Nye’ane Zambe ô ne nnôm éto

1-2. Abui bekristene da tôbane njuk ôvé?

TAME ve’ele simesane na sitima a ne ézezañe mañ, beta ôkôse ki a vuñu’uk. Mintyôa mi mañe mia bo na sitima a lebelane mañ été. Ajô te nge teke atyi étyé, wônaa mintyôa mi mañe mia ye tindi sitima vôm ase mia ke. Atyi étyé éte da ye bo na sitima a tebe ne bip a kamane nye na a lebelane mañ été nté beta ôkôs ate a vuñ.

² Éyoñe wo tôbane ngule meve’ele, été jôé é ne funane ji sitima nyi. Avale wo wô’ôtan é ne tyendé ane nkabeke dis. Môse wu ô ne liti na ô too ndi a nye’ane Yéhôva a na a ne ngule ya su’u wo, ve môse wo tôé valé ô nga sili womiene nge Yéhôva a yene fo’o été jôé. (Bsa. 10:1; 13:1) Éko éziñ, mvôé jôé é ne zu ve wo ngule nyul a mbamba bifia, nalé a nga bo na ô bone bi mvolane nlem. (Mink. 17:17; 25:11) Ve mvuse ya valé biyebe bi beta taté. Jam éte é ne fe bo na ô sili womiene nge Yéhôva a lumeya wo mvus. Aval ane sitima, aval avé bi ne belane atyi étyé éyoñe bia tôbane ngule meve’ele? Nge ke na aval avé bi ne tebe ne bip a ke ôsu a tabe ndi na Yéhôva a nye’e bia a na a ye volô bia?

3. Jé kalate Besam 31:7 a 136:1, a ye’ele bia a lat a “mvame” Yéhôva, a amu jé bi ne jô na nnye a dañe liti mbamba éve’ela mfa’a ôte? (Fombô’ô fe fôtô.)

³ Zene jia é ne volô bia aval ane atyi étyé nté bia tôbane ngule meve’ele, é ne na bi beta simesane mvame Yéhôva. (Lañe’e Besam 31:7; 136:1.) Éfia be nga kôñelane na “mvame” ja liti édo’o nye’an a fulu ya yeme ba’ale élate môt a liti nyu mbok. Yéhôva a ne beta éve’ela a dañe mfa’a ya liti bôte bevo’o fulu éte. Ajô te Kalate Zambe a jô na, Yéhôva a bili “abui mvam.” (Nkôl. 34:6,7) Kalate Zambe a jô fe na Yéhôva: ‘A ne mvam abui be ba bese ba loone nye.’ (Bsa. 86:5) Tame simesan avale nalé a tinan: Yéhôva a ye ke ve’ele li’i bebo bisaé bé étame môs éziñ! Éyoñe bia simesane na Yéhôva a yeme ba’ale élat, jam éte é ne volô bia ane atyi étyé éyoñe bia tôbane ngule meve’ele.—Bsa. 23:4.

BA’ALE’E NA NYE’ANE YÉHÔVA Ô NE ATATA’A ÑYE’ELANE YA KALATE ZAMBE

4. Va’a bive’ane bi atata’a miñye’elane ya Kalate Zambe, a liti amu jé bia buni miñye’elane mite.

⁴ Jam afe é ne volô bia na bi tebe ne bip éyoñe bia tôbane meve’ele, é ne éyoñe bia simesane na nye’ane Yéhôva ô ne ñye’elane wua ya atata’a ya Kalate Zambe. Bifia “ atata’a ñye’elane ya Kalate Zambe” bia tinane jé mfa’a wôé? Éko éziñ ô ne simesane benya mejôô ô nga yé’é Kalate Zambe. Bi tame nyoñe bone bive’an, éyoñe ô nga yé’é Kalate Zambe ô nga yeme na éyôlé Zambe é ne Yéhôva, na Yésus a ne Atyi’i mone Zambe, na bewu be nji yeme jôm éziñ, a na paradis a ye bo si va vôme bôte ba ye nyiñe nnôm éto. (Bsa. 83:18; Eccl. 9:5; Jean 3:16; Nlitan 21:3,4) Ve nné ane ô nga yeme na miñye’elane mite mi ne benya mejôô, é nji beta be tyi’ibi na be vaa wo mie ôsimesan. Amu jé? Amu ô nga yemelane na miñye’elane mite mi nji bo minlañe mi kulu ba ze. Bi tame zu yene aval avé éyoñe bia nyoñe nye’ane Yéhôva aval ane atata’a ñye’elane ya Kalate Zambe nalé a ne volô bia na bi juan a ôsimesane ya na Yéhôva a yene ki été bi tele nge nyoñe ngap a bia.

