AYÉ’É 23
JIA 2 Jôé dôé é ne Yéhôva
Amu jé éyôlé Yéhôva é ne édima asu dangan?
“‘Mi ne bengaa bam,’ nalé Yéhôva a jô.”—Ésa. 43:10.
BETA BE MAME BIA ZU YEN
Ayé’é di, bia zu yene jame bi ne bo asu na bi fubu éyôlé Yéhôva a kamane je.
1-2. Aval avé bia yeme na éyôlé Yéhôva é ne édima mise me Yésus?
ÉYÔLÉ Yéhôva é ne angôndô ya édima mise me Yésus. Teke môte mfe a nga bo na be yem éyôlé Yéhôva a lôte Yésus. Ayé’é ya mvus, bi nga yene na Yésus a mbe nkômesane ya wu mfa’a ya liti na éyôlé Yéhôva é ne étyi a na mezene mé mese me ne zôsô. (Marc 14:36; Héb. 10:7-9) A mvus éjôé ya toyini mimbu, Yésus a ye bulan Ésa wé éjôé amu a yi na Yéhôva a nyoñe duma ése. (1 Cor. 15:26-28) Nye’ane Yésus a bili asu éyôlé Zambe, wo kôme liti ngul élat é ne zañe ba Ésa. Mame mese Yésus a nga bo asu Yéhôva ma liti abim avé a nye’e nye.
2 Yésus a nga so si va asu na a zu kate bôte mame mese Yéhôva a mbe a yiik na be yem. (Jean 5:43; 12:13) A nga bo na beyé’é bé be yem éyôlé Ésa wé. (Jean 17:6, 26) Éyoñ a mbe a ye’ele’e bôt a bo mesimba, a mbe a kôme’e liti ne ngeññe na Ésa wé nnye a ve nye fek a ngule ya bo mame mete. (Jean 10:25) A fe na, éyoñ a nga ye’elane Yéhôva na a ba’ale beyé’é bé, Yésus a nga ye’elan Ésa na a bo de “amu éyôlé [jé].” (Jean 17:11) Nalé a nga liti na, éyôlé Yéhôva é mbe angôndô ya édima mise me Yésus a dañe jôm ése. Nde ñhe, nge Yésus a mbe a nyane’e éyôlé Yéhôva abime di, amu jé bôte ba tametane na be ne bekristene be ne teke yem éyôlé Ésa nge belane je?
3. Jé bia zu yen ayé’é di?
3 Mbôle bi ne benya bekristene, bia jeñ a ngul ése na bi vu Yésus, a liti nye’an a ésemé asu éyôlé Yéhôva. (1 P. 2:21) Ayé’é di, bia zu yen amu jé Yéhôva a ve bôte ba kañete “mbamba foé ya Éjôé Zambe” éyôlé jé. (Matt. 24:14) Bia zu fe yen amu jé éyôlé Yéhôva é ne édima asu môt ase ya be bia.
“BÔT ASU ÉYÔLÉ JÉ”
4. (a) Ésaé évé Yésus a nga ve beyé’é bé ôsusua na a bulane yôp? (b) Bia zu bi éyalane ya nsili ôvé?
4 Ôsusua na a bulane yôp, Yésus a nga jô beyé’é bé na: “Mia ye nyoñe ngul éyoñe mfufube nsisim a ye so be mia, a mia ye bo bengaa bam e Jérusalem, e Judée ase a Samarie a mfa’a si ja dañ ôyap.” (Mame mi. 1:8) Nalé a nga liti na beyé’é be mbe be yiane kañete vôm ase, sa ke ve minné ya Israël étam. A zen éte, bôte ya meyoñe mese be nga bi fane ya bo beyé’é be Yésus. (Matt. 28:19, 20) Ve Yésus a nga jô na: “Mia ye bo bengaa bam.” Nde ñhe, ye é mbe fe é sili’i na mimfefé beyé’é mite mi yem éyôlé Yéhôva nge ke na mi mbe mi yiane fo’o bo ve bengaa be Yésus? Mame bia koone me kalate Mame minlôman kabetôlô 15 ma volô bia na bi bi éyalane ya nsili ôte.
5. Aval avé minlôman a bemvendé ya Jérusalem be nga liti na é ne mfi na bôte bese be yem éyôlé Yéhôva? (Fombô’ô fe fôtô.)
