Tabe’e ndi na Yéhôva a nye’e wo

1. Amu jé ô nga tyi’i na wo ve womiene ngumba be Yéhôva? (Fombô’ô fe fôtô.)

YE Ô ngenan ô simesan éyoñ ô nga ve womiene ngumba be Yéhôva? Ô nga nyoñe ntyi’an ôte amu ô mbe ô nga nye’e nye a yeme nye. Ô nga bo nye ngaka’a na wo ye telé nkômbane wé ôsu ényiñe jôé, a na wo ye ke ôsu a nye’e nye a nleme wôé ôse, nsisime wôé ôse, a ngule jôé ése. (Marc 12:30) Ataté éyoñ éte, nye’ane wo nye’e nye ô nga ke ôsu a nenenen. Nde ñhe, nge môt éziñ a sili wo na: “Ye wo buni fo’o na wo nye’e Yéhôva?” Wo ye yalan aya, ye wo ye kate nye été été na: “Ma nye’e nye a lôte jôm ése!”

2-3. Yéhôva a yi na bi tabe ndi a jé, a jé bia zu yen ayé’é di? (Jérémie 31:3)

² To’o wo yeme na wo nye’e Yéhôva Zambe a nleme wôé ôse, ô ne yen ayaé ya kañese na nye fe a nye’e wo, jam éte é ne kui amu éko éziñe wo simesane na ô vo’o bo avale môt a ne nye’e. Kale jangan éziñ é nga yaé minjuk été ja jô na: “Me ma yeme na ma nye’e Yéhôva. Me nji bi bisô a lat a jam éte. Ve me nji tu’a buni na Yéhôva fe a nye’e ma.” Ve jé é ne volô wo na ô kôme yem avale Yéhôva a yene wo?

³ Yéhôva a yi na ô kôme tabe ndi na a nye’e wo. (Lañe’e Jérémie 31:3.) Nya ajôô a ne na Yéhôva a nga dutu wo be nye. A éyoñ ô nga ve womiene ngumba be nye a duban, ô nga bi beta édima das, nye’ane wé ô ne mban. Nalé a tinane na a nye’e wo nya abuii a na a ye ke wo lik étame môs éziñ. Nye’an ôte wo bo na a yene bebo bisaé bé, to’o wo ane ‘jôme jé ébien.’ (Mal. 3:17.) Yéhôva a yi na ô tabe ndi a nye’ane wé aval ane nlômane Paul ô mbe ô too ndi a nye’an ôte. Jôm éte nje a nga tili na: “Amu ma kôme fo’o yeme na sa ke awu nge ényiñ, sa ke beéngele, sa ke bijôé bi ne menen, sa ke mame ya éyoñe ji, sa ke mame ma ye boban, sa ke bôte be bili éjôé sa ke ôyabe yôbô, sa ke édo’o si, sa ke ététéa éfe Zambe a nga té ja ye bo ngule ya kandé bia a nye’ane Zambe, nalé a tinane na be Krist Yésus, Tate wongan.” (Rom. 8:38, 39) Ayé’é di, bia zu yen aval avé bi ne kôme tabe ndi na Yéhôva a nye’e bia a jame bi ne bo mfak ôte.

AMU JÉ É NE MFI YA TABE NDI NA YÉHÔVA A NYE’E BIA?