5. Timi’in avale bia té bivuse miñye’elane si.

⁵ Éyoñ ô nga yé’é Kalate Zambe éyoñ ôsu, jé é nga volô wo na ô té bivuse miñye’elan? Éko éziñe na, ô nga ve’e miñye’elane be nga ve wo ñyebe wôé a mi Kalate Zambe a ye’ele. Bi tame nyoñ éve’an: bi tame jô na ô mbe ô buni’i na Yésus nnye a ne Zambe ya ngul ése. Nté ô mbe ô yé’é Kalate Zambe, ô nga yiane sili womiene na: ‘Ye ñye’elane wu ô ne fo’o été?’ Éyoñ ô nga mane lañe bifuse ya Kalate Zambe bia kôme timine jam éte, teke bisô na ô nga yeme na Yésus a nji bo Zambe ya ngul ése aval be nga ye’ele wo. Nde ô nga fole évuse ñye’elane be nga ve wo a nya ñye’elane Kalate Zambe a ve a lat a jam éte na: Yésus a ne “atata’a ya ntéane biôm ôse,” “Atyi’i Mona Zambe.” (Col. 1:15; Jean 3:18) É ne été na bivuse miñye’elane bi ne bo ayaé ya “té” si aval ane mbia be asimesan. (2 Cor. 10:4,5) Ve éyoñ ô yemeya benya mejôô, da ye ke bo tyi’ibi na ô beta taté na wo buni bivuse miñye’elane bite.—Philip. 3:13.

6. Amu jé bi ne tabe ndi na ‘mvame Yéhôva ja ye tabe nnôm éto’?

⁶ Bi ne bo avale da a ñye’elane Kalate Zambe a ve a lat a nye’ane Yéhôva. Éyoñe wo tôbane meve’ele, nge wo taté na wo bi biyebe a lat a nye’ane Yéhôva, sili’i womiene na: ‘Ye ôsimesane wom ô ne fo’o mvo’é?’ Fombô’ô nge biyebe biôé bia lu’an a mejô bia koone me Besam 136:1, mme mete ma wulu ayé’é di. Amu jé Yéhôva a jô na mvame jé é ne “nnôm éto”? Amu jé bia koone bifia “mvame jé é too nnôm éto” tañe biyoñe 26 sam ate? Avale bia te yen, nye’ane Yéhôva ô ne mban a liti bebo bisaé bé, ô ne atata’a ñye’elane ya Kalate Zambe, aval ane miñye’elane mise mivok ô nga yé’é a kañese. E simesane na bi ne zézé jôme mise me Yéhôva, nge ke na a nye’e ki bia, a ne minsos. Tita’an ôsimesan ôte avale wo ve ngule ya titane bifuse miñye’elane mise mivok.

7. Va’a bive’ane bifuse biziñe ya Kalate Zambe bia bôé bia minleme si na Yéhôva a nye’e bia.

⁷ Kalate Zambe a bili abui bifuse bia yemete na Yéhôva a nye’e bia. Éve’an é ne na, Yésus a nga jô beyé’é bé na: “Mi ne dia a dañ abui bemvokuma.” (Matt. 10:31) Yéhôva émien a nga jô ayoñe dé na: “Ma ye ve wo ngul, ya, ma ye volô wo, ma ye su’u wo a mbo nnôme ya zôsô wom.” (Ésa. 41:10) Bifia bite bia kôme wô’é. Yésus a nji jô na ‘mi ne bo dia,’ a Yéhôva a nji jô na ‘ma ye yene nge me ne volô wo.’ Be nga jô na: “Mi ne dia” a “Ma ye volô wo.” Nge ô bili biyebe a lat a nye’ane Yéhôva éyoñe wo tôbane njuk éziñ, bifuse bi bia ye ke su’u ve na bia bôé wo nleme si, bia ye fe volô wo na ô tu’a tabe ndi na Yéhôva a nye’e wo. A nji bo mame bia ke bia ve’e befe’e. Éyoñe bia bindi a zene ya meye’elan, bia ye kui na bi bo tyiñe jia a mejô bia koone me 1 Jean 4:16 ma jô na: “Éyoñe ji, bi nga yem a buni na Zambe a nye’e bia.”a

8. Jé ô ne bo nge ô nji tu’a tabe ndi na Yéhôva a nye’e wo?

⁸ Jé ô ne bo nge biyoñe biziñe da kui na ô kate tabe ndi na Yéhôva a nye’e wo? Tuka’a fombô nge mame wo wô’ôtan ma lu’an a mame wo yem. Abui biyoñ, é wô’ô kui na avale bia wô’ôtan é selan a avale mame me ne, ve ñye’elane Kalate Zambe a ve na Yéhôva a nye’e bia, ô ne jame bi nji yiane sôô. Nge bi nji buni na Yéhôva a nye’e bia, bia liti fo’o na bi nji yeme beta fulu wé a dañe mfi nnye ate a ne nye’an.—1 Jean 4:8.

