu abim éyoñ éziñ. A da kôme yené ne ngeññe na éjôé môta binam é ne teke ndoñ. Kalate Zambe a kobô ajô befam a binga beziñe be nga bi benya meva’a éyoñe be mbe be bo’o Yéhôva ésaé. Môt ôsu ya été a ne Yésus Krist. Bi tame taté zu yene mame me nga tindi Yésus na a tobe na a kañe Yéhôva, mvuse ya valé, bia zu yen amu jé Ésa wongane ya yôp été étame nnye a yian ékaña’a. Éyoñ éte bia ye su’ulane yene beamu beziñe ba tindi bia na bi tobe na bia kañe Yéhôva.

AMU JÉ YÉSUS A NGA TOBE NA A KAÑE YÉHÔVA?

3. Jé Satan a nga jô Yésus na a bo, a jé Yésus a nga tobe na a bo?

³ Éyoñe Yésus a mbe si va, a nga tobe môt a yiane kañ. Éyoñe Yésus a maneya dubane mon éyoñe mvuse ya valé, Satan a nga liti nye bijôé bise ya si nyu, a jô nye na a ye ve nye bie nge a kute nye meboñe si fo’o ve éyoñe jia. Ane Yésus a nga jô nye na: “Kele’e wôé, a Satan! Amu é ne ntilane na: ‘A ne Yéhôva Zambe wôé, nnye wo yiane kañ, a nnye étame wo yiane bo ésaé.’” (Matt. 4:​8-10) Amu jé Yésus a nga nyoñe ntyi’an ôte? Bi tame zu yene beamu beziñe be nga tindi nye na a nyoñe ntyi’an ôte.

4-5. Mame mevé me nga tindi Yésus na a kañe Yéhôva?

⁴ Jam ôsu é nga tindi Yésus na a tobe na a kañe Yéhôva é ne nye’an. Yésus a mbe a nye’e Ésa wé angôndô ya abui. (Jean 14:31) Nde fe Yésus a nga yene na e kañe Yéhôva a ne mbamba jam. (Jean 8:​28, 29; Nlitan 4:11) Yésus a yeme na Yéhôva nnye a ne anjeñe ya ényiñ, na bi ne tabe nye ndi, a na a ve fe bia abui mbamba be biôm. (Bsa. 33:4; 36:9; Jacq. 1:17) Yéhôva a mbe a kate’e Yésus éyoñ ése mame me ne zôsô, nde fe a nga ve nye jôm ése a mbe a bili. (Jean 1:14) Ve Satan nye a nga viane soo awu. Satan a ne nlaa minsos, a too fe môte medu’an a mfôfom. (Jean 8:44) Mbôle Yésus a mbe a yeme’e mame mete mese, a nji ve’ele simesane môs éziñe na a vu Satan a tebe Yéhôva ngame yat.—Philip. 2:​5-8.

⁵ Jam afe é nga bo na Yésus a tobe na a kañe Yéhôva é ne na, a mbe a yange’e a ôjeja’a ôse mbamba be mame Yéhôva a nga ka’ale bôte ba wulu ba’aba’a a nye. (Héb. 12:2) A mbe a yeme’e na nge a tebe ne bip a ye fubu éyôlé Ésa wé, a na a ye ve nye fane ya mane vaa minju’u mise Satan a nga soo mie.

AMU JÉ YÉHÔVA A YIAN ÉKAÑA’A JANGAN?

6-7. Amu jé abui bôte da kañe ki Yéhôva den, ve amu jé a yian ékaña’a jangan?

⁶ Abui bôte da kañe ki Yéhôva den amu da yeme ki mbamba mefulu mé, a amu da yeme ki mam a boya asu dap. É mbe fe avale da asu bôte nlômane Paul ô nga kañete Athènes, be fe be mbe ki be yeme’e Zambe.—Mame mi. 17:​19, 20, 30, 34.

⁷ Paul a nga kate bôte be mbe be vô’ôlô’ô nye na nya Zambee “a ve bôte bese ényiñ a mvebe a biôme bise.” A nga ke ôsu a jô’ô na: “Nge bi bili ényiñ, nge bia fô’ôsan, a nge bi ne, a ne amu nye.” Zambe a “nga té ayoñe bôt ése a zene ya môte wua,” ajô te nnye a yian ékaña’a jangan.—Mame mi. 17:​25, 26, 28.