5 Mbu 49 ya É.J., minlôman a bemvendé ya Jérusalem be nga sulan asu na be fase nge begentil ba yiane tyi’iban atyel asu na be bo bekristen. Memane ya nsula’ane ate, Jacques monyañe Yésus a nga jô na: “[Pierre] a nga kañete bia avale Zambe a nga simesane bôte ya meyoñe mefe a na, zañe jap a nga taté tobe bôt asu éyôlé jé.” Jacques a mbe a kobô’ô ajô éyôlé évé? Jacques a nga belane mejô me nkulu mejô Amos, vôm a nga beta jô na: “Ndembene mebuka’a me bôte me ne jeñe Yéhôva a nlem ôse, fufulu a bôte ya meyoñe mese, bôte ba looban a éyôlé jé, nne Yéhôva a jô nalé.” (Mame mi. 15:14-18) Ane ô vaa na mimfefé beyé’é mite mia ye yé’é na mi yeme Yéhôva, mia ye fe “looban a éyôlé jé.” Nalé a tinane na ba ye bo na bôte befe be yem éyôlé Zambe, a fe na ba ye yeme be ane bengaa bé.
Éyoñe tin ékôane ya ntete mimbu ôsu é nga sulan, bezôsô be bobejañe bete be nga fas a yene na bekristene bese ba yiane bo ayoñ é be’e jôé Yéhôva (Fombô’ô abeñe 5)
6-7. (a) Amu jé Yésus a nga so si va? (b) Jam avé afe é mbe é dañe mfi é nga tindi Yésus na a zu si va?
6 Éyôlé Yésus ébiene ja tinane na “Yéhôva a ne Nyii wongan,” nalé a liti na a zene jé, Yéhôva a ye nyii ba ba buni nye. Yésus a nga so si va na a zu ve ényiñe jé asu bone be bôt. (Matt. 20:28) A zene ya ntañ a nga ya’an, Yésus a nga bo na bôte be bi fane ya nyiñe nnôm éto.—Jean 3:16.
7 Ve amu jé bôte be mbe be yiik ntañ? Amu jam é nga kui afup Éden. Avale bi nga yen ayé’é ya mvus, bebiaé bangane be ôsu, Adam ba Éve, be nga bo Zambe éngana’a, ane be nga jañele fane ya bi ényiñe ya nnôm éto. (Mett. 3:6, 24) Ve Yésus a nga zu si va na a zu bo jam afe é mbe é dañe mfi a lôte nkôtane ya bone be Adam ba Ève. Satan a nga laan angôndô ya minsos a lat a Yéhôva. (Mett. 3:4, 5) Jôme te nje, nkôtane bone ba Adam ba Éve ô mbe ô tii a beta jame nyi: E fubu éyôlé Yéhôva. Mbôle Yésus a mbe a kôme’e yeme Yéhôva a na a be’e fe éyôlé jé, ajô te a nga saé a ngule jé ése asu na a fubu éyôlé Ésa wé.
Aval avé môt a ne jô na a ne ñyé’é Krist a teke yem éyôlé Ésa wé nge belane je?
8. Jé beyé’é be Yésus ba yiane jeñe na be tu’a yem?
8 Beyé’é be Yésus bese bejuif a begentil, ba yiane yeme na Yéhôva Zambe nnye a ve be ényiñ. (Jean 17:3) A na aval ane Yésus, be fe ba ye looban a éyôlé Yéhôva. Ajô te ba yiane yeme na é ne angôndô ya mfi na be fubu éyôlé Yéhôva. Amu nyiane wop ô tii a jam éte. (Mame mi. 2:21, 22) Beyé’é be Yésus bese ba yiane ñhe jeñe na be tu’a yeme Yéhôva. Bi nji vembe nge Yésus a nga ke mane meye’elane mé bia koone me Jean kabetôlô 17 a mejô ma: “Me nga bo na be yem éyôlé jôé, a ma ye bo na be yeme je, ndembene nye’an ô nga nye’e ma ô ke be be a me bo jôme jia a be.”—Jean 17:26.
“MI NE BENGAA BAM”
9. Nge bia yi na bi vu Yésus, jé bia yiane bo?
9 Avale bi ndôme mane yene yôp, asu na bi bo beyé’é be Yésus, bia yiane fubu éyôlé Yéhôva. (Matt. 6:9, 10) Bia yiane yen éyôlé Yéhôva ane ji ja dañ édima mise mangan. Nalé a tinane na bia yiane bo jam éziñ. Ve jé bi ne bo asu na bi fubu éyôlé Yéhôva, a liti na mame mese Satan a nga jô a lat a Yéhôva me ne minsos?
10. Jé bia lañe kalate Ésaïe kabetôlô 42 akekui 44? (Ésaïe 43:9; 44:7-9) (Fombô’ô fe fôtô.)
10 Kalate Ésaïe kabetôlô 42 akekui 44 a ye’ele bia avale bi ne bo asu na bi fubu éyôlé Yéhôva. Bekabetôlô bete, Yéhôva a jô bekañe bivuse bezambe na be liti na bezambe bap be ne bevevee. Aval ane ajô éziñe ja kobane nda mejô, Yéhôva a sili nge bengaa be ne asu na be zu bo’olô na bezambe bap be ne benya bezambee. Ve teke môt éziñ a zu bo’olô jam éte!—Lañe’e Ésaïe 43:9; 44:7-9.