KÔME FASE NYE’ANE YÉHÔVA ‘A NYE’E WO’

9-10. Jé Yésus a mbe a kômbô’ô jô éyoñ a nga jô na “Ésa wom émien a nye’e mia,”?—Jean 16:26,27 (Fombô’ô fe fôtô.)

⁹ Bi ne kôme yé’é abui mam a lat a nye’ane Yéhôva éyoñe bia kôme fase mejô me Yésus, éyoñ a nga jô beyé’é bé na: “Ésa wom émien a nye’e mia.” (Lañe’e Jean 16:26,27.) Yésus a nji belane mejô mete fo’o ve asu na a bôé beyé’é bé minleme si. Amu, éyoñe bia lañe bifuse ya mvus, bia yene na mejô mete me nji be me fombô’ô ve avale beyé’é bé be mbe be wô’ôtane biyoñe bite. Ve a mbe a kobô’ô ajô meye’elan.

¹⁰ Yésus a mbe a ndeme mane kate beyé’é bé na ba yiane ye’elan e jôé dé ve sa ke na nnye be ye’elane nye. (Jean 16:23,24) É mbe angôndô ya mfi na be yeme jam éte. Amu mvuse ñwômane wé, beyé’é be mbe ve ku ôlame ya simesane na Yésus nnye ba yiane ye’elane nye. Nde fe Yésus a mbe a ntoo mvôé jap. Be mbe ve fase na mbôle Yésus a nye’e be, nge be ye’elane nye da ye bo tyi’ibi na a kee meye’elane mete be Ésa wé. Jôm éte nje Yésus a nji be a yi na be bi aval ôsimesan éte. Amu jé? Amu a nga jô be na: “Ésa wom émien a nye’e mia.” Jam éte é ne atata’a ñye’elane ya Kalate Zambe ô tii a meye’elan. Tame ve’ele fas avale jam éte da tinan asu dôé: A zene ya ayé’é ya Kalate Zambe, ô nga kui na ô yeme Yésus a nye’e nye. (Jean 14:21) Ve, aval ane beyé’é ya ntete mimbu ôsu, wo fe ô ne ye’elane Zambe a ndi ése amu wo yeme na ‘nye fe a nye’e wo.’ Wo liti na wo buni mejô mete éyoñ ése wo ye’elane Yéhôva.—1 Jean 5:14.

YEMELA’ANE MAME MA BO NA Ô BI BIYEBE NLEM

11. Amu jé Satan a ne mevak éyoñe bi bili biyebe a lat a nye’ane Yéhôva?

¹¹ Jé é ne bo na bi bi biyebe a lat a nye’ane Yéhôva? Éko éziñe bi ne jô na Satan nnye a bo na bi simesane nalé, a bi ne bele mfak éziñ. Diable a “jeñe na a nyabe” bia, a ne mevak éyoñ a yene na bi bili biyebe a lat a nye’ane Yéhôva. (1 P. 5:8) Te bia vuane na nye’ane ñwô ô nga tindi Yéhôva na a ve ntañ. Satan ki a yi na bi wô’ôtane ve ane bi nji yiane ntañ ôte amu bi ne bebo mam abé. (Héb. 2:9) Ve za a ye wô’ô mvaé éyoñe bi bili biyebe a lat a nye’ane Yéhôva? Fo’o ve Satan. A za a ye wu a meva’a nge bia bili atek a lume Yéhôva mvus? A ne Satan. Satan a yi na bi simesane na Yéhôva a nye’e ki bia, ve nya ajôô ya ba’ale a ne na Yéhôva a nye’e bia. Satan émiene nnye a nga bene nye’ane Yéhôva. “Ôlame” wua a dañe belane wô, ô ne na bi simesane na bi ne avale bôte Yéhôva a vo’o nye’e, a na a maneya tyi’i na bia yiane ve awu. (Éphé. 6:11) Éyoñe bia kôme yeme jame nsiñe wongan a jeñe na a bo, nalé a yiane bo na bi yemete ntyi’ane wongane ya “tube Diable.”—Jacq. 4:7.