4. Nkômbane Satan ô ne ôvé, a aval avé bi ne sa’ale melame mé?

⁴ Éyoñe bia kañese na Yéhôva a nye’e bia nalé a ne volô bia na bi sa’ale “melame me” Satan. (Éphé. 6:11) Satan a ye belane mezene mese asu na a kamane bia na bi kañe Yéhôva. Ôlame wua Satan a belane wô ô ne na, a laane minsose na Yéhôva a nye’e ki bia. Te bia ve’ele vuane na Satan a jeñe ve fane ya du’u bia. A wô’ô dañe bi fane ya bo de éyoñ a yen ane bia bili atek amu bia tyelé nleme yôp a lat a mame bi nga bo melu mvus, nge minju’u bia tôbane mie melu ma, nge ke amu bia tyelé nleme yôp asu ényiñe jangane ya melu ma zu. (Mink. 24:10) Satan a ne ane ngbwengbweme ja jeñe na é bi tit é se ngule ya kaman ébien. Ajô te éyoñe bi ne atek, Satan a jeñ a ngul ése na bi bo teke ke ôsu a kañe Yéhôva. Ve nge bi kele ôsu a tu’a tabe ndi na Yéhôva a nye’e bia, nalé a ye volô bia na bi bo ngule ya ‘tebe nye ngame yat’ a bo teke ku melame mé.—1 P. 5:8, 9; Jacq. 4:7.

5. Mfi ôvé bia bi éyoñe bia yeme na Yéhôva a nye’e bia a na a wô’ô bia mintaé?

⁵ Éyoñe bia kañese na Yéhôva a nye’e bia, nalé a ne volô bia na bi tu’a subu nye bebé. Bi tame yen amu jé bia jô nalé. Yéhôva a nga té bia a nkômbane ya nye’e bôte bevok a wô’ôtane fe nye’ane wop. Ajô te, éyoñe môt a liti na a nye’e bia, été été bia fe bia liti nye nye’an. Nde ñhe, éyoñe bia yeme na Yéhôva a nye’e bia a wô’ô bia mintaé, jam éte da ye bo na bia fe bi nye’e nye. (1 Jean 4:19) A avale nye’ane bia nye’e Yéhôva wo ye ke ôsu a yaé, nne nye fe a ye ke ôsu a nye’e bia nalé. Jôm éte nje Kalate Zambe a kôme bia jô na: “Suba’ané Zambe bebé, a a ye subu mia bebé.” (Jacq. 4:8) Nde, aval avé bi ne kôme tabe ndi na Yéhôva a nye’e bia?

JÉ É NE VOLÔ BIA NA BI KÔME TABE NDI NA YÉHÔVA A NYE’E BIA?

6. Jé ô ne bo nge ô nji tu’a tabe ndi na Yéhôva a nye’e wo?

⁶ Bo’o mbane ya ye’elane Yéhôva na a volô wo na ô kôme wô’ô amu jé a nye’e wo. (Luc 18:1; Rom. 12:12) Nge nalé a sili, ye’elane Yéhôva éyoñ ése na a volô wo na ô yene womien aval émien a yene wo. É ne été na, nge nleme wongane wo ve bia mekua, bi ne yen ayaé ya kañese na Yéhôva a nye’e bia. Ve bia yiane ba’ale na Yéhôva a dañe nleme wongan. (1 Jean 3:19, 20) A yeme bia a dañ abime bia yeme biabebien; a ne ngule ya yene mbamba mefulu bi bili to’o biabebiene bia kate me yen. (1 Sam. 16:7; 2 Mink. 6:30) Ajô te bi nji yiane ko woñe ya “kulane” mame me ne bia minlem a avale bia wô’ôtan, a ye’elane nye na a volô bia na bi kañese na a nye’e bia. (Bsa. 62:8) Éyoñe bi maneya ye’elan, é ne fe mfi na bi bo mame ma zu tôñe le.

7-8. Jé ntili Besam a nga jô ja volô bia na bi tabe ndi na Yéhôva a nye’e bia?