Bia kaman éyôlé Yéhôva (Fombô’ô abeñ 10-11)
11. Jé Yéhôva a jô ayoñe dé kalate Ésaïe 43:10-12?
11 Lañe’e Ésaïe 43:10-12. Yéhôva a jô ayoñe dé na: “Mi ne bengaa bam, . . . a me ne Zambe.” Yéhôva a jô be na be yalane nsili wu: “Ye Zambe mfe a ne, ve ma?” (Ésa. 44:8) Bi bili beta mvome ya yalane nsili ôte. A zene ya mejô mangan a mimboone miangan, bia ye liti na nya Zambee a ne ve wua, Yéhôva. Jôé dé da dañe mbetane yôp a lôte biyôlé bise. Bia yiane ñhe kôme liti ényiñe jangane ya môs ôse na bia nye’e Yéhôva a ke fe ôsu a wulu ba’aba’a a nye to’o Satan a bo na bi tôbane minjuk. Nge bi bo de, bia ye bi fane ya fubu éyôlé Yéhôva.
12. Aval avé nkulan ajô bia koone wô kalate Ésaïe 40:3, 5 ô nga tôéban?
12 Ésaïe a nga kate na môt éziñ a ye “kôme zene Yéhôva.” (Ésa. 40:3) Aval avé nkulan ajô ôte ô nga tôéban? Jean Baptiste a nga kômesane zene Yésus, nyu a nga so éjiane Yéhôva a kobô fe asu dé. (Matt. 3:3; Marc 1:2-4; Luc 3:3-6) Nkulan ajô ôte ô mbe fe ô jô’ô na: “Étôto’o Yéhôva ja ye kulan.” (Ésa. 40:5) Aval avé jam éte é nga boban? Mbôle Yésus a nga kôme vu Ésa wé éyoñ a mbe si va, a mbe ve ane Yéhôva émiene nnye a nga so si.—Jean 12:45.
13. Aval avé bi ne vu Yésus?
13 Bia vu Yésus Krist éyoñe bia kaman éyôlé Yéhôva. Aval ane Yésus, bia fe bi ne bengaa be Yéhôva. Bi be’e éyôlé Yéhôva a bia kañete môt ase bia tôbane nye mbamba be mam a bo. Ve asu na bi tu’a yeme bo ésaé éte, bia yiane fe volô bôte na be yem ésaé ése Yésus a bo asu na a fubu éyôlé Yéhôva. (Mame mi. 1:8) Bia tôñ éve’ela Yésus amu nnye a ne ngaa Yéhôva ôsu. (Nlitan 1:5) Ve aval avé éyôlé Yéhôva é ne édima asu môt ase ya be bia?
AVAL ÉYÔLÉ YÉHÔVA É NE BO ÉDIMA ASU MÔT ASE YA BE BIA
14. Avale Besam 105:3 a liti, bia wô’ôtan aya mfa’a ya éyôlé Yéhôva?
14 Bia vak a éyôlé Yéhôva. (Lañe’e Besam 105:3.) Yéhôva a ne mevak éyoñe bia bo éngelezek a éyôlé jé. (Jér. 9:23, 24; 1 Cor. 1:31; 2 Cor. 10:17) E bo “éngelezek . . . be Yéhôva” a tinane na bi ne mengo’o dol amu Yéhôva a ne Zambe wongan. Bi bili beta mvome ya kate bôte bevo’o na Yéhôva a ne Zambe a ne étyi a na mame mese a bo me ne zôsô. Bi nji yiane ve’ele wôk ôsone ya kate bôte bia bebe bia saé, bongô besikôlô bevok a bôte bia bebe bi too afôla da na bi ne Bengaa be Yéhôva! Diable a yi na bi bo teke beta kobô ajô Yéhôva. (Jér. 11:21; Nlitan 12:17) Amu na Satan a bivuse bekulu mejô bé ba yi na bôte be vuan éyôlé Yéhôva. (Jér. 23:26, 27) Nye’ane bia nye’e éyôlé Yéhôva wo bo na bi ba’ale ava’a dangan ‘éyoñ ése.’—Bsa. 5:11; 89:16.