12-13. Aval avé metyi ya abé bi be’e me ne bo na bi bi biyebe a lat a nye’ane Yéhôva?

¹² Jam afe é ne fe bo na bi kate kañese na Yéhôva a nye’e bia. jam éte é ne avé? É ne metyi ya abé bi be’e. (Bsa. 51:5; Rom. 5:12) Nsem ô nga ndaman élat é mbe zañe bone be bôt a Zambe. Jam éte é nga nambe fe asimesane dap, minleme miap, a menyule map.

¹³ Nseme wo bo na bi yene mame ve abé abé, wo bo na bi ve biabebiene mekua, bi tyelé minleme yôp, a wôk ôson. Bi ne wô’ôtane mame mete éyoñe bia te bo nsem. Ve jam éte é ne fe bia kui mbôle bia yem éyoñ ése na bi be’e metyi ya abé, été ki é nji lu’an a avale bi nga tééban atata’a. (Rom. 8:20,21) Aval ane metua a bili nka ô too ntuan a vo’o kôme wulu mvo’é, aval éte fe mbôle bi be’e metyi ya abé, bi vo’o kui na bi bo mame mese ve abeñ abeñ. A nji fo’o bo jame ya kame nge da kui bia biyoñe biziñe na bi bi biyebe a lat a nye’ane Yéhôva. Éyoñe nalé a kui, bia yiane ba’ale na Yéhôva a ne “Zambe a ne anen a angôndô, nyô a wô’ô ba’ale élate jé a mvamane ba ba nye’e nye a ba’ale metiñe mé.”—Néh. 1:5.

14. Éyoñe bia simesane ntañ, aval avé jam éte é ne volô bia na bi tu’a tabe ndi na Yéhôva a nye’e bia? (Beromain 5:8) (Fombô’ô fe nka’ale ô ne nlô ajô na “Ba’alané miabebien ‘ngule medu’ane ya nsem.’”)

¹⁴ É ne fo’o été na biyoñe biziñe bi wô’ô wô’ôtane ve ane bi nji yiane nye’ane Yéhôva. A zôsô nkoban, bi nji fo’o yiane nye’an ôte. Jam éte nde da bo na nye’ane Yéhôva ô bo ngum aval. Amu bia vo’o bi nye’ane Yéhôva a mengule mangan. Ve Yéhôva a nga ve ntañ asu na bi bi njamane ya mame me abé mangan, nalé a nga liti abim avé a nye’e bia. (1 Jean 4:10) Bia yiane fe ba’ale na Yésus a nga so na a zu nyii bebo minsem, sa ke bôte be ne zôsô. (Lañe’e Beromain 5:8.) Teke môt éziñe ya be bia a ne bo mame me ne zôsô ne tiññ. Éyoñe bia yeme na été jangane nje ja bo na bi bi biyebe a lat a nye’ane Yéhôva, nalé a yiane bia tindi na bi ke ôsu a juan a biyebe bite.—Rom. 7:24,25.

KELE’E ÔSU A WULU BA’ABA’A A YÉHÔVA

15-16. Jé bi ne tabe je ndi nge bia ke ôsu a wulu ba’aba’a a Yéhôva, a amu jé? (2 Samuel 22:26)

¹⁵ Yéhôva a yi na bi nyoñe mbamba ntyi’an asu na bi “kabetane be nye.” (Deut. 30:19,20) Nge bi bo de, bi ne tabe ndi na nye fe a ye ke ôsu a kabetan a bia. (Lañe’e 2 Samuel 22:26.) Nté ôse bia ye ke ôsu a wulu ba’aba’a a Yéhôva, bi ne tabe ndi na a ye volô bia na bi bo mbane ya jibi njuk ôse ô ne kui bia ényiñ.

¹⁶ Avale bia te mane yene mvus, aval ane atyi étyé da volô sitima, bia fe bi bili beamu be ne volô bia na bi tebe ne bip éyoñe bia tôbane ngule meve’ele. Bia yeme na Yéhôva a nye’e bia a na a ye su’u bia. A ne jame Kalate Zambe a ye’ele. Nge bia ve’ele bi biyebe biziñ a lat a nye’ane Yéhôva, bia yiane nyoñ éyoñe ya fase jame bia kôme yeme na é ne été a lôte na bi fase jame bi bia wô’ôtane nge simesane na é ne été. Bia yiane ke ôsu a tabe ndi na nye’ane Yéhôva ô ne mban ô ne nnôm éto avale Kalate Zambe a ye’ele.