⁷ Tabe’e ndi a mame Yéhôva a jô. Yéhôva a nga ve bôte mbamba nsisime na be tili Kalate Zambe, ajô te bi ne tabe ndi na mame be nga jô a lat a Yéhôva me ne benya mejôô. Bi tame yene jôme ntili Besam David a nga jô a lat a Yéhôva. A nga jô na: “Yéhôva a ne ba be ne minlem ntya’an, bebé; a nyii avale bôt é ne minlem nje’ebane si.” (Bsa. 34:18.) Éyoñe minleme mi ne bia ntya’an, bi wô’ô wô’ôtane ve ane bi ne étam. Ve avale biyoñ éte nje ñhe Yéhôva a kôme yeme na bia yi mvolane wé. E Same mfe, David a nga tili na: “Futi’i mili’i mam nde’e jôé été.” (Bsa. 56:8) Yéhôva a yen éyoñe nlem ô ne bia ntya’an a minjuk. A kôme nyoñe ngap a bia, a wô’ôtane mintaé mise mi ne bia minlem. A futi mili’i mangane nde’e été ane jôm é ne édima, a nyane me aval ane nde’e mendime môt a wulu nkôte si a bili. Besam 139:3, a jô na: “[Yéhôva] a yeme mezene mame mese.” Yéhôva a yene mame mese bia bo, ve a tyi’i na a bem ôsimesane wé mbamba be mame bia bo. (Héb. 6:10) Amu jé? Amu a nyane mone ngul ase bia ve asu na bi ve nye nlem avak.a

⁸ Yéhôva a belane bifuse ya Kalate Zambe bia ve bia ngule nyul asu na a kate bia na: “Ma yi na ô yem abim avé ma nye’e wo a nyoñe ngap a wo.” Ve avale bia te yene mvus, Satan a ke a kañete a nlam ôse na Yéhôva a nye’e ki bia. Ve nge ô ngenan ô bili bisô na Yéhôva a nye’e wo, tebe’e mone jôm a sili womiene na: ‘Za ma yiane buni, ye “ésa ya minsos” nge ke “Zambe ya benya mejôô”?’—Jean 8:44; Bsa. 31:5.

9. Ngaka’a fé Yéhôva a nga bo asu ba ba nye’e nye? (Nkôlan 20:5, 6)

⁹ Simesa’an avale Yéhôva a yene ba ba nye’e nye. Bi tame yene jame Yéhôva a nga jô Moïse a ayoñ Israël. (Lañe’e Nkôlan 20:5, 6.) Yéhôva a nga ka’ale na a ye ke ôsu a liti nye’ane wé ô ne mban asu ba ba nye’e nye. Mbôle Yéhôva a ne Zambe a yeme ba’ale élat, bi ne ñhe tabe ndi na a ye ke ôsu a nye’e ba ba nye’e nye. (Néh. 1:5) Nge bia yi na nlem ô bômbô bia si na Yéhôva a nye’e bia, bia yiane sili biabebiene na: ‘Ye bia nye’e Yéhôva?’ A ba’ale ôsimesane na: nge bia nye’e Yéhôva a bo mame mese asu na bi ve nye nlem avak, bi ne tabe ndi na nye fe a ye ke ôsu a nye’e bia. (Dn. 9:4; 1 Cor. 8:3) Nalé a tinane na, nge bi too ndi na bia nye’e Yéhôva, bi nji yiane beta bi bisô biziñe na nye fe a nye’e bia. Mbôl a ne nye’an, a yeme’e fe ba’ale élat, jam éte da bo na bi bo teke bi bisô biziñ.

10-11. Aval avé Yéhôva a yi na bi yene ntañ? (Begalate 2:20)

¹⁰ Bindi’i ntañ. Metuna’a me Yésus Krist me ne beta dase Yéhôva a nga ve bone be bôt. (Jean 3:16) Ve ye bi ne jô na das éte é ne fe asu dôé? Mvo’é mvo’é! Bi tame kobô ajô nlômane Paul. Tame simesane mbia be mam a nga bo ôsusua na a bo kristen, a ndum a mbe a yiane ke ôsu a juan amu bise’e bié. (Rom. 7:24, 25; 1 Tim. 1:12-14) Ve, a nga yene ntañ ane dase Yéhôva a nga bo nye. (Lañe’e Begalate 2:20.) Te vuane na a ngule ya mfufube nsisim, Yéhôva a nga bo na Paul a tili mejô mete. A na mame mese me ne Kalate Zambe, me nga tiliban asu na bi bi ñye’elan. (Rom. 15:4) Mejô me Paul ma liti aval avé Yéhôva a yi na bi yene ntañ, ane das a nga ve môt ase ya be bia. Éyoñe bia yene ntañ aval éte, nalé a bo na bi tu’a tabe ndi na Yéhôva a nye’e môt ase ya be bia.