8. Jé Yéhôva a ye ke ve’ele bo? Timin.

⁸ Akusa bo a ne Nté biôme bise a Njô ya si ése, Yéhôva a yemete ki bôt a ngule na be kañe nye. A ye ke ve’ele bo avale jam éte. Akusa bo nalé, a bo bia abui mame da liti na a ne, a na a nye’e môt ase ya be bia angôndô ya abui. A yi na abui bôt é bo bemvôé bé nnôm éto. (1 Tim. 2:​3, 4) Ajô te, Yéhôva a yañele bia avale bia ye ye’ele bôte bevo’o mbamba be mam a ye bo asu bôte bese, a aval a ye de bo. (Matt. 10:​11-13; 28:​19, 20) A nga ve fe bia ékôane bekristen, vôme bi ne kañe nye a bu’ubane mvolane wo so bia be bemvendé ba nye’e bia.—Mame mi. 20:28.

9. Aval avé nye’ane Yéhôva wo kôme yené ne fômelé?

⁹ Yéhôva a kôme liti nye’ane wé a aval a nyoñe to’o bôte ba kañe ki nye. Tame yene bive’ane bi: Den a nga ke betoyini mimbu, abui bôt é nga tyi’i na da bo mame da simesane na me ne mvo’é nge abé asu dap, a lôte na é bo Yéhôva mewôk. Ve to’o nalé, Yéhôva a nga ve be a mbamba nlem ase mame ma sili be asu na be ke ôsu a bu’uban ényiñ. (Matt. 5:​44, 45; Mame mi. 14:​16, 17) A nga ve be fane ya bi bemvôé, menda me bôte ma nye’e be, bon, mesu me ésaé a fane ya bu’uban ényiñ. (Bsa. 127:3; Eccl. 2:24) Da kôme yené ne fômelé na, Ésa wongane ya yôp a nye’e bôte bese. (Nkôl. 34:6) Bi tame zu yen éyoñe ji mame ma tindi bia na bi tobe na bia kañe Yéhôva a aval a botane bia.

AMU JÉ BIA TOBE NA BIA KAÑE YÉHÔVA?

10. (a) Jam avé da dañe tindi bia na bi kañe Yéhôva? (Matthieu 22:37) (b) Aval avé ô nga bu’uban ôjibi Yéhôva? (Besam 103:​13, 14)

¹⁰ Aval ane Yésus, jame da tindi bia na bi kañe Yéhôva é ne amu bia nye’e nye angôndô ya abui. (Lañe’e Matthieu 22:37.) Bia wô’ôtane na bi ne bebé a Yéhôva, éyoñe bia yé’é na bi yeme mbamba mefulu mé. Éve’an é ne na Yéhôva a ne ôjibi a bia. Éyoñe bone be Israël be nga bo nye melo, a nga ye’elane be a jô’ô na: “Bula’an, môt ase a li’i mbia zene wé.” (Jér. 18:11) Yéhôva a yeme na bi nga bialé a metyi ya abé a na bi ne metek. (Lañe’e Besam 103:​13, 14.) Éyoñe wo fase fulu ôjibi Yéhôva a mbamba mefulu mé mevok, ye ô lôô ki na wo yiane nye kañe nnôm éto?

11. Mame mevé mefe ma tindi bia na bi tobe na bia kañ Ésa wongane ya yôp été?

¹¹ Bi bili éva’a ya kañe Yéhôva amu a ne jam é ne zôsô bia yiane bo. (Matt. 4:10) Nde fe bia yeme na nge bi kele ôsu a wulu ba’aba’a a Yéhôva, a ye botane bia angôndô ya abui. Mbamba ntabane wongan a fubu éyôlé Yéhôva, a liti fe na Satan a ne nlaa minsos, a jam éte da ve Ésa wongane nlem avak. Nge bia tobe na bia kañe Yéhôva den, nalé a ye ve bia fane ya kañe nye nnôm éto a nnôm éto!—Jean 17:3.

12-13. Mame mevé bia yé’é a lat a éve’ela Jane ba Pam?

