Sekant Samwel
4 Wen Saal son Ish-boashet mi hyaa dat Abner ded da Hebron, ih geh frayd bad an aala di Izrelait dehn staat tu wori. 2 Saal son mi ga too man weh ih put in chaaj a aala di soalja dehn weh yoostu rayd dehn enimi. Wan a dehn mi naym Bayana ahn di neks wan mi naym Reekab. Fi dehn pa da-mi wahn man fahn Benjamin chraib weh naym Rimon, an ih kohn fahn Biyerot. (Biyerot yoostu bee paat a Benjamin chraib teritori. 3 Di peepl fahn Biyerot mi ron weh ahn gaahn da Gitayim, ahn dehn di liv deh laik farina op tu tudeh.)
4 Now Saal son Janatan mi ga wahn son hoofa fut mi kripl. Hihn mi faiv yaaz oal wen di nyooz kohn fahn Jezriyel dat Saal ahn Janatan mi ded, an ih ners panik ahn pik ahn op ahn ron weh. Ahn wail shee mi-di ron weh, hihn jrap ahn geh kripl. Fi hihn naym da Mefiboshet.
5 Reekab ahn Bayana, hoofa pa da Rimon fahn Biyerot, gaahn da Ish-boashet hows joorin di hat paat a di day wen hihn mi-di tek wahn res. 6 Dehn gaan eena di hows laik if dehn mi gwehn geh sohn weet, ahn dehn stab ahn eena ih beli; den Reekab an ih breda Bayana eskayp fahn deh. 7 Wen dehn gaan eena ih hows, hihn mi deh eena ih room di lidong pan ih bed, ahn dehn stab ahn an kil ahn, den dehn kot aaf ih hed. Den dehn kehr ih hed ahn waak aal nait pahn di road weh goh da di Araba. 8 Ahn dehn kehr Ish-boashet hed tu Dayvid da Hebron, ahn dehn tel di king: “Si Ish-boashet hed ya. Fi hihn pa da-mi yu enimi Saal hoo mi chrai kil yu.* Tudeh Jehoava tek rivenj pahn Saal an ih disendant dehn fi yoo, mi laad di king.”
9 Bot Dayvid ansa Reekab an ih breda Bayana, hoofa pa da Rimon fahn Biyerot, an ih tel dehn: “Ah swayr eena di naym a di livin Gaad Jehoava, di wan weh sayv mi owta aal kaina chrobl, 10 dat wen sombadi kohn tel mi dat Saal ded, ahn hihn tink dat ih mi-di bring gud nyooz fi mi, Ai mi kil ahn da Ziklag. Dat da di riwaad weh Ah giv ahn fi di mesij weh ih bring mi! 11 Imajin weh Ah wuda du wen wahn wikid man kil wahn raichos man eena ih oan hows pan ih oan bed! Unu noh tink Ai shuda ponish unu bikaaz unu shed fi hihn blod? Unu haftu ded!” 12 Den Dayvid aada di yong man dehn weh mi deh wid ahn fi kil dehn. Dehn chap aaf dehn han ahn fut ahn heng dehn bai di pool da Hebron. Bot dehn kehr Ish-boashet hed ahn beri it eena Abner grayv da Hebron.