¹¹ Bia ve Yéhôva akiba amu a nga lôme Yésus si na a zu wu asu dangan. Ve jam afe é nga bo na Yésus a zu si va é mbe na a kate bôte benya mejôô a lat a Yéhôva. (Jean 18:37) Benya mejôô bete ba fombô fe avale Yéhôva a yene bone bé.

YÉSUS A NGA YE’ELE BIA NA BI YEM ABIM AVÉ YÉHÔVA A NYE’E BIA

12. Amu jé bi ne buni mame Yésus a nga jô a lat a Yéhôva?

¹² Éyoñe Yésus a mbe si va, a mbe a nye’e a kate bôt avale mefulu Yéhôva a bili. (Luc 10:22) Bi ne buni mame Yésus a nga jô a lat a Yéhôva. Amu jé? Amu Yésus a nga nyiñ ayap a Yéhôva ôsusua na a zu si va. (Col. 1:15) Mbôl a nyiñeya ayap a Ésa wé, Yésus a kôme yem abim avé Yéhôva a nye’e bebo bisaé bé. Aval avé Yésus a nga volô bôte na be kañese na Zambe a nye’e be?

13. Aval avé Yésus a yi na bi yene Yéhôva?

¹³ Yésus a yi na bi yene Yéhôva avale nye fe a yene nye. Bekalate ba kañete ényiñe Yésus, été, Yésus a loone Yéhôva na “Ésa” tañe biyoñe 160. A éyoñ a mbe a kobô’ô a beyé’é bé, a mbe a bela’ane bifia ane “Ésa wônan” nge ke na “Ésa wônane ya yôp.” (Matt. 5:16; 6:26) Ôsusua na Yésus a zu si va, bebo bisaé be Yéhôva be mbe be wulu’u ba’aba’a a nye, be mbe be loone nye na: ‘Zambe ya ngul ése,’ Nyu a ne mbetane yôp,’ a Nté ya biôme bise,’ a biyôlé mese’esa bife. Ve Yésus nye a mbe a loone Yéhôva na Ésa wongan. Nalé a nga liti na, Yéhôva a yi na bebo bisaé bé be subu nye bebé a bi ngul élat a nye fo’o ve aval ane ésa a ne nye’an a bo a bone bé. Da kôme yené ne fômelé na, Yésus a mbe a yi na bi yene Yéhôva avale nye fe a yene nye, ane Ésa a kôme nye’e bone bé. Bi tame yene bive’ane bibaé bia liti amu jé Yésus a nga belan éfia “Ésa” asu na a kobô ajô Yéhôva.

14. Aval avé Yésus a nga liti na môt ase ya be bia a ne édima mise me Ésa wongane ya yôp? (Matthieu 10:29-31) (Fombô’ô fe fôtô.)

¹⁴ Jam ôsu, bi tame yene mejô Yésus a nga jô kalate Matthieu 10:29-31. (Lañek.) Bemvokuma be ne bone be anone be vo’o nye’e nge ke kañe Yéhôva. Ve, Ésa wongan a nyan a ônon ôse ya été aval é ne na éyoñe wua ya été wo ku si, a yeme de. Nge Yéhôva a kôme nyoñe ngap a mon ônone nyu, bi ne tabe ndi na a ne ngule ya nyoñe ngap a bia amu bia nye’e nye a kañe nye! Yésus a nga jô na “ja’a bisile bi ne mia minlô bi ne nlañan.” Mbôle Yéhôva a kôme yeme bone be mame bese be ne bia nyul, bi ne tabe ndi na a nyoñe ngap a môt ase ya be bia avale bi vo’o simesan. Yésus a yi na bi kôme yeme na môt ase ya be bia a ne édima mise me Ésa wongane ya yôp.