¹² To’o bi ngenane bongô, bi ne yé’é na bi nye’e Yéhôva angôndô ya abui a nye’an ôte wo yiane tu’a bo ngul. Bi tame nyoñ éve’ane besita bangane bebaé Jane ba Pam.a Jane a mbe a bili mimbu 11, Pam ki mimbu 10 éyoñe be nga taté na ba yé’é Kalate Zambe. Akusa bo bebiaé biap be nji be be bili nkômbane ya yé’é Kalate Zambe, be nga ve Jane ba Pam ôva’a ngule ya yé’é a Bengaa be Yéhôva fo’o ve nge ba kañese na be ke ôsu a tabe bisulane biap a menda me bôte map memane me sondô. Jane a jô na: “Mame Bengaa be Yéhôva be nga ye’ele ma me so’o Kalate Zambe, me nga volô ma na me sa’ale nyuane banga, a bo te bo mvite mame ya bisôk avale bongô be sikôlô ya aba dame be mbe be bo’ok.”

¹³ Bone mimbu mvuse ya valé, bobebinga bete bebaé, be nga bo bekañete mbamba foé. Mvuse ya valé, be nga nyoñ ésaé nkpwa’a mefan a ke ôsu a nyoñe ngap a bebiaé bap be mbe be ntoo minnôm. Éyoñe Jane a simesane mame me nga kui nye ényiñ, a jô na: “Jam ôsu me nga taté yé’é é mbe na Yéhôva a nyoñe ngap a bemvôé bé, a na avale 2 Timothée 2:19 a liti, ‘Yéhôva a yeme ba be ne émbé.’” Teke bisô na Yéhôva a nyoñe ngap a ba ba tobe na ba nye’e nye a kañe nye!

14. Aval avé minkobô miangan a mimboone miangane mi ne fubu éyôlé Yéhôva? (Fombô’ô fe befôtô.)

¹⁴ Bia yi na bi fubu éyôlé Yéhôva. Tame fase jame di: Ô bili mbamba mvôé a ne akap, a yeme fe jamé bôte bevok. Môs éziñ, ô wo wô’ô bôte be jô’ô na mvôé jôé éte é ne njet a mvôl. Wo bo aya? Wo jeñe na ô kamane mvôé jôé. Aval éte da da, Satan a bôte be ne éjôé jé si, ba ve ngule jap ése na be ve éyôlé Yéhôva mvit, ba laa minsos a lat a nye. Ajô te bi ne ntindane na bi kate bôte benya mejôô a lat a Yéhôva, a ve ngule jangan ése na bi kaman éyôlé jé. (Bsa. 34:1; Ésa. 43:10) Bia ye liti na bia kañe Yéhôva a nleme wongan ôse a zene ya mame bia jô a mame bia bo.

15. Mfi ôvé nlômane Paul ô nga yen éyoñ ô nga tyendé minsôñane mié? (Bephilippien 3:​7, 8)

¹⁵ Bia bo mintyendan ényiñe jangan asu na bi bo Yéhôva Zambe ésaé ngumba ngumba aval a yi. Nlômane Paul ô mbe ô bili beta éto ñyebe bejuif, ve a nga mane jô’é mame ya ñyebe ôte asu na a bo ñyé’é Krist a na a kañe Yéhôva Zambe. (Gal. 1:14) Jam éte é nga bo na a bi mbamba ényiñ a fane ya ke jôé e yôbe ba be Yésus. A nji ke ve’ele jôbane ntyi’an a nga nyoñe na a bo Yéhôva ésaé. A bia fe bia yiane nye vu.—Lañe’e Bephilippien 3:​7, 8.

16. Jé bi ne yé’é nkañete Julia? (Fombô’ô fe befôtô.)

¹⁶ Nge bia telé ésaé Yéhôva ôsu ényiñe jangan, wôna bia ye bi mbamba ényiñ ataté éyoñe ji akekui melu ma zu. Ntamané yene nkañete kale jangan é ne jôé na Julia. Ôsusua na a yé’é benya mejôô, Julia a mbe a yia bia nda Zambe jé éyoñ a mbe ngone minga. Beta ñyia bia a nga yene fatane ñyiane bia jé, nde a nga taté na a yañele nye. Mvuse mon éyoñ, Julia a nga taté na a wum. A nga taté na a yia bia abui bevôm. A nga ke nyiine beta sikôlô mezik. Mongô sikôlô ya aba dé a nga taté na a kobô nye ajô Zambe. Ane a nga kôme nye timine na Zambe a bili éyôlé é ne na Yéhôva. Mvuse ya valé, Julia a nga taté na a yé’é Kalate Zambe biyoñe bibaé sondô. Ane a nga su’ulane tyi’i na a zu kañe Yéhôva Zambe ényiñe jé a telé ñyiane bia. Ntyi’an ôte ô mbe ke tyi’ibi. A jô na: “Abui bôt é mbe é jô’ô ma na ma ndamane mvome me mbe me bili. Me mbe me yiik na me bo Yéhôva Zambe ésaé ényiñe jam ése.” Aval avé a yene ntyi’an a nga nyoñe den a ntoo mimbu 30? A jô na: “Nlem ô bôô ma si ne mieññ, me too ndi na Yéhôva a ye jalé minkômbane ya nleme wome melu ma zu.”—Bsa. 145:16.