15. E loone jôé Yéhôva a tinan aya?
15 Bia ke ôsu a loone jôé Yéhôva. (Joël 2:32; Rom. 10:13, 14) E loone jôé Yéhôva a nji su’u ve na bi yem éyôlé éte a na bi belane je. Bia jeñe na bi tu’a yeme na Yéhôva a ne vevee Zambe a tabe ndi a nye a jeñe mvolane wé éyoñe bia yi melep. (Bsa. 20:7; 99:6; 116:4; 145:18) Bia jeñe fe na bi kate bôte bevok éyôlé jé a mbamba mefulu mé, a volô be na be tyendé fatan ényiñe jap, ndembene be ne ve Yéhôva nlem avak.—Ésa. 12:4; Mame mi. 2:21, 38.
16. Aval avé bi ne liti na Satan a ne nlaa minsos?
16 Bi ne nkômesane ya tôbane minjuk amu éyôlé Yéhôva. (Jacq. 5:10, 11) Éyoñe bia ke ôsu a wulu ba’aba’a a Yéhôva akusa bo bia tôbane minjuk, bia liti na Satan a ne nlaa minsos. Melu me Job, Satan a nga jô na: “Jôm ése môt a bili a ye ve je ajô ya ényiñe jé.” (Job 2:4) Satan a nga jô na bôte ba kañe Yéhôva fo’o ve éyoñe mame ma wulu be mvo’é ényiñ. Nge ba tôbane minjuk, ba ye lume Yéhôva mvus. Mbôle Job a nga ba’ale élate jé a Yéhôva, a nga liti fo’o na Satan a ne nlaa minsos. Bia fe bi ne liti dene na Satan a ne nlaa minsos éyoñe bia ye ke ôsu a kañe Yéhôva to’o bia tôban avale minjuk avé. Bi too ndi na Yéhôva a ye ke ôsu a ba’ale bia amu éyôlé jé.—Jean 17:11.
17. A zene fé bi ne beta liti na bia kaman éyôlé Yéhôva avale 1 Pierre 2:12 a liti?
17 Bia semé éyôlé Yéhôva. (Mink. 30:9; Jér. 7:8-11) Mbôl abui bôte da yeme na bi ne Bengaa be Yéhôva, ajô te, mame bia bo me ne fubu éyôlé Yéhôva nge ve je mvit. (Lañe’e 1 Pierre 2:12.) Nalé a yiane bia tindi na bi bo mame mese ma sili asu na bi lu’u jôé Yéhôva a zene ya mame bia jô a ntabane wongan. Nge bia bo de akusa bo bi be’e metyi ya abé, bia ye fubu éyôlé Yéhôva.
18. A zene fé éfe bi ne beta liti na éyôlé Yéhôva é ne édima mise mangan? (Fombô’ô fe ayemé.)
18 E kamane jôé Yéhôva a ne jam é ne angôndô ya édima asu dangan a dañ éyôlé jangan ébien. (Bsa. 138:2) Amu jé jam éte é ne angôndô ya mfi? Nye’ane bia nye’e jôé Yéhôva ô wô’ô bo na bôte be vini bia.a Yésus a mbe nkômesane ya wu ane mbia môte fo’o ve asu na a kaman éyôlé Yéhôva. A nga ‘jibi ôson’ avale di na, a nji tyelé nleme yôp a lat a avale bôte bevo’o ba ye yen awu dé. (Héb. 12:2-4) Nsôñane wé ô mbe ve na a bo nkômbane Zambe.—Matt. 26:39.
19. Wo wô’ôtan aya amu ô be’e éyôlé Yéhôva, a amu jé?
19 Bi ne meva’a ya be’e éyôlé Yéhôva, a bi bili beta mvome ya loobane na Bengaa be Yéhôva. Amu nalé, bi ne nkômesane ya jibi mame mese ba ye jô bia. Éyôlé Yéhôva é ne angôndô ya mfi mise mangan a lôt avale bôte ba yene bia. Enyoñané ntyi’ane ya ke ôsu a fubu jôé Yéhôva to’o Satan a jeñ a mezene mese na a te’e bia. Nge bi bo de, bia ye liti na éyôlé Yéhôva é ne angôndô ya édima mise mangan aval é ne fe édima mise me Yésus Krist.
JIA 10 Va’ané Yéhôva Zambe duma!
a Job a nga taté na a fas avale bôte bevo’o ba ye yene nye éyoñe bemvôé bé belale be nga jô na a nga bo mbia jam. Atata’a, éyoñ a nga mane jañele biôme bié a na bone bé be nga mane wu, “Job a nji bo abé, nge bo akute ya bo’olô Zambe jam.” (Job 1:22; 2:10) Ve éyoñe be nga bôte nye ajô na a nga bo mbia jam, Job a nga taté na a “jô bijôjôô.” A nga dañe ve ngule jé ése mfa’a ya kaman éyôlé jé a lôte na a fubu éyôlé Yéhôva nge kamane je.—Job 6:3; 13:4, 5; 32:2; 34:5.