15. Mejô me Yésus bia koone me kalate Jean 6:44 ma ye’ele bia jé a lat a Ésa wongane ya yôp?

¹⁵ Bi tame beta yen éve’ane baa vôme Yésus a belan éfia “Ésa.” (Lañe’e Jean 6:44.) Ésa wongane ya yôp a nga dutu môt ase ya be bia be nye. Amu jé a nga dutu bia be nye? A ne amu a nga yene mbamba été nsisime wongan. (Mame mi. 13:48) Éyoñe Yésus a nga jô mejô bia koone me kalate Jean 6:44 a mbe a yiane simesane mejô me Yéhôva bia koone me kalate Jérémie 31:3 mme mete ma wulu ayé’é di, Yéhôva a nga jô ayoñe dé na: “Me nga dutu wo a mvam.” (Jér 31:3; ve’ek a Osée 11:4.) Tame ve’ele fas atinane ya bifia bite. Ésa wongane ya yôp a nye’e bia a ye ke ôsu a yene mbamba be mame be bia, mbamba be mame biabebiene bia vo’o kui na bi yen.

16. (a) Jé Yésus a nga ye’ele bia, a amu jé bia yiane buni mam a nga jô? (b) Jé é ne volô bia na bi tabe ndi na Yéhôva a ne aval Ésa da yiane bia? (Fombô’ô fe nka’ale “Ésa a yiane bia bese.”)

¹⁶ Éyoñe Yésus a nga liti na Yéhôva a ne Ésa wongan, a ne ve ane a mbe a kômbô’ô bia jô na: “Yéhôva a nji bo ve Ésa wom étam; a ne fe Ésa wônan. Taba’ané ndi na a nye’e mia a na a kôme nye’e môt ase ya be mia.” Nge biyoñe biziñe bia wô’ôtane ve ane Yéhôva a nye’e ki bia, bia yiane tebe mone jôm a sili biabebiene na: ‘Ye me nji yiane buni mejô me Yésus, nnye ate a kôme yem Ésa wongan a kobô’ô fe benya mejôô éyoñ ése?’—1 P. 2:22.

BO’O MAME MESE Ô NE NGULE YA BO ASU NA Ô KE ÔSU A TABE NDI NA YÉHÔVA A NYE’E WO

17. Amu jé bia yiane ke ôsu a tabe ndi na Yéhôva a nye’e bia?

¹⁷ Bia yiane ke ôsu a yemete ndi jangane na Yéhôva a nye’e bia. Avale bia te yene yôp, nsiñe wongane Satan, a ye ke ôsu a jeñ a ngul ése na a tu’ulan ésaé bia bo Yéhôva. Asu na a tôé nsôñane wé, Satan a ye ke ôsu a belane mezene mese mfa’a ya bo na bi buni na Yéhôva a nye’e ki bia. Bi nji yiane jô’é na Satan a dañ!—Job 27:5.

18. Aval avé ô ne yemete ndi jôé na Yéhôva a nye’e wo?

¹⁸ Asu na ô tu’a tabe ndi na Yéhôva a nye’e wo, wo yiane ke ôsu a ye’elane nye na a volô wo na ô yene womien avale nye fe a yene wo. Bindi’i bifuse ya Kalate Zambe bia liti aval avé Yéhôva a nyoñe ngap a ba a nye’e. Te ve’ele vuane na Yéhôva a ye ke ôsu a nye’e môt a liti na a nye’e nye. Kôme’e bindi beamu ba liti amu jé ntañ ô ne das asu môt ase ya be bia. A tabe’e ndi na Yéhôva a ne Ésa wongane ya yôp avale Yésus a nga jô. Nde ñhe, nge môt éziñ a sili wo na: “Ye ô too fo’o ndi na Yéhôva a nye’e wo?” Wo ye yalan a nleme wôé ôse na: “Ôwé, a nye’e ma! A ma ve ngule jame môs ôse asu na me liti nye na ma fe ma nye’e nye!”