KELANÉ ÔSU A KAÑE YÉHÔVA

17. Mbôle bi nga nyiñe memane ya nta’ane mame wu, aval avé jam éte da nambe bôte be nga tobe na ba kañe Yéhôva a ba be ngenane teke de bo?

¹⁷ Bi nga nyiñe melu ma su’ulane ya mbia émo nyi. Nlômane Paul ô nga tili na: “Amu a li’iya fo’o ve ‘mone nté,’ a ‘nyu a yiane so a ye zu, a a ye ke bem.’” (Héb. 10:37) Aval avé jam éte da fombô bia? Jam ôsu é ne na éyoñ é li’iya asu bôte ba tobe na ba kañe Yéhôva é ne étun. (1 Cor. 7:29) Nge bi nyoñeya ntyi’ane na bia kañe Yéhôva, bia yeme na bia ye jibi bitibila’a, ve jam éte é ne asu “mon étun éyoñ.”

18. Jé Yésus ba Yéhôva ba yi na bi bo?

¹⁸ Yésus a yi ki fo’o ve na beyé’é bé be taté na ba tôñe nye, a yi na be ke ôsu a bo de. (Matt. 16:24) Nde, nge bia kañe Yéhôva den a ntoo abui mimbu, bia yiane nyoñe ntyi’ane ya bo teke jô’é jam éte. Bia yiane saé a ngul ése asu na ényiñe jangan é lu’an a ntyi’ane bi nga nyoñe na bia bo nye ésaé. É nji ke ve’ele bo tyi’ibi, ve nge bi kele ôsu a bo nkômbane Yéhôva, bia ye bu’ubane bibotan a abui mevak ataté éyoñe ji akekui melu ma zu!—Bsa. 35:27.

19. Nkañete Gene ô ne bia ye’ele jé?

¹⁹ Abui bôte da simesane na e kañe Yéhôva a tinane na bia vo’o ke beta bu’uban ényiñ. Nge ô ne ésoé, ye wo wô’ôtane na éyoñe wo kañe Yéhôva wo jañele mame méziñ? Ésoé mojañ é too jôé na Gene ja jô na: “Me mbe me wô’ôtane na me vo’o bu’uban ényiñ, amu me ne Ngaa Yéhôva. Abui bongô bia be be bi nga yaé, é mbe é nye’e mebôk, é kui abui, é bo’o bivôé, é léé bejeu vidéo, me ki me mbe me lôte’e éyoñe jam ése na ma tabe bisulan a ke nkañete.” Aval avé mfasan ôte ô nga ndeñele Gene? A beta jô na: “Me nga taté na ma bo mbia be mam a bongô bia be be bi nga yaé. Me mbe me vôma’an ényiñ, ve me nji ke kui na me bi benya meva’a. Me nga taté na ma beta simesane benya mejôô me nga yé’é Kalate Zambe me nga bene tôñ. Ane me nga nyoñe ntyi’ane na, me nga zu kañe Yéhôva a nleme wom ôse. Ataté éyoñ éte, ma nga yene fo’o na Yéhôva a nga yalane meye’elane mese me nga bo nye.”

20. Ntyi’an ôvé bia yiane nyoñ?

²⁰ Ntili Besam a nga yia Yéhôva Zambe jia a jô’ô na: ‘Ébotan a môte wo top, a zu nye vôm ô ne, ane a ye tabe bitune menda biôé été.’ (Bsa. 65:4) Bia yiane nyoñ avale ntyi’ane da ane Josué, nnye ate a nga jô na: “Ve mfa’a wom a nda jam, bia ye bo Yéhôva ésaé.”—Jos. 24:15.